5
Jü Kabara entok jiösia bïtiari
1 Huanäine jü banko rey nésaupo kátekamta bátatana mámpo, senu librom órekame bitchak. Huáijhuatana entok yeutana át jïojterim, guoy búsan sellokari.
2 Huanäine senu ángelta úttia yaurata jípuremta bitchak, tüisi kusisi chayeka nátemajemta:
—¿Jábesu chë yörisi machi jäni, librom ä étaponakë béchïbo?, entok, ¿jume sellom ä búttianakë béchïbo?
3 Kaabe aaney, téhuekapo, buíapo, entok buíata bétuk junne, jü jábe ára liibrom étaponakeme, entok kía am bít béchïbo junne.
4 Huanäine tüisi buan táytek, yúmalasi au jípuremta kaa téyhuaka béchïbo, bueïtuk kaabe ára librom étapoy, entok kaabe ára am bitchay.
5 Huanäi senu yöturi ínel inou jiaahua:
—Katë buaana, bueïtuk jü León Judáta yoremempo yeu simlame, Davidta bétana yoiyöturimmet yeu tómtilame, yölataka áma yeu simla. Jüri ára am étapo, jume liibrom, entok jume guoy búsan seellom ára búttia.
6 Huanäine jü banko rey nésauta násuk entok naiki jiápsaka áma aneme násuk, entok yoiyöturim násuku, Kabaratane áma huéekamta bitchak. Mukiapo tóij‑ritaka kökosi yáarita bénaakay. Guoy búsanim ahuakay, entok guoy búsanim pusekay. Huámëi ínel jume guoy búsan Diosta espíritum sïme ániat bíttuarim.
7 Huanäi banko rey nésaupo kátekamtau rúkteka, librom ä bátatana mámpo ä jípurëu nüka.
8 Huanäi jume librom ä nüko, jume naiki jiápsaka áma aneme entok jume veinticuatro yoiyöturim jü Kabaratahuim tónommia jáptek. Sïmetakam arpam jípurey, entokim copam oropo yáarim jípurey, inciensoy tatapunim. Ímëi jume santom oraciónim.
9 Entokim bemela buikim buiikay, ínel jíame:
Émpë am nüpo yúmala, jume liibrom,
entok sellom em étaponakë béchïbo;
bueïtuk empo jiokot yáahuaka mëhuak,
éntoke em ójboy Diosta béchïbo itom jínnuk,
sïme yóremraata, entok yún täbuiasi nokame,
entok pueblom, entok naciónim.
10 Éntoke Diosta béchïbo réyesim entok sacerdootemsi itom yáala.
Huanäite ímï buíapo nésaunake.
11 Huanäine banko rey nésauta entok jume jiápsaka áma aneme entok jume veinte áma naiki yoiyöturim chíkola, ángelesim jíahuiatane jíkkajak, entokne am bitchak. Ímëi juebena millonimtukay.
12 Tüisim kusisi ínel jiaahuay:
Jü Kabara jiokot yáataka mëhuakame,
jüri am mabetpo yúmala, juka úttiärata,
juka rikorata, jita täyahuamta, juka tüisi úttiata,
juka ä yörihuaka entok sïmek béppa ujyóriata,
entok juka ä úttilhuähui.
13 Entok sïme jü téhuekapo yáari, entok buíata béppa, entok buíata bétuku, bahuepo ayukame, sïmetaka náu lópola ínëlim jiaahuay:
Jü banko rey nésaupo kátekamtahui,
entok Kabaratahui, bempörim béchïbotunake,
jü úttilhuame, jü yörihuähui, jü sïmek béppa ujyória,
entok jü yäura úttiära, jíba huásu‑huásuktiapo.
14 Jume naikika jiápsaka áma aneme ínëlim jiaahuay:
—¡Júnentunake!
Huanäi jume veinticuatro yoiyöturim bem pújbammeyim múmüla chätuka ä yörek, juka jíba yü huásu‑huásuktiapo jiápsamta.