ⅩⅫ
Piteŋenool pa piti himukuyee ha hiti Yéesu
Ⅰ Pahaaño pa piti hímpuul ha heetaakut ha leweño, empa nkasok pa Himuusu ha, níhilohanii.
Ⅱ Ñíhampaatiin puwaaseena pa pakati Pútuun pa niŋ pikalaŋana hilim ha heesiiŋanee ha nkayeno hiŋes fa éfikahin kapumuk Yéesu, pale nkafe pakan paka.
Ⅲ Fiye, Seetaani neenako Yutas aŋa nkasok ya Iskaliyot, akee ti pupoñapoñ pa ŋaasuwan niŋ pákasupak paka.
Ⅳ Yutas naakaay hicuku ñíhampaatiin puwaaseena pa niŋ ñíhampaatiin pakati púwuulu pa keeyeniye ka efaas ekumpaan ya enfakat ya eti Pútuun pa kapiteŋenool puume naañaŋii kawufan Yéesu.
Ⅴ Insúumii meemak, nkásiyool kati kawufanoo mañ.
Ⅵ Yutas naacoon, naayeno hiŋes káasiiŋuma keenape la afaawufanii Yéesu, kayoŋ ka peeneetaat toko.
Kaamemanool káciim ka kiti Himuusu ha
Ⅶ Hinoom ha hiti pahaaño pa hiti hímpuul ha heetaakut ha leweño níhicolii, ta nkañaŋe ta kaawaaseen císaacii ca citi Himuusu ha.
Ⅷ Yéesu naapoñ Piyeer niŋ Saŋ naasokii: “Nikaay canimemanool káciim ka kutuunaa kiti Himuusu ha kati uliyaa.”
Ⅸ Nkacakanoo: “Peyme állafiye upimemanool ko?”
Ⅹ Naañahanii: “Nísiitan, niŋ ninakiyaa ti saatee ya, efinipaakool niŋ áyiin eetiyiye élumpa eti man. Inninow pusonoo fo ti ekumpaan eyya afaanako ya,
Ⅺ innisok ati ekumpaan ya: 'Ahámpaatiin a asok, leyme ékaap ya neeyem la naakaakaay hili káciim ka kiti Himuusu ha niŋ pinapana pa pakateyoo?'
Ⅻ Afáayisan aluu patiila ti ekumpaan ya ékaap enfakat eepayee kaamemanool. Toko efinimemanool káciim ka kutuunaa.”
ⅩⅢ Nkakaay nkatook waah óo waah samat nii fa Yéesu naasokii fa. Fiye, nkamemanool káciim ka kiti Himuusu ha.
Káciim ka kiti Ateeteyo
ⅩⅣ Caanak ca cípituuno, Yéesu naayeno niŋ pupoñapoñ pa pakateyoo kati kali.
ⅩⅤ Naasokii: “Fa inci inhiliikane hínum hili císaacii ca citi Himuusu ha niŋ aluu le niŋ inci facuk kúnuul.
ⅩⅥ Kaatuko inci pusok aluu: etineneli císaacii ca citi Himuusu ha, fo ta eeha pahaaño pa mpútuule ha efihitaako pati cáwii ca citi Pútuun pa.”
ⅩⅦ Naacoop elontoŋ eti elaan naasok Pútuun pa apalaka kiteyyo, naasok: “Nicoop elaan eyye nipisayool aluu púlooŋ.
ⅩⅧ Kaatuko inci pusok ho aluu, písik fíyooy etinenelaan elaan fo ta cáwii ca citi Pútuun pa éficikey.”
ⅩⅨ Fiye, naacoop hímpuul naasok Pútuun pa apalaka, naafiit ho, naawufanii ho, naasok: “Aŋe eyem eniinam eewufanee ya aluu, níhin eehe kati nínawuniyam.”
ⅩⅩ Kapipa hili, naacoop lompo elontoŋ ya eti elaan ya naasok: “Elontoŋ eyye eti písiyool pa péeyeeni pa piti Pútuun pa niŋ pakan etempo; elaan eteyyo ekina eyem hísimam heeniisee ha kamma aluu.
ⅩⅪ Pale nisincan: Epees aŋa eekaakaay ya hífulu ti inci, yoopiya le niŋ etoom ya ti púus pa.
ⅩⅫ Kaatuko inci, Añii An, faket samat nii fa Pútuun pa mpusoke fa, pale kúnuul efikiyeno ti aŋa éefule ya ti inci.”
ⅩⅩⅢ Pupoñapoñ pa pakateyoo nkáyaañ picakanool ayme akaakaay íhinu eehuu.
Pílaacinool pa piti aŋa eehaŋe ya pamake
ⅩⅩⅣ Pinapana pa pakati Yéesu nkayeno pílaacinool peesowa cút ti eecukee nii akina ayem aŋa eehaŋe ya pamake.
ⅩⅩⅤ Yéesu naasokii: “Ti púlunta pa, pumansa pa kataakaataak sempe ti pakan paka, pakati kayine ka nkálafi kapisokee píhina heenape.
ⅩⅩⅥ Pale fotom nkaakaay piyeno ti aluu. Eemaka ya ti aluu añaŋaa piyeno nii akelan, ati hikaw ha samat nii amiikan.
ⅩⅩⅦ Ayme ayem eemaka ya, aŋa nkawufane ya apili fo amiikan a? Fo aŋa nkawufane ya tom hili ha? Pale inci oopa le ti pututa aluu samat nii amiikan.
ⅩⅩⅧ “Nisiiŋaasiiŋo niŋ inci ti páciite pa putoom.
ⅩⅩⅨ Samat nii fa Paapaa atoom naawufanaam fa cáwii fo lompo inci fáhin aluu nipiyeno pakati kikaw.
ⅩⅩⅩ Ancuk innili innilaan niŋ inci pati cáwii ca citoom, inniyeno ti pilemeyu pa kati ínnihin kíiti miin ma ŋaasuwan niŋ músupak ma miti Israyel.”
Kakaman ka kiti Yéesu pilaaco pa piti Piyeer
ⅩⅩⅪ Fiye, Yéesu naasok Simon: “Simon, Simon, síitan. Seetaani ewufaneewufan kayine kiti káahaafeen aluu samat nii uli, kápikatinool cácuuf ca niŋ kilehut ka.
ⅩⅩⅫ Pale inci luumaaluum kitii ancuk káyinan ka kitii timpi kiñoho puson, niŋ áañohooniyoo peti inci mpampaŋan pakani ti káyinan.”
ⅩⅩⅩⅢ Piyeer naasokoo: “Ateeteyo, inci siiŋaasiiŋo pikaayu niŋ awe ti ékuluma háati eket n’awe.”
ⅩⅩⅩⅣ Yéesu naañahanoo: “Piyeer, inci pusoki, fíyooy káayiin ekutoon kúlookum áafalaacin fo ñíhaaciil nii áameyiyam-méyi.”
Mañ, epootak niŋ káakuntu
ⅩⅩⅩⅤ Púful toko Yéesu naasok pinapana pa pakateyoo: “Ta inci mpoñe ta aluu peeyekanut mañ, peeyekanut epootak, peeyekanut pisamata púsupiyenu, weyme innitaakut po?” Nkasokoo: “Waah óo waah nuutaake po.”
ⅩⅩⅩⅥ Naasokii: “Fiye, an eetaake mañ naacoopool mo, aŋa lompo eetaake epootak naacoopool yo, aŋa eetaakut káakuntu anooman hísool ha hiteyoo henfakat ha naanoom koonool.
ⅩⅩⅩⅦ Kaatuko inci pusok aluu: Heekiicee ha kutoom ti hilim ha hiti Pútuun pa fo hitaako. Hisok: 'Nkacokoo samat nii áhina heenaput.' Pánipani, heekiicee ha ti inci efihitaako.”
ⅩⅩⅩⅧ Pinapana pa pakateyoo nkasokoo: “Ateeteyo ehe úkuntu úsupak.” Naasokii: “Fomaa.”
Kaluum ka kiti Yéesu ti cítintiŋ ca citi Olif
ⅩⅩⅩⅨ Yéesu náaful ti saatee ya apikaay pati cítintiŋ ca citi Olif samat nii fa naasale fa íhinu, pinapana pa pakateyoo nkanapool neyoo.
ⅩⅬ Kapucol po, naasokii: “Niluum timpi ninow ti híluuŋu.”
ⅩⅬⅠ Naateeŋo caahinkiŋ ápilaaŋii, náakilipo, naaluum:
ⅩⅬⅡ “Paapaa, niŋ súumuu, fúlan elontoŋ ya eti kúnuul enke ti inci, timpi yeno ti pásuuma pa putoom, pale ti pitii pa.”
ⅩⅬⅢ Maleekoo néefulii alacana epipenanoo sempe.
ⅩⅬⅣ Ti oom kúnuul kenfakat Yéesu naapenan kaluum meemak fo hásuwat ha hiteyoo níhifulii nihisotal t’etaam picuk nii hísim.
ⅩⅬⅤ Apílitoonii ti kaluum enkuu, náañohoonii peti pinapana pa pakateyoo náatookiyii ti hiŋotu kamma kúnuul.
ⅩⅬⅥ Naacakanii: “Weyme uwune ínniyemi ti hiŋotu? Nilito inniluum ancuk timpi ninow ti híluuŋu.”
Hicokuyee ha hiti Yéesu
ⅩⅬⅦ Yéesu ti káakup, kayoŋ nkícolii teyoo. Ti kayoŋ ka, intaako toko ñíhampaatiin puwaaseena pakati Pútuun, niŋ ñíhampaatiin pakati púwuulu pa keeyeniye ka efaas ekumpaan ya enfakat ya eti Pútuun pa, niŋ pakakee ñíhampaatiin. Yutas, akee ti pinapana pa ŋaasuwan niŋ pákasupak paka, ánowii hátikin. Naaloh Yéesu kati asumpoo.
ⅩⅬⅧ Pale Yéesu naasokoo: “Yutas niŋ hisumpu ánfule ti inci, Añii An!”
ⅩⅬⅨ Ta pinapana pa pakateyoo nkacuke ta heekaakaay ha pitaako nkacakanoo: “Ahámpaatiin, fo unii úfulanii úkuntu wa utoonii?”
Ⅼ Oonool teyii náañakii káakuntu ka kiteyoo naafiit kaanuu káali kiti amiikan a ati awaaseena ya enfakat a.
ⅬⅠ Pale Yéesu naasok: “Nikat po, eehe hifomaa!” Náalik kaanuu áyiin a náakuuñan ko.
ⅬⅡ Fiye, Yéesu naasok ñíhampaatiin ña kéekeyii ka hicokuyoo: “Fo niñaŋaa ékey niŋ úkuntu niŋ kikasap samat nii pucoka ekancak?
ⅬⅢ Hinak óo hinak inci iyyeniye niŋ aluu ti ekumpaan ya enfakat ya eti Pútuun pa, nicokutam, pale, caanak ence citaaluu niŋ citi sempe sa siti énimaan ya.”
Káalaacin ka kiti Piyeer kameye ka kiti Yéesu
ⅬⅣ Fiye, nkacok Yéesu, nkacoopoo la ti ekumpaan ya eti awaaseena ya enfakat a ati Pútuun pa. Piyeer náalaaŋ naayeniyii kanapan.
ⅬⅤ Nkacokan seemak senfakat ti pututa hank ha nkayeno kápikiipool so, Piyeer naayeno neyii.
ⅬⅥ Amiikan aal naacukoo naayeniye toko pukol seemak sa. Naasincanoo púsooni naasok: “Ayíin aŋe lompo ayenaayeno niŋ Yéesu!”
ⅬⅦ Pale Piyeer náalaacin ho naasok: “Iññáayuu, inci míitoo!”
ⅬⅧ Pifiyo caahinkiŋ, akee naacukoo naasok: “Awe lompo akee ti pinapana pa pakateyoo!” Piyeer naasok: “Haani, inci neetaat niŋ poko.”
ⅬⅨ Máamun etalaŋ yoonool eemuuse, akee naaŋiino ti hisoku: “Pánipani áyiin aŋe ayenaayeno niŋ Yéesu kaatuko akina lompo ati Kalilee!”
ⅬⅩ Piyeer naasok: “Haani, inci míit eeha ayyem ti hisoku!” Akina ti káakup, tokotoko káayiin ekutoon nkílookii.
ⅬⅪ Ateeteyo náayesoonii naasincan Piyeer táh. Piyeer náanawuno hilim eeha Ateeteyo naasokoo ha: “Fíyooy, káayiin ekutoon kúlookum áafalaacin fo ñíhaaciil nii áameyiyam-méyi.”
ⅬⅫ Náaful tíkitaaŋ naakooŋ meemak.
ⅬⅩⅢ Pákayiin paka keeyeniye ka efaas Yéesu nkápalahooloo nkalenkenoo, nkasapoo.
ⅬⅩⅣ Nkacenk ñíkinoo nkasokoo: “Yaamakool! Sok unii ayme ayemuu ti hisapu?”
ⅬⅩⅤ Nkateñaloo niŋ hícump kikee kilim.
Yéesu hátikin píhina kíiti ya
ⅬⅩⅥ Cipilap, ñíhampaatiin ña pakati Pusuwif pa, niŋ ñíhampaatiin puwaaseenapa pakati Pútuun pa, niŋ pikalaŋana hilim ha heesiiŋanee ha nkaconcool. Yéesu náacoopiyee hátikinii.
ⅬⅩⅦ Nkacakanoo: “Sok unii fo awe yem Eenucee ya ati Pútuun pa?” Yéesu naañahanii: “Niŋ inci ñahanaa aluu, étiniyinanam.
ⅬⅩⅧ Niŋ inci cakanaa aluu, etiniñahanam.
ⅬⅩⅨ Pale písik fíyooy, inci, Añii An, fayeno ti epees yáali eti Pútuun pa piti sempe.”
ⅬⅩⅩ Poko púlooŋ nkacakanoo: “Awe aŋuu yem Añii Pútuun?” Yéesu naañahanii: “Aluu himuum aluu nisoke nii inci yem akina.”
ⅬⅩⅪ Fiye, nkasok: “Usoolahutaa hísiyu hiti an eetantake! Usíyaasi ho ti putumoo!”