6
‑Ba ‑hɩhɛɛ ‑nɩ
1 'Dɩayɩnʋ ‑na, 'bʋ mɔ, ba 'ye nyiblo, 'bʋ yɩ dɛ 'kuku nɩ ni, 'a mʋ ‑mʋ', Nyɩsʋa a ‑Hihiu* nɛɛ ‑nɩ, ba ‑hɛɛ ꞊nɛ, ‑ɛ di꞊e nu, ɛ 'mʋ 'ʋ ꞊haan'hru wlɔn bi de. Kɛɛ, ba nu꞊o, 'kɩ 'lɩ ꞊wlʋ 'yɔpɔ 'kwli, ɛ kɔ, ba ꞊tu 'aan dɩɔnʋ 'yie, ‑ɛ di꞊e nu, a 'nɩ ꞊ha dɛ 'kuku nu ‑wɛ.
2 Ba ‑hɩhɛɛ ‑nɩ, 'kɩ 'lɩ 'aan 'kla‑wliye'yɩya 'kwli. 'Bʋ mɔ, 'ba yɩ꞊ɩ lɛ nɩ ni, ‑ɛ ‑bɩ a ꞊tui 'ʋ ‑Yusu 'Klɩsʋ a tete nɩ.
3 Nyiblo ‑bʋ, ‑ɛ 'yɩ nyiblo ꞊dʋ 'pa, 'tɩ‑ ‑ɛ yɩ꞊ɩ 'ye, ‑ɛ mɔ, ɛ 'yɩ yɩ'wɩnyɔ ‑kɔ, 'kɩ 'lɩ 'a dɩɔnʋ a 'lɩ'yaalɛ 'kwli, ɛ kɛɛ nɛ 'a dɩɔnʋ nɩ.
4 'A ‑nɛ nyiblo 'bʋ nɩ 'ʋ, 'bʋ 'jɩjra 'a dɩɔnʋ a nunuklɔ. 'Bʋ 'ye꞊e, ‑ɛ mɔ, ɛ nɔ yɩ, ‑ɛ ‑bɩ 'a dɩɔnʋ a nunuklɔ di nuu ꞊nɛ dɔdʋ. Ɛ 'yɩ 'lɩ꞊ɩ 'lɩ ‑wɛ, bʋ nu 'kɩ dɔdʋ, ‑tɛ ɛ ‑hi 'ʋ 'a 'bɩ 'ʋ a ‑tɩ.
5 'A ‑nɛ nyiblo 'bʋ 'nɩ 'ʋ, ‑kʋan ‑mʋ', Nyɩsʋa ‑nyi꞊e, ‑tɛ ɛ ni 'a nunuo, 'a ꞊gbɛtʋ, ɛ nɔ‑ di 'a ‑tɩ Nyɩsʋa klɛ ‑hɩhɩa ‑nɩ.
6 Nyiblo ‑mʋ', ‑ɛ tʋɛ ‑Yusu a nyibli, ɛ nɔɔ 'ʋ lɛ, 'kɩ nyibli ‑mʋ', ɛ tʋɛ ‑nɩ, bʋ ‑ha 'lɩ 'waa kʋkɔ‑tɛblɩ ‑mʋ', ʋ ‑kɔ, bʋ ‑nyi ꞊nɛ 'a 'kɩbɩa.
7 A 'nɩ 'kaa 'lɩ 'aan dɩɔnʋ. Nyɔ 'nɩ 'caa꞊a lɩ Nyɩsʋa. Dɛ ‑tonyiblo 'dʋɛ, ɛ nɔ‑ ɛ yɩ 'cɛ.
8 Ɛ ꞊hɛn 'nyrɛ, 'bʋ mɔ, ‑tonyiblo 'bʋ yɩ Nyɩsʋa ꞊wlʋ yɩ ‑kuo ‑nɩ, 'bʋ yɩ ‑tɛblɩ ‑mʋ' nɩ ni, 'a ꞊wlʋ ‑hʋɛ, ɛ kɔ bʋ hlɔɔ Nyɩsʋa ‑mɔ lɛ, ‑tɛ 'klɔ tɛ yɩ bʋ. Kɛɛ, 'bʋ mɔ, ‑tɛblɩ ‑mʋ', Nyɩsʋa a ‑Hihiu ‑hʋɛ, 'bʋ yɩ꞊ɩ nɩ ni, ‑ɛ ‑bɩ Nyɩsʋa a ‑Hihiu a 'mʋ, ɛ di ‑nyi꞊e 'klɔ yrayrʋ, ‑ɛ 'yɛ nɩ ‑wɛ 'lɩ.
9 'A ‑tɩ, ‑a 'nɩ 'saa 'lɩ, 'kɩ ‑ba nu ꞊haandɛ 'a ‑nɛ ti, ‑kɔtɩ ꞊ba 'yɩ ‑sa, ɛ di kɔ ‑nyrɔwɔ, ‑ɛ kɔ 'kwli dɛ ‑bʋ, ‑a 'dɔ, ‑a 'mʋ꞊ʋ 'cɛ.
10 'A ‑tɩ, ‑tɛ ‑a 'tɩɛ kɔ ti, ‑ba nu nyibli a pɛpɛ ꞊haandɛ ‑mɔ, kɛɛ, sɛyɩ‑sɛyɩ, nyibli ‑mʋ', ‑ʋ kuo ‑Yusu ꞊wlʋ yɩ, ʋ nʋ‑ ‑ba nu ꞊haandɛ ‑mɔ.
‑Yusu a 'kʋkʋʋ, ɛ nɔ‑ kɔ ‑pli Pɔlʋ pɩ
11 Ba 'ye 'makɩbʋɩ gbagbɩ ‑bʋ, 'n ni, 'na ꞊gbɛtʋ, 'nɩ yɩ 'a mʋ ‑mɔ 'crɩɩ ‑nɩ.
12 Nyibli ‑mʋ', ‑ʋ ‑hʋɛ ‑bʋ nɔɔ 'lɩ nyibli a pɛpɛ 'yi klɛ, ʋ nʋ‑ nɩ 'ʋ 'a mʋ ke', ‑ʋ yɩ 'a mʋ ‑lee ‑nɩ, ‑ɛ mɔ, ba 'bɛ yrɛ. Nyiblidʋ a 'mʋ, ʋ 'nɩ ‑hʋa꞊a lɩ bʋ hla꞊a, ‑ɛ mɔ, nyiblo 'bʋ ꞊tuu 'ʋ ‑Juukʋɛ* a tete 'ʋ, Nyɩsʋa 'yɩ 'lɩ꞊ɩ 'lɩ ‑wɛ, bʋ wa꞊a, kɛɛ, nyiblo 'bʋ kuo ‑Yusu 'Klɩsʋ ‑mʋ' ꞊wlʋ yɩ, ‑ɛ 'kʋʋ 'ʋ tugbɛ 'yie, ‑aan dɛ 'kuku a ‑tɩ, nyiblo a 'mʋ, ɛ nɔ‑ Nyɩsʋa di wa. 'Bʋ mɔ, 'bʋ yɩ wɛn ‑tɩ a 'mʋ nɩ hlɛ, ‑Juukʋɛ kɔ bʋ ꞊tu wɛn꞊ɛ ꞊hɩʋɛn. Ɛ nɔ‑ kɔ hʋannʋ ʋ yɩ pie. Ɛ nɔ‑ nu꞊o, nyibli a 'mʋ 'ʋ yɩ 'a mʋ ‑lee ‑nɩ, ‑ɛ mɔ, ba 'bɛ yrɛ, a 'mʋ 'ʋ ‑Juukʋɛ a tete ‑bɩ 'ʋ ꞊tuu ‑nɩ ‑wɛ.
13 Ɛ mɔ, nyibli ‑mʋ', ‑ʋ 'bɛ yrɛ, ʋ 'nɩ ꞊tuu꞊o 'ʋ ‑Juukʋɛ a tete a 'mʋ a pɛpɛ 'ʋ. Ʋ ‑hʋɛ꞊ɛ nɩ, 'kɩ ba 'bɛ yrɛ, ‑ɛ di꞊e nu, ʋ 'mʋ 'waa dɩɔnʋ a ‑pli pʋ, ʋ 'mʋ꞊ʋ hla, ‑ɛ mɔ, ‑tɩ ‑mʋ', ʋ ‑hla, a 'ble꞊e kʋa.
14 'Mɔ ‑bɩ, dɛ ‑bʋ, ‑kɔtɩ 'nɩ pɩ ‑pli, ɛ nɔ‑ mɔ, 'kʋkʋʋ ‑mʋ', ‑aan Kʋkɔnyɔ ‑Yusu 'Klɩsʋ 'kʋ, 'kɩ 'ʋ tugbɛ 'yie. Bʋ 'kʋʋ 'ʋ tugbɛ 'yie, ɛ nu꞊o nɩ, 'klɔ ‑bʋ a ‑tɛblɩ a pɛpɛ, 'ɛ 'yɛ nɩ da ꞊dedede, 'kɩ 'lɩ 'mʋ 'yi. Ɛ 'wɩ yɩ, ‑tɛblɩ a 'mʋ, ʋ kɔɔ 'ʋ꞊ʋ tugbɛ 'yie, ɛ kɔ ‑Yusu 'Klɩsʋ 'hʋɛn‑. 'Na 'mumu a 'mʋ ‑bʋ, 'n 'wɩ꞊ɩ nyiblodʋ ‑mʋ' yɩ, ‑ɛ 'kʋʋ 'ʋ tugbɛ a 'mʋ 'yie, 'tɩ‑ ‑ɛ hie 'ʋ 'klɔ ‑bʋ a ‑tɛblɩ bʋ.
15 'Bʋ mɔ, nyiblo 'bʋ 'bɛ yɩ, ‑ʋ'ʋ‑ 'bʋ 'yɩ yɩ 'bɛ, ɛ 'nɩ ‑da꞊a ꞊dedede. Dɛ ‑mɔ dɛ gbagbʋ, ɛ nɔ‑ mɔ Nyɩsʋa bʋ nu꞊o, ‑ba ‑hɛ nyibli yrayrɩ.
16 Nyibli a pɛpɛ ‑mʋ', ‑ʋ nɛ 'hru yrayrʋ a 'mʋ, ‑kɔtɩ 'n hla wɛn, ʋ kɔ nyibli ‑mʋ', ‑ʋ mɔ Nyɩsʋa a sɛyɩ a dakɔ 'hʋɛn‑, ʋ nʋ‑ Nyɩsʋa yɩ 'a kɩbʋwɛɛnlɛ ‑nyi, kɔ, ʋ nʋ‑ kɔ nyaɩ ɛ yɩ yru.
17 Kʋɛ 'kɩ mɔ ‑nyrɔwɔ ‑bʋ 'yie bʋ, nyiblo ꞊dʋ 'nɩ 'yaa 'kɩ 'mʋ 'kla ‑wliye, ‑kɔtɩ 'pʋɩ ‑bʋ, ‑ʋ nɩ 'mʋ 'hʋɩ lɛ, ɛ nɔ‑ tʋɛ ꞊nɛ nyibli yɩ, ‑ɛ mɔ, 'mɔ ‑Yusu 'Klɩsʋ a nyiblo ꞊nɩɔ.
18 'Na 'dɩayɩnʋ ‑na, ‑aan Kʋkɔnyɔ ‑Yusu 'Klɩsʋ bʋ nu 'a mʋ ꞊haandɛ ‑mɔ. Kɛ‑ bʋ nɩ 'mʋ.