19
Jü téhuekapo Diosta úttilhuame
1 Íkäi simsuko senu jíahuitane jíkkajak, tüisi kuusik téhueka bétana, juebenam yun náu anë bénasi, ínel jíamta:
¡Aleluya! Jínëuria, entok yörihuame,
entok lóoria, entok úttiära,
itom Señor Dios am áttiak.
2 Bueïtuk áapo lútulaisi entok lútüriapo áman ä yäura bíttebok.
Áapo jü jámut buére kaa tihuemtat nokta béttek át chúppak,
bueïtuk ä kaa tiuray ániata nasontek.
Entok jume Diosta nésau joame áma súahuakame ä bejtutuak apörikuchi.
3 Juchim ínel jiaahua:
—¡Aleluya! Ä buichia éntok jíba huásu‑huásuktiapo jikau huéiye.
4 Jume veinte áma naiki yoiyöturim entok jume naiki jiápsaka áma aneme tónommia jápteka buíau kóm chätuk. Huanärim Diosta úttilek, juka yörisi machi buére banko yäurapo kátekamta. Huanärim ínel jiaahuay:
—¡Júnentunake! ¡Aleluya!
5 Huanäi jü buére yörisi machi banko yäurapo senu jíahui yeu siika, ínel jíaka:
Itom Diostem úttile, sïme eme ä nésauri joame,
entok ä yöreme, junëli jume chë kaa ériahuame
entok jume ériahuame junne.
Jü Kabarata jubë pajkopo kuptey jïbuähuame
6 Huanäine jíahuita jíkkajak, juebenam náu anë bénasi, bäa bürum jíahui bénasi éntok buére yúku omtiriam jíahui bénasi, ínel jíamta:
¡Aleluya! Bueïtuk jü Señor itom Dios sïmeta ára joame reytaka nésahue.
7 Ujyorisite éenake, entokte al-leenake,
entokte lóoriata ä máknake,
bueïtuk Kabarata jubëu pajko béja yuumak.
Ä kunaseme éntok tülisi áu yáaka sánkotela.
8 Áapo éntok lino finoyi tülisi machiyi entok belojkoy súpetuahuak.
Bueïtuk jü lino fiino, Diosta pueblopo joomem Diosta bíchäpo tülisi huéchiasi anhuame.
9 Jü ángel éntok ínel inou jiaahua:
—Akë ä jïojte: “Al‑leehuame áme béchïbotunake, jume Kabarata jubë pajkopo jïbuä ïaahuaka núnurim.”
Huanäi ínel inou jiaahua:
—Ímëi Diosta nokim lútüriamme.
10 Huanäine ángelta guókpo áu tónommia kíktek, ä yöri báreka. Áapo éntok ínel inou jiaahua:
—Ëe, ¡katë júkäi johua! Bueïtuk ínapo Diosta nésauri johua, emo bénasi, entok Cristota huám émomak aanim, entok Jesústa bétana nok lútüria kaa koptíame bénasi. Diostë yöre.
Bueïtuk jü Jesústa nok lútüria profecíata espíritu.
Jü kábäi tósalit jikat yessimeme
11 Huanäine téhuekata étaporikne bitchak; kábäi tósali éntok áma yeu machiak. Jü át yessimeme éntok, jü huitti Diostat jiápseka tua lútüriapo ájäria ti téhuak, bueïtuk lútüriapo huám nésahue, entok nássua.
12 Ä pusim éntok tájíta béetë bénaakay. Ä kóbat éntok yún diadeemam huériay. Entok senu téhuam át jïojterim jípurey, kaabeta éntok täyähui, áapo jíbba.
13 Ä súpem éntok sïmekut ójbokay; ä téhuam éntok, “Diosta Nookim”, tim téhuaakay.
14 Jume téhuekapo sontarom éntok, lino fino totösalik entok tülisi machik sánkoka áa sáukim kaatey, kábäi totösalimmechi.
15 Ä tem bétana éntok ejpara buahui síbulaika yeu huéiye, jume naciónim, ay kökosi yáa báreka. Áapo éntok kutkutti jíbebia sisïguokiyi ámet nésaunake. Huanäi Dios sïmeta ára joame tüisi omteka ámet cheptinake, jum vinota jojohuäpo.
16 Ä sánkot entok ä máchammet ímëi téhuam át jïojteri: “Sïmem reyimmeu Rey sïme nésahueme áapo sauhue.”
17 Huanäine senu ángelta täat huékamta bitchak. Huanäi tüisi kusisi cháchayek, sïme huikichim téhueka násuk nenëyemmehui, ínel jíaka:
—¡Äbem kaate, éntokem Diosta buére kuptey jïbuähuäpo náu rúkte,
18 bueïtuk reyim entok jume sontaro yö yáarim huaakas enchim buänakë béchïbo, entok yoreme üúttiakame huaakas, kábäim entok ámet josakame huaakas, entok sïmem súmataka entok kaa súmataka aneme huaakas, jume chë kaa ériahuame entok jume ériahuame huaakas!
19 Huanäine animal máusi machita bitchak, entok reyim ániat aneme entok bem sontarom, emo náu tóij‑lame jü kábäit yessimemtamak nássua báreka, entok ä sontarommaki.
20 Huanäi jü animal máusi machi pereesotehuak, áapörimak éntok jü profeeta ára nókïchi ä bíchäpo señaalim yáakame. Júmëi am bäitäulatukay, jume animal máusi machita marka mabetakame entok alë bénasi yáata úttilekame. Ímëi guoyika jiápsakam táji baubäata bénaku azuufrey béetëpom kóm guötiahuak.
21 Jume huate éntok súahuak, jume ejparam kábäit yessimemta tempo yeu huémtayi. Huanäi sïme jume huikichim huakajta ára buäyeme am buäka jóbuak.