Naabo ɗoŋ zina
kʼIsa Almasi
Eŋ urzi kʼono ɗoŋ kun tʼoone adda mattup ettiyo
Ette mattup ere ki sirwe Lik yi riiŋe. Mattup ki Naabo ɗoŋ zina kʼIsa Almasi ette tʼin kaza mummino ɗoŋ zina kʼIsa an niibe me. Yʼa ruute soŋ mummino Unde Kamilen̰ tʼa ɗiige ekki ɗoŋ zina kʼIsa wo an dʼizire adda geegiryagi an di gizite Rabila Majjaanawa ti toogo kʼUnde Kamilen̰ me. Wo sulɗi ɗoŋ oon̰e ti dabar ere an uune a urzi naabadaŋ geŋ, yi tiʼn ruute pây adda mattup ette.
Ti kaaga geŋ kane Yawudiyagi an ilke ono Raa a kane ɗaŋŋal. Lik adda mattup ette yʼa ruute mummino kane ɗoŋ zina kʼIsa an di gizite Rabila Majjaanawa a ɗoŋ Yawudiyagi ye me.
Wo yi ruutite ɓaadaŋ a urzi naabo ɗoŋ zina sire an ize gettiyo, kane miŋ Piyer ti Pool. Piyer yʼa gizite ono Raa a ɗoŋ ki geeger Zeruzalem, bini ɗoŋ ɓaadaŋ an ziipe addaŋ a Isa wo an seeɗu zakiɗi eego. Wo ki yode Pool yʼa gizite urzi kʼAlmasi adda geegiryagi ki ɗoŋ kane Yawudiyagi ye. Mattup ette tʼin kaza a kine, i dehu in di kizite Rabila Majjaanawa kʼIsa Almasi adda duniya pay.
1
Ɗoŋ zina kʼAlmasi a Zeruzalem
1 Teyopil meeʼki nuŋ, nuŋ adda mattupadó ere ki poone, ni riiŋe sulɗi ɗoŋ pay Isa yʼize wo yi duuye ɗuwo tʼume kʼeesiyo,
2 bini onniyo ere Raa yʼa yʼumɓe kʼawwa ki kandaane. Wo ki poone yʼa yʼamɓa geŋ, ti toogo kʼUnde Kamilen̰ yʼan di ruute sulɗi ɗoŋ an dʼise a ɗoŋ zindí ɗoŋ yi biire.
3 Aame yi dibire bini yʼinda wo yi bilɗe maŋ, yʼan di gize tuddí te a kane ɗoŋ zindí tʼurzi ɓaadaŋ, geŋ i-kaza yoŋ ki kotto yi-bilɗe. Wo adda kʼonniyo ada piɗe geŋ tuddí yʼan di gize, wo yʼan di gizite sulɗi ɗoŋ ki Moziko Raa.
4 Onniyo soo an ti guune omɓo ti kane gen̰n̰o maŋ, yʼan di ruute, yʼede: «Kun ollo koɗuwo, ti Zeruzalem eŋ kun arga tunɗa ye, kun dello munɗa wede Meega Raa yi ruute yʼun tʼela, aa kun illiga nʼun ruute ti bizó.
5 Ti poone Zaŋ ɗuwo yiʼni zuyyite batem tʼahu, wo ɗe kuneʼŋ adda kʼonniyto miibi Raa yʼun tiʼn suyya batem tʼUnde Kamilen̰.»
Isa yʼeŋgile kʼawwa ki kandaane
6 Wo kane ɗoŋ i tʼugiye a ɗaanadí geŋ an di yʼ tunde, anʼde: «Galmeegey, kee a onniyo gettiyo ko moziko ki ɗoŋ kʼIzirayel kʼan ti tʼela me?»
7 Isa yʼan di ruute, yʼede: «Kane sulɗi ɗoŋ aakede onniyto, ise peeɗo ere tuuku Meega Raa yi dihe yʼaase ti toogadí geŋ, kun kʼaane kun ki tiʼn suune ye.
8 Wo ɗe kune kun tʼoona toogo aame Unde Kamilen̰ ti ɗiiga egguŋ maŋ. Iŋkino maŋ kun kizita onamó, kun tʼeesa ti Zeruzalem, kun dʼamɓa kʼadda siiɗo ki Ziide ti Samari pay, bini ɗaŋgu siiɗo pay.»
9 Aame yʼa ti ruute iŋkino maŋ, a ɗaanadaŋ geŋ miŋ yʼa tʼiiziga jomkey, yʼa iŋgile kʼawwa ki kandaane, an di wolliyo bini dondirso ti di yʼippe.
10 Aame kane an ɓaɓɓiya Isa yʼeŋgile kʼawwa ki kandaane geŋ, an wolliyo bibaraw a sirpadaŋ ɗoŋ sire ti kallagi tuwarɗi, an an di ruute, anʼde:
11 «Kune ɗoŋ ti siiɗo Galile no, kun ôhire kun ɓaɓɓiya kʼawwa ki kandaane moo me? Geŋ Isa Raa yi yʼumɓe ti ɗaanaguŋ, saŋ onniyo soo yʼa-kimo, kun di yʼ wolla aa kun yi wulle yʼiŋgile kʼawwa ki kandaane iŋkino sey.»
12 Iŋkino maŋ kane ɗoŋ zina geŋ, tʼekki mokkolo ere an ti waaku mokkolo kʼInda kʼOlibiye an di-ɗiige, an dʼiŋgile ki Zeruzalem kono to mokkolo gette dokki ye ti Zeruzalem me, suma kuɓɓaara soo.
13 An iiney Zeruzalem maŋ, an di-gili biino ere tʼawwa tʼekki bakatú aame an dʼogiyso daayum. Aame geŋ kane Piyer, Zaŋ, Zak, Andire, Pilip, Toma, Bartelemi, Matiye, Zak ulo kʼAlpe, Simo wede addí wehini kono siiɗadí me, wo Ziid ulo Zak.
14 Kane pay onamaŋ kaŋ soo, daayum an tondiyo Raa ti erayi ɗoŋ oŋgo, ti Mariyam mekkʼIsa wo ti zemɓa kʼIsa pây.
Beeriyo Matiyas a olɗe Ziidas
15 Adda kʼonniytagi geŋ, onniyo soo Piyer yʼa tʼiiziga a ɗaana zemɓa kane suma meeda uto ada sire an tʼugiye gen̰n̰o, wo yʼan di ruute, yʼede:
16-17 «Zemɓa ki nuŋ, kun suune Ziidas yoŋ ti diine kine, wo naabadí ede ere yi naabiya aa kine in naabiya te. Kʼita maŋ yʼa tʼize wede kʼoogumso a ɗoŋ ki seeɗu kʼIsa. Ono geŋ Unde Kamilen̰ tiʼni ruute ti kaaga adda mattup ki Raa, ti bize Dawut a tukki Ziidas me, geŋ a-tʼiide.
18 Iŋkino maŋ ti soŋko ere an i ele ki dimme gette, yʼa tʼiwila doome. Wo kaciŋ wede geŋ yʼa iire tʼaddí a siiɗo adda doome geŋ me, addí a ɓitte in̰n̰i kʼaddí a tʼuɗɗite pay ti paate.
19 Rabila gette ɗoŋ siiɗo Zeruzalem pay an di-tʼilliga, wo geŋ iŋkino doome Ziidas yʼiwila geŋ an di yʼ waaku ti onamaŋ “Akil Damma”, i-kaza “doome an iwila ti puuzo wede.”
20 Ono eŋ nebi Dawut yi riiŋe ti kaaga adda mattup ki Soom, yʼede:
“Ɓoozí a kila bulgo, wenɗa a lekka umbo.”
Wo yi riiŋe soŋ, yʼede:
“Ume naabadí wenɗa doolo yʼa tʼamɓa.”
21-22 Iŋkino maŋ i dehu wedusu yʼa-tʼette ti kine, yʼa tʼise wede kazita ki rabila ki balɗiya Galmeega Isa. Wedusu geŋ yʼaase ti diine kane ɗoŋ izire ti kine onniyo ti onniyo aame Galmeega Isa yʼizire adda siiɗo ti kine, tʼume Zaŋ yi ti yʼ zuyye batem bini onniyo ere Raa yʼa yʼumɓe ti diine kine, yʼa iŋgile kʼawwa ki kandaane.»
23 Aame geŋ an di biire ɗoŋ sire, Yusup wede Barsabas sundí soo Zistus, kane ti Matiyas.
24 Iŋkino maŋ an tunde Raa, anʼde: «Galmeega, kee ki suune adde ɗuwo pay, iŋkino ki beero soo ti diine ɗoŋ sire en̰n̰o,
25 kono yʼa tʼamɓe naabo ɗoŋ zina kʼIsa a olɗe ki Ziidas, kono yo Ziidas geŋ ume naabadí yi iili, yi tʼiide kʼume wede aa addí i dehu i-dʼîide untadí.»
26 Iŋkino maŋ an tʼize teltel muntelliyo, maŋ i-tʼiire a Matiyas, geŋ yoŋ yʼa di giƴƴe ti kane ɗoŋ zina ɗoŋ koomat makumu soo gen̰n̰o.