☰ 1 Korint 1
Na Etana KerekereꞋa Sa Paul Fuana Ngwae FaꞋamamana Ki ꞋI Korint
KaidaꞋi sa Paul nia leka ana uula lekaꞋa nia, nia dao ka tua Ꞌi Efesus sulia kala kaidaꞋi, ma nia ka keresia ti kerekereꞋa fuana ngwae faꞋamamana ki Ꞌi Korint. Saena taꞋi kerekereꞋa, sa Paul faꞋamanata kira Ꞌani tuaꞋa saga faꞋinia ngwae abu faꞋamamana. (Kulu Ꞌiri toꞋo ana kerekereꞋa neꞋeri Ꞌi taꞋena.) Buri Ꞌana neꞋe ngwae Ꞌi Korint ki kira toꞋomani na kerekereꞋa neꞋeri, kira ka toꞋo ana ti lidiꞋa neꞋe kira oga kike lidia Ꞌuana sa Paul. Kira saefiloa ka Ꞌuri, “ꞋUri ma, nia leꞋa goꞋo ana fuana araꞋinga nama noaꞋa? ꞋUri ma, nia leꞋa goꞋo ana fuana ngwae faꞋamamana ki, kuke leka fanga goꞋo ada faꞋinia kwaima kulu ki neꞋe kira Ꞌania fanga neꞋe kira foꞋosi Ꞌani nunuꞋi ru ki? ꞋUri ma faꞋuta neꞋe kulu ka fiku foꞋo goꞋo aka? Ma kwateꞋa faꞋuta mo ana AnoꞋi ru Abu neꞋe leꞋa fuaka fuana saefilolana God Ꞌuana?” Na ngwae faꞋamamana ki Ꞌi Korint kira kerekere fuana sa Paul fuana saefilolana sulia ru neꞋeri ki.
Ta uulu ngwae neꞋe satada Stafanas, ma sa Fotunatus, ma sa Akaikus, kira leka maꞋi faꞋasia Ꞌi Korint faꞋinia kerekereꞋa baera siana sa Paul. Ma kira ka faꞋarongoa logo sa Paul Ꞌania ti ru taꞋa liu fuli Ꞌi safitana ngwae faꞋamamana ki Ꞌi Korint. Ti ngwae faꞋamamana Ꞌi Korint, kira ka olisuꞋusuꞋu Ꞌi safitada kwailiu, ma kira ka fata baꞋalafe sulia sa tai neꞋe siuabua kira ma ka faꞋamanatada Ꞌania ru God ki (3:1-23). Ti ngwae oga kike leka sulia sa Paul, ma ti ai ka oga kike leka sulia sa Apolos nama sulia ti ngwae matamata laꞋu. ꞋUnaꞋeri ma taꞋi ngwae logo ka kakabara na teꞋa fafo nia, ma na faꞋinaꞋonaꞋo ana fikutaꞋi ngwae God ki noaꞋa kira kasi sasia nama ta ru ana falafala taꞋa ꞋunaꞋeri. Ma ta ru laꞋu, ti ngwae faꞋamamana kira ka ngali logo ti ngwae faꞋamamana ana kwai matalangaꞋinga Ꞌi maana ngwae abu faꞋamamana ki fuana faꞋasagalada.
Sa Paul ka keresia laꞋu fuana ngwae faꞋamamana Ꞌi Korint. Ma na kerekereꞋa neꞋeri kulu ka saea Ꞌani 1 Korint. Saena bali buka 1-6, sa Paul ka kerekere sulia ru taꞋa neꞋe fuli safitana ngwae faꞋamamana Ꞌi Korint neꞋe nia rongoꞋi. Saena bali buka 7-16, nia olisia na lidia neꞋe ngwae Korint ki kira saefiloa maꞋi saena kerekereꞋa kira.
Na ru talingaꞋi ki saena buka neꞋe:
Na ꞋafitaꞋiꞋanga ana barangisiꞋa saena siosi & 1:1—4:21
Na ꞋafitaꞋiꞋanga ana kakabaraꞋanga & 5:1-13
Na ꞋafitaꞋiꞋanga ana kwaifataiꞋanga & 6:1-8
Na ꞋafitaꞋiꞋanga ana kwaiogaiꞋanga taꞋa & 6:9-20
Sa Paul olisia na lidiꞋa kira ana araꞋinga & 7:1-40
Sa Paul olisia na lidiꞋa kira ana nunuꞋi ru ki & 8:1—11:1
Sa Paul olisia na lidiꞋa kira ana foꞋo fikuꞋa & 11:2—14:40
Sa Paul olisia na lidiꞋa kira ana tataꞋe Ꞌanga ana noni faolu & 15:1-58
Fata leꞋa leꞋa Ꞌanga sa Paul & 16:1-24
1
1 Na kerekereꞋa neꞋe nia leka maꞋi faꞋasi nauꞋa sa Paul faꞋinia na ngwae asina kia sa Sosetenes. God nia fili nau sulia na kwaiogai Ꞌanga nia Ꞌiri nauꞋa ta ngwae ni lifurongo ana sa Jesus Christ.
2 KeroꞋo kerekere fuamuꞋa ngwae neꞋe kamu faꞋamamana ana sa Jesus, ma muka tua saena na fanoa Ꞌi Korint. God nia fili kamu, ma ka faꞋa abu kamu na ngwae nia ki, sulia na ꞋadoꞋa kamu faꞋinia sa Jesus Christ. God ka fili kamu faꞋinia na ngwae ana fanoa ki taꞋifau neꞋe kira foꞋosia sa Jesus Christ, neꞋe na Aofia kira, ma na Aofia kia logo.
3 Nau ku foꞋo fasi Ꞌiri God na MaꞋa kia ma na Aofia sa Jesus Christ ke kwaiꞋofe amuꞋa ma ke kwatea na aroaroꞋanga fuamuꞋa.
Kulu toꞋo ana na leꞋangaꞋa ki osiꞋana sa Christ
4 Nau ku baꞋatafea God suli asoa ki osiꞋana kamuꞋa, sulia na kwaiꞋofeꞋanga neꞋe nia faꞋataꞋinia fuamuꞋa Ꞌania sa Jesus Christ. 5 God kwatea naꞋa ru leꞋa Ꞌoro ki fuamuꞋa, osiꞋana kamu tua ratai faꞋinia sa Jesus Christ. ꞋUnaꞋeri muka sai leꞋa ana ru Ꞌoro ki sulia sa Jesus Christ, ma muka faꞋatalo leꞋa logo sulia. 6 Na ru leꞋa neꞋe kiri nia kwatea fuamuꞋa, nia faꞋataꞋinia fuamuꞋa neꞋe na faꞋarongoꞋa neꞋe kami faꞋarongo kamu Ꞌani sulia sa Christ nia mamana. 7 Ma osiꞋana nia ꞋunaꞋeri, kamu ka ngalia naꞋa ru leꞋa ki taꞋifau faꞋasia God, ana kaidaꞋi neꞋe muke kwaimasi ana faꞋi asoa neꞋe na Aofia kia sa Jesus Christ ke baꞋa oli laꞋu maꞋi ana. 8 Ma nia ke baꞋa faꞋangasingasi kamu leleka ka dao ana asoa Ꞌisi, fasi Ꞌiri noaꞋa ta ru taꞋa kasi teo amuꞋa ana faꞋi asoa neꞋe nia ke baꞋa oli maꞋi ana. 9 Kulu fitoꞋo ana God ke sasi ꞋunaꞋeri fuamuꞋa, osiꞋana nia fili kulu Ꞌiri kulu ka tua kwaima faꞋinia sa Jesus Christ na Ngela nia ma na Aofia kia.
Na barangisiꞋanga Ꞌi safitana na fiku taꞋi ngwae faꞋamamana
10 Aia, ngwae asina nau kina Ꞌae, nau ku gani kamu Ꞌania na ngasingasiꞋanga ana sa Jesus Christ na Aofia kia, muke mango faꞋasia kwaingilongiloiꞋanga faꞋi kamu kwailiu, fasi Ꞌiri noaꞋa ta barangisiꞋanga Ꞌi safitamuꞋa. Ma nia leꞋa fuana neꞋe manataꞋanga kamu ki ma na kwaiogaiꞋanga kamu ki ka alua taꞋi ru. 11 Nau ku saea ru neꞋeri, osiꞋana neꞋe ti ngwae faꞋasia kwalafa Ꞌi Kloe kira faꞋarongo nau Ꞌani fasi kamu toꞋo ana olisuꞋusuꞋu Ꞌanga ki faꞋi kamu kwailiu. 12 Ma ti ngwae amuꞋa fata Ꞌuri, “NauꞋa na fafarongo sa Paul.” Ma ta ngwae ka saea, “NauꞋa na fafarongo sa Apolos.” Ma ta ngwae laꞋu ka saea, “NauꞋa na fafarongo sa Peter.” Ma ta ngwae laꞋu ka saea, “NauꞋa na fafarongo sa Jesus Christ.” 13 Na ru taꞋa liu neꞋeriꞋa, si duꞋungana kaumulu daroꞋia sa Jesus Christ Ꞌani fikuꞋa matamata ki. NoaꞋa laꞋu nauꞋa sa Paul ba nau ku mae fuamuꞋa ana na Ꞌai rara folo! Ma noaꞋa kamu Ꞌiri siuabu Ꞌani sataku fasi Ꞌiri kamuꞋa na fafarongo nau ki!
14 Nau ku baꞋatafea God, duꞋungana taꞋifilia sa Krispus ma sa Geas goꞋo neꞋe nau ku siuabuda. 15 Nia neꞋe, noaꞋa ta ngwae bore Ꞌana kasi saea nia siuabu Ꞌiri niaꞋa na fafarongo nau. 16 (Aia, nau ku siuabua logo sa Stafanas faꞋinia na luꞋuluꞋua nia, ma noaꞋa nau kusi manata toꞋona sa tai laꞋu neꞋe nau ku siuabua.) 17 OsiꞋana sa Jesus Christ noaꞋa kasi asungaꞋi nau maꞋi fuana siuabulana ngwae ki. Nia asungaꞋi nau lala maꞋi Ꞌiri nau ku faꞋarongo Ꞌani FaꞋarongoꞋa LeꞋa. Ma noaꞋa nau kusi fata Ꞌani liatoꞋo Ꞌanga ana magalia, Ꞌasu Ꞌubani ti ngwae kira kata faꞋamamana sulia na alaꞋanga leꞋa nau ma noaꞋa laꞋu sulia na mamanaꞋanga ana maelana sa Jesus Christ ana Ꞌai rara folo.
Na maelana sa Jesus faꞋataꞋinia na ngasingasiꞋanga ma na liatoꞋongaꞋa God
18 Ana kaidaꞋi ti ngwae kira rongoa faꞋarongoꞋa sulia na maelana sa Jesus Christ ana Ꞌai rara folo, kira fia na faꞋarongoꞋanga neꞋeri na ru ꞋoꞋo goꞋo Ꞌana. Ma na ngwae neꞋeri ki, God ke baꞋa kwatea na kwaꞋikwaꞋinga fuada. Bore ma kuluꞋa, na ngwae neꞋe God faꞋamauri kulu ki, kulu saiana na faꞋarongoꞋanga neꞋeri nia neꞋe na ngasingasiꞋanga God fuana faꞋamaurilana ngwae ki. 19 OsiꞋana God nia saea saena na KerekereꞋa Abu ka Ꞌuri,
“Ti ngwae Ꞌi neꞋana kira saea fasi kira liatoꞋo ma kira ka toꞋo ana na liaꞋi ngwae saga ki.
Bore ma nai baꞋa faꞋataꞋinia neꞋe noaꞋa kira Ꞌiri liatoꞋo goꞋo, ma nau kui baꞋa faꞋataꞋinia neꞋe na naiꞋi ru Ꞌanga kira ki ke baꞋa sui.”
 
20 Nia neꞋe, kulu saiana na liatoꞋongaꞋa ngwae Grik ki, ma na liatoꞋongaꞋa ngwae Jiu ki, ma na liatoꞋongaꞋa ngwae alaꞋa leꞋa ki, nia ke dalafaꞋa goꞋo Ꞌana. God faꞋataꞋinia neꞋe na liatoꞋongaꞋa ngwae ki niꞋi boleboleꞋa goꞋo Ꞌani.
21 God nia liatoꞋo liu. Nia neꞋe kwate ma ka ꞋafitaꞋi fuana na ngwae ki Ꞌiri kira kasi saiana God Ꞌani na liatoꞋongaꞋa kira talada. God oga faꞋamaurilana na ngwae neꞋe kira faꞋamamana ana faꞋarongoꞋanga neꞋe kami faꞋarongo Ꞌani, sui bore Ꞌana ngwae Ꞌoro ki kika saea neꞋe faꞋarongoꞋanga neꞋeri nia boleboleꞋa goꞋo Ꞌana. 22 Ma na ngwae Jiu ki, kira oga kike lisia na faꞋanadaꞋa ki sui mala kira ka fiꞋi faꞋamamana. Ma na ngwae Ꞌi Grik ki, kira oga rongolana na alaꞋanga liatoꞋo ki sui mala kira ka fiꞋi faꞋamamana. 23 Bore ma kamiꞋa faꞋarongo Ꞌani sa Jesus Christ faꞋinia na maelana ana Ꞌai rara folo. Ma na ngwae Jiu ki kira Ꞌaila Ꞌani na faꞋarongoꞋa neꞋeri. Ma na ngwae Grik ki, kira saea neꞋe faꞋarongoꞋa neꞋeri na alaꞋanga boleboleꞋa goꞋo Ꞌana. 24 Bore ma fuana sa tai faꞋida neꞋe God filida naꞋa, ana Jiu ki, ma ngwae neꞋe noaꞋa laꞋu Jiu ki logo, na faꞋarongoꞋa neꞋeri sulia sa Jesus Christ neꞋe faꞋataꞋinia na ngasingasiꞋanga God faꞋinia na liatoꞋongaꞋa God. 25 Sui bore Ꞌana ngwae Ꞌoro kira ka saea neꞋe liatoꞋo Ꞌanga God ru boleboleꞋa goꞋo Ꞌana, na liatoꞋo Ꞌanga God nia tasa liufia na liatoꞋo Ꞌanga na ngwae ki. Ma sui bore Ꞌana ngwae Ꞌoro kira ka saea na ngasingasiꞋanga God neꞋe ru tiꞋitiꞋi goꞋo Ꞌana, na ngasingasiꞋanga God, ngasingasiꞋa ka tasa liufia na ngasingasiꞋanga ngwae ki.
26 Aia, ngwae asina nau kina Ꞌae, noaꞋa kamu kasi manata bura Ꞌani tuaꞋa ba kamu tua maꞋi Ꞌani Ꞌi naꞋona mala kaidaꞋi ba God nia sae kamu Ꞌuana faꞋamamanaꞋanga. OsiꞋana neꞋe Ꞌi maana ngwae ki, bara ngwae goꞋo amuꞋa neꞋe kira toꞋo ana liatoꞋongaꞋa, ma na ꞋinotoꞋanga. Ma bara ngwae goꞋo amuꞋa neꞋe leka maꞋi faꞋasia na fuuꞋi ngwae toꞋofu ki. 27 Sui bore Ꞌana ka ꞋunaꞋeri, God nia fili kamu na ngwae neꞋe kira saea kaumulu boleboleꞋa ki, fasi Ꞌiri nia ke faꞋaꞋekea na ngwae liatoꞋo ki. Ma nia ka fili kamu na ngwae neꞋe kira saea kaumulu ngwataꞋutaꞋu ki, fasi Ꞌiri nia ke faꞋaꞋekea na ngwae ꞋinotoꞋa ki. 28 Ma God ka fili kamu na ngwae neꞋe kira kasi fuꞋusi doe amuꞋa ki, ma kira ka Ꞌaila Ꞌani kamu, ma kira ka saea kamu na ru ꞋoꞋo ki goꞋo, fasi Ꞌiri nia ke faꞋalia na ru neꞋe kira saea Ꞌania na ru talingaꞋi ki. 29 Ma sulia nia ꞋunaꞋeri, noaꞋa ta ngwae kasi saiana ka fata leꞋa sulia niaꞋa talana Ꞌi naꞋona God. 30 God naꞋa neꞋe alu kulu ka tua ratai faꞋinia sa Jesus Christ, ma God naꞋa neꞋe ka kwatea liatoꞋo Ꞌanga fuaka Ꞌani sa Jesus Christ. Ma God ka faꞋa ꞋoloꞋolo kulu sulia sa Jesus Christ. Ma osiꞋana sa Jesus Christ logo, God ka loge kia, ma nia ka faꞋa abu kia naꞋa fuana. 31 Ma nia ka diꞋia na KerekereꞋa Abu ba saea, “Sa tai bore Ꞌana neꞋe oga ka fata baꞋalafe, nia ka fata baꞋalafe sulia tae neꞋe na Aofia nia fulia.”
☰