2
Iosua ena mase
1 Iehova ena aneru ese Gilgal amo ela, ela bona Bokimi. Ia eto, Aigupto amo na hakaumui lasi, senemui na gwau henidia hamata baina henidia nato tanona ai na hakaumui vareai. Na hamaoromui, nato “Eda herohemaino na lau ese basina hadikaia;
2 umui danu ina tano taudia ida basio herohemaino; edia ihaboulaina patadia ba ḡiḡidia dobi”. To umui ese egu haheḡani asio badinaia. Ede vada o kara toma?
3 Taunabunai, harihari na hamaoromuimu, na tomu, Basina luludia lasi vairamui ai: idia na inaimui ai baela, bona edia dirava ese bae idoamui.
4 Iehova ena aneru ese Israel taudia iboudiai unu e hereva henidia toma; bena iboudiai na e tai lolololo.
5 Bena una gabu ladana e hatoa Bokimi. Unuseni ai idia ese Iehova e boua.
6 Iosua ese Israel taudia e siaidia karoho, bena ta ta ena gabu ena gabu ela, edia tano iabidia totona.
7 Bena Israel taudia ese Iehova isiaina e lao heni, Iosua ena mauri dinadia iboudiai lalodiai, bona tau badadia, Iosua ena mase murinai dounu e mauri nohova bona Iehova ena siahu karadia Israel latanai e kara vada e ita taudia, edia mauri dinadia lalodiai danu.
8 A Iosua Nunu, Iehova ena hesiai tauna, na e mase; ena mauri laḡanidia na sinahu-ta dikoana gwauta.
9 Ena tano korikori ai e guria, Timnata-here ai, Efraim ororodia ai, Gaasa ororona mirigini kahana ai.
10 Una uru idoinai danu na tubu tama dekediai e hahebou. Bena uru matamatana ta e vara isi; idia na Iehova asi dibadia, bona Iehova ena kara Israel taudia ediai danu asi dibadia.
Israel taudia e kara havara
11 Bena Israel taudia ese Iehova vairanai e kara havara, dirava idaudia, ladadia Baal, isiaidia e lao heni.
12 Idia ese Iehova, senedia edia Dirava, Aigupto tanona amo e hakaudia lasi Diravana, e rakatania; dirava idaudia, bogaragidiai e nohova besedia edia dirava, muridia amo e raka bona e toma henidia diho; unu amo idia ese Iehova ena badu e havaraia.
13 Idia ese Iehova e rakatania, dirava ladadia Baal bona dirava ladadia Astaroto isiaidia e lao henidia.
14 Taunabunai, Iehova ena badu vada e ḡaraḡara Israel taudia ediai. Bena ia ese dadidadi taudia imadia ai e atodia; idia ese edia kohu e dadi ore. Inaidia heḡeḡemadai imadia ai e atodia kau, bena idia na asi goadadia inaidia bae laodia ahu.
15 Tuari ela negadia iboudiai Iehova imana ese e hadikadia, Iehova ese vada e sisiba henidia bona e gwau henidia hamata heḡereḡerena. Edia noho na dika rohoroho.
16 Bena Iehova ese hahemaoro taudia e duanaidia, bena unu hahemaoro taudia ese dadidadi taudia imadia amo e hamauridia.
17 Ḡau tamona, idia ese edia hahemaoro taudia eredia asie kamonai; dounu dirava idaudia muridia amo e raka bona isiaidia e lao heni. Asi vanahana idia ese tamadia e rakalai daladia amo e raka siri; tamadia ese Iehova ena hahegani e badinadia, a idia ese asie badinadia.
18 Iehova ese Israel taudia edia hahemaoro taudia e duanaidia negadia ai, ia ese una hahemaoro tauna enai e taova, bona ena hahemaoro dinadia iboudiai lalodiai ia ese Israel taudia na inaidia imadia amo e hamauridiava; badina be e daḡedaḡe henidia bona e hahisihisidia taudia daidiai e ḡanaḡanava negadia ai na Iehova ese e bogadia hisiva.
19 A hahemaoro tauna e mase negana ai, idia na e raka muri, e kara havara, tamadia edia kara havara e hereadia; dirava idaudia muridia amo e raka, isiaidia e lao heni bona e toma henidia diho; edia kara havara bona edia gwau daḡe asie rakatanidia.
20 Taunabunai, Iehova ena badu ma e haḡaraḡaraia lou, Israel taudia ediai. Ia eto, Ina bese ese egu taravatu, senedia na gwaurai henidia taravatuna, vada e tataia utu bona eregu asie kamonai dainai,
21 lau ese Iosua na ina tano ai e masetanidia besedia basina luludia lasi vairadiai;
22 idia edia amo Israel taudia baina tohodia, nahuadia bae toho, Iehova ena dala ai bae raka, tamadia e rakalaiava na heto, eiava lasi.
23 Taunabunai, Iehova ese unu bese e hanohodia; se luludia lasi bona Iosua imana ai se atodia.