3
Yesu Mosesepa Manda Daa
1 Yangonemoo Anatumi nakama kee leyamopa sukusa karaminyi dokona Yesu namwana Purisi Mupwa kanya akali ingyuo karamo doko suu pyale pyale karalapape.
2 Mosese baa Anatunya yulu kaeya nao pyuo kareyamo doko suu pyao Anatumi Yesu yulu maiyamo dokona Anatu baapa pyuokondali koo pyakamyuo piya.
3 Akalimi anda keyange pilyaminyipape andana kingi doko ketae paa napala akalinya kingi ketae penge. Dokonako ingyuo Mosese kaepala Yesu neta renge ingyuo karamo.
4 Dokona lao anda dupwa wambumi piminyi pisi karamo doko suu pyao Anatumi bange peparae wasiyamo silyamo.
5 Mosese Anatunya kendemande dokome Anatunya wambu keta yulu kulisa palyuo piya. Dopa pyuo Anatunya yulu rengya nyera dupwana lao lao pano kareya.
6 Dopa piyamopape Koraisa baa Anatunya wambu dupwana kyawa nyuo iso kareya. Namwa kaeya napala Yesu epara lao mona kare kare kararama ramo doko Anatunya ree palu ingyuo kararama lyakande.
Anatunya Wambu Mona Seramo Kararami
7 Imambu Poo Pyasimi lao dokopa,
Epapu Anatunya pii serami ramo dokopa
8 yuu muiyane dokona mona kana pokapala
Anatupa male male lao kamba lao kareyami kande
dokonako palyuo pii nalapape.
9 Anatu lao dokopa
nakamana kauwane dupwame ee kana akalisa kisima (40).
nambana yulu kando karapalape
namba alyungu mambu ingyuo minyuo kui leyami leya.
10 Dopa pyuo peyaminyi dokome
namba imbu singi nyakayami.
Nambame enda akalipi yuu peparae
kopetame suu pyao karenge leyo.
Nambame nenge rambo lao piso karo pingi doko
mana nyii nalu nao nayami.
11 Namba imbu singi nyepala mawa pii leyoŋo
nambamoo pipya koo sela epa narami
leya.
12 Yangonemoo nakama lapome mona koo palyuo lete karenge Anatu baa kapa ingya nange lao suu pyapala neta pasasarami lao waso karalapape.
13 Yangonemoo epapu nee silyamo dolapokoŋo yulu koo dokome kunji pyao mona kana poko nyii nana lao yango sukusa piimi lao porainyi pyambwalapape.
14 Namwa kanda soo Kurisene ingyapala dokopa waa waa karo piyama dokona palyuo pyuo puu parama ramo doko Koraisana dupwa namwa opetaenako ingyuo para.
15 Pii dake Baepole dokona letamo.
Epapu Anatunya pii serami ramo dokopa
yuu muiyane dokona mona kana pokapala
Anatupa male male lao kamba lao kareyami kande
dokonako palyuo pii nalapape.
16 Apimoo Anatunya pii lamaiyamo doko see napala kamba lao kareyamisi? Enda akalipi yuu Isipi yaki nyuo Mosese nakambana rapu pingi dokome lanyuo peyamo dupwasa letamo.
17 Apimoo kando ee kana 40 dusipana Anatumi imbu singi neta nyiyase? Wambu yulu koo pipala yuu muiyane dokona kumuyami dupwako kando imbu singi nyiya.
18 Anatumi mawa nyuo lao dokopa, Nakama nambapa koo soo pisa epa naramiŋi lao leya. Pii doko apimoo kando leyase? Kamba leyami dupwa kando leyasa piya.
19 Anatu leyamuli pyuo mendakinya palyuo suu pyaa nayami dokome yuu angi dokona sukusa paa nayami.