5
Epfu anụ Chileke g'ọ
phụa obu-imemini
1 Jiko Chipfu; nyatanụ
ẹjo-iphe,
dapfutaru anyi-a.
Lenaa ẹnya hụma
iphe-iphere, eeme anyi.
2 Okiphe anyi bẹ lakọtawaru
ndu lwarụ alwalwa
l'ẹka.
Ibe anyi lakọtawa ndu
ọhozo l'ẹka.
3 Anyi bụwaa ndu a tọgboru
nwa maa;
ọphu anyi enweẹdu nna.
Ne anyi phẹ bẹ bụwaa
ụnwanyi,
ji phẹ anọedu.
4 Mini-angụngu bẹ bụ azụta bẹ
anyi azụtaje iya.
Nkụ, eeshije ite bụru ụgwo
bẹ anyi apfụje kpata
iya.
5 A nyabẹwaru anyi
mkpamẹhu l'olu.
Ike bvụ-gbuwaru anyi;
ọphu ẹphe ekwedu
g'anyi tụta unme.
6 Anyi wowaru onwanyi ye
l'ẹka ndu Ijiputu;
waa ndu Asiriya
g'ee-shi g'anyi hụmaje nri,
a-sụru anyi eriri.
7 Nna anyi phẹ bẹ meru iphe-ẹji;
nwụshihu.
Ọ bụru anyịbedua byaru
evuta aphụ, dụ iya nụ.
8 Nta bụ ndu bụ ohu bụ
phẹ bụ ishi anyi.
Ọphu ọ dụdu onye a-nafụta
anyi l'ẹka phẹ;
g'anyi nweru onwanyi.
9 Anyi alọje ishi anyi alọlo
tẹmanu anyi ahụma nri,
anyi e-ri;
kẹle ogu-echi bẹ nọ
l'echiẹgu.
10 Akpọ-ẹhu anyi bẹ ahụ ọku
g'ovokọku.
Iphe, kparụ iya nụ bụru l'ẹjo
ẹgu eme anyi.
11 Ụnwanyi bẹ e gudechaaru
jepfu k'ọkpehu lẹ
Zayọnu;
gudekwaphọ ụnwumgboko
jepfu l'ime mkpụkpu,
dụgbaa lẹ Jiuda.
12 Ẹphe gude ẹka phẹ
swị-gbushia ndu-ishi.
Ọphu aakwabẹjeedu ndu bụ
ọgerenya ùbvù.
13 Unwokoro bẹ ẹphe
gudechaaru g'ẹphe
gweje iphe egwegwe
lẹ mkpuma,
eegweje iphe.
Ụnwegirima unwoke nọdu
ada tsụutsuu lẹ nkụ,
e boru phẹ.
14 Ndu bụ ọgerenya ta anọjeedu
l'ọnu-abata mkpụkpu.
Ọphu ụnwokorobya
agụjeedu ebvu,
ẹphe shi agụje.
15 Ẹhu-ụtso ta adụedu anyi l'obu.
Ebvu, anyi eteje bẹ byawaru
bya abụru nggụmaphu.
16 Okpu-eze ono bẹ shiwaa anyi
l'ishi dafụ.
Nshịo anyi; kẹle anyi
mewaru iphe-ẹji!
17 Ọo iphe ono meru g'o gude
meji tọfu anyi.
Ọ bụru iya kpatarụ;
ẹnya dụchawaa anyị
ragaraga.
18 Kẹle úbvú Zayọnu bẹ bụwaa
ochobu;
Ọ bụru nkụta-ọswa bẹ
etsojeru ejephe l'eli iya.
19 Ọo gụbe Chipfu bẹ a-bụru
Onye eze anyi jasụ l'ojejoje.
Mbụ l'aba-eze ngu anọje;
e -shi l'ọgbo sweru
ọgbo.
20 ?Bụ gụnu meru g'o gude
ị zọhaa anyi jasụru
asụru?
?Bụ gụnu meru g'o gude
ị parụ anyi haa nọo
ọdu?
21 Duphutanụ anyi azụ l'ẹka
ị nọ; jiko Chipfu;
k'ọphu anyi a-lwapfuta
ngu ọzo.
Mephunu ọnodu anyị azụ g'ọ
dụ g'o shihawaa dụ lẹ
teke k'ichee.
22 ?Tọo ị jịkawaru anyi l'ophu
l'ophu?
Mbụ ?ịvuwaru ọvuma
parụ anyi haa
phuruphuru
gberegedege tọo?