5
Ọ tọ dụdu onye pfụru ọto
1 “Unu tsokpọerupho ọma
gbororo Jierúsalẹmu jee
iphu l'azụ;
lephee ẹnya maẹshiduru;
chọchaa l'edupfu
l'edupfu phẹ maru mẹ
unu a-hụma nwonye
lanụ,
bụ onye eme ire-lanụ;
tẹme ọ nọdu achọje iphe,
bụ ọkpobe opfu.
Ọo ya bụ lẹ mu agụaru
mkpụkpu ono nvụ.
2 A makwarụ-a l'ẹphe
egudeje ẹpha Chipfu ria
angụ; ọle angụ ono,
ẹphe eri ono bụkwa
ụka bẹ ẹphe adzụ.”
3 Gụbe Chipfu; ?tọ bụdu iphe,
bụ ire-lanụ bẹ ịinoduje
ele ẹnya iya?
I chiru phẹ iphe;
ọphu o medụru phẹ
ẹhuka.
I bya egwee phẹ arakabya;
ọphu ẹphe ekwekwaphọ
emezita iphe,
ẹphe mesweru.
Ẹphe mechaa iphu phẹ;
o shihugbaa
dụngudungu gẹ mkpuma;
bya ajịka l'izimanụ taa
lwadụ phẹ azụ.
4 Mu bya arịa sụ:
“Ndu-a bụkwa ndu ụkpa;
tẹme ẹphe bụru ndu
eme eswe.
Noo kẹle ẹphe ta amadụ ụzo
kẹ Chipfu.
Mbụ l'ẹphe ta amadụ iphe,
Chileke phẹ sụru
g'ẹphe meje.
5 Ọo ya bụ l'ọo gẹ mu bya
ejepfu ndu ọphu bụ
ndu-ishi je epfuru
yeru phẹ.
Ẹphebedua a-kabẹkwa maru
ụzo kẹ Chipfu;
mbụ iphe,
Chileke phẹ sụru g'ẹphe meje.”
Ọle ọ bụle-a gẹ ndu ọphu dụ
bụ g'ẹphe dụ.
Ẹphebedua kwaphọ
mebyiwarụ iphe,
shi segbabẹ mu l'ẹphe;
bya agbabua ụdo,
e shi gude kekọta anyi
l'ẹphe.
6 Ọo ya bụ l'oduma e-shi l'ọswa
bya afụaru phẹ.
Mbụ l'ẹjo-nkụta-ọswa
e-shi l'echiẹgu bya
atapyashịa phẹ.
Agụ e-domi l'ọma mkpụkpu
phẹ kwabẹru phẹ;
g'ọ lajashịa phẹ iphiriba
iphiriba;
mbụ mẹ ọ -dụkpooru onye
ọphu jeru afụta;
kẹle ekwefu-ike ọphu ẹphe
kwefuru pawaru ẹka;
tẹme alaphu azụ,
ẹphe laphuru pawaa
igwerigwe.
7 “?Dẹnu g'o gude mu je
l'agụru unu nvụ?
Ụnwu unu gbadoakwaru mu;
bya egude agwa,
abụdu Chileke riahaa
angụ.
Ọle ọ kwa mbẹdua
emekọtaru phẹ iphe,
bụ mkpa phẹ g'ọ ha.
Ẹphe nọdu erikwaphọ ogori
bya awụ gbiigbiigbi eje
l'ụlo ụnwanyi-ụkpara.
8 Ẹphe bụ ịnya, a nụ-jiru ẹpho ree,
eshi okee agụshi ike;
kẹle g'ẹphe ha aragba
mịmimi agbapfu nyee
nwoke ibe phẹ.
9 ?Bụ ẹphe -mechaa nno;
mu ahaa phẹ gẹ mu
ta nụ phẹ aphụ iya tọo?
?Bụ ọha, dụ ẹgube ono bẹ
mu ta agwatadu ụgwo
iphe, ẹphe eme?
Nokwa olu Chipfu.
10 Unu je atụko ụpho opfu-vayịnu
iya ono phọkashichaa;
ọle ọ tọ bụkwa kẹ g'unu
mebyishibẹbekota iya g'ọ ha.
Unu kwashịchaa ya ẹkali;
kẹle ndu-a ta adụedu
ọphu bụ kẹ Chipfu.
11 Ndu ọnu-ụlo Ízurẹlu yẹe ndu
ọnu-ụlo Jiuda
bẹ mewaru ọphu mu
egudedu ire phẹ ẹka
ililekpọo.
Nokwa iphe, Chipfu eepfu.”
Chipfu ajịka ndu Ízurẹlu
12 Ẹphe dzụwaru ụka kpua Chipfu; kẹle ẹphe sụru: “Ọ tọ dụkwa iphe, oo-me! Ọphu ọ dụkwa iphe, byaru eme anyi. Ọgu taa dapfukwa anyi; ọphu ọkpa-nri abyapfutakwa anyi.
13 Ndu mpfuchiru Chileke ta adụekwa iphe ọzo, ẹphe bụ gbahaa phẹrephere. Ọphu opfu Chileke anọedu phẹ l'ime. Ọo ya bụ g'e mee phẹ iphe, ẹphe sụru l'oo-me ndu ọzo.”
14 Ọo ya bụ lẹ-a; wakwa iphe, Chipfu, bụ Chileke; bya abụru Ọkalibe-Kakọta-Ike eepfu baa: “Eshinu ndu-a pfuru ẹgube opfu-a bẹ mu e-me g'opfu mu, dụ gụbe Jieremaya l'ọnu bụru ọku; ndu-a abụru nkụ, ọo-nọdu eke.”
15 Wakwa iphe, Chipfu epfu baa: “Gụbe ọnu-ụlo Ízurẹlu; mu gudekwa ndu shi ẹka dụ ẹnya abapfuta ngu. Ọha ọbu bụ ọha, shi l'ichee; bya abụru ọha, ike dụ; ndu ị tị madụ opfu-alị phẹ; ọphu ịinudu iphe, ẹphe epfu.
16 Ẹkpa-apfụ phẹ dụgbaa g'ilu, gheru ọnu. Tẹme g'ẹphe ha tụkoru bụru ndu dụ ike l'ọgu.
17 Ẹphe a-tụko iphe, i gege akpata l'opfu ripyaa bya eripyaa nri, i nweru enweru. Ẹphe atapyaa ụnwu ngu unwoke mẹ ụnwanyi; ẹphe atapyaa ikpoto eghu mẹ atụru ngu; mẹkpoo eswi ngu; ẹphe eripyaa opfu-vayịnu ngu; mẹkpoo oshi figu ngu; ẹphe egude ogu-echi mebyishia mkpụkpu lẹ mkpụkpu ngu, bụ ndu ọphu a kpụ-pheru igbulọ mgburugburu, bụ mkpụkpu ị kpọru obu yeru.
18 “Obenu lẹ-a; o -rwua mbọku ono; bẹ mu tee mebyishibẹbekwa unu rengurengu. Noo iphe, Chipfu epfu bụ ono.
19 Teke ndu Ízurẹlu jịru sụ: ‘?Bụ gụnu kparụ iphe, Chipfu, bụ Chileke anyi meru anyi ẹgube ọwa-a?’ Unu asụ phẹ lẹ-a: ‘Eshinu unu gbadoru Chipfu bya eje agwọta ọbvu ndu ọhozo gwalaha l'alị unu; bẹ nta-a bẹ unu e-jeahaarụ ndu ọhozo ozi l'alị, abụdu k'unu.’ ”
Ọkwa, Chipfu nmarụ ndu nkiya
20 “Unu raa iphe-a arara g'ọnu-ụlo Jiékọpu nụma! Unu ejekwaphọ echia ya lẹ mkpu l'alị Jiuda sụ phẹ lẹ-a:
21 Unu nụmakwa iphe-a; unubẹ ndu eme eswe; tẹme ọphu unu enwedu egomunggo; unubẹ ndu nweru ẹnya; ọphu unu aphụdu iya ụzo. Unu nweru nchị; ọphu unu anụdu iya iphe.
22 Wakwa iphe, Chipfu epfu baa: ?Tọ gbadụru g'unu gege anọdu atsụ mu ebvu? ?Tọ gbadụru g'unu a-nọdu mu l'iphu phụa kpaakpaakpaa. Ọ kwa mbẹdua gude ẹja-evevee kpaa oke alị yẹe eze-ẹnyimu. Tẹme mu tụ-bua lẹ jasụ l'ojejoje bẹ ọ tọ byadu l'asọghata iya. Akpara-mini a-tụkpokwaa sọo gborogboro; ọle ọ tọo dakadụ iya. Ọo-tụkpoo wọowoowoo; ọle ọ tọo sọghatadu iya.
23 Obenu lẹ ndu-a bụchaa ndu ẹjo-ọkpoma. Tẹme ekwefu ike dụ phẹ l'obu. Ẹphe ghakọbewaru; ọ bụru phẹ atụgbu.
24 Ẹphe ta asụjedu onwophẹ: ‘G'anyi tsụeshikwa Chipfu, bụ Chileke anyi ebvu; onye edzeje mini ishi-apha yẹe mini udzumini l'orwuberu iya; bya abụru iya doberu teke emetajẹ iphe e meberu l'alị.’
25 Ọo emeswe, unu emesweje bẹ meru g'ẹgube iphe ono ta adụ. Ọ bụru iphe-ẹji unu meru; ọphu iphe, dụ ree erwudu unu ẹka.
26 “A -bya l'ẹka ndibe mu dọru bẹ ndu eme ẹjo-iphe nọkwa iya; ndu egepajẹru gẹ ndu agba ọ́nyà-ẹnu; mẹkpoo gẹ ndu agba ọ́nyà, ẹphe e-gude nmata nemadzụ.
27 Ọo g'ụnwu-ẹnu ejije ẹpfune iya-a bụ g'ẹregede ẹregede jiru ụlo phẹ pyịmu. Ẹphe byawaru bya enweru iphe bya abụru ndu ike dụ.
28 Ẹphe bya adachaa okporokpo dụ kẹ rẹpfurepfu. Ọphu iphe-ẹji, ẹphe eme enweẹdu ókè. Ẹphe ta ahajẹduru ndu enwedu nna enge; ọphu ẹphe agbajẹeduru ndu akpa nri ọdzori.
29 “Wakwa iphe, Chipfu epfu baa: ?Tọ gbadụru kẹ gẹ mu nụa phẹ aphụ iphe-a, ẹphe eme-a tọo? ?Tọ gbadụru gẹ mu melata ẹgube ọha, dụ ẹgube ọwa-a iphe, ẹphe eme mu tọo?
30 Iphe, aasọ oyi; mẹ iphe, anyị ishi ẹdzu meakwaru l'alị-a:
31 Lẹ ndu mpfuchiru epfukwa iphe, abụdu eviya. Ndu uke bụru ike-ọkpu bẹ ẹphe gude bụru ishi. Ọ bụru ẹgube ono bụ g'ọ dụ ndibe mu ree. Obenu lẹ-a; ?bụ gụnu bẹ unu e-me mẹ o -rwua l'ikpazụ iya?”