3
‑Tonyiblo ‑mʋ', ‑ɛ kuo Nyɩsʋa ꞊wlʋ yɩ, ɛ nɔ‑ Nyɩsʋa wɛ
1 'A mʋ Galatɩkʋɛ, a 'yɩ 'lulɛ‑hihie ‑kɔ. 'N pʋ꞊ʋ ꞊han‑tɩ, ‑ɛ mɔ, nyiblo ꞊dʋ ‑kaa nɛ 'a mʋ. ‑Tɛ ‑Yusu 'Klɩsʋ nu 'kʋkʋʋ, 'kɩ 'ʋ tugbɛ 'yie, 'n ‑hɩhɩa 'a mɔ꞊ɔ klɛ nɩ ‑tɛɛ.
2 'N ‑hʋɛ ꞊bʋ 'bɛti 'a mʋ: ꞊Bɩ ‑tɛ a ꞊tui 'ʋ ‑Juukʋɛ* a tete 'ʋ, ɛ nɔ‑ nu꞊o, Nyɩsʋa 'ɛ ‑nyi 'a mʋ 'a ‑Hihiu*? 'Ʋʋn‑. 'A ꞊haantitie ‑mʋ', ɛ nɔ‑ a pʋ nʋa yɩ bʋ, ɛ kɔ, 'a kuo ‑Yusu ꞊wlʋ yɩ. Ɛ nɔ‑ kɔ ‑tɩ, 'ɛ ‑nyi 'a mʋ 'a ‑Hihiu. ꞊Bɩ ɛ 'yɩ 'mʋ lɛ ‑nɩ?
3 Dɛ‑ kɔ ‑tɩ, 'a 'yɩ 'kɩ 'a lɛyuyruo ‑kɔ? Dɛ‑ kɔ ‑tɩ, ‑kʋan ‑mʋ', Nyɩsʋa a ‑Hihiu ꞊tu ‑wlu, 'kɩ 'lɩ 'a mʋ 'lɩ, 'a ‑hʋɛ ba ‑yra꞊a 'lu, 'kɩ 'lɩ 'aan dɩɔnʋ a 'klɩ 'kwli 'lɩ?
4 ꞊Bɩ ꞊haandɛ a pɛpɛ ‑mʋ', Nyɩsʋa nu 'a mʋ ‑mɔ, ɛ mɔ dadʋ ꞊nɩɔ? 'Ʋʋn‑, 'n 'yɩ꞊ɩ ꞊han‑tɩ ‑pʋ, 'kɩ bʋ di dadʋ' pa.
5 Nyɩsʋa yɩ ‑nyi 'a mʋ 'a ‑Hihiu, 'ɛ ni ꞊wlɩlɛkɛɛ‑tɛblɩ, 'kɩ 'lɩ 'a mʋ 'nyɩ. ꞊Bɩ ba yɩ 'ʋ ‑Juukʋɛ a tete a ‑tɩ nɩ ꞊tui ‑nɩ a ‑tɩ, ɛ nɔ‑ kɔ ‑tɩ 'ɛ ni꞊e? 'Ʋʋn‑, ɛ ni꞊e nɩ, ‑kɔtɩ a pʋ 'a ꞊haantitie nʋa yɩ bʋ, 'a kuo ‑Yusu ꞊wlʋ yɩ.
6 Ba ‑hie ‑aan 'baɩ gbagbʋ Abrahamʋ a dɛ 'lu ‑mɔ lɛ. Ʋ 'crɩɩ 'lɩ Nyɩsʋacrɩɛn 'kwli nɩ, ‑ɛ mɔ: «Abrahamʋ kuo la Nyɩsʋa ꞊wlʋ yɩ. ‑Tɛ ɛ kuo la Nyɩsʋa ꞊wlʋ yɩ, ɛ nɔ‑ nu꞊o, Nyɩsʋa 'ɛ 'sii la 'ʋ꞊ʋ yɩ, 'kɩ 'ʋ 'a dɩɔnʋ ye'.»
7 Dɛ a 'mʋ, ɛ ꞊hɛn 'nyrɛ, ‑ɛ mɔ, nyibli ‑mʋ', ‑ʋ kuo ‑Yusu ꞊wlʋ yɩ ‑tɛɛ, ʋ nʋ‑ mɔ Abrahamʋ a sɛyɩ‑sɛyɩ a 'yonʋ a 'yonʋ.
8 Ti ‑hi la a ti 'yri, ʋ 'crɩ la꞊a nɩ, 'kɩ 'lɩ Nyɩsʋacrɩɛn 'kwli, ‑ɛ mɔ: «Nyibli ‑mʋ', ‑ʋ 'yɩ ‑Juukʋɛ 'pa‑, ʋ di kuo Nyɩsʋa ꞊wlʋ yɩ, ɛ kɔ, Nyɩsʋa 'mʋ 'ʋ ꞊nʋ yɩ 'sii ‑nɩ ‑wɛ, 'kɩ 'ʋ 'a dɩɔnʋ ye'.» Dɛ a 'mʋ a ‑tɩ, ɛ nɩ la ke', Abrahamʋ 'ɛ 'wɩn la Nyɩsʋa a ꞊haantitie, Nyɩsʋa 'ɛ lee ꞊nɛ, ɛ wɛn: «'Kɩ 'n di 'lɩ ‑mʋ 'lɩ naa ‑nɩ, 'mʋ dakɔ a pɛpɛ, ‑ʋ nɩ 'nɛ‑ ‑tʋtʋ kɩ ꞊haandɛ ‑mɔ nu.»
9 Abrahamʋ kuo la Nyɩsʋa ꞊wlʋ yɩ. Ɛ nɔ‑ nu꞊o, Nyɩsʋa 'ɛ nu꞊o ꞊haandɛ ‑mɔ, 'tɩ‑, nyibli a pɛpɛ ‑mʋ', ‑ʋ kuo Nyɩsʋa ꞊wlʋ yɩ ‑wɛ, ɛ di nu ꞊nʋ ꞊haandɛ ‑mɔ.
10 Nyibli ‑mʋ', ‑ʋ yɩ꞊ɩ 'lu ‑mɔ lɛ ‑hie, ‑ɛ mɔ, Nyɩsʋa di 'ʋ ꞊nʋ yɩ 'nɩ 'sii ‑nɩ, 'kɩ 'ʋ 'a dɩɔnʋ ye', ‑ɛ nu꞊o, ‑tɩ ‑mʋ', tete ‑hlɛ, nɔ‑ ʋ ni, nyibli a 'mʋ, Nyɩsʋa a ‑bati di ꞊nʋ 'nɩ klɔ. 'Ɛ mɔ ‑tɛɛ, Nyɩsʋa a win 'ɛ pɩ lɛ: «Nyiblo 'bʋ 'yɛ nɩ ꞊tuu 'ʋ tete a pɛpɛ ‑mʋ', ʋ 'crɩɩ 'lɩ Nyɩsʋacrɩɛn 'kwli, 'a ‑nɛ ti, nyiblo a 'mʋ, Nyɩsʋa a ‑bati di꞊e 'nɩ klɔ.»
11 ‑A yi꞊e nɩ, ‑ɛ mɔ, ɛ 'yɩ nyiblo ꞊dʋ ‑kɔ, ‑bʋ 'sii 'ʋ yɩ, 'kɩ 'ʋ Nyɩsʋa ye', 'a tete a 'ʋ꞊tuulɛ a ‑tɩ. ‑A yi dɛ a 'mʋ nɩ, ‑ɛ nu꞊o, kɛ‑ Nyɩsʋa a win pɩ, ‑ɛ mɔ: «Nyiblo ‑mʋ', ‑ɛ kuo Nyɩsʋa ꞊wlʋ yɩ, nɔ‑ 'sii 'ʋ yɩ, 'kɩ 'ʋ Nyɩsʋa ye'. Nyiblo a 'mʋ, ɛ nɔ‑ di 'klɔ nɩ.»
12 Kɛɛ, ʋ 'crɩ꞊ɩ nɩ, 'kɩ 'lɩ Nyɩsʋacrɩɛn 'kwli, ‑ɛ mɔ: «Nyiblo ‑mʋ', ‑ɛ ꞊tui 'ʋ tete 'ʋ, ɛ nɔ‑ di 'klɔ nɩ.» Dɛ a 'mʋ, ɛ tʋɛ nɛ ‑a mʋ nɩ, ‑ɛ mɔ, tete a 'ʋ꞊tuulɛ, kɔ Nyɩsʋa a ꞊wlʋ a yɩkuolɛ 'hʋɛn‑, ʋ 'yɩ dɛ ‑nɩ ‑do 'pa‑.
13 'A ‑tɩ, Nyɩsʋa a ‑bati klɔ ‑a mʋ nɩ, ‑ɛ nu꞊o, ‑a 'yɩ 'ʋ tete 'ʋ ꞊tuu ‑nɩ ‑tɛɛ. Kɛɛ, ‑Yusu 'Klɩsʋ, nɔ‑ ‑di, 'ɛ nyra 'ʋ ‑aan ‑ta' bʋ, Nyɩsʋa a ‑bati 'ɛ klɔ꞊ɔ. Dɛ a 'mʋ, ɛ nɔ‑ kɔ 'kwli ɛ naa 'lɩ, 'ɛ wa ‑a ‑mʋ, ‑ɛ di꞊e nu, Nyɩsʋa a ‑bati 'nɩ ꞊ha ‑a mʋ klɔ de. Kɛ‑ ʋ nu la 'a 'cɩcrɩɩ, 'kɩ 'lɩ Nyɩsʋacrɩɛn 'kwli, ‑ɛ mɔ: «'Bʋ mɔ, 'bʋ 'ba nyiblo bʋ, 'kɩ 'lɩ tugbɛ yra, ɛ ꞊hɛn 'nyrɛ, ‑ɛ mɔ, nyiblo a 'mʋ, Nyɩsʋa a ‑bati klɔ꞊ɔ nɩ.»
14 Kɛ‑ ‑Yusu 'Klɩsʋ nu 'a nunuo, ‑ɛ di꞊e nu, ꞊haandɛ ‑mʋ', Nyɩsʋa pʋ la lɛ, ɛ di la Abrahamʋ ‑mɔ nu, nyibli ‑mʋ', ‑ʋ 'yɩ ‑Juukʋɛ 'pa‑, ɛ 'mʋ ꞊nʋ꞊ʋ ‑mɔ nu ‑wɛ, dɛ ‑mʋ', ‑Yusu 'Klɩsʋ ‑nu a ‑tɩ. Kɛ‑ ‑Yusu nu 'a nunuo ‑wɛ, ‑ɛ di꞊e nu, ‑tɛ ‑a kuo ꞊nɛ ꞊wlʋ yɩ, Nyɩsʋa 'mʋ ‑a mʋ 'a ‑Hihiu, ɛ pʋ la lɛ, ɛ di la ‑a mʋ ‑nyi ‑nyi.
꞊Haandɛ ‑mʋ', Nyɩsʋa pʋ la 'lɩ, 'kɩ 'ʋ Abrahamʋ ‑mɔ
15 'Na 'dɩayɩnʋ ‑na, ꞊bʋ pʋ꞊ʋ 'yrɩ a ꞊tutuo a dɛ yɩ. 'Bʋ mɔ, dakɔgble nɩ 'hʋɛn, 'bʋ ‑wɛn, 'kɩ bʋ ꞊tu 'yrɩ, ‑ɛ ‑bɩ nyiblo ꞊dʋ 'yɩ 'lɩ꞊ɩ 'lɩ ‑wɛ, bʋ nyre 'yrɩ a 'mʋ yɩ, mɔ, nyiblo ꞊dʋ 'yɩ 'lɩ꞊ɩ 'lɩ ‑wɛ, bʋ pʋ 'ʋ꞊ʋ dɛ 'lu.
16 Kɛ‑ nɩ ‑do ɛ ꞊ti 'mʋ, 'kɩ 'ʋ Nyɩsʋa a 'yrɩ ‑mʋ', ɛ ꞊tu la, ɛ kɔ Abrahamʋ 'hʋɛn‑ a ‑ta'. Ti ‑mʋ', ‑ɛ kɔ 'yri Nyɩsʋa ꞊tui la 'yrɩ a 'mʋ, ɛ kɔ Abrahamʋ 'hʋɛn‑, ɛ lee la꞊a nɩ, ‑ɛ mɔ, ꞊haandɛ ‑mʋ', ‑kɔtɩ ɛ hlɛ, ɛ di la ꞊nɛ꞊ɛ ‑mɔ 'nɩ nu, ɛ kɔ 'a 'yonʋ a 'yonʋ 'hʋɛn‑. Kɛɛ, sɛyɩ‑sɛyɩ, Nyɩsʋacrɩɛn 'nɩ ‑pʋ꞊ʋ lɛ, ‑ɛ mɔ, ꞊haandɛ a 'mʋ, ɛ di nu la꞊a Abrahamʋ ‑mɔ, kɔ 'a 'yonʋ a 'yonʋ 'hʋɛn‑. Kɛɛ, ɛ wɛn 'nɩ, ɛ di nu la꞊a 'a 'yonʋ a 'yu nɩ ‑do ‑mɔ. 'Yu a 'mʋ, ɛ nɔ‑ mɔ ‑Yusu 'Klɩsʋ.
17 ‑Tɩ 'n ‑hʋɛ ꞊bʋ hla, ɛ nɔ‑ mɔ: Nyɩsʋa ꞊tu 'yrɩ, ɛ kɔ Abrahamʋ 'hʋɛn‑, 'ɛ gba 'yrɩ a (430) ‑hɔtrʋwɩ nɩ ‑hɛn nɛ 'yrɩ a ꞊wlʋ ꞊tu 'ʋ ‑pu, 'tɩ‑ 'ɛ ‑ha 'lɩ tete, 'ɛ ‑nyi꞊e 'a dakɔ, ‑ʋ mɔ ‑Juukʋɛ*. Dɛ a 'mʋ, ɛ ꞊hɛn 'nyrɛ, ‑ɛ mɔ, 'yrɩ ‑mʋ', Nyɩsʋa ꞊tu, ɛ kɔ Abrahamʋ 'hʋɛn‑, ɛ kɔ ꞊haandɛ ‑mʋ', ɛ pʋ la lɛ, ɛ di la꞊a ‑mɔ nu, tete 'yɩ 'lɩ꞊ɩ 'lɩ ‑wɛ, bʋ nyre꞊e yɩ.
18 'Bʋ mɔ, Nyɩsʋa 'bʋ yɩ wɛn nyibli ꞊haandɛ ‑mɔ nɩ ni, ‑tɛ ʋ ꞊tui 'ʋ tete a ‑tɩ, ‑ɛ ‑bɩ ɛ 'wɩ yɩ, ɛ 'yɩ ‑tɛ ɛ pʋ la lɛ, ɛ di la ꞊nʋ ꞊haandɛ ‑mɔ nu a ‑tɩ, ɛ 'nɩ ‑nu꞊o wɛn ꞊nʋ꞊ʋ ‑mɔ. Kɛɛ, Nyɩsʋa nu la Abrahamʋ ꞊haandɛ ‑mɔ, ‑kɔtɩ ɛ pʋ la 'lɩ ꞊nɛ꞊ɛ nɩ. Ɛ 'yɩ ꞊bɩ Abrahamʋ a 'mʋ bʋ ꞊tuu 'ʋ tete 'ʋ a ‑tɩ, ɛ 'yɩ la꞊a ꞊haandɛ ‑mɔ ‑nu.
Dɛ‑ kɔ ‑tɩ Nyɩsʋa 'ɛ ‑nyi ‑a mʋ 'a tete
19 ‑Tɛ ɛ nɩ 'mʋ lɛ, ‑baklɛ, nyiblo ꞊dʋ di 'nɩ 'bɛti ‑nɩ: Dɛ‑ kɔ ‑tɩ Nyɩsʋa 'ɛ ‑nyi ‑Juukʋɛ* 'a tete 'lɩ? Nyɩsʋa ‑nyi ‑a mʋ 'a tete nɩ, ‑ɛ di꞊e nu, ‑tɛblɩ ‑mʋ', ‑ɛ nyre yɩ, 'kɩ 'ʋ꞊ʋ ye', ‑a 'mʋ꞊ʋ yi. Ɛ ‑nyi ‑a mɔ꞊ɔ nɩ, 'kɩ 'lɩ ti gbi 'kwli, ɛ 'mʋ꞊ʋ gba ‑gbagba, Abrahamʋ a 'yonʋ a 'yu ‑mʋ', Nyɩsʋa pʋ la lɛ, ɛ di la ꞊haandɛ a 'mʋ ‑mɔ nu, ɛ 'mʋ di. 'Yu a 'mʋ, ɛ nɔ‑ mɔ ‑Yusu 'Klɩsʋ. ‑Tɛ ‑Yusu ‑di 'kɩ, ‑ɛ ‑bɩ tete 'yɩ 'kɩ 'klɩ ꞊dʋ ‑kɔ de. Nyɩsʋa ‑ha la 'lɩ tete, 'ɛ ‑nyi la꞊a 'a lɛlenyʋ, lɛlenyʋ a 'mʋ, 'ʋ ‑nyi la꞊a ‑tonyibli. Ti ‑mʋ' ‑kɔ 'yri ʋ yɩ la 'ʋ ꞊nʋ꞊ʋ ‑nyii ‑nɩ, ‑ɛ ‑bɩ 'kɩ Nyɩsʋa a winwlɔn‑hanyɔ* Moise nɩ la 'ʋ Nyɩsʋa kɔ ‑tonyibli 'hʋɛn‑ a ‑gbati.
20 Kɛɛ, ‑tɛ Nyɩsʋa yɩ la Abrahamʋ nɩ ‑lee ‑nɩ, ‑ɛ mɔ, ɛ di nu la꞊a ꞊haandɛ ‑mɔ, Nyɩsʋa a ꞊gbɛtʋ, nɔ‑ hlee la 'lɩ꞊ɩ ‑mɔ. Ɛ 'yɩ 'lɩ nyiblo ꞊dʋ 'lɩ ‑naa ‑nɩ.
21 ꞊Bɩ dɛ a 'mʋ, ɛ ꞊hɛn 'nyrɛ, ‑ɛ mɔ, Nyɩsʋa a 'lɩpʋdɛ, kɔ tete 'hʋɛn‑, ʋ 'yɩ ‑pɛ? 'Ʋʋn‑, ɛ 'yɩ 'mʋ lɛ ‑nɩ. 'Bʋ mɔ, Nyɩsʋa a tete ‑mʋ', ɛ ‑nyi ‑tonyibli, 'bʋ yɩ wɛn nyibli 'klɔ yrayrʋ nɩ ‑nyi, ‑ɛ ‑bɩ ɛ ‑wɛ wɛn 'lɩ꞊ɩ nɩ, 'kɩ bʋ 'sii wɛn 'ʋ nyibli yɩ, 'kɩ 'ʋ Nyɩsʋa ye'. Kɛɛ, ɛ 'yɩ tete ꞊dʋ ‑kɔ, ‑bʋ nu dɛ a 'mʋ.
22 Kɛɛ, ʋ 'crɩɩ 'lɩ Nyɩsʋacrɩɛn 'kwli nɩ, ‑ɛ mɔ, 'kɩ 'klɔ ‑bʋ kɩ a nyibli a pɛpɛ nɩ 'lɩ dɛ 'kuku a 'klɩ bʋ. Kɛ‑ ɛ nɩ 'mʋ, ‑ɛ di꞊e nu, ꞊haandɛ ‑mʋ', Nyɩsʋa pʋ la lɛ, ɛ di la nyibli ‑mɔ nu, ɛ 'mʋ꞊ʋ nyibli ‑mʋ', ‑ʋ kuo ‑Yusu 'Klɩsʋ ꞊wlʋ yɩ ‑mɔ nu. Ɛ ni ꞊nʋ꞊ʋ ‑mɔ, ‑ɛ nu꞊o, ʋ kuo ‑Yusu 'Klɩsʋ ꞊wlʋ yɩ.
23 Ti ‑hi la a ti 'yri, ‑tɛ 'hru 'yɛ la 'ʋ bʋ nɩ pɛ, 'kɩ nyibli bʋ kuo la ‑Yusu 'Klɩsʋ ꞊wlʋ yɩ, ‑Juukʋɛ a tete nu la꞊a nɩ, ꞊a mɔ la ꞊jɩklapʋ, ꞊a ꞊tui la 'ʋ꞊ʋ, 'ɛ gba꞊a ‑gbagba, Nyɩsʋa 'ɛ ya ‑a mʋ ‑Yusu 'Klɩsʋ yɩ, 'ɛ tɔɔ nɛ ‑a mʋ 'hru ‑mʋ', ‑a di na, 'tɩ‑ ‑Yusu 'Klɩsʋ a 'mʋ, ‑a 'mʋ꞊ʋ ꞊wlʋ yɩ ‑kuo ‑nɩ.
24 Tete a 'mʋ, ɛ 'wɩ la ‑aan naanyɔ yɩ, ‑ɛ kla 'yi, 'ɛ gba꞊a ‑gbagba, ‑Yusu 'Klɩsʋ 'ɛ ‑di. Kɛ‑ tete a 'mʋ, ɛ nɩ la 'mʋ, ‑ɛ di꞊e nu, ‑tɛ ‑Yusu 'Klɩsʋ ‑di, Nyɩsʋa 'mʋ 'ʋ ‑a mʋ yɩ 'sii ‑nɩ, 'kɩ 'ʋ 'a dɩɔnʋ ye', ‑ɛ nu꞊o, ‑a kuo ‑Yusu 'Klɩsʋ a 'mʋ ꞊wlʋ yɩ.
25 ‑Tɛ ti nɛ ‑bʋ, 'hru pɛ 'ʋ bʋ, 'kɩ ‑ba kuo ‑Yusu 'Klɩsʋ ꞊wlʋ yɩ. Tete 'yɩ 'kɩ ‑aan naanyɔ 'pa‑.
26 'Aan pɛpɛ, a mɔ Nyɩsʋa a 'yonʋ ꞊nɩɔ, ‑ɛ nu꞊o, a kuo ‑Yusu 'Klɩsʋ ꞊wlʋ yɩ. Ɛ ꞊hɛn 'nyrɛ, ‑ɛ mɔ, a kɔ ‑Yusu 'Klɩsʋ 'hʋɛn‑, a ‑mʋɛ nɩ.
27 Ʋ pʋ 'a mʋ 'nie 'lu, ‑ɛ di꞊e nu, a kɔ ‑Yusu 'Klɩsʋ 'hʋɛn‑, a 'mʋ ‑mʋɛ. ‑Tɛ ti nɛ ‑bʋ, a gba ‑Yusu 'Klɩsʋ a ꞊wlʋ.
28 ‑Mɔ ‑Juukʋɛyu, ꞊yɩ ‑Juukʋɛyu 'pa‑, 'kɩ 'ʋ Nyɩsʋa ye', 'yilɛ'jɩjra ꞊dʋ 'yɩ 'ʋ ‑nɩ. ꞊Bɩ ‑mɔ ꞊koyu, ‑ʋ'ʋ‑ ꞊yɩ ꞊koyu 'pa‑, ‑mɔ nyɩbɛyu gbe, ‑mɔ nʋgba, 'kɩ 'ʋ Nyɩsʋa ye', 'yilɛ'jɩjra 'yɩ 'ʋ ‑nɩ. 'Aan pɛpɛ, a kɔ ‑Yusu 'Klɩsʋ 'hʋɛn‑, a ‑mʋɛ nɩ, 'a mɔ dɛ nɩ ‑do.
29 ‑Tɛ a mɔ ‑Yusu 'Klɩsʋ a nyibli, ɛ ꞊hɛn 'nyrɛ, ‑ɛ mɔ, a mɔ Abrahamʋ a 'yonʋ a 'yonʋ ꞊nɩɔ ‑wɛ. 'A ‑tɩ, ꞊haandɛ a pɛpɛ ‑mʋ', Nyɩsʋa pʋ la lɛ, ɛ di la Abrahamʋ kɔ a 'yonʋ 'hʋɛn‑ ‑mɔ nu, ɛ di nu 'a mɔ꞊ɔ ‑mɔ ‑wɛ.