22
Yïꞌrïnyïnä yidi deleny
(Luka 14.15–24)
1 A je Yicu mïꞌrïcï ngwujaꞌri mana ngwari,
2 “Yeleny yidi gerala yiru nono delenya digeꞌta yïꞌrïnyïnä yidi agidi gwudi gïjï güngün.
3 Ngwube ükäjï ngwïnädä ngwüngün ngwüjï ngwanni ngwurnidaar je aar je abingaca ndi ari aar ilada gïyïꞌrïnyïnä, aar be ꞌdonya ndi ila.
4 Ngwube oꞌre ngwükäjï ngwïnädä ngwuꞌter mana ngwuje ci, ‘Car ngwüjü ngwanni ngwurnidaar je, ndi ari äny gwuma geꞌte enying mama, yïndïrï na yiimꞌru yüny yanni yïcü nje yima dügïnï, na yiꞌral ꞌdar yima ji mama. Iladar be gïyïꞌrïnyïnä!’
5 Aar be münä ngwujaꞌranu ngwüꞌtü nggwee ngwele giliburanu lüngün na nggwee ngwele giyiiru yüngün.
6 A loko määtä ngwïnädä ngwüngün aar je ärrï yïrïgïnä aar je ꞌrinye.
7 A güündä ape delenya ngwükäjï gwuꞌtulung gwüngün aar ele aar ꞌrinye ngwüjü ngwoo ngwuꞌrinyidu aar je üꞌdïyïjä gündärä gegen.
8 A be deleny ci ngwïnädä ngwüngün nu, ‘Yïꞌrïnyïnä yima ji mama, a be ngwüjï ngwanni ngwurnidi nje ngwaꞌti ädï ngwäy ndi ila.
9 ꞌDïꞌrär aang ele ngwayalu giyumil aang urnida ngwüjü ngwanni ngwa je mbuja car je aar ila gïyïꞌrïnyïnä yidi agidi.’
10 No a ngwïnäd ꞌtü aar ele ngwayalu, aar urnida ngwüjälü ꞌdar ngwanni ngwuma aar je mbuja, ngwanni ngwuki na ngwanni ngwujaw, ꞌdi a ngwïrnü onyadi ngwaalinga.
11 A be anni ma deleny ändä ngwengga ngwïrnü, ngwengga guru geꞌte gaꞌti genna ngwureda ngwudi yïꞌrïnyïnä.
12 Ngwuci, ‘Gwani dimaad, nga gwändï ngene awa gwaꞌti genna ngwureda ngwudi yïꞌrïnyïnä?’ Ngwuꞌti ondaju.
13 A deleny ci ngwïnädä, ‘Gekajar ngwuyalu na yora aang ape aang gatu poor gïdïrïmänü, ngwaalu ngwudi yal na ïyïnï ngwad.’
14 Ndi ari lonyadu lurnidar je, aar je be äbrï loko.”
Gïꞌtïjï delenya didi Rumang dulba
(Murkuj 12.13–17; Luka 20.20–26)
15 A be Ngwübärrïjï ꞌtü aar ele aar geꞌte ngwujaꞌri ndi ari awa aar määtä Yicung ngwujaꞌri ngwe.
16 Aar ükäcä ngwoꞌra ngwegen ngwüjïngä le ngwudi giꞌdu gidi Yïrüdïj, aar ci, “Gwani Doorta, änyängä lïlïngïdï ndi ari nga gwujaw, a gwati enggaci ngwüjü ngwujaꞌri ngwudi gay gidi Ngwaalu ganni giru ꞌdidanu, na yedeny yati ang ꞌti ïtï gïdïjï dere ndi ari nga gwati ꞌti gätädï lingina giyelenya yidi ngwüjï.
17 Ondaci nje ꞌdi nga gwaraa? Nyii gïꞌtïjï Delenya didi ngwelenyinga Ruma dani Gayijar dulba gwalla nyii ꞌti gïꞌtïjä?”
18 A je be Yicu lenge yigor yegen yanni yiki ngwuje ci, “Ngwumurꞌtuny ngwee, ngaa lïmïnä ndiny ïdäjï kang?
19 Ätädïny ꞌdi bartad gwanni gwati aang geꞌte dulba.” Aar ätädä dinar,
20 ngwuje otacalu ngwuje ci, “Yiꞌremna na yuuli giyee yidi yärü yiru?”
21 Aar ci, “Yidi Deleny didi ngwelenya Ruma dani Gayijar yiru.”
Ngwuje be ci, “Ngwong ngwudi Deleny didi Rumang, ätädär je Delenya didi Rumang na ngwong ngwudi Ngwaalu, ätädär je Ngwaalinga.”
22 Anni ma aar ꞌdingini ngwujaꞌri ngwee, aar dibi aar ꞌdïꞌrï aar gatani aar ele.
ꞌDïꞌrï gwudi ngwüjï ngwayu
(Murkuj 12.18–27; Luka 20.27–40)
23 Gomon geꞌte geꞌte nggoo, a Ngwüjändügï elaca ngwanni ngwati ari ꞌdïꞌrï gwudi ngwüjï ngwayu gwaꞌti.
24 Aar otacalu aar ci, “Gwani Doorta, Müjä gwaru manari dur dima ayi ngwugatani dayalu daꞌti lïngïtï, a gwenggen ape dedela ngwulengaci yïjü.
25 A be yïjü yiju kwoꞌra täꞌrïl (7) yiru yengga ꞌdänggäränü a Gaanni agu ngwayi gwaꞌti ätï yïjü ngwügätïjänï Gwenggen dedela ngwombaji.
26 Oꞌre aar gu ru ndi Gwoone na Gwallu ꞌdi aar ayi ꞌdar kwoꞌra täꞌrïl (7).
27 A be gwodanalu a daw ayi.
28 A be ma ji manari gomon gima ila ganni gadi ge ngwüjï ꞌdïꞌrä giyiꞌranyanu, daw dadi be ru didi yärü gïyïjänü giyoo yiru yengga kwoꞌra täꞌrïl (7), anni agar ngindenga ꞌdar?”
29 A je be Yicu gwäꞌräcänü ngwuje ci, “Ngaa lidudu ngaa laꞌti lïngïdädï ngwujaꞌri ngwe ngwudi gitab na yiima yidi Ngwaalu yorto ye ngwaalinga.
30 Gomon gidi ꞌdïꞌrï, ngwüjï ngwaꞌti ngwa agu ngwaꞌti ngwa ägïnï ngwa ru nono yïꞌrrä kerala.
31 A be ngwujaꞌri ngwani ꞌdïꞌrï gwudi ngwüjï ngwanni ngwayu, ngaa laꞌti ulu ngwujaꞌri ngwanni ngwüllïnä ngwudi Ngwaalu ngwaru ngwe lingla le lüngün,
32 ndi ari, ‘Äny gwuru Ngwaalu ngwudi Äbräyïm na Ngwaalu ngwudi Ijaag na Ngwaalu ngwudi Yagubo’? Nginde gwäꞌtüdï Ngwaalu ngwudi ngwüjï ngwayu ngwube ru Ngwaalu ngwudi ngwüjï ngwumidu.”
33 Anni ma gu ngwüjï ngwonyadu ꞌdingini ngwujaꞌri ngwee no, aar dibi ngwujaꞌri ngwüngün.
Ngwujaꞌri ngwanni ngwupana
(Murkuj 12.28–34; Luka 10.25–28)
34 Anni ma Ngwübärrïjï engga ndi ari Yicu gwuma dami Ngwüjändügï, aar oꞌrajidalu gwüpäng.
35 A deꞌte ꞌdenggenanu diru doorta didi yobo otacalu gwading ïdäjï ngwuci,
36 “Gwani Doorta, ngwujaꞌri ngwïndï ne ngwanni ngwupana ngwujaꞌranu ngwudi yobo?”
37 A Yicu ci, “ ‘Ämnä Delenya diru Ngwaalu ngwunga ligor le lunga ku na lingeno le lunga ku na yaꞌrany ye yunga ku.’
38 Ngwujaꞌri ngwuru ngwee ngwanni ngwuru giꞌra aar ru ngwanni ngwupana.
39 Na ngwanni ngwuru giꞌra rom, ngwuru gu ngweꞌte ngweꞌte ndi ari, ‘Ämnä gwanggalu nono ligoꞌro lunga.’
40 Ngwujaꞌri ngwee rom ngwuru ngwanni ngwaru ngwe Yobo na Yïjïr.”
Gwanni Gwubrutaar yelenya na Däwüd
(Murkuj 12.35–37; Luka 20.41–44)
41 A gaji ganni gima ge Ngwübärrïjï ji ndi oꞌrajidalu, a je Yicu otacalu,
42 “Ngaa laraa gwani gwanni Gwubrutaar yelenya, gwuru gïjï gidi yärü?”
Aar ci, “Gwuru gïjï gidi Däwüd!”
43 Ngwuje ci, “A mine Däwüd arra mung ondaji Lïgïꞌrïm le lanni Lijuꞌru ngwuci ‘Deleny?’ Ndi ari gwaru nu,
44 ‘Deleny dica Delenya düny nu,
Jalu kaama güny
ꞌdi ang gïꞌtïjï güwänälü gunga giyoranu yunga.’
45 Ma be ari gwuca Däwüd, ‘Deleny,’ ngwube ru gïjï güngün awa?”
46 Aaꞌti dïjï dere burna ndi ci ngwujaꞌri ngwere. ꞌTuꞌtu komon nggoo, aaꞌti ba be dïjï dere ädïnä ndi otacalu ngwujaꞌri ngwe ngwere.