2
Ndu Ízurẹlu atụnwa Chileke
1 Mu byakwa anụma olu Chipfu, sụru mu:
2 “Je je araa ya arara gẹ ndu Jierúsalẹmu nụma-dzuru; sụ phẹ-a:
“Mu nyatakwarụ g'o shi
evubeje ngu evuvu
eme iphe,
dụ mu ree teke ị bụkwadu
okorọbya.
I shi yee mu obu gẹ nwanyị,
a lụru k'ọ̀phúú.
I shi etsojeru mu je aghakọta
echiẹgu;
mbụ je aghaa alị ono,
adụdu iphe,
aakọje iya ono.
3 Ndu Ízurẹlu shi dụru Chipfu
nsọ.
Ọ bụru phẹ bụ akpụru mbụ,
mu vuru ụzo kpata l'iphe,
mu kọru l'opfu mu.
Iphe, bụkpoo ndu mekparu
phẹ ẹhu bẹ ọ nmarụ
ikpe.
Tẹme ẹjo mmekpa-ẹhu
dapfukwa phẹ phọ.
Noo iphe, Chipfu epfu bụ ono.”
4 Unu nụmakwa opfu Chipfu;
unubẹ ọnu-ụlo Jiékọpu;
unubẹ ipfu l'ipfu ọnu-ụlo
Ízurẹlu!
5 Wakwa iphe, Chipfu epfu
baa:
“?Bụ gụnu bẹ ndiche unu phẹ
sụkporu lẹ mu mejeru
phẹ, meru g'o gude
ẹphe haa mu jemihu?
Ẹphe je awata etso ntẹkpe,
adụdu urwu, ọ barụ
phẹ shi nno bụru ndu
adụdu iphe,
ẹphe barụ urwu iya
l'onwophẹ;
6 ọphu ẹphe ajịduru sụ:
‘?Bụ awe bẹ ọ nọ;
mbụ Chipfu,
bụ iya dufutaru anyi
l'alị Ijiputu;
bya edua anyi dughaa
echiẹgu, adụdu iphe,
dabyiru iya nụ;
mbụ dughaa alị ono,
bụ evevee dụ iya;
yẹe iduma iduma;
alị, dụ chakịri chakịri
bya agbahụkota tsụkiribaa;
alị, adụdu onye eshije iya
eshishi;
ọphu ọ dụdu onye bu iya
ebubu?’
7 Sụ-a; mu duru unu dubata
l'alị emehu iphe,
e meberu iya g'unu rije
akpụru-iphe, amị iya nụ;
yẹe ẹku, kụru iya nụ.
Obenu l'unu bataru iya bya
atụrwua alị mu;
bya emee okiphe mu ono;
ọ kpọo ìdzù.
8 Ọphu ndu-uke mu ajịduru sụ:
‘?Bụ awe bẹ ọ nọ; mbụ Chipfu?’
Ndu eme k'ekemu ta amadụ
onye mu bụ;
ndu-ishi kwefuru mu ike;
ndu mpfuchiru bụru Balụ
bẹ ẹphe epfuje iphe,
o pfuru; bụru iphe,
ẹphe etso bụ ntẹkpe,
adụdu urwu, ọ barụ.”
9 Wakwa iphe, Chipfu epfu
baa:
“Ọo ya bụ lẹ mu e-pfunupho
iphe, unu meru mu
ọzo.
Mu a-nọdu epfunupho ọzo
iphe, ụnwu nwanwa
unu meru mu.
10 Mbụ-a; unu ghabunaa
eze-ẹnyimu bahụ l'alị
ndu Sayịpurosu je
elekpọdapho ẹnya!
Unu yenu nemadzụ g'e
jerwua alị ndu Keda
je egbua ya igo
rengurengu!
Maẹshikwaru ?O nweru
ẹka ẹgube iphe ono
mejeru?
11 Mbụ-a; ?Ọ dụru ọha,
gbajẹru agwa phẹ inwe;
l'ẹbe abụ l'iphe ọbu,
ẹphe agwa ọbu bụ Chi?
Obenu lẹ ndibe mu gbanweru
mụbe onye dụ
akpabiri je anata iphe,
adụdu urwu, ọ barụ.
12 Gụbe igwe; g'iphe-a nyịkwaa
ngu ishi ẹdzu!
G'ị kpọ-yiaru iya ukuvu!
Nokwa iphe, Chipfu eepfu.
13 Ndibe mu mewaru uzi iphe-ẹji
labọ.
Ẹphe gbadowaru mu;
mbụ mụbe ọ̀gbà mini,
doru rịsaa;
asọ gborogboro;
bya ebvuaru onwophẹ
iduma-nnakọbe-mini;
tẹme ọ bụru
iduma-nnakọbe-mini,
gbawashịhuru agbawashịhu;
ọphu mini adọjeduru iya.”
14 “Ízurẹlu ?ọ bụ ohu tọo?
?Ọ bụ onye a byaru anwụ;
ọ bụwaru ohu tọo?
?Dẹnukwanu g'o gude a
kwaahaa ya ọkwata?
15 Oduma, dụ igwerigwe
sụakwaru ekiri;
bya abawaru iya
hanyịhanyi.
Ẹphe tụkowaru iphe,
dụ l'alị iya mebyishichaa.
Mkpụkpu, dụgbaa ya nụ bẹ
a tụakwaru ọku;
ọku tsufukọta iya;
ọphu ọ dụedu onye bu iya
nụ.
16 Ọzo bụ lẹ ndu mkpụkpu
Mẹmufisu;
yẹe ndu mkpụkpu
Tahụpanahesu kpụwaru
ngu ishi.
17 ?Tọbudu ngu meru iya
onwongu;
eshinu ị jịkaru Chipfu,
bụ Chileke ngu teke o
du ngu eje lẹ gbororo?
18 Nta-a; ?bụ gụnu kparụ iphe,
iije alị Ijiputu eje angụ mini,
shi l'ẹnyimu Shihọ?
Ọzokwanu; ?bụ gụnu bụ k'eje
alị Asiriya je angụ mini,
shi l'ẹnyimu Yufurétisu?
19 Ẹjo-iphe, iime bụkwa
iya e-mechaa hụ̀a ngu
ahụ̀hù.
Ọ bụru azụ ono, ịila ono
a-gbọru ngu ụja.
Rịnaa ya arịri maru g'ọ
dụ-beru ngu ẹji waa
g'ọotsu-beru ngu l'ẹhu
g'ị jịkaru Chipfu,
bụ Chileke ngu;
ọphu ịitsudu iya ebvu
ililekpọo.
Nokwa iphe, Nnajịuphu epfu
bụ ono;
mbụ Nnajịuphu,
bụ Ọkalibe-Kakọta-Ike.”
20 Ọ bụro teke dụhawaa ẹnya
bẹ ị nyakafụru ishi iphe,
shi segbabẹ mu lẹ ngu;
mbụ l'ị nyakafụru ẹgbirigba,
e shi gude tụgbabe mu lẹ ngu;
bya epfua sụ l'i tii jeẹduru
mu ozi!
G'e lekeberu ẹnya epfu;
ị wata azẹ-phe l'eli iphe,
bụ úbvú, ha l'eli;
mẹ l'iphe, bụkpoo mkpula
eze-oshi, jaru àjàjà;
gẹ nwanyị-ụkpara.
21 Mu kọwaru ngu g'onye kọru
opfu ọkpobe vayịnu,
karụ upfu bya adụebe ree.
?Dẹnukwanu g'o gude ị
ghakọbeepho bya awọeru
mu phọ ohu vayịnu?
22 Ọ tọ dụkwa m'obeta i gude
ncha-ọkanwa saa
onwongu;
bya ekwokpọo ncha
kwogharu iya ẹka;
ikpe ono, nmarụ ngu
ono rakụeru ngu phọ l'ẹhu
g'ọ rakụru l'iphu mu.
Nokwa iphe, Nnajịuphu,
bụ Chipfu epfu.
23 ?Dẹnu g'ii-shi sụ l'a ta
tụrwukwaru ngu;
ọphu ị gwọkwaru ọbvu
ono, bụ Balụ?
Lewarọ ẹnya l'ẹgube umere,
i meru lẹ nsụda ono!
Gbunaa igo l'ẹgube umere,
i meru l'ẹka ono.
Iphe, ị bụ bẹ bụkwa nyee
ịnya-kamẹlu, ebu
nggada karagidimu
karagidimu.
O -buru nggada ono shia
ọwa-a;
l'o buru iya shia ọphuu.
24 Nyee nkapfụ-ịgara-ọswa,
echiẹgu kwọwaru ẹhu,
akpọ phẹrephere furumu;
ẹka ọ dụru iphe,
agụ iya ememe.
Mbụ l'ọ -nọdu ana okee;
ta adụdu onye alophuje
iya azụ.
Okee ya -nọdu achị iya;
ike taa bvụdu okee
ya ọbu.
Ọ -bya eshi nyee ya ono
okee;
bẹ ọ hụmaanaru-a ẹka
ọ nọ.
25 Sụ-a; ta agbashị ọso gbiriri
jasụ g'ọkpa swachafụ
ngu;
ẹkpiri akpọ ngu jegirijegiri.
Obenu l'i pfururọ sụ:
?Kẹ gụnuhunu?
Agwa ndu ọhozo bẹ mu
yeru obu.
Ọ bụru phẹ bẹ mu a-nọdu
agba etso.
Ndu Ízurẹlu gbaru g'aa-nụ phẹ aphụ
26 “Ọ kwa g'eekpuje onye-oshi iphu lẹ ntụ mẹ e -gude iya-a; bụ g'e kpuru ọnu-ụlo Ízurẹlu iphu lẹ ntụ. Ẹphebedua; ẹphe lẹ ndu eze phẹ; yẹe ndu-ishi phẹ; mẹ ndu-uke phẹ; mẹ ndu mpfuchiru Chileke phẹ;
27 tụkoru sụ ntẹkpe, a pyịru lẹ mkpụrukpu oshi l'ọ kwa iya bụ nna phẹ. Bya asụ iphe, a pyịru lẹ mkpuma l'ọ kwa iya bụ ne, nwụru phẹ nụ. Nta-a bẹ ẹphe ghawarụ mu azụ; ẹphe ta aghaduru mu iphu. Ọle ọobujekwanuru; ẹphe -daba l'iphe-ẹhuka; ẹphe asụkwa-a gẹ mu bya adzọo phẹ!
28 “?Dẹnuhunu agwa ọbu, unu gwọshiru onwunu ọbu? G'ẹphe byanụ mẹ ọ -bụru l'ẹphe a-dzọta unu mẹ unu -nọdu eje iphe-ẹhuka; kẹle ọo g'unubẹ ndu Jiuda nweberu mkpụkpu igwerigwe bụ g'agwa unu dụ-be igwerigwe.
29 ?Dẹnu g'o gude unu nọdu epfu l'o nweru iphe, mu meru unu? Ee! Unu tụkoakwaru g'unu ha kwefukọtaru mu ike! Nokwa iphe, Chipfu eepfu.
30 Iphe, mu chiru ndibe unu bụkwa iphe-mmanụ; g'ọ tọ bụdu l'ẹphe eye ọnu k'emezi iphe, ẹphe mesweru-a. Ogu-echi ngu sụwaru ndu mpfuchiru unu pyaapyaa g'oduma, alajashị iphe o guderu alajashị.
31 Unubẹ ọgbo nta; unu lenaa ẹnya ree l'opfu Chipfu, sụru: ?Mu bụjeru ndu Ízurẹlu echiẹgu; tọo alị, gbahụru tsụkiribaa? ?Dẹnu g'o gude ndibe mu nọdu epfuje sụ: ‘Anyi nwekwarụ onwanyi aghaphe g'ọ dụ anyi. Ọphu anyi abyapfutabaẹdu ngu ọzo?’
32 Nwamgbọko ?ọozohaje ịyagba iya? Tọo nwanyị, ala ji; ?ọozohaje iphe, e gude kwaa ya akwa ala ji? Obenu lẹ ndibe mu zọhawaru mu ujiku olemole, ete nweẹdu agụta.
33 Lewarọ g'i gude achọ n-yemobu achọ iya k'ẹrengete! Mbụ l'ụnwanyi, kachakpọo adụ njọ bẹ i zichawaru iphe, iime.
34 Ọo l'uwe ngu bẹ ndiphe hụmaru mee-ndzụ ndu ụkpa, adụdu iphe, ẹphe meru; l'ẹbe abụ l'i guderu phẹ l'ẹka ẹphe etsuka ụlo ngu.
“I mechakpọo iphemiphe ono;
35 ị nọdu epfukwarọ sụ l'ọ tọ dụkwa iphe, i mejeru. L'ẹhu tee ghukwa mu eghu l'opfu ẹhu ngu. Ọle mu e-kpekwanụ ngu ikpe; eshinu ị sụru l'ọ tọ dụdu iphe, i mejeru.
36 ?Dẹnu g'o gude i tsoru aghaphe achọ g'ị gbanwee ụzo ngu. Ọ kwa g'ọ tọ dụdu iphe, ndu Asiriya dụru ike meeru ngu bụ gẹ ndu Ijiputu adụdu iphe, ẹphe a-dụ ike emeru ngu.
37 Ii-mechakwa shikwaphọ l'ẹka ono vuru ẹka l'ishi lwajẹ; kẹle mu tụkowaru ndu ono, ị kpọru obu yeru ono jịka; ọphu ẹphe e-yekwarụ ngu ẹka.”