9
Maduna metauna bese haida latadiai
1 Maduna metauna herevana ta:
Iehova ena hereva na Hadraka tanona latanai,
bona Damasko latanai baine kau.
Badina be Aram hanuadia na Iehova ena,
Israel iduhudia iboudiai heḡereḡeredia;
2 Hamat danu, ia hetabiranai,
Turo bona Sidono, ena be edia aonega na herea,
to idia danu Iehova ena.
3 Turo ese ena maḡu aukana ta vada e haginia,
silver vada e hasenua, ḡahu na heto,
bona gold danu, ariara momorudia na heheto.
4 To, a itaia, Ḡaubada ese ena ḡau iboudiai baine abidia oho,
bona ena taḡa na davara ai baine negea;
bena lahi ese hanua na baine araia ore.
5 Askelono ese baine itaia, bena baine gari;
Gasa danu, bena hisihisi ai baine hehure-hehure;
Ekron danu, badina be ena helaro vada e baia;
Pavapava na Gasa amo baine boio,
Askelono na baine mia, asi inoholaina;
6 vara-hanai taudia na Asdod ai bae noho;
Filistia ena heaḡi baina hadokoa.
7 Ana rara na uduna amo baina abia oho,
bona ana ḡau dika-rohorohodia na isedia padadia amo danu.
Ia danu orea kwabukwabuna ta ai bainela, eda Dirava ena;
ia na Iuda iduhuna ta heḡereḡerena ai bainela,
bona Ekron na Iebusu taudia heḡereḡeredia ai bainela.
8 Bena egu ruma ai baina kone noho, baina gimaia,
ta na basine raka lao raka mai helaoreana;
hahehisi tauna ta ese basine hahebolodia uru lou,
badina be harihari lau sibogu matagu amo na heitamu.
Siona pavapavana
9 Siona kekenimu e, a moale hisi dae!
Ierusalem kekenimu e, a lolo badabada!
A itaia, emu pavapava na e vasimu,
mai siahuna bona mai kwalimuna ida;
ia na manau; ia na doniki ai e guimu,
doniki nat una latanai e gui kaumu.
10 Kariota na Efraim amo baina negea daure,
bona tuari hosina danu Ierusalem amo;
tuari pevana danu baine henege daure.
Ia ese bese idau-idau baine haherohedia maino;
ena basileia na baine hesiriu, kone ta amo ela bona ma kone ta,
bona Sinavai Badana amo ela bona tanobada dokodia.
Siona ihamaurina
11 Oi danu, eda herohemaino rarana dainai,
emu iḡui taudia na guri haura-haurana amo baina ruhadia nege.
12 Dauhai nohomui ai o helaro hanaihanaimu taumui e,
emui gabu aukana ba lou henia;
hari dina ai na gwauraiamu, harua ma baina henimui lou.
13 Badina be Iuda vada na marea, egu peva;
Efraim na ia hakorena ai vada na halaoa.
Siona e, oi natumu baina rubedia;
Helene tanona e, oi natumu daediai baina rubedia;
tuari tauna ena dare heḡereḡerena ai baina dapadapalaimu.
14 Bena Iehova na idia daediai baine hedinarai,
ena hakore bainela kevaru na heto;
Ḡaubada Iehova ese kibi baine hiriria,
diho kahana koe-hirihiridia ai baine raka lao.
15 Iehova Sabaota ese baine gimadia,
vilipopo taudia bae ha-oredia bona bae moimoilaidia;
bena raradia bae inu, vine lanuna na heto;
bae honu, kehere na helo;
bae parika-parika, ihaboulaina patana daigunidia na heheto.
16 Una dina ai Iehova, edia Dirava, ese baine hamauridia,
badina be idia na ena bese verina;
badina be kwara ivavalaina ḡauna iheralaina nadidia na heheto,
idia na ena tano daenai bae kiama-kiama.
17 Momokani. Daka namo! Daka hairai!
Uit ese uhau baine hagoadadia,
bona vine ranuna matamatana ese ulato baine hagoadadia.