24
1 Dakepa Kamongo baame Isaraele wambu dupwa elyape keta pisakapili lao suu pyapyamo doko soo nyepala baa wamba piyamuli pyuo Kamongo piso sela paa naya. Paa napala kapu kyuo baa yuu muiyane dorena kando kareya.
2 Karo Isaraele wambu dupwa rara liti pira pira pyuo paleyaminyipa kandeya. Dokopa Anatunya Imambu doko epo baa keta maralyiya.
3 Epo maralyiyamopa baame poropeta pii pyongo pyao leya.
Namba Beona ikinyingi Belamena pii dake.
Nambame wambu kando soo giso karenge.
4 Anatumi pii letamo dupwa namba singi.
Nambame lenge rakaro karo.
Anatu Porai Wakasa dokome pii repa repa pilyamo dupwa angi rolae kandenge.
5 Isaraele wambunya komau anda piyaminyi dupwa ama keyange ingilyamo.
6 Bona isa malu maki maki pyuo karenge dopakale ingilyamo.
Ipwa marenge dokona ee wara pingi dopale ingilyamo.
Isa alo lengende Anatumi wara piyamo dupwa dopale ingilyamo.
Dee isa sita lenge lapo ipwa marenge dokona karenge dopale ingilyamo.
7 Yuu Isaraele dokona apunda malu eparamopa
yuu ipwange palira dupwana nakamame ee wara pirami.
Nakamana kiŋi doko mupwa wakasa ingyapala kiŋi Akake nyuo isa palyara.
Banya isingi yulu dokome yuu andake dokona wambu peparae keta palyuo suu lara.
8 Anatumi wambu dupwa Isipi karo lanyuo epeya.
Baame mena bulamakao kali rae lenge dopakale ingyuo wambu dupwa pyao ralinyi nembakamyuo karenge.
Nakamame nakamana nyisu petenge dupwa pyao
kuli rukyuo walikya dupwa pyao roo payo mumu pingi.
9 Mena laene porai luu palenge dokopa mendeme pyaleta nange doko suu pyao
Isaraele wambu dupwa dopale ingingi.
Wambu mendeme Isaraele elyape keta pisiramo doko elyape ketako pisira.
Wambu mendeme Isaraele randa mairamo dokopa randako baa nyera.
10 Beleke baame Belame kando imbumi kumuo pyalana kingi rangome malikyapala dopa leya. Nambame emba kyakale lao nyepala nambana nyisu petenge dupwa randa maiyakape lapunupape yuu rema wambu dupwa elyape keta pisilini.
11 Epapu anda puu. Nambame emba pee piruŋu lao lalu lao leyonopape Kamongome daa lao kata rokolyamo.
12 Belame isingi lao, Embame embena wai pii minyingi akali dupwa dopa lamaiyuo,
13 Embena anda dokona kana kulingipi golope singi dupwa peparae jerenepape Kamongome langiyamuli pyuo kamba lao namba rangeme maso pii naro ingilyamo. Kamongome pii langiramo doko iki nambame laro lamaiyu, leya.
Belamena Poropeta Pii Pyongo Pyao Ote Pyuo Leya
14 Belameme Beleke kando lao, Nambana wambu range karaminyi dupwa keta kapu kyuo pelyo. Ene papa naronopa nambame emba Isaraele wambu dupwame embena wambu dupwa kando rengya aki mende pirami dokona lao repe repe pii langilyu.
15 Ene piramo dupwana poropeta pii pyongo pyao leya.
Namba Beona ikinyingi Belamena pii dake.
Nambame wambu kando soo giso karenge.
16 Anatumi pii letamo dupwa namba singi.
Nambame soo gisingi renge Anatu Ama Ketae doko keta piso epelyamo doko kando nyingi.
Nambame lenge rakaro karo.
Anatu Porai Wakasa dokome pii repa repa pilyamo dupwa angi rolae kandenge.
17 Rengya pira dokona kando suu pyao
Isaraele rara dupwame pirami doko silyu.
Kiŋi doko bui yanga paupau wakasa lenge dopakale ingyuo Isaraele rara dupwana sipurapala karara.
Isaraele karo epo baame Moape range akali mupwa dupwa pyara.
Dee Sete wambu dupwa peparae pyao isa palyuo kokwa soo nembara.
18 Baame banya nyisu petenge yuu Itome palenge dupwa pyao wini pipala nakamana yuu doko nyuo banya ingyara.
Dopa piramopa Isaraele wambu dupwa wini pyuo puu parami.
19 Isaraele rara dupwame kimbumi kalyuo minjuku minyuo parami.
Wambu yaki nyerami dupwa pyao ote pyuo pyarami.
20 Yuu gii dokopa Belame banya pii repa repa piyamo dokona Amaleke wambu dupwa kandapala rengya pira dupwana pyongo pyao lamaiya.
Wambu rara menge dupwa nyuo isa palyuo Amaleke rara doko ama porai wakasa.
Porai wakasa ingyapyamopape rengya peparae kwaeyalu kwaeyo kwaeyarami.
21 Banya pii repa repa piyamo dokona baame Kene wambu dupwa kandeya. Kandapala rengya pira dupwana pyongo pyao lamaiya.
Yaka kusimwa dupwame mendemepe nyii nana lao rondona kapa retenge doko suu pyao
yuu nakama palyuo karaminyi doko mende pii nao kapa sera.
22 Dopa pyuo kararaminyipape Asiria range dupwame nakama Kene wambu dupwa pyapala karapusi ingyuo nyeraminyi dokopa
nakama kwaeyo parami, leya.
23 Belameme poropeta pii pyongo pyao lao,
Wambu dulurena epo malu palyilyaminyi dupwa apimoose?
24 Wambu dupwame yuu Saiporasa karo ipwa kota dokona sipunya piso epo
yuu Asiria rangepe dee yuu Ipa rangepe nyuo anamasi minyuo pyarami.
Pyaraminyipape enakana nakama opetae kumalu kumuo kumarami,
leya.
25 Lao otapala dokopa Belame sipurapala anda kapu kyuo peya. Peyamo dokopa Beleke baa rangena anda panya kata nyuo peya.
25:1—27:11 Isaraele wambu dupwame kingimi wasisi bange Bealo lenge doko misi lao lakandeyami doko kandapala Anatumi rae mai naya. Isaraele akali porai yulu kapa pingipi kata papingipi dupwana kingi reto yaka leyami. Yaka leyaminyili pyuo rara dupwana yuu enenge doko mokwa soo maiya.