2
Bu Bhobua akɵ pɨ́ omabhuka
1 Lɨ ekpɨ́ na Patekote akolo lɨe, ndʉ omabhuka hana apo bhʉ́la o lɨ bɨlɨ bini.
2 Má gala kolo me-e, tolo ayie abhʉ́lá maka anvi na kpekpeke. Tolo ango-o aha bɨlɨ bhʉ́ ’tɨ ɨnde u adʉ bhʉ́ e hana.
3 Abhomʉ-o, u au oehe maka dɨngɨdhɨ djua. Oehe ango-o agbogbo bhʉsʉ e, atsia adʉlʉ pɨ́ ’ndjɨ ndʉ uo hana bini ne bini.
4 Ndʉ uo hana abedhe ne Bu Bhobua . U atsia aholo agama ’ngʉ́ bhʉ́ oeli koko, maka lɨ Bu Bhobua adʉ ahaha pɨ uo lɨe ngʉ́ nagagama ko.
5 Bhʉ́ gʉdhʉ na Yelusalema-a, omaYuda ɨnde ayie bhʉ́ ndʉ okʉtɨ hana pɨ́la doto libhomu adʉ oo. A adʉ okpála ɨnde adʉ akpe Ebhe.
6 Lɨ u adje tolo ango-o lɨe, bhiti okpála ango-o ago apo bhʉ́la o. U atsia adʉ angamba naali. Padhá de, anga kpála ne kpála adʉ adje omabhuka agama ’ngʉ́ bhʉ́ eli gba e makpe.
7 U abedhe ne nangamba, di ne nakɨaka. U atsia adʉ apa me: «Okpála ɨ ngagama ’ngʉ́ ɨnde-e, ndʉ uo hana ne okpála na ndu doto na Galilaya adɨ?
8 Lele pɨ ndʉ nɨ́ hana bini ne bini, nɨ́ ngadje uo lɨe ngagama ’ngʉ́ bhʉ́ eli gba nɨ́ makpe na kʉtɨ-e?
9-10 Bhʉ́ ká nɨ́ sɨ-e, okpála koko ayie bhʉ́ doto na Palate. Okoko ayie bhʉ́ Media. Okoko ayie bhʉ́ Elama. Okoko ayie bhʉ́ Edjipeto. Okoko ne okpála na Medjopotami. Okoko ayie bhʉ́ ndu doto na Yudaya. Okoko ayie bhʉ́ Kapadose. Okoko ayie bhʉ́ Pote di ne Adjia. Okoko ayie bhʉ́ Filidjia. Okoko ayie bhʉ́ Pamifilia. Okoko ayie lɨngo gʉdhʉ na Silene ɨnde bhʉ́ doto na Libi ko. Okoko ayie bhʉ́ gʉdhʉ na Loma .
11 Okoko ayie bhʉ́ kpɵmɵ na Kelete. Okoko ayie bhʉ́ doto na Alabi. U azu okoko omaYuda. Okoko-o, a ko ogandji okpála ɨnde abhuka Ebhe gba omaYuda-o. La-a, lele pɨ nɨ́ ngadje uo ngakpokpo ’ngʉ́ pɨndjɨ ongamba ’ngʉ́ gba Ebhe bhʉ́ eli gba nɨ́ na kʉtɨ lɨe bini ne bini-e!»
12 Ndʉ uo hana adʉ ne nangamba naali. Mabhundja gba uo-o angbɨngɨ. Abhomʉ-o, u atsia apa sʉnda o me: «Engʉ́ ɨnde-e akʉnda napa pɨ?»
13 Engʉ́ bini, okoko adʉ amʉ omabhuka. U atsia adʉ apa me: «Pandɨ aholo uo e-e ngae bha-a!»
Piele akpokpo eli gba Ebhe-e pɨ bhiti okpála
14 Piele ayie bhʉ́lá bhʉ́ dabɨlɨ bini ne obhʉlʉ titima ndjɨkpa ne ká bini koko-o. Anɨ aholo agama ’ngʉ́ kpekpeke pɨ bhiti okpála me: «Ngayi omaYuda, di ne ndʉ yi okpála hana ɨnde ngadʉlʉ bhʉ́ gʉdhʉ na Yelusalema-a, yi dje ma ndjɨndjɨ, amba yi mbɨla la di engʉ́ ɨ ngakodho ’kpɨ́ ɨnde.
15 Okpála ɨnde-e, a holo uo ne pandɨ maka yi ngabhubhundja lɨe de. Padhá de, anga a ko nga bha saa na odukpabini na kɵkpɨ́.
16 Engʉ́ bini, engʉ́ ɨ ngakodho ’kpɨ́ mbɨa ɨnde-e, a ko engʉ́ ɨnde lɨ polofeta Djʉele apa nanɨ e-o. Engʉ́ ɨnde me:
17 ‹Ebhe apa me: lɨ sokpɨ́-e,
ma atúko Bua gba ma-a pɨ́ ndʉ okpála hana.
Ongɨsɨ gba yi na obhosɨbhosɨ, di ne obhe na olɨsɨlɨsɨ akpókpo ongʉ́ ɨnde ma akʉnda e-o.
Omakombise gba yi-e aú ongʉ́ ɨnde ma akʉnda nasuno e bhʉ́ loto.
Ogbegbe okpála gba yi-e atsia alóto oloto ɨnde ma atíma e pɨ uo ko.
18 Lɨ oekpɨ́ ango-o, ma atúko belegʉ di Bua gba ma-a
pɨ́ okpála na kulu gba ma na obhosɨbhosɨ, di ne obhe na olɨsɨlɨsɨ.
U tsia kpókpo ongʉ́ ɨnde ma akʉnda e-o.
19 Ma améne ongamba ’ngʉ́ abhʉ́lá.
Ma tsia méne ongamba ’ngʉ́ kuto pɨ́la doto.
Ngʉte atúko, lɨ djua tsí, a adʉ́ di ne ndindi nguwa.
20 Kala me ekpɨ́ gba Ngámá-a kolo-o, ekpɨ́ na ngbéngbé,
di ne ekpɨ́ na asasaua-a,
ela adjí lɨe biti.
Lɨ epe djí lɨe maka ngʉte.
21 Abhomʉ-o, kpála ne kpála ɨnde abhʉ ’lɨ Ngámá-a,
tsia sía mʉkobho.›»
22 Abhomʉ-o, Piele atsia apa me: «Ngayi okpála na Ɨsalaele, yi dje nga engʉ́ ma adji apa e pɨ yi ɨnde: Ebhe apana pɨ yi mbámbá me nɨ atima Yesu, kpála na kʉtɨ na Nadjaleta-a, pɨ yi. Anɨ apana lɨ namene ongamba ’ngʉ́ sʉnda yi bhʉ́ anɨ. Anɨ amene okɨaka ’ngʉ́ , di ne oehe na tsʉlʉtsʉlʉ bhʉ́ anɨ. Ngayi makpe-e, yi mbɨla ’ngʉ́ tété ndjɨndjɨ.
23 Kpála bhomʉ-o, u apʉ anɨ pɨ yi. Ebhe ambɨla nanɨ ’ngʉ́ tété kalanʉ. Anɨ atsia akʉnda me amene lɨe moko. Yi abhɵlɵ anɨ. Padhá de, anga yi aha anɨ pɨ okpála na sisiti. U agɨ anɨ lɨ kulusi, u atsia abhɵlɵ anɨ.
24 Engʉ́ bini, Ebhe azuku anɨ, anɨ atsia aꞌe anɨ bhʉ́ lɨkabhu na kuo. Padhá de, anga a ayo nanɨ de me kuo to anɨ bhʉ́ tɨkpʉ gba e-e de.
25 Kaka-a, Davidi apa lɨ ’ngʉ́ gba anɨ-e me:
‹Ma adʉ au Ngámá Ebhe kala ma ndʉ nedhɨnga hana.
Padhá de, anga anɨ lɨ pá ’kpa ma na kokpa, amba ma agʉ́kʉ de.
26 Kaka-a, bua ma abedhe ne djalɨ bedhe.
Ma la di ngali ’tsi ne djalɨ hana.
Ekpɨ́ ma akpí lɨe,
ma adʉ́ ne ’to ma me ma akóbho makobho.
27 Padhá de, anga mʉ ꞌó ká ma de me ma dʉ lɨ bɨlɨ gba okpála ɨnde amu-o de.
Mʉ kʉ́nda de me kpála gba mʉ na ngbingbili-e zi bhʉ́ lata-a de.
28 Mo osuno mʉma okpadjɨ na mʉkobho.
Mo obédhe ma ne djalɨ, anga nɨ́ ne mʉ bhʉ́ dabɨlɨ bini.›»
29 Piele apa matá me: «Ondaise ma, ma tɨ da napa engʉ́ pɨ yi mbámbá pɨndjɨ ogbi nɨ́ Davidi. Anɨ akpi, u atsia azɨ anɨ. Lata anɨ bhʉ́ ká nɨ́ akolo pɨ nakɨ.
30 Engʉ́ bini, a ko nanɨ polofeta. Anɨ ambɨla me Ebhe apa nanɨ ne natʉ silika me: ‹Ma aꞌó sʉka ongɨsɨ gba mʉ-o bini ngámá bhʉ́ da mʉ.›
31 Davidi au nanɨ engʉ́ ɨnde agó-o kalanʉ. Kaka-a, anɨ atsia apa engʉ́ nazuku gba Masɨya me:
‹Ebhe ꞌo ká anɨ lɨ bɨlɨ gba okpála ɨnde amu-o de.
Anɨ ꞌo la di de me anɨ zi bhʉ́ lata-a de.›
32 Yesu ɨnde ma ngapa ’ngʉ́ gba e-e, Ebhe azuku anɨ. Ndʉ ya hana, ya au engʉ́ ango-o ne djila ya.
33 Pɨpɨta-a, Ebhe aꞌe anɨ abhʉ́lá, anɨ atsia aꞌo anɨ lɨ pá ’kpa e na kokpa. ’Dyɨ nɨ́ Ebhe aha Bu Bhobua pɨ anɨ maka anɨ apa nanɨ lɨe kalanʉ ko. Anɨ atsia atuko Bu Bhobua ango-o pɨ́ ya. A ko bhende yi ngau e, di ne bhende yi ngadje e mbɨa ɨnde-e ko.
34 Padhá de, anga Davidi ngae makpe ꞌʉ nanɨ abhʉ́lá de. Engʉ́ bini, anɨ apa ngae me:
‹Ngámá Ebhe apa nanɨ pɨ Ngámá gba ma-a me:
Dʉ lɨ pá ’kpa ma na kokpa,
35 akólo lɨ ’kpɨ́ ma aꞌó obhʉlʉ yala gba mʉ-o lɨe sa ’dhʉ mʉ ko.›
36 A ayo me ndʉ okpála hana na Ɨsalaele mbɨla engʉ́ ɨnde-e ndjɨndjɨ me: Yesu ɨnde-e, ɨnde yi abhɵlɵ e lɨ kulusi-e, Ebhe aꞌo anɨ Ngámá, anɨ atsia aꞌo di anɨ Masɨya!»
37 Lɨ u adje engʉ́ bhomʉ-o lɨe, bua uo asia lɨkabhu naali. U atsia ayi Piele di ne obhʉlʉ titima koko-o me: «Ondaise ya, a ayo me ya mene pɨ?»
38 Abhomʉ-o, Piele atsia agie pɨ uo me: «Kpála ne kpála dji bua e, anɨ sia batisimo ne ’lɨ Yesu Kilisito , amba Ebhe ꞌe siti ’ngʉ́ gba anɨ-o. Abhomʉ-o, yi tsia sía la di Bu Bhobua padhá.
39 Padhá de, anga anɨ apa nanɨ kalanʉ me nɨ améne pɨ yi ne ongɨsɨ gba yi-e moko. Anɨ atsia apa me nɨ améne di pɨ okpála bhende ngadʉlʉ tsutsutsu, di ne pɨ ndʉ okpála hana bhende lɨ Ngámá gba nɨ-e aꞌɨ́ o-o.»
40 Abhomʉ-o, Piele atsia akpo ’ngʉ́ koko pɨ uo bhelé ngʉ́ naha pɨ uo gʉmʉ me u bhuka, di me u dʉ ne nalila lɨo malila. Anɨ adʉ apa pɨ uo me: «Okpála na nakɨ ɨnde-e sisiti. Yi yie bhʉ́ ká uo mayie, amba Ebhe kobho yi.»
41 Okpála bhelé ɨnde adje ’li Piele-e, azɨba. U atsia asia batisimo. Lɨ ekpɨ́ ango-o, okpála masɨkpe de kutu bata alɨ bhʉ́ ká omabhuka.
Omabhuka na kalanʉ-o adʉ nanɨ lele o pɨ?
42 U adʉ aha lɨo ndʉ ’kpɨ́ hana ngʉ́ nadje nasuno gba obhʉlʉ titima gba Yesu-o. U adʉ nadʉ sʉnda o bhʉ́ mʉkʉnda maka ondaise. U adʉ azʉ ’he bhʉ́ dabɨlɨ bini, u atsia adʉ di ayo Ebhe bhʉ́ dabɨlɨ bini.
43 Ndʉ okpála hana adʉ ne tsʉlʉ. Padhá de, anga obhʉlʉ titima-a adʉ amene ongʉ́ na ngangamba, di ne okɨaka ’ngʉ́ naali.
44 Ndʉ omabhuka hana adʉ adʉlʉ bhʉ́ dabɨlɨ bini. Ndʉ ’he gba uo-o hana adʉ bhadi bhʉ́ dabɨlɨ bini. U atsia adʉ agbogbo bhʉsʉ bhʉsʉ lɨ o.
45 U adʉ atsɨndjɨ oedyɨ gba o, di ne oehe koko gba o-o. U atsia adʉ agbogbo bhʉsʉ tɨa ango-o lɨ ndʉ okpála hana, maka lɨ gʉmʉ gba kpála bini ne bini adʉ lɨe ko.
46 Ekpɨ́ bini ne bini hana, u adʉ apo bhʉ́la o bhʉ́ dabɨlɨ bini, u adʉ alɨ bhʉ́ ’ngbé ’tɨ Ebhe gba omaYuda. U adʉ agʉmʉ mapa bhʉ́ etɨ gba o, u atsia adʉ azʉ ’he ne djalɨ, di ne bua na bhʉbhʉkʉ.
47 U adʉ atoko Ebhe. Engʉ́ ɨnde u adʉ amene e-e bhʉ́ bádha bhʉ́ ’bu gba Ebhe-e , a adʉ anga lɨ okpála naali. Abhomʉ-o, ndʉ ’kpɨ́ hana, Ngámá atsia adʉ ato okpála koko bhende asia mʉkobho-o bhʉ́ ká uo.