EBRE MU A 'LƐTRƐ
Ebre mu a 'lɛtrɛ 'ɛ ŋgblo
Mɛɛ 'la zan 'lɛtrɛ 'lɛɛ‑ ꞊dia yaa 'gbu 'tɔ 'ɛ 'kanlɛ‑ mɛɛ ni. 'Duŋ‑ 'yee‑ 'lɛtrɛ 'lɛɛ‑ zan ‑o mɛɛ 'la 'le 'bhɛ zan Grɛki wli 'gbu 'ɛ dɔ 'elrele, 'bhɛɛ‑ ‑e ‑Waanbhaa' a 'Sɛwɛ 'ɛ dɔ kplankplan, 'bhɛ 'pegee ‑e Zuufu mu a 'toŋ mu 'ɛ dɔ 'ezin‑ kplankplan 'gbu. Mɛɛ 'ke mu pe dɔɔ Pɔlu ‑le 'a zan 'ɛ 'le, 'bhɛɛ‑ mɛɛ ‑bhɛɛke' 'lɛdo‑ pe dɔɔ Apolɔsi ‑le 'a zan 'ɛ 'le (Klɛza 18.24-28, 1 Korɛnti 3.5-9; 4.1-2). Mɛɛ 'la zan 'yee‑ 'lɛtrɛ 'lɛɛ‑ ꞊dia, ‑ya ꞊dia win 'la ma, 'bhɛ ‑le dɔɔ 'ke ‑ya pe ‑o ‑yaa ‑yrɛnkpa' zii' Zuufu mu 'la ꞊wlaa Zesu Krisi 'yi 'mu ni dɔɔ 'mu dɔ 'eglɔɔle 'mu a 'kpaleya 'ɛ 'yi. ‑Ya ꞊pia 'mu ni 'ke 'mu ‑ploola 'mu 'kpale‑ ma Zesu 'yi, 'bhɛɛ‑ 'ke 'mu dɔ gbɛ drɛɛwoa‑ Zuufu mu a 'toŋ mu 'ɛ 'klɔsikunle ma, 'mu 'laa nu ‑trɔn 'srɔɔwolɛ 'bhɛ ma. ‑Amasrɔyi Zesu Krisi mɛɛ goza ‑za 'yi jan 'la ꞊woa 'bhɛ ‑le 'ke wlan 'le.
‑O sɔ 'yee‑ Ebre mu a 'lɛtrɛ 'ɛ 'yiciɛnle ‑lɛ plɛ: ‑A ‑lɛ ꞊lwa mi 'ɛ (Ebre 1.4–10.18) 'bhɛ 'a zrɔn 'bhii‑ Zesu gblaan ‑yiya' laflɛ' 'yi ‑mlɛkɛ' mu 'ɛ ni. ‑A gblaan ‑yiya' Moizi 'pegee ‑bhoolaya gwe 'ɛ ta 'sraka 'lɛna mu ‑gbɛnɛ mu 'ɛ ni. ‑Waanbhaa' ‑yrɛ 'yi, Zesu ‑o 'ke 'Sraka 'Lɛna mi gblaan 'le. ‑Yoo 'bhii‑ Mɛlikizedɛki gbɛɛn‑, 'bhɛ 'la 'yaa‑ 'ke ‑bhleŋgbe 'pegee 'sraka 'lɛna mi 'le Abraamu a pɛ 'waati 'ɛ ba bhe. Zesu 'a 'gbu ꞊naa 'ke 'sraka 'le ‑kɔɔa' ‑za 'yɔɔ‑ mu 'ɛ ma. 'Bhɛɛ‑ 'duŋ‑, ‑o ‑yaa 'sraka mu 'la go 'elwaleta ‑sɔ, 'mu 'laa ‑yaa sɔ mɛɛ a ‑za 'yɔɔ‑ mu 'ɛ taliile.
‑A ‑lɛ plɛ mi 'ɛ 'yi (Ebre 10.19–13.17), 'lɛtrɛ 'lɛɛ‑ zan 'ɛ ‑yoo zruwla 'zi Ebre mu 'ɛ 'kpee dɔɔ ‑woo zrubakpala ‑waa' 'kpaleya 'ɛ 'yi, 'bhii‑ 'elwaleta mu 'ɛ 'mu 'a ꞊kla gɔnɛ‑ 'la gbɛɛn‑ bhe.
‑E ‑yaa' 'lɛtrɛ 'ɛ 'lɛyanyrɛ 'ɛ ꞊kla 'ke mɛɛ mu 'pubɔle 'pegee 'mu 'dumawolele.
‑BHOOLAYA DRƐƐ 'Ɛ GBLAAN ‑YIYA' 'BHOOLAYA GWE 'Ɛ NI
1
‑Jan 'ɛ zisanyrɛ
1 'Ŋ nɛɛnɛ‑ mu, 'elwaleta ‑sɔ, ‑Waanbhaa' ‑jan ‑kpaa ‑a *‑lɛla' janwo mu 'ɛ 'lii, 'bhɛɛ‑ 'mu ‑janwoa ‑kɔɔ' ‑gbɔɔ mu 'ɛ ni ‑glɔɔn ‑bebe 'le 'bhɛ 'pegee gbɛ 'ɛ 'kpɛn ‑glɔɔn ma.
2 'Duŋ‑ ‑zɔn 'waati mu 'lɛɛ‑ ba, 'woo‑ 'waati mu 'la ‑woo 'ke 'waati boolazi mu 'ɛ 'le, 'yee‑ ‑Waanbhaa' 'gbu ‑jan ‑kpaa ‑a Gbe 'ɛ 'lii, 'bhɛɛ‑ 'bhɛ 'bhɛ ꞊woa ‑kɔɔ' mu ni. ‑E pɛ 'kpɛn ꞊kla ‑a Gbe 'ɛ 'bhɛɛ‑ gbɛ zi; 'bhɛɛ‑ ‑ya ‑kpaa pɛ 'kpɛn 'wiiŋ‑.
3 ‑Waanbhaa' a 'tɔbhɔleya 'bhile 'ɛ 'kpɛn ‑o 'yela‑ ‑yi, 'bhɛɛ‑ 'yele‑ ‑Waanbhaa' bhɔɔma kpataakpa 'gbu 'ɛ 'le. ‑Yaa' 'sɔle‑ ma jan 'ɛ 'bhɛ ‑le 'drunyan ta pɛ mu 'ɛ 'kpɛn kun 'elrele. ‑E yanle bhaaplɛŋ mu a ‑za 'yɔɔ‑ mu 'ɛ golele ‑o ma, 'ke ‑yoo klɛ 'weŋ, 'kee‑ gele‑ yaalɛ laflɛ' 'yi laanima ‑Waanbhaa' 'la 'bhɛ a ‑glɔɔya' 'ɛ 'kpaale‑ ‑o pɛ 'kpɛn 'wiiŋ‑, 'bhɛ ‑din 'tɔbhɔ ma yaayrɛ 'ɛ ꞊nɔɔ.
‑Waanbhaa' 'tɔ gblaan ꞊naa Zesu Krisi 'ke 'bhɛ kan ‑mlɛkɛ' mu a pɛ 'ɛ ta
4 'Bhɛ 'yi 'tɛ, ‑Waanbhaa' 'a ꞊kla 'bhɛɛ‑ ‑a Gbe 'ɛ ꞊kla 'egblaanle 'ke 'bhɛ ‑yiya' ‑mlɛkɛ' mu 'ɛ ni, 'bhɛla‑ ‑yile 'tɔbhɔ ma 'tɔ 'la 'bhɛ gblaan ‑yiya' ‑mlɛkɛ' mu a pɛ 'tɔ mu 'ɛ ni, ‑Waanbhaa' 'bhɛɛ‑ ꞊naa ‑a ni.
5 Wlan 'ɛ ni, ‑Waanbhaa' laa pelɛ ‑lido' ‑mlɛkɛ' 'kedo‑ 'kpɔ ni dɔɔ:
«'Bhi ‑le 'ke 'ŋ Gbe 'ɛ 'le,
'bhɛɛ‑ 'mi ꞊kla ‑zɔn 'e Dɛ 'le.»
'Bhɛɛ‑ yaa pelɛ ‑mlɛkɛ' 'kedo‑ 'kpɔ ba za 'yi dɔɔ:
«'Mi nu klɛlɛ ‑a Dɛ 'le,
'Bhɛɛ‑ 'yee‑ nu klɛlɛ 'mi Gbe 'le.»
6 'Duŋ‑ ‑Waanbhaa' ‑yaa zan ‑a Gbe 'la 'bhɛ ‑o 'ke ‑a ‑nɛ ꞊lwa 'ɛ 'le 'bhɛ 'winbɔlɛ 'waati 'la ba, ‑ya ꞊pia dɔɔ:
«‑Mlɛkɛ' 'tɔle‑ ‑mlɛkɛ' 'mu 'kpɛn 'e 'kpɔ zɛn ‑a ‑la, 'bhɛɛ‑ ‑wa gba.»
7 'Bhɛɛ‑ 'yee‑ ‑Waanbhaa' ‑jan 'lɛɛ‑ 'bhɛɛ‑ ꞊woa ‑mlɛkɛ' mu 'ɛ ba zayi' dɔɔ:
«‑Woo 'ke ‑yaa' winbɔwo mu 'le, 'bhɛɛ‑ ‑woo 'ke ‑yaa' yewonɛ mu 'le,
‑o kan blaale‑ 'bhii‑ ‑ploo 'kangbɛya gbɛɛn‑, 'bhɛɛ‑ ‑o yran 'bhii‑ 'tɛ nrɛ mu gbɛɛn‑.»
8 'Duŋ‑ 'yee‑ ‑Waanbhaa' 'kɛla ꞊woa ‑a Gbe 'ɛ ba zayi', 'bhɛ ‑le ‑gɛ dɔɔ:
«'Bhi ‑le 'ke ‑Waanbhaa' 'le, 'bhɛɛ‑ 'yaa‑ ‑bhleŋgbeya 'ɛ ‑daŋ' 'laa ‑o 'bhɛ ma ‑titi.
'E 'yaa‑ ‑bhleŋgbeya 'ɛ klɛ ‑lɛdɔɔleya ‑la ma.
9 ‑Za 'lɛdɔɔle ‑le sɔ 'e ni, 'bhɛɛ‑ ‑za 'yɔɔ‑ vɛnsi 'e yin 'lii.
'Bhɛla‑ ‑zayile, 'ee! ‑Waanbhaa', 'yaa‑ ‑Waanbhaa' 'ɛ ‑yoo 'e makwan‑,
'bhɛɛ‑ ‑yee' ꞊kpaa 'edaŋma ‑yaa' pɛ 'le,
'bhɛɛ‑ ‑yrɔn 'la 'bhɛ 'e zrukpalaa 'egbɛnɛle ‑e 'bhɛ ꞊klaa 'e 'wiiŋ‑.
'E ‑za ꞊swa ‑a ni 'ke 'bhɛ kan 'e ‑vin mu 'ɛ ta.»
10 'Bhɛɛ‑ ‑Waanbhaa' pe 'ezin‑ ‑a Gbe 'ɛ ba za 'yi dɔɔ:
«'Bhi Mɛɛzan, 'bhi ‑le 'trɛ ꞊kla 'kee‑ san ‑a zisan' bhla zi 'ɛ ma,
'bhɛɛ‑ 'bhi ‑le laflɛ' ꞊kla 'e 'gbu 'kɔɔ.
11 'Bhɛ pɛ mu 'ɛ 'kpɛn nu 'kanlɛ‑;
'duŋ‑ 'bhi nu bolɛ 'e bogbɛya do 'ɛ 'yi.
'Trɛ 'pegee laflɛ' nu ‑krɔyawolɛ 'bhii‑ dunɛ‑ do ‑krɔyawo gɔnɛ‑ 'la gbɛɛn‑.
12 'E nu ‑o gbɛkpalɛ 'bhii‑ ‑o dunɛ‑ tralapɛ 'ɛ gbɛkpa 'eke‑ 'yi gɔnɛ‑ 'la gbɛɛn‑.
‑O nu ‑o tabɔɔlɛ 'bhii‑ mɛɛ 'a ta dunɛ‑ mu tabɔɔ gɔnɛ‑ 'la gbɛɛn‑:
'Duŋ‑ 'bhi nu bolɛ 'e bogbɛya do 'ɛ 'yi, 'bhɛɛ‑ 'bhi 'laa nu ‑krɔyawolɛ ‑titi.»
13 'Bhɛɛ‑ ‑Waanbhaa' laa pelɛ‑ ‑lido' ‑mlɛkɛ' 'ɛ 'kedo‑ 'kpɔ ni dɔɔ:
«Nu yala‑ 'ŋ ‑din 'tɔbhɔ ma yaayrɛ 'ɛ ꞊nɔɔ ‑gɛ,
'sani‑ 'ŋ yan 'e 'sɔɔnnii mu 'ɛ klɛlele 'e gaan ‑la pɛ 'le.»
14 'Bhɛɛ‑ ‑mlɛkɛ' mu 'ɛ 'kpɛn 'laa ‑o 'ke lii mu 'le bi ɛɛ? ‑Woo ‑le 'ke ‑Waanbhaa' a winbɔwo mu 'le, 'ke ‑o yewo ‑a ni. Mɛɛ la zan mu ‑o 'ke go pɛ mu 'le ‑za 'yi, ‑Waanbhaa' ‑o winbɔ 'bhɛ zan mu 'ɛ ta, 'kooko‑ ‑o ge bhɔ 'bhɛ zan mu 'ɛ ba.