NaIpru gail
Nalob̃ulat napisulan van hǝn naIpru gail
Ase itos nalob̃ulat napisulan egai?
Datsalǝboi as totosi. Len alat lotokad namitisau, ta m̃o galevis lunau ke aPol o aParnapas totosi, ta damǝŋai galevis lunau ke aAp̃ollos totosi husur nasoran san ebutǝlas mai igomah.
Itos nalob̃ulat napisulan egai hǝn nǝsa?
Itosi hǝn alat siYesu asike lǝb̃iteh dan nadǝlomian lotokade lan. Isor vǝsvǝsaii ke, nalo siMoses tous naviolan hǝn natutumavan sil nǝsaan, inoŋ, husur aYesu totutumav hǝn gai vǝha-sua tovi namǝkot. Salipair dan aYesu hǝn lǝb̃etǝlmam tǝtas hǝn naṽide seJu gail. Lǝb̃igole dereh lipanis habat sile.
Itosi m̃os ase?
Alat lotokad namitisau lunau ke totosi m̃os alat siYesu len naut sua, ale nǝvanuan isob̃ur ei lovi Ju.
Itosi ŋais mai len naut a be?
Alat lotokad namitisau luke totosi len nasihau sua len nasihau A.D. 66 vǝbar A.D. 96, be lǝsalǝboi naut totosi lan.
1) Len aKristo, aGot evǝhot gai (1.1-3)
2) AKristo iyalyal sǝhor aŋel gail (1.4–2.18)
3) AKristo iyalyal sǝhor aMoses mai aJosua (3.1–4.13)
4) AKristo evi b̃iltihai tutumav sǝhor ahai tutumav p̃isi (4.14–7.28)
5) Na-kel-gati-an aGot tota gati len nǝda heKristo esǝhor na-kel-gati-an ta m̃o tota gati len nǝda herivatvat gail (8.1–9.22)
6) Nǝboŋ aKristo totutumav hǝn gai esǝhor naviolan ideh ahai tutumav gail lototutumav hǝni (9.23–10.39)
7) Nadǝlomian silat ta sutuai (11.1-40)
8) Nǝmauran timabe hǝn aGot b̃ehǝhaṽur hǝni? (12.1–13.19)
9) Na-sor-tuṽ-an mai nasoruan namǝkot (13.20-25)
1
ANatun aGot
1 Sutuai tia len ahai kelkel ur gail, aGot isor vǝha-sob̃sob̃ur mai atǝmadat gail ta sutuai len naṽide tiltile gail.
2 Len nǝboŋ galegai hǝn nanoŋan hǝn navile a pan, aGot isor. Len aNatun isor mai gidato. Itabtabuh len aNatun hǝn natit p̃isi lǝb̃evi esan sǝb̃on. Len aNatun, aGot igol nǝmav mai navile a pan mai natit p̃isi lan.
3 ANatun evi nam̃ialan hǝn namǝnas hǝn nǝyalyalan siGot. Ilav kot aGot, ep̃itoṽ hǝn nab̃oruan siGot. Len nasoruan hǝn nǝdaŋan san etǝgau gat natit p̃isi hum lotomaienan. Nǝboŋ togol naveveuan dan nǝsaan, ebǝtah len navǝlan nǝmatu seKiŋ len nǝmav a mǝhat.
ANatun aGot iyalyal sǝhor aŋel gail
4 Imaienan aGot igol aNatun iyalyal sǝhor aŋel gail, hum nǝhes aGot tolav maii toyalyal sǝhor nahǝsalit gail.
5 Husur aGot sakel mai aŋel ideh ke,
“Gaiug govi aNatugw ulum̃an,
damǝŋai nogǝm vi Tǝmam̃.”
Ale aGot sakel mai aŋel ideh ke,
“Ginau dereh nevi Tǝman,
ale atenan tevi Natugw.”
6 Ale tǝtas am, nǝboŋ aGot togol ahai a m̃o san b̃egǝm vi lan navile a pan, ike,
“Aŋel p̃isi siGot lilotu hǝni!”
7 Nǝboŋ tosor husur aŋel gail, aGot ike,
“Nugol aŋel sagw gail losum̃an nǝlan,
loum sagw hum nǝhab towunwun.”
8 Be nǝboŋ tosor mai aNatun ike,
“O Got, nab̃iltihai bǝtbǝtah sam̃ hum sekiŋ
ipat vi sutuai sutuai,
nanoran sam̃ ehum nǝhai sekiŋ
gotowol hǝn esam̃ gail lan.
9 Golǝmas bun nanoran,
gomǝtahun bun nǝsaan.
Imaienan, aGot tovi aGot sam̃ evǝhas gaiug,
eb̃ir naoil hǝn nahǝhaṽuran len gaiug
sǝhor avan ideh gail am.”
10 AGot ikele am ke,
“Nasub̃, len natub̃atan goriŋ nǝpaudesen hǝn navile a pan,
ale nǝmav, gotoum hǝni hǝn navǝlam̃ gǝlaru.
11 Dereh natgalen p̃isi limasig,
hum nahurabat tomatu van vam̃om.
Be gaiug dereh gitoh vi sutuai.
12 Dereh gebul gat nǝmav mai navile a pan
hum nahurabat naut susus,
ale gel gǝlaru hum nahurabat artomatu.
Be gaiug, gǝsagǝgel boŋ ideh
ale nǝmauran sam̃ asike inoŋ vi sutuai.”
13 Ale aGot sakel mai aŋel ideh ke,
“Gebǝtah tarhǝt nǝmatu sagw,
vir nǝb̃eriŋ naenemi sam̃ gail pipit nariem̃ gǝlaru
hǝn lǝb̃evi ut kǝmas.”
14 Be aŋel gail lumabe? Lovi nanunun hǝn nauman siGot ŋai. Esǝvat galit hǝn lǝb̃evi tarhǝt silat, gai tolav kuv galit dan nǝsaan hǝn lǝb̃ikad nǝmauran vi sutuai.