105
Anatu Dee Banya Wambupi
1 Kamongo baapa ange lao dokopa
baa andake wakasale ingyuo karo yulu pipyamo dupwa
kamame yamarangunyi nembo ingyuo silyamo lao yuu muu dupwana dopa pyuo karamoŋo sinya lao lamaimana.
2 Kenane dokome pyao dokopa
yulu keyange pipyamo dupwana lamaiyuo baa lakandamanale.
3 Namwa banya ingyuo karamano dokona lao rae maimanale.
Dopa pyuo wambu baa kingipi wapambupi lakao baa kingi letaminyi dupwa rae maiyuo penale.
4 Kamongo karamo dokona nyisinya lao pupwape.
Papala banya kingi lakando karalu karalapape.
5-6 Nakama banya kendemande Aporakamena para pyao nyisi dupwa karaminyi.
Nakama Jekope Anatumi rombo palyiyamo dokona para pyao nyiyamo dupwakaraminyiko.
Dokona Anatunya yulu keyange pyuo wambumi pii nange yulu piyamopape kote rolae leyamopape
dupwana doko mende kande lao suu pyao karalapape.
7 Kamongo doko namwana Anatuŋu.
Banya mawa pii dupwa wambu yuu muu ree lao palaminyi dupwa peparaena ingyuo silyamo.
8 Banya pii lao kana minyalamo doko leyoŋo lao suupyao karara ingingi.
Rengya para pyao puu paramo dupwanape banya lalu lao lenge pii doko ama kame see nao suu pyaro karalu karara.
9 Aporakamepa keta piruŋu lao kana minyuo leyamo doko kame see nao suu pyaro karara.
Aisake keta lalu lao leyamo dokona dopako pira.
10 Dopako pyuo Kamongome Jekope keta piruŋu lao kana minyiyamo pii doko
kulisa ingyo sulu sera.
11 Baame lao, Nambame yuu Kenanedoko nyuo jeroŋo.
Jeroŋo dokopa nakama rangena ingyuo yuu nyuo palyuo kararami, leya.
12 Anatunya wambu kukilama
yuu Kenane dokona mee upunili ingyuo peyami.
13 Pao dokopa yuu pandape wambu palenge dupwa nyinyi peyo
dee yuu kiŋi wakalemana isingi dupwa nyuo yalo peyami.
14-15 Dopa pyuo peyaminyipape nakama Anatumi koo keta mapya naya.
Anatu baame kiŋi dupwa repe repe lamaiyuo,
Nambana yapalyuo nyisi kendemande dupwa meeelya pyuo karakana.
Nambana poropeta akali dupwa minyandaka nalapape, leya.
Dopa lao banya wambu dupwa kyawa minyuo kareya.
16 Anatumi lopo andake mende Isaraele wambu dupwa kiso maipala
nenge dupwalembeke nyinyi nembeya.
17 Dopa piyamopape baame akali mende kingi Josepe lengende maipala kana ropo pyao nyiyami dokome
wambo panda rapa rapa pyakamyuo karara lao piyasa piya.
18 Banya kimbu dokona puu saneme poraiyuo kiimbuo
banya mange dokona puu sane dokome puu karo piyami.
19 Piyaminyipa dopa piraŋa lao pyasi paleyamo doko angi pyaka siya.
Dopa piraŋa lao leyamo Kamongona pii doko kinyi angi rolae ingyuo peya.
20 Dokona Isipi kiŋi dokomebaa moko nembeya.
Yuu dupwana isingi dokome baa kiiramo nyiya.
21 Baame banya gapomane yulu mupwape
dee yuu litipi dokona mupwa ingyuo iso karenale lao panda maiya.
22 Maipala baame kiŋinya akali kyawa dupwa pawa palyuo iso karena lao panda maiya.
Kiŋinya dopa piri dapa piri lao nyiso lenge akali dupwa baame lamainya lao panda maiya.
23 Dokopa Jekope yuu Isipi dokona pao palyuo kareya.
24 Kamongome banya wambu dupwa wane wai kiso
nakama yanda pimwai dupwa pipya porai ingyuo karena lao piya.
25 Kamongome Isipi akali dupwame banya kendemande wambu dupwa pipya epe kanda napala
panga silya sana pyuo karena lao piya.
26 Dopa pipala banya kendemande akali Mosese Eronepa
baame rombo palyuo nyiyamo dolapo pena leya.
27 Nakamame Anatunya yulu ama andake doko pyuo
mirakale yulu dupwa yuu Isipi dokona pyuo kareyambi.
28 Anatu baame yuu doko iminjanyi peyamopape
Isipi wambu dupwame doko mende pyaamo lao leyamo dokona palyuo pii nayami.
29 Baame ipwa dupwa ranjama wai pyapala
nakamana oma dupwa pyao kumasinyi nembeya.
30 Nakamana yuu liti doko mungimi simbwapala
kiŋinya anda opetaeko simbuya.
31 Anatumi wambena dee oto epo simbunya leyamo doko suu pyao
yuu liti dokona epo kete piya.
32 Nakamana yuu dokona apunda epenge kandale doko suu pyao
yuu pele pipala randake kapa isa malyiya.
33 Baame nakamana isa girapope piki isape peparae kokwa sinyi nembeya.
Isa dupwa peparae pyao roo pyalya pyana pinyi nembeya.
34 Baamegoemba mendeme kapa pyuo yaka larami ingya nara dopale dupwa epena lao nyinyi peeya.
35 Dopa piyasa ee nenge isokope dupwa neyamisa
saa raki piso pupya ingiya.
36 Baame Isipi wambunya ree palu peparaena
wane mupwasa dupwa mende neta paa nana lao pyao kumasiya.
37 Dopa pipala piso Isaraele wambu dupwa neta nyuo nembeya.
Nembeyamodokopa nakamame kana kulingi golope nyuo manjo peyami.
Nakama mendali anga nyuope pii nao porai ingyuo kareyami.
38 Isipi wambumi Isaraelewambu dupwa kando pakame kumuyaminyi dokona
nakama kala peyaminyi dokoparae maiyami.
39 Banya wambu keta kopa soo lanyuo pao
dee kukwa dokopa isare rao yanga paupau lao lanyuo peya.
40 Nakamame jinya lao kee leyami dokopa baame yaka kuki dupwa peyakamiya.
Baame yake panda rae nenge dupwa nao sikya pinya lao maiya.
41 Baame kana dokona nyuo karalyapala ipwa guu lanyi peyakamiyasa
yuu yando nasi dokona ipwapona wasinyuo epo peya.
42 Baame banya kendemande akali Aporakameketa
pii yalu pyuo lalu lao leyamo doko suu pyao kareya.
43 Karo baame banya rombo palyisi wambu dupwa nyuo neta nembeya.
Nembeyamo dokopa rae maingi kenane dupwa pii ketae palyuo lao pyao peyami.
44 Baame yuu wakalemana dupwa nyuo maiya.
Maipala ee nengepe dokonasiyamo dupwa rombo pyao nyinya leya.
45 Renge doko banya wambu dupwame banya lowa dupwana kamba laa nao karo
mawa pii lasi dupwa minyakao karo pirami lao piya.