ୱେ଼କ୍‌ହି ବ଼ଲୁ ପୁଃନି ମେ଼ରାତି ରା଼ତି ପତି । ଈଦି ଜିକେଏ ଜହନ ତା଼ଣାଟି ଜୀସୁ କ୍ରୀସ୍ତ ଜାର୍ନାଆ଼ତି ୯୫ ବାର୍ସା ଡା଼ୟୁ ରା଼ସ୍‌କି ଆ଼ହାମାଚେ ୧:୧ । ଏ଼ୱାସି ଜହନତି ନେହିଁ କାବ୍ରୁତଲେ ତୀନିଗଟା ଆ଼କୁ ପତିୟାଁ ରା଼ଚାମାଚେସି ଏ଼ୱି ୧ଜହ, ୨ଜହ ଅ଼ଡ଼େ ୩ଜହ । ଜହନ ଆମିନି ଗାଟାଣାଇଁ ଜୀସୁ ହା଼ରେକା ଜୀୱୁ ନ଼ହିଁମାଚେସି । ଜହନ ଏ଼ୟୁ ମାଦିମାନି ବୂମିତି ପାତ୍‌ମସ୍‌ ଟା଼ୟୁତା ମାନି ବେ଼ଲାତା ଈ ୱେ଼କ୍‌ହି ବ଼ଲୁ ରା଼ଚାମାଚେସି, ଇଚିହିଁ ଜୀସୁ କ୍ରୀସ୍ତତି ନେହିଁ କାବ୍ରୁତାକି ଏ଼ୱାଣାଇଁ ଏମ୍ବାଆଁ ଅ଼ୱିଆ଼ହାମାଚେ ଜହ ୧୩:୨୩ ।

ଜୀସୁ ୱେଣ୍ତା ୱା଼ନି ଦିନା ଡାଗେ ୱା଼ହି ମାନାକି ଜୀସୁ କ୍ରୀସ୍ତ ତା଼ଣା ନାମୁତଲେ ମାଞ୍ଜାଲି ପ଼ଡ଼ୱି ଆ଼ନାରାକି ସା଼ସା ଅ଼ଡ଼େ ଆ଼ସା ହୀହାଲିତାକି ଈ ୱେ଼କ୍‌ହି ବ଼ଲୁ ରା଼ଚିତେସି ୧:୩; ୨୨:୭ । ଏ଼ୱାସି ବାରେ ନାମିତି ଲ଼କୁ ଅ଼ଡ଼େ ବାରେକିହାଁ ସା଼ତାଗଟା କୁଲମିତାକି ରା଼ଚିମାନେସି ୨–୩ । ଜହନ ତାନି ରା଼ଚିନି ତା଼ଣା ମାହାପୂରୁ ଅଣ୍‌ପୁତି ବ଼ଲୁ୧:୩ ଅ଼ଡ଼େ ତାନି ମେସାମାନି ହା଼ରେକା ସିନାୟାଁତି କାତା ରା଼ଚିମାନେସି । ଈ ପତିତି ଏଚେକା ତା଼ଣା ପ୍ଣାଃଇ ପତି ତଲେ ସମାନା ମାନାଣି, ଜିକ ୬:୧-୮ ମେସାଲି ଆ଼ଡିନାୟି । ସା଼ତାଗଟା ତୀତ୍ରି ଅ଼ଡ଼େ ସା଼ତାଗଟା ଗିନାୟାଁ ଏମିନି ଗାଟାଇ ମାହାପୂରୁ ମିସରତି ଲ଼କୁଣି ଡଣ୍ତ ହୀହାଲିତାକି କସ୍ତୟାଁ ପାଣ୍ତାନେସି ହାନାୟି ୭–୯ ।

ୱେ଼କ୍‌ହି ବ଼ଲୁ ରା଼ନି ବେ଼ଲାତି କାତା ୱେସିମାନେ, ଜୀସୁ ଡା଼ୟୁ ଜୀଣା ଆ଼ନେସି ଅ଼ଡ଼େ ଆମିନି ଗାଟାରି ଏ଼ୱାଣି ତା଼ଣା ବା଼ର୍ସୁ ଇଟିନେରି ଏ଼ୱାରି ବାରେବେ଼ଲା ଏ଼ୱାଣିତଲେ ଡ଼ୟିନେରି । ଈ ପତି ନିଙ୍ଗେ ଜାଗ୍ରାତା କିୟାପେ ଅ଼ଡ଼େ ଆ଼ସା ହିୟାପେ, ଇଚିହିଁ ଜୀସୁ ତବେ ୱେଣ୍ତା ୱା଼ହିମାନେସି ।