23
Aar apada Yicung gideleny dani Bilatij
(Mätä 27.1–2,11–14; Murkuj 15.1–5; Yuwana 18.28–38)
1 A ngwüjï ꞌdïꞌrälü ꞌdar aar apada Yicung ndi deleny dani Bilatij.
2 Aar üꞌrïdä ngwujaꞌri nono aar ari, “Nyii limbuju, guru nggee ndi dudiyi ngwüjü ngwärï. Nginde gïnïjä geꞌteng dulba dani Gayijar deleny didi Rumang ngwari nginde gwuru gwani Gwubrutaar yelenya gwuru deleny.”
3 A no a Bilatij otaci Yicungalu ngwuci, “Nga gwuru deleny didi Ngwüyäwüde?”
A Yicu ci, “Yäy anaku ara gu.”
4 A be Bilatij ci ngwurꞌdala ngwanni ngwuru ngweleny a ngwüjï ꞌdar ngwanni ngwuju ngeno nu, “Nggwaꞌti mbojaja guru nggee yiꞌral nono yere yanni yadi nyi gu gekaji.”
5 Aar be ꞌdonyalu ꞌtïꞌtïbüny aar ci, “Gur nggee gati lagaci ngwüjü ngwujaꞌranu, gati gwogaji ngwüjü ngwujaꞌri ngwe ngwüngün ngwaalu ꞌdar Yäwüdïyä, Jälïl ꞌdi ngwobana ngene.”
Aar dinga Yicung gideleny dani Yïrüdïj
6 ꞌDingina gu Bilatij ngwürïny ngwani Jälïl no, ngwutalu manari gur nggee giru Dïjälïl.
7 Anni mung gu lenge ndi ari Yicu gwuru gwudi Jälïlïng deleny düngün diru dani Yïrüdïj, ngwudinga ndi Yïrüdïj gwanni gwuju kaji nggoo Üräjälïm.
8 Anni ma Yïrüdïj ele ngwengga Yicung ngwujayanu gwulleny. Anaku mïnïng gu ꞌtuꞌtu gaji golanu ndi engga ndi ari gwuꞌdingining gwe gwulleny ngwujada ndi engga yiima ꞌdünggüngün.
9 A Yïrüdïj otacalu ngwujaꞌri ngwe ngwonyadu, aaꞌti Yicu gwäꞌräcänü yiꞌral ye yere.
10 A ngwurꞌdal ngwanni ngwuru ngweleny ngwoortanga le ngwudi yobo aar ji ndi dünälä aar ondajaji giyiꞌral yegen yanni yüꞌrïdädäär je Yicung nono.
11 A Yïrüdïjïngä gwuꞌtulu gwe gwüngün ärrï Yicung yïdäpängä aar giki direda dijaw didi yeleny aar gwäꞌräcä Bilatijing.
12 Gomon nggoo Yïrüdïjïngä Bilatij gwe lanni liru güwän gwerre, aar ru ngwumaad.
Aar pïcï Yicung yelenya gwani yiꞌrany
(Mätä 27.15–26; Murkuj 15.6–15; Yuwana 18.39—19.16)
13 A Bilatij urnidi ngwurꞌdala ngwanni ngwuru ngweleny na mbumbunga lanni liru yiꞌra na ngwüjï ꞌdar gwüpäng.
14 Ngwuje ci, “Nga nga läpïjïny guru nggee nunnu gati lagaci ngwüjü ngwujaꞌranu ngwuje dudiyi ngwüꞌdïꞌrï yäärä ye. A be giminy otacalu gwenene ngwäyänü ꞌdanggalu giminyi ꞌti mbojaja ngwujaꞌri nono ngwanni ngwara ngwe ꞌdünggüngün.
15 Na Yïrüdïj ꞌto gwaꞌting mbojaja ngwujaꞌri nono, no gwuma aar nje gwäꞌräcä. Yere yaꞌti yärrüng je yadi gäbïcï ngwayi.
16 Yäy gu no, gwunyi be pï ꞌdogo gwunyi gatalu.”
18 A be ngwüjï ꞌdar ürrï dula, aar ci, “ꞌRïnyïtï ngindeng nje be gätïjä Barabajingalu.”
19 Barabaj gwümäätär aar giki giyiꞌral yärrüng je kündär nggwogaji ngwüjü ndi ꞌdïꞌrïyä yärä na ngwuꞌrinyidi.
20 Mïnä gu Bilatij ndi gata Yicungalu, ngwoꞌre ngwuje päcälü mana.
21 Aar ꞌdonyalu ꞌtïꞌtïbüny aar ci, “Pädï küꞌrï ngwayi!”
22 Oꞌre a je Bilatij otacalu gomonanu ganni giralu täꞌrïl, ngwuje ci, “Ange gwuru yiꞌral yiru ange yanni yärrä je gur nggee? Äny gaꞌti nyi mbojaja yiꞌral nono yanni yadi gäbïcï ngwayi, no ginyi pï ꞌdogo nyi gatalu.”
23 Aar be määtä aar ꞌdonyalu ꞌtïꞌtïbüny aar ürrï dula gwulleny aar bupi ngwayi. Aar je ꞌdengenaci dula degen.
24 No a Bilatij mïꞌrïnï kiꞌra ngwuje ämnäcï buping gwegen.
25 Aar je gätïjä guralu ganni gïmäätär aar giki giyiꞌral yärrüng je ngwugwogaji ngwüjü ndi ꞌdïꞌrïyï yärä, ngwuꞌrinyidi Ngwuje be ätä Yicung aar ärrï yiꞌral yanni yibupaar je.
Aar pä Yicung küꞌrï gimamindanu
(Mätä 27.32–44; Murkuj 15.21–32; Yuwana 19.17–27)
26 Anni ma aar ape aar gwe ele, aar mbuji guru geꞌte gidi gen gani Giruwan, gur gani Jamaan goꞌra gïtäny, aar üpïyï güüꞌrï, ngge gwujani Yicung.
27 A ngwüjï ngwonyadu gwujani Yicung na ngwaw ngwanni ngwïnädï je Yicu ꞌdi aar rünïjï.
28 A Yicu gwurlalu ngwuje ci, “Lani yera yidi Üräjälïmïng, nyii ꞌti ärädï, ärädär yigoꞌro yalu na yïjï yalu.
29 Yomon yeꞌte yila yanni yada ye ari yiwaya aang ari, ‘Äjï jaying nono gwudi ngwaw ngwanni ngwuru yurrum, äjï jaying nono gwudi ngwaw ngwanni gwaꞌti lïngïtï aar ꞌti iꞌriya aꞌtur!’
30 La be ci yeno, ‘Acaji nje’
a yidotra, ‘Gwüꞌrübäjï njälü.’
31 Ndi ari manari lärrïny gu no gwanni gwuru daꞌri dïgïlä, ya be ruꞌtaa ꞌdanggalu lanni liru yüꞌrï yundu?”
32 Aar apa ngwuꞌramu rom ngwadi aar je ꞌrinye Yicunga le.
33 Anni ma aar le obani ngwaalu ngwucaar je ngwaalu ngwudi guya gidi giꞌra gidi dïjï, aar je pä gïyüꞌrï ngwuꞌram ngwe ngwoo rom. Deꞌte aar pä küꞌrï kaama a deꞌte aar pä küꞌrï kängïr.
34 A Yicu ari, “Papa, düdänïjä jänü, ngindenga laꞌti lïngïdï ndi ari gilo ndi ärrï ange.” Aar gatu yuꞌru aar gigini ngwuredanu ngwüngün.
35 A ngwüjï dünälä aar ji ndi ombajidi, na ngwüjï ngwanni ngwuru yiꞌra ngwuju ꞌto aar ärï ngwïmä aar ari, “Nginde gwügïlängïdïyä ngwüjü ngwuꞌter gäbïcär ꞌdi ngwügïlängïdïyï ligoꞌro lüngün manari gwuru gwanni Gwubrutaar yelenya gwanni gwäbrä Ngwaalu.”
36 Na gwuꞌtulunga ꞌto aar ondaci Yicung yïdäpängä. Aar ape yaw yula aar ꞌdonggaci aar je ätädä nunnu ngwuje ïyï
37 aar ci, “Manari nga gwuru ꞌdiꞌdidanu Deleny didi Ngwüyäwüd, gïlängïdïyä ligoꞌro lunga.”
38 Aar ulli ngwujaꞌri küꞌrälä ngwaru nu, DELENY DIDI NGWÜYÄWÜD DIRU NDEE.
39 A duꞌram deꞌte ndoo dïpädäär je le gïyüꞌrälä ngwürrä Yicung ngwujaꞌri nono ngwullo ngwuci, “Nga gwäꞌtüdï gwanni Gwubrutaar yelenya? Gïlängïdïyä ligoꞌro lunga nje gïlängïdïyänï ꞌto!”
40 A duꞌram deꞌte ndoo girinya ngwuci, “Nga ꞌto, yedeny yaꞌti ang ïtï Ngwaalo? Anaku ürküdïyäär nje gu ngindenga le,
41 nda mätïnä mama giyiꞌral yege yanni yärrï nda je yiki. A be gur nggee gaꞌti ärrü yiꞌral yiki.”
42 Ngwube ari, “Yicu, diwayininy ma ji ma ang änï giyelenyanu yunga.”
43 A Yicu ci, “Äny gwa ang ci ꞌdidanu gwene nda la ji gwüpäng kerala.”
Yiꞌrany yidi Yicu
(Mätä 27.45–56; Murkuj 15.33–41; Yuwana 19.28–30)
44-45 A dïrïm elalu mogeny ꞌtuꞌtu gilingen lïdünälä, ꞌdi a lingen ele ngwuru täꞌrïl. A dired danni dati ji gidiliganu kobo dïrïtïnänü gidiliganu ngwuranu rom.
46 A Yicu urnidi dula gwulleny ngwari, “Papa, gwang ätädä lïgïꞌrïmä lüny kuyanu gunga.” Anni mung gu ari no, ngwugatu düwä ngwayi.
47 Anni ma gu gur giru giꞌra gidi gwuꞌtulunga engga yiꞌral giyee no, aar gäbïcï ngwortada Ngwaalinga ngwari, “ꞌDidanu dïjï ndee diru dïjï dïdünälü.”
48 A ngwüjï ꞌdar ngwanni ngwuju ngenone giyiꞌral giyee, anni ma aar engga yiꞌral giyee aar oꞌre lïmäätänä yigoralu.
49 A ngwüjï ꞌdar ngwanni ngwülïngïdï Yicung na ngwaw ngwanni ngwïndäär le ꞌtuꞌtu Jälïl, aar dünä ngwaalu ngwolanu aar ji ndi geꞌte yiꞌral giyee ngwäy nono.
Gatidi gwudi Yicu
(Mätä 27.57–61; Murkuj 15.42–47; Yuwana 19.38–42)
50 A gur geꞌte ngwüjänü ngwudi ngwämrä ngwudi Ngwüyäwüd gani Yüjïb giru dïjï dijaw dïdünälü.
51 Gaꞌti ngwujaꞌri ngwudi ngweleny jädänü na ärrï gwanni gwärräär gwe Yicung. Gati ji Yäwüdïyä kündär gani Rama. Giru ngwüjï ngwanni ngwati ji ndi dünïcï yelenya yidi Ngwaalu.
52 Ngwele ndi Bilatij, ngwotacalu ngwanginu ngwe ngwudi Yicu.
53 Ngwülläjälü ngwape ngwüpä direda nono ngwugeꞌte gidimomanu danni diyang daꞌti aar gu gätï dïjänü dïpïdäär ngwurꞌda.
54 Gomon nggoo giru gidi Jaꞌrimani aar jici gomon mama ganni gadi ila giru Kwoꞌra täꞌrïl.
55 Ngwaw ngwanni ngwïndäär Yicunga le ꞌtuꞌtu Jälïl, aar ꞌdïꞌrï aar gwoda Yüjïbïng aar enggada dimomo na awa legeꞌta gu ngwangina ngwüngün.
56 Aar be kwodalu aar ro gwuduꞌrula aar geꞌte yila. Aar be jalu gomon nggoo ganni giru Kwoꞌra täꞌrïl aar gatu düwä anaku aru gu yobo.