31
Alwalwa ndu Ízurẹlu
1 Wakwa iphe, Chipfu epfu baa: “O -rwua lẹ teke ono; bẹ mu a-bụru Chileke k'ipfu l'ipfu ndu Ízurẹlu l'ophu; ẹphe abụru ndibe mu.”
2 Wakwa iphe, Chipfu epfu baa: “Ndu ono, ogu-echi gbuphodoru ono bẹ e meru eze-iphe-ọma teke ẹphe nọ l'echiẹgu; mbụ Ízurẹlu; teke o shi achọ ẹka ọo-nọdu tụta unme
3 bẹ Chipfu shi l'ẹka dụ ẹnya mee g'ọ hụma iya. Mu yeru ngu obu yee ngu iya k'ojejoje. Mu gude n-yemobu mu kpụritaru ngu.
4 Mu a-kpụ-phukwa ngu phọ azụ; l'ị bụru onye a kpuphuru azụ; gụbe nwamgbọko mu yẹe nwoke akwajẹduru ono, bụ gụbe Ízurẹlu. L'i wota nkwa ngu je etsoru ndu ẹhu atsọ wata ete ebvu.
5 Ịi-wata akọ opfu-vayịnu l'eli úbvú úbvú Samériya ọzobaa. Ndu akọ opfu a-kọ iya; ria iphe, ẹphe kọru iya;
6 kẹle e -mechaa; l'ọ dụru mbọku, ndu eche nche a-nọnya; ẹphe echiaha mkpu l'alị úbvú úbvú ndu Ifuremu sụ: ‘Unu bya g'anyi je l'úbvú Zayọnu; jepfu Chipfu, bụ Chileke anyi!’ ”
7 Wakwa iphe, Chipfu epfu baa:
Unu gụa ebvu ẹhu-ụtso nụ
Jiékọpu!
Unu tụa ụzu ẹhu-ụtso nụ
onye-ishi ọhamoha!
Unu raa ya arara; kwaa ya
l'ẹvu sụ:
Jiko Chipfu; dzọnaa ndu
nkengu;
mbụ nwa ndu Ízurẹlu ndu
ọphu phọduru nụ!
8 Lekwa; mu e-shi l'alị ndu
isheli chị-phuta phẹ
azụ.
Mu e-jerwuchaa ẹka igwe
beru alị beru je
erwukọo phẹ.
Mu a-chịtachaa mẹ ndu atsụ
ishi; mẹ ndu ẹniyeni;
mẹ ndu dụ ime;
mẹ ndu ọphu ime emewaa
ememe.
Ọ bụepho l'ikpoto ndu a-lwa
nụ a-pa ẹka.
9 Ẹphe a-nọdu ara ẹkwa abya.
Mbụ l'ẹphe a-nọdu arwọ mu
arwọrwo;
mu edu phẹ alwa.
Mu e-du phẹ dughaa nggele
nggele;
dua phẹ shia ụzo,
dụ baswaa k'ọphu ụpfu
ata akpọdu phẹ l'ọkpa.
Ọ bụru iphe, kparụ iya nụ bụ
lẹ mu bụ nna Ízurẹlu;
tẹme Ifuremu bụru ọkpara
mu.
10 “Unu nụmakwa Opfu Chipfu;
unubẹ ọhamoha!
Unu araa ya arara gẹ ndu
bukube eze-ẹnyimu
l'ẹka dụ ẹnya nụma!
L'onye ono, chịkashiru
ndu Ízurẹlu ono
a-chịkobekwa phẹ phọ
ọzo.
L'ooche ụnwu atụru iya
ọbu nche g'onye eche
atụru;
11 kẹle Chipfu gbafụtawaru
Jiékọpu pfụa aswa ishi iya
l'ẹka ndu ka phẹ ọkpehu.
12 Ẹphe a-bya bya atụa ụzu
ẹhu-ụtso l'úbvú Zayọnu.
Ẹphe eteru ẹswa kpua iphe,
dụ ree, Chipfu doberu;
mbụ ereshi-o; mẹ mẹe-o;
mẹkpoo manụ;
mẹ ụnwu atụru mẹ eghu;
mẹkpoo ikpoto eswi.
Ẹphe a-dụ g'opfu,
a kọru agba iya mini ree;
ọphu ẹphe a-nọdubaedu
aphụ-aphụ.
13 Teke ono bẹ ụnwumgboko
a-wata ete ebvu;
ẹhu atsọ phẹ;
mẹ ụnwokorobya;
mẹ ndu bụ ọgerenya
kwaphọ.
Noo teke mu e-me g'aphụ,
ẹphe shi agụ bụru phẹ
ẹhu-ụtso.
Mu a-dụ phẹ obu;
mu agbanwee aphụ,
tsọru phẹ nụ g'ọ bụru phẹ
ẹhu-ụtso.
14 Ndu uke bẹ mu a-nụkpo iphe,
dụ ree nụa k'etsutsu iya.
Tẹme iphe, dụ ree,
mu doberu bẹ e-jikpọo
ndu nkiya ẹpho.”
Nokwa iphe, Chipfu eepfu.
Chipfu a-phụru ndu
nkiya obu-imemini
15 Wakwa iphe, Chipfu epfu
baa:
“A nụmaru ụzu-ẹkwa lẹ
mkpụkpu Rama;
mbụ ẹkwa anwụhu mẹ oke
nggụmaphu.
Ọ bụru Rechiẹlu l'ara ẹkwa
ụnwu iya;
ọphu o kwedu g'e gbobuta
iya egbobuta;
opfu l'ụnwu iya bvụeberu.”
16 Wakwa iphe, Chipfu epfu baa:
“Gberuma! Ba rahẹ ẹkwa!
Huchaa ẹnya-mini, nọ ngu
l'ẹnya;
kẹle ee-mechaa bua ngu
nggo ozi ngu;
mbụ l'ẹphe e-shi l'alị ndu
ọhogu lwa.
Ọ kwa Chipfu epfu iya.
17 Ọo ya bụ lẹ-a; unu lee ẹnya
l'iphu a-dụru unu ree.
Ụnwu unu l'a-lwa l'alị phẹ.”
Nokwa iphe, Chipfu eepfu
bụ ono.
18 Ude, Ifuremu atsụ bẹ mu
nụmawaru; l'ọ sụru:
Ị hụ̀waru mu ahụ̀hù g'onye
ahụ̀ nweswi,
ekwedu g'a gọta iya.
A hụ̀kwanaa mu hụ̀ta.
Dophunu mu azụ gẹ mu
alwaphuta azụ;
noo kẹle ọo ngu bụ Chipfu
bya abụru Chileke mu.
19 Mu kpaphuhucharu;
izimanụ bya alwaphuta
mu azụ.
Ọnodu, mu nọ doẹ mu phọ
ẹnya.
Mu phuru yoo; chịru ẹka ye
l'iphu ụtapfu.
Iphere bya egude mu;
mu bya abụru onye
ẹnya lwarụ;
kẹle ọo iphe, mu meru
teke mu bụ okorọbya
bẹ byaru eteahaa mu
ntụ l'iphu nta-a.
20 “Sụ-a; Ifuremu ?tọ bụdu nwa,
mu yeru obu;
mbụ nwa, tụbaru mu
l'ẹnya?
A makwarụ-a lẹ mu ahajẹru
epfuru iya;
obenu lẹ mu anyatajẹle
iya-a.
Ọo ya bụ lẹ-a; oghoroko iya
dụ mu shii;
mbụ lẹ mu aphụru iya
obu-imemini,
parụ ẹka.
Nokwa iphe, Chipfu eepfu
bụ ono.
21 Meshia ọhubama dobegbaa
l'oji!
L'ị kọshia obvudu obvudu
dobegbaa!
L'i lerwetakwa oji,
a tụru mkpoli ẹnya,
bụ oji, iishi!
Lwadụpho azụ;
gụbe nwamgbọko mu,
bụ Ízurẹlu!
Lwadụpho azụ lẹ mkpụkpu
ngu ono g'ọ ha!
22 ?Ịi-ghaphekpọ ẹgube ono
jasụ teke ole;
gụbe nwada ono,
eegudedu
ire iya ẹka ono?
Chipfu mewaru iphe ọ̀phúú
lẹ mgboko-a;
mbụ lẹ nwanyị a-wata
eleta nwoke ẹnya.”
Iphe e-mechaa dụru ndibe Chileke lẹ ree
23 Wakwa iphe, Chipfu, bụ Ọkalibe-Kakọta-Ike eepfu baa; mbụ Chileke ndu Ízurẹlu: “Ọ sụru-a: Mu -shiẹpho l'ẹka a kpụru phẹ lẹ ndzụ duphuta phẹ azụ; bẹ ndu nọ l'alị Jiuda; yẹe mkpụkpu lẹ mkpụkpu iya a-wata epfu opfu-a ọzo sụ:
“Gẹ Chipfu kebe ngu l'ọma;
gụbe ibe onye ono,
pfụberekoto ono;
gụbe úbvú, dụ nsọ!
24 Ndu Jiuda mẹ mkpụkpu lẹ mkpụkpu, nọkota iya nụ l'a-tụko bukọtaru l'ẹka ono; ndu akọ opfu eburu iya; ẹphe lẹ ndu aghaphe aghaphe; ẹphe l'eghu mẹ atụru phẹ.
25 Kẹle onye ike bvụru bẹ ee-me-a g'ẹpho ji; mu emee iphe, bụkpoo onye rwụhuru arwụhu g'ọ rọkota ike.”
26 Mu jeberu nno bya etehu; bya awata achịka ẹnya. Mgbẹnya mu ọbu nọdu atsọ mu ntụmatu.
27 Wakwa iphe, Chipfu epfu baa: Lekwa; mbọku abyakwa-a; teke mu e-woru mebyi-iphe, bụ nemadzụ yẹe anụ woru ghakaa l'alị Ízurẹlu yẹle alị Jiuda.
28 Ọo gẹ mu eche phẹ nche; e pheshia phẹ; nwukpọshia phẹ; e mekpee phẹ; mebyishia phẹ; ẹphe laa l'iswi; nokwaphọ gẹ mu a-nọdu eche phẹ nche; aa-kpụkwa phẹ; dzaphu phẹ azụ. Nokwa iphe, Chipfu eepfu.
29 O -rwua mbọku ono bẹ a taa sụbaedu:
Nna anyi phẹ bụkwa akpụru
vayịnu,
achaduru achacha bẹ
ẹphe riru.
Ọ nọdu akpọ ụnwu phẹ
eze ihuku.
30 Ọ bụ-chia iphe, e-me nụ bụ l'onyemonye a-la l'ẹjo-iphe, o metaru. Onye riwarụro akpụru vayịnu, achaduru achacha; eze akpọwa iya rọ ihuku.
31 Wakwa iphe, Chipfu epfu baa: Mbọku abyakwa teke mu lẹ ndu Ízurẹlu; waa ndu Jiuda a-gba ndzụ ọ̀phúú.
32 Ono taa dụedu g'ọgbandzu ọphu mu lẹ nna phẹ oche gbaru; teke ono, mu gude ẹka seta phẹ dufuta phẹ l'alị ndu Ijiputu; noo kẹle ẹphe mebyiru ọgbandzu mu; l'ẹka bụkwa mbẹdua bụ ji, alụ phẹ nụ. Nokwa iphe, Chipfu eepfu.
33 Wakwa iphe, Chipfu epfu baa: Wakwa ụdu ọgbandzu ọphu mu l'ọnu-ụlo Ízurẹlu a-gba: mẹ e -mechaẹpho teke ono. Ekemu mu bẹ mu e-woru ye phẹ l'egomunggo. Ọ bụru l'ime ọkpoma phẹ bẹ mu e-de iya edede. Mu a-bụru Chileke phẹ; ẹphebedua abụru ndibe mu.
34 Nemadzụ tee ziẹdu nwibe iya iphe ọzobaa; ọphu nemadzụ eziẹdu nwune iya iphe kẹ g'aasụje: Makwarụ Chipfu! Kẹle ẹphe e-shiẹpho l'onye ẹnya kachaa alwalwa l'ime phẹ maru mu jasụ l'onye ọphu kachaa shii. Noo kẹle mu a-gụru phẹ nvụ l'ẹjo-iphe, ẹphe megbabẹru. Ọphu mu anyatabaẹdu iphe-ẹji phẹ ọzobakpo. Nokwa iphe, Chipfu eepfu bụ ono.
35 Wakwa iphe, Chipfu epfu baa:
Mbụ onye ono, doberu
ẹnyanwu sụ g'o chije
l'eswe;
bya emee g'ọnwu;
yẹe kpokpode chije
l'ẹnyashi; onye ono,
bụ iya akparwụbeje
oke-ẹnyimu;
akpara-mini iya ede mba;
ẹpha iya bụ Chipfu,
bụ Ọkalibe-Kakọta-Ike.
36 “Ọo ẹpho m'ọ bụ l'a -nọnyaru;
iphe-a,
mu tuburu k'ememe-a
phuhu k'ọphu mu
hụma-buhuru iya;
ọ bụru iya bụ l'oshilọkpa
Ízurẹlu achịhu;
ẹphe taa bụedu ọha ẹka
phẹ l'iphu mu jasụru
asụru.”
Nokwa iphe, Chipfu eepfu
bụ ono.
37 Wakwa iphe, Chipfu epfu baa:
“Ọo ẹpho m'ọ bụ l'aa-tụ̀
imigwe imigwe l'iphe,
aatụ̀je iphe;
aabya ebvua alị bvurwua
ẹka a tọru ọkpa mgboko
l'ophu;
tẹme mu e-gude iphe,
oshilọkpa Ízurẹlu
megbabẹru jịka-gbua
phẹ.”
Nokwa iphe, Chipfu eepfu
bụ ono.
38 Wakwa iphe, Chipfu epfu baa: “Mbọku abyakwa teke ee-mechaa kpụkwaa mkpụkpu-a doberu mụbe Chipfu eshi l'ọje Hananẹlu jasụ lẹ Ọnu-abata Mgburẹku.
39 Ogologo iphe, e-gude atụ̀ iphe l'a-gbẹ l'ẹpho l'ẹka ono dabyiru ogologo jasụ l'eli úbvú Garẹbu; l'ọobya agọ-jia dabyiru jasụ lẹ Gowa.
40 Nsụda ono l'ophu, bụ ẹka e shi etuphajẹ odzu; awụshi iya ntụ; mẹkpoo ẹgu ono l'ophu, dabyiru jasụ lẹ nggele Kidirọnu l'ụzo ẹnyanwu-awawa; gbiriri jasụ l'agụga ọnu-abata Ịnya; g'ọ ha a-dụkotaru Chipfu nsọ. Ọphu a byadu ephefubaa mkpụkpu ono ephefu; ọphu ee-nwukpọshibaedu iya enwukpọshi.”