5
Ebvu, Debora yẹe Baraku gụru
1 Lẹ mbọku ono bẹ Debora yẹe Baraku nwa Abinowamu gụru ebvu-a sụ:
2 “Ndu-ishi ndu Ízurẹlu vutaru ụzo ọgu;
ndu Ízurẹlu l'ophu gude obu phẹ tsoru phẹ;
unu jaa Chipfu ajaja!
3 Unu nụma iphe-a; unubẹ ndu eze!
Unu ngabẹ nchị; unubẹ ndu-ishi!
Mu a-gụ ebvu nụ Chipfu; mu a-gụ ebvu gụ-ku iya;
mbụ lẹ mu e-gude ebvu jaa Chipfu, bụ Chileke ndu Ízurẹlu ajaja.
4 Gụbe Chipfu; teke ị lụfuru l'alị Siye;
mbụ teke ị zọru garamugaramu lụfu l'alị ndu Edọmu
bẹ mgboko nmahụru jiijiijii;
igwe rwua erwurwu; wa mini.
5 Úbvú bẹ nmakọtaru jiijiijii l'iphu gụbe Chipfu;
mbụ jeyekpọ l'úbvú Sayịnayi bẹ nmacharu jiijiijii
l'iphu gụbe Chipfu, bụ Chileke kẹ ndu Ízurẹlu.
6 Lẹ teke kẹ Shamụga nwa Anatu; waa Jiayẹlu
bẹ a gwọberu eshi eze gbororo;
ndu ije pyoaha ntubo.
7 Iphe, bụ mkpụkpu, nọ lẹ Ízurẹlu dabyikọtaru iphoro;
gbiriri jasụru Debora fụta;
bya abụru ne ndu Ízurẹlu.
8 G'ẹphe hatarụ agwa ọ̀phúú; bẹ ọgu watarụ ada l'alị Ízurẹlu gbaa mgburugburu;
ọphu ọ dụdu mẹ iphe, eegudeje egbobuta onwonye; ọzoo arwa, a hụmaru l'echilabọ ụkporo ụnu nemadzụ ise, nọ l'alị Ízurẹlu.
9 Ndu-ishi ndu Ízurẹlu dụ mu l'obu;
mbụ ndu tụru obu phẹ onyo wofuta onwophẹ onoya.
Unu jaa Chipfu ajaja!
10 Unubẹ ndu ono agba l'eli nkapfụ-ịgara ọchaa;
mbụ unubẹ ndu ono, nọ l'eli ukpo, a wukoberu l'eli nkapfụ-ịgara;
mẹ unubẹ ndu eje l'ọkpa;
11 unu geẹdukwa olu-ebvu ndu ono, agụ ebvu l'ẹka eekutajẹ mini ono.
Ọo l'ẹka ono bẹ ẹphe a-nọdu gụa ebvu k'iphe, pfụru ọto, Chipfu mekọtaru;
mbụ iphe, pfụru ọto, o mekọtaru ndibe iya lẹ Ízurẹlu.
Tọbudu iya bụ; ndibe Chipfu wụfu jeshia l'ọnu-abata mkpụkpu.
12 ‘Gbalihukpọdapho! Debora gbalihu!
Gbalihu! Gbalihu! Chiswee ebvu!
Baraku; gbalihu!
Gụbe nwa Abinowamu; duta ndu ị kpụru lẹ ndzụ.’
13 Tọbudu iya bụ; unwoke ọphu phọduru nụ wụ-pfushia ndu-ishi.
Ndibe Chipfu wụru byapfuta mu g'anyi tsoo ndu ọkpehu dụ ọgu.
14 Ndu Ifuremu, bụ ndu ọphu gbaru ọgbarabvu l'úbvú úbvú Amalẹku
wụfuta tsoru gụbe Benjiaminu; gụ lẹ ndibe ngu.
Ndu-ishi-ojọgu, shi l'alị ndu Makiya wụfutakwapho;
ndu shi l'alị Zebulọnu bụru ndu gude mgbọro onye-ishi-ojọgu.
15 Ndu-ishi ndu Isaka; ẹphe lẹ Debora tụko swịru.
Nokwaphọ gẹ ndu Isaka l'onwophẹ wụkwarupho tsoru Baraku; gbazeta lẹ nsụda ono.
Ọphu obu anọdu ndu Rúbẹnu l'ẹka lanụ.
16 ?Bụ gụnu bẹ unu dọru l'ọdu atụru eme?
?Bụ g'unu nụma okwe onye eche atụru akpọ gude ekukọbe atụru iya tọo?
Ndu Rúbẹnu bẹ agba egomunggo shii.
17 Ndu Giladu bẹ kwarụ l'azụ ẹnyimu Jiọ́danu.
?Bụ gụnu bẹ ndu Danu gụgaru kwaa l'ụgbo-mini?
Ndu Asha kwaa l'agụga ẹnyimu;
mbụ l'ọdu ụgbo-mini.
18 Ndu Zebulọnu mịa ẹnya lẹ ndzụ kweta ọnwu.
Nokwaphọ gẹ ndu Nafụtali mịkwarupho ẹnya lẹ ndzụ bụ ono;
mbụ l'ẹgu ọgu ono.
19 Ndu eze byaru; ẹphe lwụa ọgu ono.
Ndu eze ndu Kénanu bẹ lwụru ọgu lẹ mkpụkpu Tanaku;
lẹ mgboru mini mkpụkpu Megido;
ọphu ẹphe alwụtaduru mẹ mkpọla-ọchaa.
20 Kpokpode bẹ gbẹchaa l'akpaminigwe alwụ ọgu;
mbụ l'ẹphe shichaa l'ẹka ẹphe eshije; etso Sizera ọgu.
21 Ẹnyimu Kishọnu tụko phẹ kpota;
mbụ ẹnyimu shi l'ichee ono, bụ iya bụ ẹnyimu Kishọnu.
Gụbe obu mu; gude ike zọru je l'iphu!
22 No iya; igiji ọkpa ịnya nọdu ada g'egbigwe.
Mbụ ịnya, ọkpehu dụ nọdu agbagbaa kẹ kwaakwa.
23 Ojozi-imigwe, shi l'ẹka Chipfu sụru: ‘Unu tụa mkpụkpu Merọzu ọnu;
mbụ; unu tụa phẹ ẹjo ọnu;
kẹle ẹphe ta abyadụru eyetaru Chipfu ẹka l'ọgu;
mbụ yetarụ Chipfu ẹka lwụa ndu ike dụ l'ọgu.’
24 Gẹ Jiayẹlu; mbụ nyee Heba, bụ onye Kénu bụkwaru onye aa-kachaa agọru ọnu-ọma nụ l'iphe, bụ ụnwanyi;
g'ọ bụru iya bẹ aa-kachaa agọru ọnu-ọma nụ l'iphe, bụ ụnwanyi, bu l'ụlo-ẹ́kwà.
25 Ọ rarụ ọ́rà mini; ọ nụ iya mini-ẹra-eswi.
Mbụ l'ọo l'iphe, gbaru ndu eze bẹ o yeru iya mini ẹra-eswi.
26 Ọ dzụ-liru nggu ụlo-ẹ́kwà;
bya egude ẹkutara palia ọngu ndu-ozi;
kpọbe iya Sizera l'ishi-nchị;
tsupyabẹ iya ishi l'alị; kpọ-fua ụzo.
27 Ọ bụru lẹ mgboru ọkpa iya bẹ o phozeru; dabyiru.
Mbụ l'ọo lẹ mgboru ọkpa iya bẹ o phozeru dabyiru nwụhu.
Ọ bụru l'ẹka o phozeru ono bẹ ọ daru; nwụhu.
28 Lẹ windo bẹ ne Sizera gbẹ pyofu ẹnya.
Ọ nọdu l'ọnu-ụzo ụlo-eli ara ẹkwa sụ:
‘?Bụ gụnu kparụ iphe, ụgbo-ịnya anọ ọdu alwalwa?
?Bụ gụnu meru iphe, a ta nụada ụkporo ọkpa ụgbo-ịnya iya?’
29 Ụnwumgboko ibe eze ndu ọphu kachaa amaru iphe nọdu azụ eyeru iya l'iphe, oopfu;
tẹme yẹbedua nọdu azụkwa iya phọ ekwe l'onwiya.
30 Ẹphe nọdu asụje iya: ‘?Tọbudu iphe, ẹphe a-kwata l'ọkwata bẹ ẹphe achọ; bya ekekwa iya phọ ekeke?
Nwoke nọnu e-keta nwamgbọko lanụ; ọzoo ẹbo.
Sizera eketachaa uwe, ama ntụmatu;
mbụ l'oo-ketachaa uwe, ama ntụmatu, akwaru k'ẹrengete;
waa ẹkwa, dụ ẹguru, mu a-tụ-phuje l'olu;
mbụ ?ọ bụkotaru iphe, a kwatarụ l'ọkwata?’
31 Gẹ ndu ọhogu gụbe Chipfu lakọta l'iyi ẹgube ono.
Ọle gẹ ndu yeru ngu obu gbukwa kẹ nwịinwii g'ẹnyanwu, agbakota agbakota.”
Tọbudu iya bụ; alị ono nweru nchị-odoo nọ ụkporo apha labọ.