2
‑Tɛ ‑mʋ', ‑a kɔ ba nu ‑tɛblɩ a nunuo, 'kɩ 'lɩ 'cʋɛ 'kwli
1 Yɩ‑hɛdɛ, 'n ‑hʋɛ ba nu, 'a mʋ ‑Yusu a nyibli, ɛ nɔ‑ mɔ ba da Nyɩsʋa, 'kɩ 'ʋ nyibli a pɛpɛ a ‑ta', ba pʋ 'lɩ ꞊nʋ Nyɩsʋa ‑jɩ' bʋ, kɔ, ba ‑nyi Nyɩsʋa 'wio ‑wɛ, 'waa ‑tɩ.
2 Ba da Nyɩsʋa, 'kɩ 'ʋ 'kɩɩnpʋ kɔ bodɩɔpʋ kɔ 'blʋgbanaanyʋ a pɛpɛ a ‑ta', ‑ɛ di꞊e nu, ‑a 'mʋ plɔ a bleelɛ kɔ, ɛ kɔ kɩbʋwɛɛnlɛ 'hʋɛn‑, 'kɩ 'nɛ‑ 'klɔ ‑bʋ kɩ. ‑Ba ꞊tuu 'ʋ Nyɩsʋa 'ʋ, kɔ, ‑aan nunuklɔ bʋ 'sii 'ʋ yɩ.
3 Dɛ a 'mʋ, ɛ nɔ‑ nɔ yɩ, 'kɩ 'ʋ Nyɩsʋa ye'. Ɛ nɔ‑ wa ‑a mʋ,
4 kɔ, 'ɛ ‑hʋɛ bʋ wa nyibli a pɛpɛ, kɔ, 'ɛ ‑hʋɛ bʋ yi ‑tɩ a ‑tɛɛ.
5 Nyɩsʋa mɔ Nyɩsʋa nɩ ‑do. 'Kɩ ɛ nɩ 'lɩ 'kɩbɩa ‑bɩ kɩ, ‑tonyibli 'ʋ nɩ 'nɛ‑ 'kɩbɩa ‑bɩ kɩ. Nyiblo nɩ ‑do, ɛ nɔ‑ nɩ 'ʋ Nyɩsʋa kɔ ‑tonyibli 'hʋɛn‑ ‑gbati. Nyiblo a 'mʋ, ɛ nɔ‑ mɔ ‑Yusu 'Klɩsʋ, ‑ɛ ‑hɛ ‑tonyiblo.
6 Ɛ di 'nɛ‑ nɩ, 'ɛ ‑ha 'a dɩɔnʋ, 'ɛ 'kʋ, 'kɩ 'ʋ nyibli a pɛpɛ a ‑ta', ɛ 'mʋ ꞊nʋ ꞊gblɛ, 'kɩ 'ʋ 'waa dɛ 'kuku ‑mɔ', ɛ 'mʋ ꞊nʋ 'a nyibli ‑mɔ' nu. Kɛ‑ ‑Yusu nu꞊o nyibli a tɔɔlɛ, ‑ɛ mɔ, Nyɩsʋa ‑hʋɛ bʋ wa nyibli a pɛpɛ. Ti ‑mʋ', Nyɩsʋa wa la 'nyrɛ, 'kɩ ‑Yusu tɔɔ 'ʋ nyibli dɛ a 'mʋ.
7 Ɛ nɔ‑ kɔ ‑tɩ ‑Yusu 'ɛ nu 'mʋ 'a lɛlenyɔ ‑mɔ, kɔ 'a ‑mɔnanyɔ* 'hʋɛn‑, ‑ɛ di꞊e nu, nyibli ‑mʋ', ‑ʋ 'yɩ ‑Juukʋɛ* 'pa‑, 'mʋ ꞊nʋ Nyɩsʋa a ꞊haantitie ‑tɔɔ ‑nɩ, ʋ 'mʋ ‑Yusu ꞊wlʋ yɩ ‑kuo ‑nɩ, kɔ, ʋ 'mʋ ‑tɩ a ‑tɛɛ yi. ‑Tɩ ‑bʋ, 'n hlɛ, ɛ mɔ ꞊han‑tɩ ꞊nɩɔ, ɛ 'yɩ hɩ 'pa‑.
8 ‑Ɛ ‑bɩ 'kɩ, 'n ‑hʋɛ꞊ɛ nɩ, nyɩbɛpʋ bʋ da Nyɩsʋa, 'kɩ 'ʋ 'a ‑nɛ ‑tɩtɛ ꞊dʋ. 'Bʋ mɔ, 'bʋ yɩ꞊ɩ nɩ dɛ, 'waa ꞊wlɩ bʋ 'sii 'ʋ yɩ, yrʋ kɔ gblɛ 'nɩ 'nɩɩ 'lɩ 'waa ꞊wlɩ kɩ.
9 Nʋgbɩ ‑mɔ ‑bɩ, 'waa 'hʋɩlɛpʋ‑tɛblɩ, ʋ pɩ 'hʋɩ lɛ, bʋ kɔ 'ʋ, ʋ 'nɩ 'yaa 'lɩ 'waa dɩɔnʋ. 'Waa yɩnɩnɔ ʋ blɛɛ yɩ bʋ ꞊mʋɔ lɛ, ɛ 'yɩ bʋ bi 'ludʋ ‑mʋ', nyibli bʋ 'ye, 'ʋ 'tɛ 'ʋ blɛ, kɔ, ɛ 'yɩ bʋ ꞊tu 'lɩ nʋɩ꞊yrɩ 'waa dɩɔnʋ nʋɩ' lɛ, bʋ pʋ ‑ti dabʋɩ lɛ, kɔ, bʋ pʋ 'cɩɩn lɔ lɛ, ɛ kɔ 'hʋɩlɛpʋ‑tɛblɩ ‑mʋ', ‑ɛ pɩ ꞊die dɩakɩ.
10 ‑Tɛ ‑mʋ', 'waa yɩnɩnɔ kɔ bʋ nɩ 'mʋ, ɛ nɔ‑ ‑bʋ: 'Waa nunuklɔ kɔ bʋ 'sii 'ʋ yɩ. 'Bʋ yɩ nɩna lɛ nɩ ni, ‑ɛ ‑bɩ nyibli di꞊e 'nɩ 'ye, ‑ɛ mɔ, nʋgbɩ a 'mʋ, ʋ nʋɛ Nyɩsʋa nɩ, 'tɩ‑ 'ʋ ꞊tui 'ʋ꞊ʋ 'ʋ.
11 Nʋgbɩ 'bʋ yɩ Nyɩsʋa a tɔɔwin nɩ 'wɩn, ʋ blɛɛ yɩ, bʋ pʋ꞊ʋ nʋa yɩ bʋ, bʋ ꞊tuu 'ʋ 'cʋɛ a ye'nanyʋ ‑mʋ', ‑ʋ tʋɛ Nyɩsʋa a ‑tɩ.
12 'Nɩ ‑hʋa꞊a lɩ꞊ɩ, 'kɩ nʋgba bʋ tɔɔ nyɩbɛyugbe Nyɩsʋa a ‑tɩ, kɔ, 'nɩ ‑hʋa꞊a lɩ꞊ɩ ‑wɛ, 'kɩ nʋgba bʋ nɩ 'ʋ nyɩbɛyugbe 'lu yɩ, kɛɛ, bʋ pʋ 'ʋ nʋa bʋ,
13 ‑ɛ nu꞊o, Adamʋ, ɛ nɔ‑ Nyɩsʋa nu yɩ‑hɛdɛ, 'tɩ‑ 'ɛ nu nʋgba, ‑ɛ mɔ Ɛfʋ.
14 'Ya 'ʋ 'lu de, Satan, ‑ɛ mɔ 'kuo ‑hʋɩn* a nyiblo gbagbʋ, ɛ 'yɩ Adamʋ 'pa‑, ɛ 'yɩ꞊ɩ mɛ lɛ ‑ha, 'kɩ bʋ kaa ꞊nɛ, kɛɛ, nʋgba, ɛ nɔ‑ ‑ha꞊a mɛ lɛ, 'kɩ bʋ kaa ꞊nɛ, 'tɩ‑ nʋgba a 'mʋ, 'ɛ ‑hɛɛ Nyɩsʋa a ‑tɩ lɛ.
15 Kɛɛ, 'ye ꞊bɩɩ bʋ nɩ 'mʋ lɛ, nʋgbɩ di kɔ 'yonʋ, 'tɩ‑ Nyɩsʋa di ꞊nʋ 'nɩ wa, 'bʋ mɔ, bʋ 'cibi 'ʋ 'a ꞊wlʋ a yɩkuolɛ, kɔ, 'bʋ kɔ nʋɛlɛ, kɔ, 'waa nunuklɔ 'bʋ 'sii 'ʋ yɩ, 'kɩ 'ʋ Nyɩsʋa ye', kɔ, 'bʋ 'yɛ nɩ 'yaa 'lɩ 'waa dɩɔnʋ.