3
1 Hermanodøjc, tøø jaꞌa Jesucristo jaꞌa nbojpä ngädieey hajxy xyajnähwáatsäm. Tøø jaꞌa Dios hajxy xyajnähdíjjäm coo jaꞌa miädiaꞌagy hajxy nmäbǿjcämät. Tsøgä Jesucristo hajxy jahmiéjtsäm; høxtahm̱ds højts jaꞌa Dios yaa xyajnäguéjxäm. Jaduhṉ hajxy njahmiéjtsämät coo hajxy jim̱ xñähgapxtúutäm maa jaꞌa Dioswiinduumän.
2 Haa jaꞌa Moisésä, pedyii jeꞌe jecy quiuduuṉ̃ maa jaꞌa Dios jaꞌa tiøjcän. (Jeꞌeduhṉ ñänøøm̱by jaꞌa judíoshajxy.) Jaanä jaduhṉä Jesucristo pedyii quiudiuum̱bä coo wyiinguejxä coo højts jaduhṉ xñähgapxtúutämät.
3 Maas hoy jaduhṉ coo jaꞌa Jesucristo hajxy nwiingudsähgǿøyyämät quejee jaꞌa Moisés. Høxtahm̱dsä tøjcojpä, jeꞌeds jaduhṉ wiingudsähgǿøyyäp; cabä tøjc jaduhṉ wyiingudsähgøꞌøyii.
4 Cabä tøjc hamdsoo quiojy; hänaꞌc jaduhṉ cojp. Pero jaꞌa Dios, cøx̱iä jeꞌeduhṉ piädaacy tijaty yaa hijp hädaa yaabä naax̱wiin møødä jim̱ tsajpootyp.
5-6 Jaꞌa Moisés, jayøjpä tøyhajt jaduhṉ miädiaactsohṉ̃ mädyii jaꞌa Dios hänajty cujecy quiapxtøwaam̱by. Pedyii jaꞌa Moisés quiudiuuṉ̃ maa jaꞌa Dios jaꞌa quiuꞌugän. Pero cabä møjcuhdujt miooyyä nebiä Jesucristo miøødän. Hix̱, jaꞌa Jesucristo, jaꞌa Dios yhamdsoo Uung jeꞌe. Y pedyii jim̱ quiudiuuṉ̃ maa jaꞌa Dios jaꞌa quiuꞌugän. Pero jaꞌa Moisés, jaduhṉ jeꞌe yhijty nebiä moonsän. Coo hajxy hamuumduꞌjoot nmäbǿjcämät, coo jaꞌa Jesucristo hajxy jootcujc njøbhíjxämät coo hänajty miejtstägatsaꞌañ, mänitä Dios hajxy nägøx̱iä xquiuꞌugnäbǿjcämät.
7 Jaduhṉ jiiby myiṉ̃ cujaay maa jaꞌa Diosmädiaꞌaguiän:
Cooc̈h nmädiaꞌagy hajxy jädaꞌanäbaady xmiädóow̱ät,
8-9 hamuumduꞌjoot hajxy jaduhṉ myajtúnät.
Haa jaꞌa jecyjiäyaꞌayhajxiä, jaꞌa mijts mhap mdeedyhajxiä, cábøch nmädiaꞌagy hajxy jecy xyajtuuṉä, hóyhøch hijxtahṉd may nja yajcähxøꞌcy, mänáajøch hajxy jecy nyajwäditiän pactuum juxychäguiꞌxjomøjt.
Cooc̈h nmädiaꞌagy hajxy xquiaꞌa mäbøjcä, páadyhøch hajxy nyajcumädooyy.
10-11 Xyagjootmadiägǿøyyhøch hajxy jeꞌe. Mänítøch nmänaaṉ̃:
“Tøø hajxy jaduhṉ mduꞌudägooñä. Cábøch nmädiaꞌagy hajxy xyhabøgaaṉä.
Tøyhajt jaduhṉ, cábøch mijts jim̱ nyajmedsaaṉnä maac̈h mijts hijty nyajpooꞌxaꞌañän.”
Jaduhṉä Dioshespíritu miänaaṉ̃ maa jaꞌa Diosmädiaꞌaguiän.
12 Hermanodøjc, mnigwieendähadǿøjäp hajxy nebiä Diosmädiaꞌagy hajxy mgaꞌa najtshixǿꞌøwät; jaduhṉ hajxy mgaꞌa tuꞌudägóyyät. Jujcy jaꞌa Dios; caꞌa jiaduhṉä nebiä jäyaꞌayhajxy yaabä Dyioshajpiän.
13 Pero mäduhṉ̃tiä hajxy mjugyhaty, mniguiapxmøcpøgǿøjäp hajxy jabom̱‑jabom̱, neby hajxy jaduhṉ mgaꞌa tuꞌudägóyyät.
14 Coo hajxy tehṉgajnä nmäbǿjcämät, neby hajxy tøø nmäbøjtsóhṉäm, mänitä Jesucristo hajxy jim̱ xmiødhájtämät tsajpootyp.
15 Jaduhṉ jiiby myiṉ̃ cujaay maa jaꞌa Diosmädiaꞌaguiän:
Coo jaꞌa Diosmädiaꞌagy hajxy mmädów̱ät jädaꞌanäbaady, hamuumduꞌjoot hajxy myajtúnät.
Jaꞌa jecyjiäyaꞌayhajxy, cabä Diosmädiaꞌagy hajxy jecy miäbøjcy.
16 Jim̱ä Moisés jaꞌa jäyaꞌay hoy wioobädsøm̱y Egiptonaaxooty; jeꞌeds hajxy jecy caꞌa mäbøjc jaꞌa Diosmädiaꞌagy, hoy hajxy hänajty tøø jia mädoy.
17 Jeꞌeds hajxy hoy tiuꞌudägooñä. Jim̱ hajxy hoy quiøx̱y hoꞌnä pactuum. Jeꞌedsä Dios hoyhoy ñäjootmayhajt juxychäguiꞌxjomøjt.
18-19 Jeꞌedsä Dios jaduhṉ ñämaayy coo quiaꞌa yajmedsaaṉnä maa hijty jaduhṉ yajpooꞌxaꞌañän, jeꞌeguiøxpä coo hajxy hänajty quiaꞌa mäbøcy.