1 TESALONAIKA
Orome gapomaneme yuu kingi Masetonia iso kareyamo dokona yuu taone Tesalonaika doko mupwa singi. Pole baa yuu Pilipai yaki nyepala baa yuu Tesalonaika dokona pao Elyambu Pingi doko wara piya. Pole baa Tesalonaika dokona karo misi leyamo dokopa Juu daa rara wakale wambu lapo wambo Juunya mana pii soo peteyaminyi dupwa kaepala Anatunya waili pii keyange doko soo nyepala mona kapu kyiyami. Dopa piyaminyipa Juu wambu lapome Polepa yango palyuo karo baa pyalana pyuo kareyami. Renge dokona lao Pole baa yuu Tesalonaika yaki nyepala yuu Beria peya. Enakana Pole baa yuu Korina dokona epo kareyamopa banya puu minyuo role pyao yulu pyuo karenge akali Timoti baame epo Pole baa Tesalonaika Elyambu Pingi dokona oripote pii lao polo lamaiya.
Dokopa Pole baame pepa pase mupwa dake Tesalonaika wambu dupwa pyao maiya. Pyao maiyuo dokopa baa Tesalonaika Kurisene wambunya mona porainyi pyambuo piya. Nakamame mona reto Yesu kapa ingingi lao suu pyao karaminyi doko sepala Anatu yako lao rae maiya. Wamba nakama pipya palyuo kareyo dokopa nambana Kurisene yulu pii nenge rambope dupwa apa piyu doko silyaminyi lao piya. Tesalonaika wambu dupwa Yesu Koraisa eparamo dokona lao piso singi malu piso siyaminyi dokona Pole baame pii isingi lamaiyuo role pepa dake piya. Yesu epapa napyamopa Kurisene wambu kumulyaminyi dupwa eparamo dokopa apa piramipi? Koraisa baa anjokorape eparape? lao piso siyami. Pole baame nakama lamaiyuo, Yesu epapa naramo dokopa Kurisene dupwa nakama yulu elya kalo mondo lao pyuo karalapape, leya.
Buku Dakena Pii Palamo Dusipa
1. Pii kanda soo leya 1:1
2. Tesalonaika wambu dupwana lao Anatu kando sangyu leya 1:2—3:13
3. Kurisene yulu dokona poraiyuo pinya lao lao porainyi pyambuya 4:1-12
4. Koraisa eparamo dokona lao pii lapo leya dupwa 4:13—5:11
5. Lumwa pyuo pii lao porainyi pyambuo leya 5:12-22
6. Pii lao oto leya 5:23-28
1
1 Rakane Anatu, Kamongo Yesu Koraisapana Elyambu Pingi yuu Tesalonaika petenge wambu dupwa pepa dake namwa Polemoo Sailasa Timotimoo pyao jilyamano. Mona keyange palyuo ipingi rengepe mona kyuu lao singi rengepe nakama keta palena.
Tesalonaika Wambumi Yesu Kapa Ingingi Lao Suu Piyami Doko
2 Namwame yuu peparae Anatu dokona sangyu lao karo nakama suu pyao kaeya nao ateŋa lakao petamano.
3 Namwana Rakane Anatu kando ateŋa lao dokopa nakamame Anatu kapa ingingi lao soo nyiyaminyi dokome yulu keyange piyami doko kame see nalyamano. Nakama Anatu mona reteyami dokona yulu porai piyami. Dopako pyuo namwana Kamongo Yesu Koraisa dee epara doko soo gisapala mona kare kare karaminyi. Dopa pyuo keyange pilyaminyi doko kame see napala ateŋa lakalyamano.
4 Yangonemoo, Anatumi nakama mona reto baa rangena ingyuo rombo palyiya doko soo kaelyamano.
5 Namwa waili pii keyange lao epeyama doko pii yeelyo minyuo epeyamande daa. Porainya renge paletape Imambu Poo Pyasi opetaepe nakamana monarena yulu porai piramopa kapa ingingi lao suu pyarami doko minyuo epeyamasa piya. Nakama kapa serami dokona lao namwa apa pyuo pyuo karaminyi lao kandeyami.
6 Nakamame Kamongona yulu dokonape namwa piyama dokonape kimbu moko minyuo pyuo kareyami. Randa andake nyuo dokopa waili pii keyange soo nyiyami. Dokona Imambu Poo Pyasimi nyisiyamopa rae maiyuo kareyami.
7 Nakama yulu keyange piyami dokona Kurisene wambu yuu Masetonia rangepe yuu Girisi range dupwape nakamana yulu kandapala piyaminyili pyuo pyuo kareyami.
8 Kamongona waili pii nakama keta raeyo peya doko yuu Masetonia Girisipana iki daa. Nakama Anatu kapa ingingi lao suu piyami doko yuu muu peparaena lao peya. Dokona namwa aki mende konda pyuo laramase?
9 Namwa nakamana yuu dokona kanda soo epeyama dokopa nakamame yako lapala yulu andake piyami doko wambu peparae lao karaminyi. Dokona lao nakamame bange wakale anatu yaleoko kingimi waso kareyami dupwa yaki nyepala Anatu angi lete karenge dokona dokoko wambu peparae lao karaminyi.
10 Banya Ikinyingi baame lopo nyiyamo doko yake panda piso lupyuo eparamo doko isaro karaminyi. Yesu eparamo dokopa Anatunya kote andake palira dokona namwa nyiso kiiramo nyera.