5
1 Basa hataholi kamahele kala lae, Yesus ndia, memak Karistus, fo Manetualain haituan mai so, ma sila ndia dadik neu Manetualain ana nala. Huu, hataholi mana sue hataholi esa dadik neu amak, na, ndia boe oo, sue amak ndia anan.
2 Mete ma ita sue Lamatuak, ma tao tungga Ndia palendan, na, ndia natudu nae, ita boe oo sue Lamatuak ana nala, fo ndia, ita tolanoo kamahele nala.
3 De, mete ma ita sue Ndia, na, ita tao tungga Ndia palenda nala. Ma Ndia palendan taa mabela.
4 Ita fo mana dadik Lamatuak ana nala so, bisa laban ma senggi daebafok hihii-nanaun, huu ita tamahele teu Ndia.
5 Hataholi fo bisa senggi daebafok hihii-nanaun, na kada hataholi kamahelek, fo mana manaku nae, Yesus ndia, Manetualain Anan.
Namahele neu Yesus, na, ndia nanalan hata?
6 Sadi ei bubuluk. Yesus ndia, taa kada hataholi basa faik. Tehuu, Ndia boe oo, Karistus fo Manetualain haituan neni daebafok ia mai so. Ledoeik Ana sangga nakalalaꞌok Ndia uen, Yohanis salani Ndia nenik oe. Basa ndia, boe ma Ndia boe oo mate, ma nafaa heni Ndia daan. De, kasosoak ndia, taa kada oe fo Yohanis paken fo salani Ndia, tehuu Ndia daan faa ndia, na, kasosoak boe. Huu, Manetualain Dulan mesa kana nafada leondia, ma Ndia taa pepeko nalelak.
7 Huu, hambu dedeꞌak telu dadik sakasii:
8 fo ndia, Lamatuak Dulan, oe fo Yohanis paken fo salani neu Yesus, ma Yesus daa hehelin. Katelu kala sila, latudu dedeꞌak esa fo sama laꞌeneu Yesus.
9 Mete ma hataholi dadik neu sakasii, na, ita tateme tamahele teu ndia. Nakalenak bali mete ma Manetualain mesa kana dadik sakasii laꞌeneu Ndia Anan, ita musi tamahele. Naa te dedeꞌa katelu kala ia, fo Lamatuak paken fo natudu buti, lae, Yesus ndia, taa kada hataholi basa faik, tehuu Ndia boe oo, Karistus.
10 Hataholi fo namahele neu Lamatuak Anan ndia, na, ndia ndandaan nae, hataholi ndia simbo nala Lamatuak Dedeꞌa-kokolan so, laꞌeneu Kakanak ndia. Tehuu hataholi fo taa namahele neu Lamatuak, na, ndia sama leo hataholi mana kokolak, nae, “Manetualain ndia, masapepekok!” No leondiak, ndia taa simbok Lamatuak Dedeꞌa-kokolan laꞌeneu Lamatuak Ana hehelin.
11 Lamatuak Dedeꞌa-kokolan isin leoiak: Ana fee ita tasoda ndoos fo taa mana basak. Ma ita hambu sodak ndia, huu ita tamahele teu Ndia Anan.
12 De, hataholi fo nanambaꞌak no Manetualain Anan, na, nasoda nakandondoo henin no Ndia. Tehuu hataholi fo taa nanambaꞌak no Manetualain Anan, na, taa hambu sodak leondiak.
Hatina de, Yohanis sulak susulak ia?
13 Au sulak susulak ia fee ei, fo mana mamahele neu Manetualain Anan, suek ei bubuluk tebe-tebe, mae, ei hambu sodak nakandondoo henin.
Yohanis sulak tamba laꞌeneu huhule-haladoik
14 Mete ma ita hule-haladoi neu Manetualain, ma toke sudi hata tungga Ndia hihii-nanaun, na, ita bisa tamahele tebe-tebe Ana namanene hata fo ita tokek ndia.
15 Ma mete ma ita tamahele tebe-tebe Ndia namanene ita huhule-haladoin, na, ita boe oo tamahele tebe-tebe simbo hata fo ita token teme Ndia mai.
16 Mete ma o mita o tolanoom tao salak, fo taa bisa tao nisa ndia, na, malolenak o hule-haladoi fo Manetualain fali nala o tolanoom ndia, suek nasoda. Naa, au hihiing nai ia, hambu salak fo taa tao nala hataholi mate. Ma hambu salak fo bisa tao nala hataholi mate, tehuu au taa adenu hule-haladoi, mete ma hambu salak leondiak.
17 Nai Manetualain matan, na, basa dedeꞌa taa malole fo ita taok ndia, na basa sila la, salak. Tehuu, taa basa sala kala, leni mamates.
Yohanis fee nasanenedak seluk dedeꞌa kasosoak
18 Hataholi fo naoka nai Manetualain so, na, taa nasoda tao salak bali, huu, Manetualain Anan nanean. Ma, manggalauk inahuun taa senggin so bali.
19 Ita bubuluk, tae, ita ia, taoka nai Manetualain. Tehuu ita boe oo bubuluk, manggalau inahuuk naena koasa fo heti basa hataholi nai daebafok ia.
20 Ita bubuluk, tae, Manetualain Anan mai so, fo tao ita bubuluk dedeꞌa kala ia, fo suek ita bisa talelak Manetualain fo tetebes ndia. Hatematak ia, ita bisa tasoda malole to Ndia so, huu ita tasoda dalek esa to Ndia Anan, Yesus Karistus. Huu, Ndia ndia boe, Manetualain tetebes. Ma Ndia tao hataholi nasoda nakandondoo henin.
21 Ana nggalei! Manea neulalau ei soda mala. Boso ela dedeꞌa feꞌek nggati Manetualain nai ei dale mala.
Leondiak leo.
Yohanis