Jü Carta Hebreommeu Jïojteri
1
Dios ä Üusihua bétana nok‑la
1 Dios juebénasi noksulatukay yún kaa nanäla machisi júnak táapo täbui taahuarimmechi, jume áchayhuarimmehui, profeetam huämi.
2 Én ímëi taahuarim chúkula huëpo ä üusihua huämi, itou nok‑la. Íkäi éntok ä yö yáaka sïmeta ä mámpo tójjak; ániata éntok áapörik béchïbo yáuhuak.
3 Áapo ájäria jü bélojkosi sïmek béppa Diosta ujyória, entok tua alëbenna sïmeku, sïme ániat ayukamta jíapsitua, sïmeta tútti jípure ä nok úttiärayi. Entok Áapo mukuka sïmek béppa tülisi itom báksiak, kaa tü yáarim itom úuhuaaka. Huanäi ámani jikat jü tua yörisi machik bátam bétana yejtek.
Jü Usiari ángelesim béppa chë yörisi maachi
4 Íäri béchïbo ángelesim béppa chë yörisi machisi tahuariahuak, entok bempörim béppa chë yörisi machi téhuam mákhuak, tua Diosta ä üusi béchïbo.
5 Bueïtuk, ¿jauhueysu Dios jabe ángeltau ínel jiaahuak:
Émpë ín Üusi;
ínapone én em Áchaytaka taahua?
Entok kétchi:
Ínapone én áa béchïbo áchayhuari;
áapo éntok ín üussitunake.
6 Entok kétchi, juka kësam huérita ániau kóm bíttuaka jume ángelesimmeu ínel jiaahua:
Tónommeyem áu jápteka ä yöre.
7 Jume ángelesim bétana éntok két ínel jiaahua:
Ä ángelesim jekata bénasi johua;
jume nésauta ä joriame éntok táij bétemta bénamme.
8 Entok ä Üusi bétana ínel jiaahua:
Dios yörisi machi bankopo káteka, jíbapo béchïbo nésahue,
entok jü kuta em réytaka áy nésahueu huitti lútula huéeka bíttu.
9 Juka lútula jíapsihuamtë nákke;
të juka kaa türik éntoke kujti eäke kaa huáatia.
Íäri bëchïbo Dios enchi áma yeu púuhuak.
Jü em Dios éntok musäla machisi al‑leehuamta enchi mákka,
em jáläim béppa.
10 Entok íkäi két nooka:
Empo, Señor, sïmeta naatëpo buíatë yáuhuak;
jü téhueka junne em mámammey yáari.
11 Ïri lütinake, të empo jíbapo béchïbo tahuanake;
jü huate éntok súpem bénasi moynake.
12 Entok huépul súpem bénasë nat am tóttianake,
éntoke chúkula täbui bemela súpem béchïbo am nakulianake.
Të empo katë täbuiasi tahuanake, entok em huásuktiriam katim lütinake.
13 Bueïtuk jauhuey taaposu Dios, jábe ángeltau ínel jiaahuak:
¿Ímïre ín bata bétana yejte,
jume enchi bej‑reka kateme em guókim bétuk nee am órëu tájti?
14 ¿Jachum kaa espíritu áusüli, jume Diosta tékilpo aneme? Ímëri juka jínëurita mabetnakeme bem anianakë béchïbom äbo bíttuari.