3
Iphe-ẹhuka ndu Ízurẹlu erwu Jieremaya l'ẹhu
1 Ọo mbẹdua bụ onye
gudekpọo ẹnya mu hụma
iphe-ẹhuka ono,
Chileke gude oke ẹhu-eghu
iya echi g'eechi
mgbọro ono.
2 Ọ chịfuru mu; mee mu haa
eje l'ìphóró jeahaa ije
l'ọchii.
3 Ire-lanụ bụ l'o gudewaa
ẹka iya awagọ mu
mbọku-mbọku.
4 Anụehu mu; mẹ akpọ ẹhu
mu bẹ o mewaru ọ nọdu
ese ẹli.
Ọkpu, nọ mu l'ẹhu bẹ ọ
kụ-jishiwaru akụ-jishi.
5 O gude iphe, atsọ ilu
waa iphe-ẹhuka kephee mu;
mbụ gude iya gbaphee
mu mgburugburu.
6 O mewaru gẹ mu nọdu l'ọchii;
gẹ ndu nwụhuhawaru nụ
teke dụ ẹnya.
7 Ọ kpụ-phetaru mu
mgburugburu;
k'ọphu bụ l'o to nwedu
ẹka mu e-shi lụfu alụfu.
Ọ nyabẹwaru mu ẹgbirigba,
anyi-tsuta mu anyi-tsuta.
8 Teke mu chiru mkpu nta
chia imo;
raa nta raa imo g'ọ
gbaaru mu mkpu;
Ọ tọ ngabẹdu nchị l'epfupfu,
mu epfu anụ iya.
9 O gudewaa mkpuma,
a gbakpọshiru
agbakpọshi dochishia
mu ụzo;
bya emewaa g'ụzo mu
dụkota
nggọdogonggodogo.
10 Ọo g'agụ akwagebeje-a
bụ g'ọ zẹ kwabẹru mu;
Mbụ kwabẹ g'oduma,
domiru onwiya edomi.
11 O nwufuru mu l'ụzo,
mu eshije;
woru mu labushia
nanụ nanụ;
Bya agbado mu;
mu dabyiru nkịnyi mu.
12 O setawaru apfụ iya;
ọ bụru mbẹdua bẹ ọ
tụberu g'ọ gbaa ya.
13 O wotaru apfụ,
shi l'ẹkpa apfụ iya;
woru iya sụbaa mu obu.
14 Mu bụwaa onye ndibe
mu anọduje atụ ụzu ọchi;
Mbụ onye aanọduje agụru
ebvu eswe l'ẹnyashi
gude aja mu ewenu.
15 Ọo iphe, atsọ ilu bẹ o gude
nụ-jia mu ẹpho.
Ọ bụru age bẹ o cheru mu
jasụ ọ tsụahaa mu atsụtsu.
16 O gudewaa ẹjirija kujishia
mu eze;
bya azọwaa mu tọlitoli
lẹ ntụ.
17 Ị nafụwaru mu nchị-adụ-doo;
Mbụ lẹ mu zọhawaru iphe,
bụ iya bụ ẹhu-guu.
18 Ọo ya meru g'o gude mu
nọdu epfu sụ:
“Ike bvụakwaru mu;
Ọphu iphe, mu ele ẹnya
iya l'ẹka Chipfu
erwuẹkwaru mu phọ ẹka.”
19 Mu nyatarụ iphe-ẹhuka mu;
waa phururugbadaa,
mu aghaphe;
mbụ iphe ono, atsọ ilu;
waa age ono.
20 Ọobujeru teke mu nyatarụ
iya g'ọ ha; meji atọfu mu.
21 Ọobujeru mu -nyata iphe
lanụ-a;
obu eguzeta mu.
22 L'ọo n-yemobu Chipfu
ono meru g'o gude
ọphu anyi atụkodu
lakọta l'iswi.
Noo kẹle obu-imemini
iya te nwedu eberu.
23 L'ụtsu g'ụtsu bẹ n-yemobu
waa obu-imemini
Chipfu ono adụje ọ̀phúú
ọ̀phúú.
Apfụshi ike ngu bẹ parụ
ẹka apaa.
24 Iphe, mu epfuje l'obu
mu bụ l'ọo Chipfu bụ
okiphe, mu ketarụ.
Ọo ya meru g'o gude
mu je l'anọdu kwabẹru
iya.
25 Chipfu bẹ dụkwaru
ndu ono,
nọ kwabẹru iya nụ lẹ ree;
mbụ onye ono,
anọduje ele ẹnya iya.
26 Iphe, dụ ree bụ gẹ nemadzụ
nọdu nggujingguji
kwabẹ;
nọdu kwabẹru Chipfu
g'ọ dzọo ya.
27 Ẹgube ivu-ẹrwa ono bẹ
ọ dụje ree gẹ nemadzụ
vua ya lẹ teke ọ bụ okorọbya.
28 G'onye ọbu nọdu
nggujingguji vuru iya
nkịnyi iya;
Noo kẹle ọo Chipfu boru
iya ya.
29 G'onye ọbu phozekwa
kpube iphu l'alị;
kẹle o nweru g'ọo-dụ;
l'e meeru iya iphe,
oole ẹnya iya.
30 G'o dobe upfuru-nchị
iya g'onye echi iya ẹka
chita ike iya;
Ọ haa g'e gude iphe-iphere
nụ-jia ya ẹpho.
31 Kẹle Nnajịuphu taa -jịkadu
nemadzụ jasụ l'ojejoje.
32 Ọ bụ eviya l'oomeje g'aphụ
tsọru nemadzụ;
ọle ọophujekwapho
obu-imemini.
Kẹle n-yemobu iya bẹ
nyịberu anyịbe.
33 Ọ tọo nọdujedu atsọ
iya ụtso g'o mee
g'iphe-ẹhuka waa aphụ
dapfuta ụnwu-eliphe.
34 G'e gude ọkpa zọpyashia
ndu ono,
a tụru mkpọro lẹ
mgboko;
35 mbụ g'a nafụ nemadzụ
iphe, rwuberu iya nụ
l'atatiphu
Ọkalibe-kangokọtaru-nụ;
36 mbụ l'a -nafụ nemadzụ
iswi-ọdu-mma, rwuberu
iya nụ;
bẹ iphemiphe ono g'ọ ha
taa dụkwa Nnajịuphu ree.
37 ?Bụ onye a-dụ ike pfua opfu;
mee ya g'o ree;
m'ọ -bụru lẹ Nnajịuphu ta
atụduru ekemu g'o ree?
38 ?Tọbudu
Ọkalibe-kangokọtaru-nụ
bẹ asụje g'iphe-ẹhuka
waa iphe,
dụ ree byapfuta
nemadzụ?
39 ?Bụ gụnu meru g'o gude
nemadzụ,
nọ ndzụ je anọduje
atsụshi aphụ;
lẹ teke aahụ̀ iya ahụ̀hù
k'iphe-ẹji, o meru?
40 G'anyi nyochana ụzo anyi;
gbua ya igo;
Lwaphuta azụ lwapfuta
Chipfu.
41 G'anyi palinaa obu anyi
imeli;
Chị-liaru Chileke, nọ l'imigwe
ẹka imeli sụ:
42 Anyi meswewaru;
bya ekwefu ike;
ọphu ị tị gụeduru
anyi nvụ.
43 I kpuchiteru onwongu
ẹhu-eghu gude chịa
anyi ọso.
I gbuwaru anyi; ọphu ị
tị phụduru anyi
obu-imemini.
44 I gudewaa urwukpu
kpuchia onwongu;
k'ọphu ọ tọ dụdu epfupfu,
anyi pfuru nụ ngu
e-rwuje ngu nchị.
45 I mewaru anyi bụru ndu
dụ ẹkpa-oyi;
bụru ikpọzu l'echilabọ
ndiphe.
46 Ndu ọhogu anyi l'ophu
bẹ sawaru ọnu galaba
epfubyishi anyi.
47 Ndzụ-agụgu bẹ rwutawaru
anyi;
a gbabẹwaru anyi ọ́nyà.
Mkpurupyata yẹe ọla-l'iswi
dapfutawaa anyi.
48 Ẹnya-mini, asọe mu phọ
gborogboro l'ẹnya gẹ
mini nggele;
Kẹle ndibe mu bẹ e
meru umerekete.
49 Ẹnya-mini ta abyadụ
asọshi-buhu mu l'ẹnya;
mbụ l'ọonodujeepho
asọ mu mkpụrumkpuru;
50 jasụ teke Chipfu a-gbẹ
l'imigwe lee ẹnya l'alị
hụma mu.
51 Iphe, ẹnya mu ahụma
meru aphụ ji mu obu.
Ọ bụru k'ụnwada mkpụkpu
mu ono bẹ kparụ iya nụ.
52 Ndu ọhogu mu anọduje
achị nta mu g'onye
achị nta ẹnu
l'ẹbe abụ l'o nweru iphe,
mu meru phẹ.
53 Ẹphe nwuru mu ye l'ime
nsụ g'ee-shi g'ẹphe
wota ndzụ mu.
Ẹphe nọdu atụ mu mkpuma.
54 Mini rikputeru mu ishi;
mu rịa lẹ mu chịhuwaru.
55 Ọ bụru l'ime wukirima
nsụ ono bẹ mu nọ
raku gụbe Chipfu.
56 Ị nụmawaru arwọrwo,
mu rwọru ngu sụ:
Ba gbakwa mu nkụchi
l'araku ono,
mu rakuru ngu g'ị
gbaaru mu mkpu ono.
57 Ị kpịritaru mu ntse teke
mu rakuru ngu ono.
Ị sụ gẹ mu ba tsụshi ebvu.
58 Gụbe Nnajịuphu;
ọ kwa ngu leru ẹnya
l'opfu ẹhu mu;
bya agbafụta ndzụ mu.
59 Gụbe Chipfu; ị hụmawaru-a
ẹjo-iphe, e meru mu;
hanaaru mu enge!
60 Ị hụmawaru g'ẹphe
gwataberu mu ụgwo
iphe, mu meru;
mẹkwapho ẹjo-idzu,
ẹphe achịkotaru mu.
61 Gụbe Chipfu; ị nụmawaru-a
g'ẹphe epfubyishi mu;
mẹkwapho ẹjo-idzu,
ẹphe achịkotaru mu.
62 Mbọku-mbọku bẹ ndu ono,
etso mu opfu ono;
anọdujeepho agba mu
mgbamu;
bya achịru mu ẹjo-idzu.
63 Lewa phẹ rọ ẹnya!
Ẹphe -nọdu anọo;
ọzoo l'ẹphe pfụru apfụru;
bẹ ẹphe egudejeẹ mu
phọ agụ l'ebvu;
64 “Gụbe Chipfu; pfụkwaa phẹ
ụgwo, gbaru phẹ nụ;
mbụ ẹgube ono iphe,
ẹphe meru dụ.
65 Kpọ-chikwaa phẹ obu
akpọ-chi;
G'ẹphe bụkwaru ndu ị
tụru ọnu.
66 Gudekwa ẹhu-eghu chịpyabe
phẹ;
woru phẹ mebyishia
lẹ mkpula igwe kẹ Chipfu.”