7
1 Taunimanima basio hahemaoro henidia, bena idia ese danu basie hahemaoro henimui.
2 Badina be umui emui hahemaoro heḡereḡerena ai ma bae hahemaoro henimui; bona umui emui hahetoho heḡereḡerena ai ma bae hahetoho henimui.
3 Badina be dahaka au tahana tadikakamu matana ai o itaiamu, a au badana oi matamu ai mia na to laloamu?
4 Badina be dahaka tadikakamu o hamaoroamu, o tomu “Mani au tahana matamu amo baina abia lasi”, a au badana na matamu ai mia?
5 Koikoi taumu e, au badana matamu amo bavabia lasi guna, murinai au tahana tadikakamu matana ai ba itaia ḡoevaḡoeva, bena bavabia lasi.
6 Helaḡa ḡaudia na sisia basio henidia, bona emui aḡeva mai hairaidia na boroma vairadiai basio nege, aedia amo bae moi tao bena bae mede kerehai bae doamui na garina.
7 Ba noinoi, do baine henimui; ba tahua, do ba davaria; ba pidipidi, iduara baine hekeho emui.
8 Badina be noinoi taudia iboudiai na e abimu; itahuna tauna ese e davariamu; iduara na e hekehomu, pidipidi tauna ena.
9 Umui daika natuna aniani bema noia negana ai na nadi bema henia?
10 Eiava gwarume bema noia negana ai na gaigai bema henia?
11 Benaini, umui na dika taumui, ḡau namodia natumui o henidiamu, Tamamui guba ai e nohomu ese ḡau namodia na inoihenina taudia basine henidia a?
12 Taunabunai, ḡau iboudiai umui ba ura taunimanima ese bae kara henimui, umui ese unu ba kara henidia toma; badina be ta avatu bona peroveta herevadia anidia korikori bunai.
Dala korikorina
13 Ikoukou hekahi-hekahina amo ba raka vareai. Badina be mase gabuna e laomu dalana na ikoukou ḡamoḡa bada bona dala na lababana bada; bona hutuma na unu amo e raka vareaimu.
14 A mauri gabuna e laomu dalana na ikoukou hekahi-hekahina bona dala na rotona; e davariamu taudia na gagadoi.
15 Nahuamui ba toho, peroveta taudia koikoidia nd garina; e vasimu, oromadia na mamoe na heheto, to lalodia na uda sisiadia heḡereḡeredia.
16 Huahuadia amo ba dibadia. Vine be au ginigini amo ba buruki a? Eiava korukoru na ava ḡiniḡini amo bavabi a?
17 Benaini, au namodia iboudiai huahuadia be nanamo; a au dikadia na huahuadia danu didika.
18 Au namona ese huahua dikadia ihavaradia na asi dibana; au dikana danu huahua namodia ihavaradia na asi dibana.
19 Huahuadia dia nanamo audia iboudiai na bae utu, lahi ai bae taho kau.
20 Taunabunai, huahuadia amo ba dibadia.
21 Dia bae hereva henigu, baeto “Lohiabada e, Lohiabada e,” taudia iboudiai na guba basileiana lalonai basie raka vareai; a Tamagu guba ai e nohomu ena ura e karamu tauna mo.
22 Hutuma una dina ai bae hereva henigu, baeto, Lohiabada e, Lohiabada e, oi ladamu ai asia peroveta a? Oi ladamu ai lauma dikadia asia luludia a? Oi ladamu ai hoa karadia momo asia kara a?
23 Bena lau ese baina haere henidia, bainato, Asi dibagu umui; dauha aola, kara havara taumui e.
24 Taunabunai, egu hereva bini e kamonaimu bona karadia e karamu tauna na aonega tauna na heto, ia ese ena ruma na papapapa latanai e hadaia.
25 Bena medu e diho, utu-utu e utua dae, lai bada e toa, ruma na e hohoa. To una ruma se kohu, badina be ia na papapapa latanai e hadaia.
26 A egu hereva bini e kamonaimu to karadia se karamu tauna na kavakava tauna na heto, ena ruma na raria latanai e hadaia.
27 Bena medu e diho, utu-utu e utua dae, lai bada e toa, ruma na e hohoa; bena e kohu, e heḡiḡi rohoroho.
28 Iesu ese ena haroro e hadokoa; bena taunimanima ese ena hahediba herevadia e hoalai,
29 badina be e hadibadiava mai siahuna ida, dia itorena taudia heḡereḡeredia.