20
Buglayungu 1,000 Satan kane pangwa
1 Na kaniga angelo ta heven kondo ende atne ungwa ye maugl beiye paikrukwa ki ya te sen kande ta ongo mina ake indre moglkwa.
2 Ye toki kande dragon i akegidi moglkwa, tokimo i kamkand imbo toki, ye yomba prapra ka-tange tongwa. Tokimo i Satan iwe, ye buglayungu 1,000 kane paimorambuka pre angelo sen indre kane koglkwa.
3 Ye eremogl Satan piyasi maugl beiye paikrumara atne ende, konbo dra yongugl sigetdi boma nuglo ake sidange gidi kondungwa. Ana ye kane paimogltre makan yomba prapra kakimbi aglketa ditekrambuka. Ye sugl paimogl enan buglayungu 1,000 dundinambuka. Ana okuwo ye kane poko endimbi enge sungunagle keunde ta yoko wanmorambuka.
4 Ana na kaniga sia king tau yongo ana yomba tau siamo igle amedingwa. Ye kot mina yomba mambunono yumbu sinaglkwa pre God kongun tongwa. Yomba merkinde sigeglkwa spiritno kaniga ye eremogl Yesus wedi pirngi dindre kangiye dembiyesi pene ende te God kamo ake gidingwa. Yegl erikwa ipre kunda ikine eremogl nunguno gariko ana geglkwa. Te na kaninga yomba eremogl kambu are ya kuiyamo dembiye karaugl erekre te ye munomo mamburo mina ya onguno mina ikrikwa yomba, ye kor-moraglkwa indre ana Krais bogl akiye buglayungu 1,000 king meglkwa.
5 Yombamo geglkwa i okuna andiglkrikwa pre erme komnaiye kaima andigl ukor enaglkwa. Yomba geglkwa tau enge igle andiglkrikwa ye buglayungu 1,000 i dundinambuka pre sugl kanmeglkwa.
6 Yomba komuno kaima andraglkwa i ye holi mogl gunyei moraglkwa. Te okuwo goraglkwa i yombuglomo i ta kuno eran yomba i ta engre atne endekrambuka. Yegl eran yombamo i God prismo mogltre te Krais prismo mogltre ana ye Krais bogl akiye buglayungu 1,000 king moraglkwa.
Satan wu kinde kaima ongwa
7 Ana buglayungu 1,000 dundinan, Satan kane pangwa gugl ende teimbi ana kane yungu kondo ende menda enambuka.
8 Ye ende menda undre ana yomba makan koglkoglo ya nigl bre beiye te ande umara beimara yomba mogl-eingwa i kakimbi ditenambuka. Gok ya Mangok epiglmo i kakimbi ditenambuka, ye endpi kunda eraglmedi pre dimakai sinambuka. Yombamo ye nambano mundi nigl menda okupo yei omere yegl.
9 Ye endpi makan koglkoglo pindre God yombama meglmara ya te dumo kande God wakai kaima kangwa i yombugl isuna endinaglkwa. Ba heven imbo endi donga ende atne undre ana goglko kimbirnem wagle de gogl kondingwa.
10 Te Satan eremogl kimbirnem wagle kakimbi dite wanmoglkwa, piyasi maugl beiye paikrukwa kombuglo salpa depamara suna endingo, igle okuna kambu are ya propet kakimbi piyasi atne endingo miurara, ana ye wu suna ongo suwota orko ana ermine ya enduwer giugl engenge pir moraglkwa.
Kot kande plau dungwa
11 Ana na kaniga sia king kande kruwo ta yongo ana yagl ta bolamugl amedi moglkwa. Ye mambuglo mina heven ya te makan teke endimbriko ana dumono ta yeikrukwa.
12 Yomba kande ya kindewond geglkwa ye sia king yomara gumamugl andigl meglko kaniga. Ana yagl sia king mina amedi moglkwa i buk tau poglkwa, te buk ta ombugl poglkwa i kor aimande meglkwa buk. Ana ye ka buk mina beglko pangwa i kandre ana ye yomba geglkwa yumbusi i-perepere endungwa, i ye yene mambunono erimere erimere yumbu sungwa.
13 Ana mundi nigl suna yomba gogl paimeglkwa i mundi nigl te ikine endungwa. Te goglkwa ya geglkwa dumo suna geglkwa yomba ye mina paimeglkwa i ye suwo te ikine endimbrika, yomba kindaginde taragl erimere erimere yegl ye mambunono suwara suwarandi yumbu sungwa.
14 Ana goglkwa ya Geglkwa Dumo piyasi donga mina suna endingo ende atne embrika, maugl kande mina endi donga atne depangwa i geglkwa namba 2 orkwa.
15 Ana kor aimande meglkwa buk i mina yomba ta kangiye paikrukwa ye maugl beiye paikrukwa mina donga depamara piyasi atne endingwa.