91
Anatu Namwa Kyawa Minyingi
1 Wambu mende Kamongome kyawa minyinya lao para ramo
dee wambu mende Anatunya arapu porai renge palenge dokona panao mee karo pira ramo dokome Kamongo kando lamaiyuo,
2 Embame nambana kyawa lete nyingipi dee konambena mendeke ingyuo karene dokona
nambana Anatuŋu namba emba keta pyamalyuo karo, lara.
3 Baame emba yulu koo kandapa nao yalu pyuo seramo dokona randa nyere dupwape
dee anga renge koo wambu pyao kuma singi dupwanape emba kyawa minyuo karara.
4 Emba banya arapu dokona kolame yakane yambe pyalamuli pyuo lanyuo papira.
Baame emba kyawa minyuo reto kararamo kapa karare.
Baame banya reto yaki nyii nao pyuo karenge renge dokome pyuo emba kyawa minyara.
5 Emba kukwa dokopa randa jerami lao paka renge nyuowape
dee korakama dokopa pyarami lao suu pyaowape
6 dee kukwa anga yakane koo kisaramopa
koo renge dupwame yuu yangaramo dokopa emba pyao kumakara lyamo laope dusipana pako kara napipi.
7 Wambu dupwame emba kararene dusa wambu taosande malu pyao kuma soo eparaminyipape
emba mee mondo lao karo epare ingyara.
8 Kopetame pingidupwa apa pyuo koo keta palyuo randa nyilyaminyi lao
kando soo karare.
9 Embame Kamongo Ama Ketae doko embena konambe ingyaro karamo lao sepala
wane nyaŋana mendeke ingyuo karapinyi pilyamo.
10 Dokona randa andake mendeme emba isa pyao palya nara.
Koo keta palirili yulu randa dokona mende embena anda kambusa epa nara.
11 Emba parene kata dupwana
Anatumi banya aŋala dupwa emba rapu pyakana lao jera.
12 Embena kimbu doko kaname isa pyaa nana lao
nakamana kingi kapena emba ketae reto nyerami.
13 Embame mena laene wambu nenge dupwape dee kau wambu pingipi dupwa
pyao rambetaku pyarene mee kimbumi nara ingilyamo.
14 Anatumi lao dokopa nambame namba mona retarami dupwa nyiso
dee namba Kamongo doko karene lao soo karaminyi dupwa kyawa lete nyero, letamo.
15 Nambame nyisape lao kyakale laraminyi dokopa isingi pii yano doko pyakamiro.
Nakamba randa nyepala pisiraminyi dokopa kaeya nao role pyao piso nenge rekya lao nyepala dokopa
nakama lakando kingi ketae pyambuo piro.
16 Nambame nakama angi kyawa minyuo karo.
Nakama lapo yano pyao mailyuŋu lao dokopa karo yaku nao kumunya laro ingilyamo.