Petrus kaesan
Petrus susula kaesan
1
Soda-molek
1-2 Susulak ia neme au mai, Petrus, fo Yesus Karistus nadedenun.
Au sulak susulak ia, fee ei basa nggei, fo Manetualain hele nalan so. Ei leo matanggenggelak nai mamanak noꞌuk nai propinsi Pontus, propinsi Galati, propinsi Kapadokia, propinsi Asia ma propinsi Bitinia.
Tolanoo susue nggalei! Neme sososan mai, Manetualain hele nala memak ei so, fo dadik neu Ndia hataholi nala. Ndia Dulan boe oo, tao nala ei dadik malalaok soaneu Ndia, fo suek ei tao tungga basa palenda fo Yesus Karistus fee ei. Mete ma ei tao tungga basa Ndia palenda nala, na, ndia dadik tanda nae, ei dadik malalaok soaneu Ndia, huu Manetualain mbimbilu Yesus daan neu ei.
Au hule-haladoi, fo Manetualain natudu Ndia dale malolen neu ei, fo suek ei bisa masoda tamba faik tamba sodak, mole ma ndoo-ndoo.
Mete ma ita tamahele teu Lamatuak, na, ita tasalai teu Ndia
3 Basa kokoa-kikiok neu Manetualain! Ndia ndia, ita Lamatuan Yesus Karistus Aman. Huu Lamatuak dale malolen, de Ana kasian nalan seli neu ita. Yesus Karistus maten, boe ma Ana nasoda fali. De, mete ma Karistus tao nasoda ita, na, Ana fee ita soda beuk, fo sama leo ita nana bonggi beuk. Huu ndia de ita tamahele takandondoo henin teu Karistus, huu ita tamahena ma tamahele tae, neu ko Ana nanea neulalau ita.
4 Nai daebafok ia, mete ma amak esa maten, na, ana ela hata nala neu ndia ana nala. Leondiak boe, Yesus mbeda ela pusaka soaneu ita so nai lalai. Tehuu pusaka ndia taa bisa nakalulutuk ma taa mopo heni sana.
5 Ei mamahele mae, Manetualain naena koasa fo tulu-fali ei. Ana nafaduli ei, ma nanea ei fo taa hambu esa tao nakalulutu ei. Ma neu daebafok babasan, Manetualain sangga natudu manggaledok Ndia dalan fo nasalaꞌe nala ei neme ei sala-singgom mai.
6 Huu ndia de ei dale mala lamahoko, mae hatematak ia ei mameda mabela, huu ei musi hambu toꞌa-taa mata-mata kala.
7 Manetualain mboꞌi ita hambu soba-dou kala, fo sangga uku-sudi ita tamahehelen teu Ndia. Mete ma ita takamboꞌik teme soba-douk mai, na, ndia natudu nae, ita tamahehelen ndia, matea ma tetebes. Ita bisa takasasaman no lilo mbilas. Huu ita musi hotu lilo mbilas neu haꞌi, fo suek manggenggeon kalua dei, bei fo ita hambu lilombila isi-isik. Naa te, tungga Manetualain duduꞌan, na, ita tamahehelen belin lena heni lilo mbilas. De, mete ma ita tamahehelen nala nakamboꞌik neme soba-douk mai leondiak, dei fo neu faik fo Yesus Karistus fali main, na, Manetualain boe oo koa ita, de Ana sosoꞌuk ita naden ma fee hadak neu ita.
8 Mae ei bei ta mita Yesus no ei mata hehelim, tehuu ei sue Ndia. Mae hatematak ia ei taa mita Ndia, tehuu ei mamahele neu Ndia. Ei dale mala lamahoko lalan seli, mae taa hambu dedeꞌa-kokolak fo nandaa mafada hataholi laꞌeneu ei dale namahokom.
9 Huu ei mamahele neu Ndia, de ei nggadim ndia, na ndia Manetualain nasalaꞌe nala ei neme ei sala-singgom mai.
10 Manetualain mana kokola makahulu nala sangga bubuluk fo suek bubuluk malole lena, talobee de Manetualain nasalaꞌe nala hataholi la leme sala-singgo nala mai. Mana kokola la sila lafada memak laꞌeneu Manetualain natudu Ndia dale malolen neu ei, huu Ana nahehele memak so fo nasalaꞌe nala ei.
11 Karistus Dulan naue-naosa nai sila dale nala, fo nafada memak, nae, dei fo Karistus musi hambu totoꞌak, ma dalan talobee fo Ana musi hambu doidosok. Basa dedeꞌa kala sila, bei fo Lamatuak soꞌu dema-demak Ndia. Huu ndia de, mana kokola la sila sangga bubuluk, fai hida fo basa dedeꞌa kala sila dadi.
12 Basa de, Karistus Dulan ndia, nafada mana kokola la sila, nae, sila ndia taa lita, tehuu ei ndia mita dedeꞌa kala sila. Hatematak ia ei boe oo, mamanene dedeꞌa kala ia, huu Lamatuak Dula Dale Malalaon neme nusa-sodak mai, haitua hataholi feꞌek so, fo neu nafada Lamatuak Hala Malolen neu ei. Naa te, Lamatuak ata nusa-soda nala boe oo, lahiik lita dedeꞌa kala ia.
Lamatuak nadenu fo ita tasoda malalaok
13 Huu ndia de, ei musi mahehele sadia bubuluk neulalau basa dedeꞌa kala ia. Manea neulalau fo ei duduꞌa ndoos. Mahehele fo mamahele makandoo neu Yesus Karistus, losa Ana fali main. Huu faik ndia, Lamatuak nau natudu Ndia dale malolen neu ei.
14 Ei musi mamanene taa-taa neu Manetualain, sama leo kakana kala lamanene taa-taa leu sila ina-ama nala. Makahulun, ei bei ta bubuluk Lamatuak dala soda teteben. Tehuu hatematak ia ei bubuluk so. De, boso masoda tungga ei hihii tatao manggalaum bali. Huu, ndia ei dala soda laam ndia.
15 Huu ndia de hatematak ia ei musi masoda malalaok. Huu, Lamatuak ndia, malalaok. Ndia ndia noke nala ei, fo dadik neu Ndia ana nala. Huu ndia, de ei musi malalaok, nai basa ei soda katematuam.
16 Huu, nana sulak nai Manetualain Susula Malalaon nae, “Ei musi malalaok, huu Au malalaok.”
17 Ei mahiik makokola mia Manetualain sama leo Ndia ndia, ei Amam. Ndia boe oo, dadik Mana Maketu Dedeꞌak fo neu ko palisak hataholi esa-esak sodan. Tehuu Ndia feꞌe neme mana maketu dedeꞌa feꞌe kala. Huu naketu hataholi dedeꞌan no ndoos ma taa nabenu seselik. Huu ndia de, ei musi mata neuk. Huu ei sama leo hataholi nusa dea fo kada leo tataak nai daebafok ia.
18 Ei bubuluk so mae, Karistus tifa ketu ma soi nala ei so mima ei sodam fo huu-okan taa. Soda mata leondiak ndia, ei simbo malan neme ei bei-bai mala mai, sama leo hata pusaka esa. Tehuu masanenedak, huu Karistus tifa ei taa nenik lilo mbilas do lilo fulak, fo dei fo mopo henin.
19 Tehuu Ana tifa ei, nenik Ndia daa hehelin. Ndia belin ana seli! Ana mate leo biꞌilombo ana fo taa tao nitak salak, fo ala halan dadik neu tunu-hotuk.
20 Faik fo Manetualain bei ta nakadadadik daebafok ia, Ana bubuluk basan so, dei fo Karistus taon. Tehuu makahulun, Manetualain bei ta natudu Karistus neu hataholi nai daebafok ia. Bei fo hatematak ia, Ana natudu Karistus, fo dadik babaꞌe-babatik neu ei.
21 Huu Karistus tataon, de, ei bisa mamahele neu Manetualain. Huu Ana tao nasoda falik Karistus, ma soꞌu dema-demak Ndia. Manetualain tao leondiak, suek ei mamahele neu Ndia, ma mamahena fo Ana tao natetu hata fo Ana helu memak ndia so.
22 Ei tao tungga hata fo tetebes. De, hatematak ia, ei bisa maue-maledi mini tean fee Lamatuak. Ndia tao nala ei sue tebe-tebe ei tolanoo kamahele mala. Ei susuem ndia musi boe natea, huu ei dale mala malalaok.
23 Hatematak ia, ei hambu soda beuk so. Tehuu soda beuk ia, ei taa hambu sana neme ei inama mala, fo dei fo mate sala lai daebafok ia, tehuu ei hambum neme ita Aman manai nusa-sodak, fo taa mana matek. Ei soda beum ia, ei hambum nesik Manetualain Dedeꞌa-kokolan. Ndia Dedeꞌa-kokolan ia, neni masoda tetebes, ma nahele nakandoo.
24 Huu Manetualain Susula Malalaon nana sulak nae,
“Hataholi sama leo naꞌu esa, do bungga esa.
Tehuu sila lole nala, taa lahele nakandoo.
Naꞌu, male henin.
Bungga boe oo, moꞌu henin.
Doo-doo fa boe ma mate sala, de mopo heni sala.
25 Tehuu ita Lamatuan Dedeꞌa-kokolan,
nahele nakandoo, ma taa no namaketuk.”
Manetualain Dedeꞌa-kokola nala sila, ndia Hala Malole fo ai mafada neu ei so.