IONA
1
Iona ese Iehova e heautania
1 Iehova ena hereva na Iona Amitai enai e kau, eto,
2 A tore isi, hanua badana ladana Nineve baola, ba gwau henia; badina be edia kara dika na lau vairagu ai vada eme hedinarai.
3 A Iona e tore isi, Tarasisi baine heau lao, Iehova vairana amo baine heau oho eto. Ia na e diho, Iopa ai, Tarasisi bainela lagatoina ta e davaria; dava e heni, bena e gui, idia ida Tarasisi baela, Iehova ena amo baine heau oho eto.
4 Bena Iehova ese lai gubana e hatoaia, davara latanai; hurehure vada e bada herea, lagatoi na mokona e heroḡi rohoroho.
5 Bena lagatoi taudia na e gari, ta ta ena dirava ena dirava e hahanedia; bena e negenege, lagatoi ihaharaḡana totona. A Iona na vada e diho, lagatoi tuana ai, unuseni ai vada e hekure, vada e mahuta.
6 Taunabunai lagatoi biaguna ema, e hamaoroa, eto, Mahuta taumu e, edeheto? A tore isi, emu dirava ba hahanea; reana una dirava ese baine laloda, bena basita mase.
7 Bena idia na e hereva heheni, eto, Aoma, mari aita abi; bena baita diba daika bagunai ina dika na ita latadai vada e kau. Taunabunai idia ese mari e abi, bena mari ese Iona e duanaia.
8 Bena idia ese e nanadaia, eto, A hamaoromai, daika bagunai ina dika na latadai vada e kau? Oiemu ḡaukara be dahaka? Ede amo oma? Emu tano be edena? Oi na edena bese tauna?
9 Bena ia ese e haere henidia, eto, Lau na Heberu tauna; Iehova, guba Diravana, davara bona tano kaukauna e karadia Diravana garina na garimu.
10 Bena unu tatau na e gari dikadika, e hamaoroa, eto, Ede vada o kara toma? Badina be unu tatau vada e diba ia na Iehova vairana amo vada e heau oho, badina be ia ese vada e hamaorodia.
11 Bena idia ese ma e nanadaia, eto, Ede baia karamu toma bena davara baine gaima emai ai? Badina be hurehure vada e bada e laova.
12 Ia ese e hamaorodia, eto, Bavabigu, davara ai ba tahogu dobi; bena davara baine gaima emui ai; badina be lau dibagu, ina guba badana na lau daigu ai emui ai vada e kau.
13 Ḡau tamona, hari tatau na e bara hekwarahi, lagatoi na kone ai bae baraia diho totona; to asie heḡereḡere, badina be hurehure na vada e bada herea e laova idia vairadiai.
14 Taunabunai, idia ese Iehova e tai henia, eto, Iehova, e, ai ese a noimumu, ina tau ena mauri bagunai basia mase, bona asi kererena tauna rarana na ai latamai ai basio atoa kau; badina be, Iehova e, emu ura heḡereḡerena ai vada o karaia.
15 Taunabunai idia ese Iona e abia, davara ai e tahoa dobi; bena davara na vada e gaima.
16 Bena unu tatau ese Iehova e gari henia lalo-dika; idia ese boubou karadia e kara, Iehova ena, bona e gwau hamata danu.
17 Bena Iehova ese gwarume badana ta e saia, ia ese Iona baine hadonoa; bena Iona na dina toi boi toi una gwarume bogana ai e nohova.