5
Diosta súaleme suayahuähui
1 Huame yoiyöturi enchim násuk yeu púarimmeune jiokot jiaahua, ínapo két yöturitaka áme béuchi, éntok Cristotau jiokot máchiraata sikamta bíchakame, éntok jü két ujyória yeu ä machinakepo annakeme, enchimmeune ínel jiaahua:
2 Jume Diosta súaleka enchim násuk anemem suaya, am suaya kaa útteapo, enchim tü jiápsekä béchïbo ál‑la; kaa huaka béjtuahuamta huáatiaka, ál‑lem kaitat boobíchaka chíkti enchim jíapsimak ä yáanake.
3 Katem huame enchim suayäu úttiapo sau báare, ál‑lem ejemplotam mákka jume Jesucristota súaleme.
4 Huanäi huaka am suayame béppa nésahuemta yeu machiakem huaka coronata ujyorik kaa momoyemta mabetnake.
5 Alë bénasi, eme jübua yoyötume, jume yoiyöturim mámpo emo jípure. Éntok sïme nánancha emo nok jíkkajaka kaa béttek jíapsitem náu jípunake; bueïtuk:
Dios am béj‑reka huéiye,
jume emo buérialeme,
éntok kaa emo buérialemmeu tühuata johua.
6 Júnentukem Dios útteakamta mámam bétuk emo jípure, áapörik enchim tóbnoktianakë béchïbo taahuata yúmako.
7 Sïmeta huaka enchim kóm éähuem ä mámpo tójja, bueïtuk áapo enchim suaya.
8 Suamsem emo nüye, éntokem kaa kótche; bueïtuk hua enchim béj‑ri, jü diablo, leonta omtë bénasi, chíkola huerama, jábeta ä buänakeu jariaka.
9 Huákärem béj‑reka óusi jápte, jíba bénasi Diosta súaleka, jünéaka jukai junëli huémta huame huate enchim hermanom sïme ániat anemmeu ayukähui.
10 Të jü Dios sïme tü eäu tápuni, hua ä yü ujyória itom mik báreka itom núnukame Jesucristota béchïbo, chúkula kaa jaiki táapo enchim imï ániapo jiokot ansukäpo, áapo enchim tü tátabnake, enchim óusi éetuanake, enchim útteata máknake, éntok kaitat jáchin éaka enchim jíapsituanake.
11 Áapörik béchïbotunake jü yörihuame, éntok jü nésayhuame jíbapo béchïbo. Júneltunake.
Teboteri chúpëpo huéeme
12 Silvánotamak, hua tua yúmalasi hermanopo ín jípurëumakne kaa jaiki nokta enchimmeu jïojtek, enchimmeu nokaka jáchin enchim emo nünake bétana éntok hua én enchim boojoriau tua jü Diosta lútüriatukä bétana nokaka.
13 Jume Jesucristota súaleme Babiloniapo aneme enchimmak náu yeu púari, éntok Marcos ín üusi, enchim tebottua.
14 Emóem tebotua enchim emo nákë béchïbo.
Yánti jíapsihuame sïmem enchimmaktunake, sïme eme jume Jesucristota mabet‑lame. Júneltunake.