12
Unto ki Zak, wo Piyer adda daŋgay
1 Aame geŋ mozigo Erod yʼa iise dabirsa zemɓa oŋgoŋ ti diine ɗoŋ ogiyso ti suma kʼIsa.
2 Yʼan dʼele urzi a asigiryagi, Zak leema Zaŋ an di yʼîide ti seebir.
3 Wo aame Erod yi wulle a Yawudiyagi an tʼize uŋse maŋ, yʼan dʼele urzi Piyer toŋ an ti yʼ seeɗo a onniytagi ɗoŋ ki tarnaape wede an dʼomɓo mappa daa kʼorme.
4 Aame an ti yʼ ziiɗo maŋ, an di yʼele adda daŋgay, wo Erod yʼa-ti zippe asigiryagi koomat makumu zoot, yʼa tiʼn dikkiɗa omagi piɗe, an di yʼ boohe. Yi dehu yʼa ɗekka booradí a ɗaana ɗuwo pay aame tarnaape Pak ki Yawudiyagi yi tʼiŋgila maŋ.
5 Iŋkino maŋ Piyer yi lekkiyo daŋgay wo kane ɗoŋ ogiyso ti suma kʼIsa geŋ an tondiyo Raa daa puukiyo wo tʼaddaŋ pay kono yode.
Aɗɗiya Piyer ti daŋgay
6 A diɗɗo ere soggo Erod yʼa ɗekka booro ki Piyer a ɗaana ɗuwo pay gette, Piyer geŋ yi moone a diine kʼasigiryagi sire, beyɗíʼŋ kettiso ti ziŋziri sire, wo a biza daŋgay ummey asigiryagi sey an boohiyo.
7 A kaamiki maaleeka ki Galmeega Raa yʼa ɗiige adda daŋgay, biino ere Piyer adda gette a-tuure keren̰. Maŋ maaleeka yʼa yi butte Piyer a sirpadí kono yʼa-tʼinne, wo yi di ruute, yʼede: «Kesiko ki tʼoozo!» Maŋ ziŋziri ti beyɗí a tiipe.
8 Saŋ maaleeka yi di ruute, yʼede: «Ki-ketto tooná wo ki tʼosso toɓiyagá.» Piyer yʼa tʼize aa maaleeka yi ruute, wo yi di ruute sey, yʼede: «Ki tʼosso kallayá goole wo kʼa ni daani.»
9 Iŋkino maŋ Piyer yʼa diine maaleeka, tʼadda daŋgay yʼa tʼuɗɗe, wo a elkiyadí yi ki zuune ye munɗa wede maaleeka yʼisiyo geŋ ɗerec me, yʼelkiyo i-iido munɗa aa suniye.
10 An tʼuɗɗe tʼume kʼasigiryagi ɗoŋ ki poone, ti ɗoŋ ki sirwe toŋ an a-tʼuɗɗe pây, an dʼiiney a biza wede ki maala kʼa-tʼaɗɗe kʼadda geeger. Biza geŋ a tʼihina siidí a ɗaanadaŋ me, wo an tʼuɗɗe maŋ an dʼizire kaŋ soo a urzi, saŋ a kaamiki n̰okkot maaleeka yi yʼiili Piyer me.
11 Iŋkino maŋ Piyer eedí tʼa iido, yʼa yi zuune munɗa wede i-iido me, wo yʼa ruute, yʼede: «Aŋkeŋ ni zuune baa geŋ ɗerec, Galmeega Raa yʼigibo maaleeka yʼa-nʼuɗɗe ti bey kʼErod wo ti munɗa wede ulsu Yawudiyagi an dehu an oo dʼise me.»
12 Aame yi zuune iŋkino maŋ, yʼa iŋgile ki ɓoy kʼerewo sundutú Mariyam mekki Zaŋ, sundí soo Markus. Adda ɓoy geŋ ɗoŋ ɓaadaŋ an tʼugiye an tondiyo Raa.
13 Piyer yʼiideʼŋ yi koppiyo biza yi-tʼette, wo i dʼede ere naabo sundutú Rood, tʼa iido tʼa-tʼihina biza.
14 Aame tʼilligaʼŋ golla ki Piyer tʼa ti zuune, wo todʼte ulbutú a ûune tʼuŋsuwo ɓaadaŋ. Iŋkino maŋ tʼa-tʼihina biza umbo, tʼa-gime kaŋ okko, tʼan di ruuto, tʼede: «Piyer yo en̰n̰o a biza.»
15 Kane an i-di ruute, anʼde: «Koŋ mi tʼokko maade ko?» Wo ɗe todʼ tʼa ruute, tʼede: «Ki kotto yo a biza.» Iŋkino maŋ kane an di ruute, anʼde: «Geŋ maaleekayí koo maŋ.»
16 Iŋkino yo Piyer geŋ yi koppiyo biza pi bini an dʼiido, an i-tʼihina. An yi wulle maŋ, an ziiɗa giggiraŋ.
17 Maŋ yʼan dʼize likuw ti beezí kono an dʼanniga, wo yʼan tʼîide taaya mummino Galmeega yi-yʼuɗɗo ti daŋgay me. Yʼan di ruute sey, yʼede: «A Zak wo a zemɓa oŋgo toŋ, kun an tʼôodoy taaya.» Saŋ tʼume kane yʼaa tʼuɗɗe, yʼa iŋgile kʼume doolo.
18 Ume i tʼumpile maŋ asigiryagi an wolliyo Piyer umbo, undaŋ a tʼuɗɗe, an dʼiise tondiso, anʼde: «Ɗe Piyer a yʼihe moo me?»
19 Mozigo Erod yʼa igibe ɗuwo ki dehuzí, wo an ki yʼuuno ye. Maŋ yʼanni wiike kane asigiryagi ɗoŋ i yi boohiyo me, yʼanni tundite ti kulkuwo, yʼede: «Ɗe Piyer kun i ize mummino!» Iŋkino maŋ yʼan di ruute a asigiryagi doolo an tiʼn ôodo. Saŋ maŋ Erod yʼa tʼiiziga ti siiɗo Ziide, yʼa-lekko a geeger Sezare onniyto miibi.
Unto ki mozigo Erod
20 Iŋkino maŋ kane ɗoŋ geegiryagi Tir ti Sidoŋ geŋ, an ooniyo omɓo ti siiɗo ki mozigo Erod, wo aame geŋ yoŋ yi ti gulkuwe ɓaadaŋ ti kane ɗoŋ siiɗo geŋ me. Maŋ kane ɗoŋ pay geŋ an tʼîide onamaŋ kaŋ soo, an tʼoone urzi ki toose ti Erod. Maŋ an dʼuuney wede soo sundí Bilastus, yoŋ geŋ wede boohiyo biino mozigo. Kane an iide an ti yʼ ŋiiƴa, yʼan dʼan tʼette kʼume mozigo Erod.
21 Iŋkino maŋ Erod yʼan dʼele onniyo, wo aame onniyo gette tʼiina maŋ yi-tʼusse kallayí ki moziko, yʼa-guune kaakido booro, yʼa iise rootiyto a ɗaana ɗuwo pay.
22 Ɗoŋ ollige geŋ an dʼiise ɗollite, anʼde: «En̰n̰o eŋ i rootiyto wedusu ye, eŋ raayusu!»
23 Aame Erod yʼilliga ono ɗuwo gen̰n̰o maŋ, ulbí uŋse tuddí yʼa ti-gili, tamma gette yi-kʼiili a Raa ye. Iŋkino maŋ a kaamiki, maaleeka ki Galmeega Raa yʼa yi diin̰e ti eeni, ondirɗagi adda kʼaddí an di yʼiimi, yʼa inda.
24 Tiŋ geŋ ono Raa i-teepiyo ki ɗaana ki ɗaana, wo ɗoŋ ɓaadaŋ an di ziipe addaŋ a Isa.
25 Aame Pool ti Barnabas a zina ere an an igibe ki noogiyo ɗuwo a Zeruzalem an aa ti-ɗiŋge maŋ, an a-ti yʼ wiike ti kane Zaŋ wede sundí soo Markus, an di-gime ki Antiyos.