18
Mïꞌrï ngwujaꞌri ngwani undi ngwäy gwudi dedel
1 A be Yicu mïꞌrïcï ngwoꞌra ngwüngün ngwujaꞌri ngwuje enggaci ndi ari aar undi ngwäy ndi otaci Ngwaalingalu yomon ꞌdar aaꞌti la muli nono aꞌtur.
2 Ngwari, “Kündär geꞌte, deleny diju gu danni dati ꞌti dïnyädï Ngwaalinga ating ꞌti geꞌtaji ngwüjï ngwäyänü.
3 Na daw deꞌte diru dedel diju gu kündär nggoo. Ati ngwilada ꞌdünggüngün ating gu dünäcälä no ndi ari ngwüꞌtücï ngwony ngwüngün ngwuci, ‘Ila nje ombaci yiꞌral aꞌri gwe nyi ꞌtücï.’
4 A yomon ele aar onyadi ati deleny ꞌdonya ndi ombaci dedela yiꞌral. A be gäꞌtï gänü ngwube ci ligoꞌro lüngün nu, ‘Äny gwaꞌti dïnyädï Ngwaalinga nyi ꞌti geꞌtaji ngwüjï ngwäyänü,
5 ati aar nyi be daw ndee päcälü yomon ꞌdar aar nyi ꞌti gäbïcä nggwa gatu düwä, diny ombaci yiꞌral yüngün ngwele aaꞌti diny äbïngïnänü yiꞌral yüngün diny iye giꞌra!’ ”
6 A je be Deleny ci nu, “ꞌDinginar ngwujaꞌri ngwaru ngwe deleny ndee daꞌti dünälü.
7 Nda mine Ngwaalu, laꞌti ling je ombaci yiꞌral yegen lanni läbrüng je liru ngwüjï ngwüngün, ngwanni ngwati ꞌti mulu nono ndi otacalu lingen le na dilu de? La je Ngwaalu ji ndi gwäꞌräcï yiꞌralalu ngwuje ꞌti ombaca?
8 Nggwa je ci nu, Nginde ling je ꞌtücï yiꞌral yegen ngwuje übïdïyänü aar gu ru puprang. Ndä be ndi ari Gïjï gidi Dïjï dümnä mung oꞌra, ga mbuji ämnïng Ngwaalu ngene gïdïdla?”
Dïbärrïjï na didulba
9 Oꞌre a je Yicu mïꞌrïcï ngwujaꞌri ngwe ngwani ngwüjï ngwanni ngwati ci yigoꞌro yegen ngwujaw ati aar be ꞌdüꞌdïnyä ngwüjü ngwoko ndi ari,
10 “Ngwüjï rom (2) ngwändädï kobo ndi otaci Ngwaalingalu, deꞌte diru Dïbärrïjï a deꞌte diru didulba.
11 A be Dïbärrïjï dünädälä ngwotaci Ngwaalingalu giligoꞌro lüngün. Ngwari, ‘Ngwaalu, äny gwucanga yäy ꞌtu, ndi ari äny gwäꞌtüdï nono ngwüjü ngwoko ngwanni ngwati ngïrïdïnä ngwüjü, ngwanni ngwuki, ngwanni ngwati mïꞌrï ngwäyänü na nggwäꞌtüdï nono didulba ndee.
12 Nggwati määtä ngwädä yomonanu rom (2) giyomon kwoꞌra täꞌrïl. Na nggwati gwalli giꞌra geꞌte ngwonganu ꞌdï ꞌdar ngwanni ngwati nje bile.’
13 A be gur nggoo giru didulba dünä ꞌtuꞌtu ngwaalu ngwolanu. A yaaru ape ndi ꞌdïꞌrïyï ngwäy ngwombajidi kerala. Ngwube geꞌte guy giligorala lüngün ngwari, ‘Ang ïnä gwani Ngwaalu, äny gwuru dïjï danni diki.’ ”
14 A Yicu ari, “Nggwa je ci ndi ari gur nggoo giru didulba aaꞌti ngaa la ari Dïbärrïjï, giru gima üllä ꞌdunu gwüngün gijaw nono ngwäyänü Ngwaalu. Ndi ari gwere gwanni gwati piyi ligoꞌro lüngün, lating okeye na gwanni gwati okeye ligoꞌro lüngün, lating piyi.”
A Yicu onjaci yïjü yanni yooko
(Mätä 19.13–15; Murkuj 10.13–16)
15 A ngwüjï ngwoko ji ndi apa yïjü aar ye ila ndi Yicu nunnu ngwuje gatu guy nono ngwuje onjaci. Anni ma je ngwooꞌra ngwudi Yicu engga, aar je girinya aar je etaci.
16 A be Yicu urnida yïjü ꞌdünggüngün ngwari, “Gäbïcär yïjü yanni yooko aar ila ꞌdünggüny aaꞌti ya je etaci, ndi ari yeleny yidi Ngwaalu yiru yidi ngwüjï ngwanni ngwuru nono ngindeng je.
17 ꞌDiꞌdidanu, nggwa je ci, gwere gwanni gwaꞌti gwa ape yelenya yidi Ngwaalu ngwuje ape nono gïjü ganni gooko, gwaꞌti gwa änï giyelenyanu yidi Ngwaalu aꞌtur.”
Deleny danni dïnänü
(Mätä 19.16–30; Murkuj 10.17–31)
18 A deleny deꞌte otaci Yicungalu ngwuci, “Gwani doorta danni dijaw nggwa ape ange nunnu nyi mbuji miding gwudi gwurꞌtaling?”
19 A be Yicu ci nu, “Ange gwuru nyi be ci äny gwujaw? Gwaꞌti gwere gwanni gwujaw a be Ngwaalu ru jücü.
20 Nga gwülïngïdï ngwujaꞌri ngwudi Ngwaalu ndi ari aaꞌti a gwa mïꞌrï ngwäyänü, aaꞌti a gwa ꞌrinyidi, aaꞌti a gwa ape yuꞌrimi, aaꞌti a gwüꞌrïdä dïjü yiꞌduru nono, dïnyädï papanga je nanni gwe.”
21 A be gur ci nu, “Äny gwümätï ngwujaꞌri ngwee ꞌdar ꞌtuꞌtu ꞌdïꞌrïny gwälü gwooko.”
22 Anni ma gu Yicu ꞌdingini no, ngwuci nu, “Yeꞌte pu giyoo yijalu ndi a je ärrï. Ïllï je yunga ꞌdar yanni yätä je ang ape ngwiliny nga je gegenaci ngwüjü ngwanni ngwuru ngwuwayi a gwa be ätï yuꞌrina kerala. Nga be ila nyi gwujani.”
23 A be anni ma gu gur ꞌdingini nu, ngwuruni gwulleny, ndi ari giru dïjï dätï gola gipa.
24 A Yicu ombaji ngwari, “Yojema gwulleny ngwüjï ngwanni ngwünänü ndi änï giyelenyanu yidi Ngwaalu!
25 ꞌDiꞌdidanu Yijanalu ürgäny ndi ari a damla änï kïy gidi yïbrä ndi ari a dïjï dïnänü änï giyelenyanu yidi Ngwaalu.”
26 Ngwüjï ngwanni ngwuꞌdingina ngindeng nggwondaji no, aar utalu ndi ari, “Yärü mine gwa gïlängïdïnï?”
27 A Yicu ari, “Yanni yati ajilaji ngwüjü ngwümnä, yati ꞌti ajilaja Ngwaalinga.”
28 A be Butruj ci nu, “Änggädï! Änyängä lima gatana ngwonyalu ꞌdar ngwärï ndi ar ang gwujani!”
29 A je Yicu ci, “ꞌDiꞌdidanu nggwa je ci, ndi ari gwere gwanni gwa gatani ngwuꞌduna, dayu, gwenggen, papanga, yïjï yüngün, gwani yeleny yidi Ngwaalu,
30 gwaꞌti gwa amiꞌrati ndi mbuji gwonyadana kaji nggee gïdïdlä a miding gwudi gwurꞌtaling kaji gïdïdlä ndäꞌdï dadi oꞌra.”
A Yicu ondaji mana gwani yiꞌrany yüngün
(Mätä 20.17–19; Murkuj 10.32–34)
31 A Yicu apada ngwoꞌra ngwoo ngwüngün ngwuru ꞌdï na rom (12) gay geꞌte ngwuci nu, “A ladi allu Üräjälïm a ngwujaꞌri ꞌdar ngwanni ngwullu je ngwïjïr ngwudi Ngwaalu Kïjï gidi Dïjï dümnä ngwa gu mbuti.
32 Nginde ga aar määtä ga aar ätädä ngwüjü ngwuru Garany, ga aar ärrï yïdäpängä ga aar lo ga aar gwonynya ngwäyänü.
33 Ga aar pï lacal le ga aar ꞌrinye ga jalu yomon täꞌrïl (3) ga ꞌdïꞌrä.”
34 A be ngwooꞌra ngwüngün ꞌti lïngïdï yiꞌral yere ngwujaꞌri ngwee. Ndi ari, yiꞌral giyee yänïjäär jälü ndi aar je lenge aar ꞌti lïngïdï ndi ari Yicu gwondijaja kang.
A Yicu uꞌriyi diwuwaya nono danni dïrïmü ngwäy
(Mätä 20.29–34; Murkuj 10.46–52)
35 Anni ma Yicu ji gito gito kündär gani Ariya, gur geꞌte giju gu ngeno giru diwayi gïrïmü ngwäy ngwuji ndi jalu gay gïlänï ndi geraci ngwüjü guy.
36 Anni mung ꞌdingini ngwüjü ngwonyadu ngwïndï aar ꞌtü nono, ngwutalu ngwari, “Yiru ange giyo?”
37 Aar ci, “Yicu gwudi Najrang nggwo gwïndï.”
38 Ngwärï dula ngwari, “Wä Yicu Gïjï gidi Däwüd, ang ïnä!”
39 A ngwüjï ngwanni ngwumadina girinya aar ci gwugundu. Ngwümꞌrïdänï dula dipa ngwari, “Gïjï gidi Däwüd, ang ïnä!”
40 No a Yicu dünï ngwuje ci aar äpïjä dïjü ndoo. Anni mung ꞌdonggada, a Yicu otacalu ngwuci,
41 “A gwümïnä ang ärrïjï ange?”
Ngwuci, “Gwani Deleny, äny gwümïnä ndi uꞌri ngwäy.”
42 A Yicu ci, “Uꞌru ngwäy, ämnï gwunga Ngwaalu gwuma ang uꞌriyi nono.”
43 Puprang no, ngwuꞌri ngwäy ngwombajidalu, a nginde gwujani Yicung, ngwortada Ngwaalingala. Anni ma ngwüjï ku engga yiꞌral giyee, ngindenga ꞌto aar ortada Ngwaalinga.