18
Ọkpu-ite; yẹe ụrwa iya
1 Wakwa opfu, Jieremaya nụmaru l'ọnu Chipfu, sụru iya:
2 “Tụgbua jepfu onye akpụ ite l'ibe iya. Noo ẹka mu e-me g'ị nụma opfu mu.”
3 No iya; mu tụgbunaa jeshia ibe ọkpu-ite. Mu jeshia; o gudewaa iphe-wilu labọ, ọokpuje ite akpụ ite.
4 Ọ kpụa ite ụrwa ono, o gude l'ẹka akpụ ono kpụ-byia ya akpụ-byi. Ọ bya egude ụrwa ono kpụa ọzo lẹ g'ọ dụ iya ree.
5 Noo teke mu nụmaru Opfu Chipfu, sụru mu:
6 Wakwa iphe, Chipfu epfu baa: “Gụbe ọnu-ụlo Ízurẹlu; ?mu te emedu unu g'ọkpu-ite-a l'eme-a? Lekwa; ọ kwa g'ụrwa dụ l'ẹka onye akpụ ite bụ g'unubẹ ọnu-ụlo Ízurẹlu dụ l'ẹka mu.
7 Mu -pfua sụ l'ọwa-a g'ee-me ọha baa; ọzoo l'ọwa-a g'ee-me alị-eze baa; l'ee-pheshi iya epheshi; ọzoo l'ee-nwukpọshi iya; ọzoo l'ee-mebyishi iya;
8 ọ -bụru l'ọha ono, mu pfuru l'ọwa-a g'ee-me iya ono dakọberu haa eme ẹjo-iphe phẹ; mu ahaa phẹ eme ẹjo-iphe ono, mu shi rịa lẹ mu e-me phẹ ono.
9 Teke o nwekwanụru teke mu pfuru sụ l'ọwa-a g'ee-me ọha baa; ọzoo l'ọwa-a g'ee-me alị-eze baa; l'a kwọ-lita iya; mee ya g'ọ ngụru angụru;
10 ọ -wata eme ẹjo-iphe l'iphu mu; k'ọphu bụ l'o too mejedu iphe, mu sụru g'e mee; mu ahakwaphọ iphe, dụ ree ono, mu shi rịa lẹ mu e-me g'o rwu iya ẹka ono.
11 Ọo ya bụ lẹ-a; nta-a bụ g'i je epfuru yeru ndu Jiuda; mẹ ndu ono, bu lẹ Jierúsalẹmu ono; sụ phẹ-a: Wakwa iphe, Chipfu epfu baa: Unu lekwa; mu kwakọbekwaru unu ọla-l'iswi; tẹme mu nọdu arịru unu ẹjo ọriri. Unu dakọbekwa lwaphuta azụ; g'onyenọnu hakwaa ẹjo-iphe, oome; unu mee ụzo unu yẹe iphe, unu eme g'ọ dụ ree.
12 Ẹphe asụkwaro: ‘E tee mekọtaekwa iya. Anyi a-nọdukwa eme iphe, anyi rịtaru l'ọriri g'anyi eme iya; g'anyi ha l'onye l'onye a-nọdu eme iphe, anyi rịtaru l'ọriri l'ẹjo ọkpoma anyi.’ ”
Ndu Ízurẹlu ajịka Chipfu
13 “Ọo ya bụ lẹ-a; wakwa iphe,
Chipfu epfu baa:
Unu kpaẹshikwa ishi
l'ọhamoha;
?bụ onye nụmajeru ẹgube
ọwa?
Nwada mu yẹe nwoke
akwajẹduru ono,
bụ Ízurẹlu bẹ meakwaru
iphe, anyị ishi ẹdzu.
14 Aka-mini-sunoo k'úbvú úbvú
Lébanọnu;
?ọ dụru teke ọo-nọnya l'ọ
haa adụ lẹ kpọkoro
kpọkoro kpọkoro ẹka
ono,
dụ lẹ mkpoze úbvú ono?
Tọo mini-oyi ono, shi l'ẹka dụ
ẹnya asọ abya ono;
?ọo-nọnya l'ọ sọ-buhu tọo?
15 Eshinu ndibe mu zọhawaru
mu;
wata akpọ ụ̀nwù-isẹnsu ọku
anụ iphe, abụdu iphe;
ẹphe mewaa phẹ;
ẹphe kpọo garịgari kpọfu
l'ụzo phẹ ono, bụ ụzo,
shi phẹ lẹ ndiche ono;
wata eshi ụzo dụ wẹrere;
mbụ ụzo, a tụduru mkpoli;
16 ẹphe mee alị phẹ;
ọ bụru ochobu;
bụru ẹka aa-nọdu anmarụ
ọtsa jasụ l'ojejoje.
Iphe, bụkpoo onyemonye,
ghataru iya nụ bẹ ọo-dụje
biribiri;
l'o phuphee ishi.
17 Mu a-tụka phẹ nanụnanu
g'iphe, phẹrephere,
shi l'ụzo ẹnyanwu-awawa
zikashịru;
ẹphe adakaa nanụnanu
l'ẹka ndu ọhogu phẹ.
Mu e-goshi phẹ azụ mu;
mu tee goshidu phẹ
iphu mu
m'ẹphe -nọdu eje iphe-ẹhuka.”
Aachịru Jieremaya ẹjo idzu
18 Tọbudu iya bụ; ẹphe sụ: “Unu bya g'anyi chịaru Jieremaya ẹjo idzu; kẹle anyi nweru-a ndu-uke, a-nọdu ezi anyi iphe; anyi nweru ndu maru iphe, bụ ndu a-nọdu atụ-ziru anyi ẹka; bya enweru ndu mpfuchiru, a-nọdu ezi anyi opfu Chileke. Unu bya g'anyi gude ire mee ya omeliwe; g'anyi ba ngakwa nchị l'iphe, oopfu mẹ nanụ.”
19 Ngabẹnuru mu nchị; jiko Chipfu; nụma olu ndu achọ mu opfu.
20 ?Ee-gude ẹjo-iphe pfụa ụgwo iphe-ọma? Kẹle-a; ẹphe tụakwaru nsụ doberu mu. Nyatakwa lẹ mu pfụru l'iphu ngu pfuaru phẹ opfu ọma gude mee g'ẹhu ghubuhu ngu eghu l'opfu ẹhu phẹ.
21 Ọo ya bụ lẹ-a; chịnuru ụnwu phẹ ye l'ọkpa-nri; l'e gude ogu-echi gbua phẹ pyaapyaa; unyomu phẹ abụru ndu ume nwa a-nọdu eme; tẹme ẹphe abụru ndu ji phẹ nwụshihuru. G'e gbushia unwoke phẹ egbushi; g'ụnwokorobya phẹ bụru ndu ee-gude ogu-echi gbushia l'iphu ọgu.
22 G'iphe, a-nọdu atụ l'ụlo phẹ bụru ụzu-ẹkwa teke ono, ịi-chịru ndu ojọgu sọbata l'ibe phẹ bya atụ phẹ l'ụpfu ono; kẹle ẹphe tụwaru nsụ doberu mu gẹ mu dalahụ; bya eworu ọ́nyà gbabẹru mu gẹ mu ye ọkpa.
23 Obenu lẹ gụbe Chipfu machaarụ ẹjo idzu, ẹphe achịru mu kẹ g'ẹphe gbua mu. Ta agụkwaru phẹ nvụ l'ẹjo-iphe ono, ẹphe eme ono. Ọphu i hufukwa iphe-ẹji, ẹphe eme l'iphu phẹ. Ọchia g'ẹphe nọdu ngu l'iphu bụru ndu e mekperu emekpe. Noo iphe, ii-me phẹ bụ ono teke ẹhu a-nọdu eghu ngu eghu.