15
येरुसलेम सहरतोर विस्वसिर वासि तेल्वेङ कीस्तोर
1 अद्रमे पया उंद दिया उय्तुर यहुदि विस्वसिर यहुदा पटटाहि सुरिया पटटकेडा अंताकिया सहरते वासि अग्डोर विस्वसिरिन कलियतोर. कलियिसि “मीट मोसानाङ अडोङ वेहतपु डायना रिवज केवेके देवुळ मीकु पिसिह केवो आयग़ा,” इनजोर काग़्हता बोटटोर.
2 इदिन केंजिसि पोलु, बार्नबस, वेर अद्रम काग़्हवालोरा संगे पका जग्ळम आतपे पोल्लोने गिटोगटो आतोर. पया अंताकियातोर विस्वसिर बाताल इतोर, “पोलु, बार्नबस ओसो उय्तुर विस्वसिर येरुसलेम अनजि, बळयिरिन, विस्वसिराङ पेदल्किन इद पोल्लोतुन देहतलाहि ताल्ह्किस वायिर,” इनजोर इतोर.
3 ताना पया अंताकियातोर विस्वसिर ओरिन येरुसलेम लोहतोर. लोहतस्के पोलु ओना तोळतोर बार पिनिके ओसो सामरिया पटिह्क अनेके, यहुदि आयवोर बेद्रम देवुळतके वातोर, अदिन अग्डोर विस्वसिरिह्क पूरा वेहचोर अतोर. तान केंजिसि सबेटोर विस्वसिर पका गिर्दा आतोर.
4 अद्रमे पया येरुसलेम एवतोर, एवतस्के विस्वसिर, बळयिर, विस्वसिराङ पेदल्कु ओरिन गिर्दाते कलियतोर. कलियतस्के पोलु, बार्नबस तमा कयदे यहुदि आयवोरगा देवुळि बाताल-बाताल कबळ कीता इनजोर पूरा पोल्लोन ओरिह्क वेहचीतोर.
5 मति परुसिरा तुंगातग्डाहि येसुन विस्वस कीतोर अगा मतोर. ओर तेदिस इद्रम इतोर, “यहुदि आयवोरिन डायना रिवज कीया वेहचि, ओरिन मोसानाङ अडोने ताकलाह उकुम ईयना गावले,” इतोर.
6 इतस्के बळयिर, विस्वसिराङ पेदल्कु इद पोल्लोतुन विचर कीयलाह जमा आतोर.
7 अस्के वेल्लाय जोम पोल्लोने ईनाह-आनाह गिटोगटो आतोर. पया पत्रु तेदिसि इद्रम इतोग़, “मावोरिर वेल्लाङे दियाङ मुने देवुळि नावा तोडटे यहुदि आयवोर बेसता कबुरतुन केंजिसि, येसुन विस्वस कीयिर इनजोर मयग्डाहि नाक आचता, इदिन मीट पुतिरे.
8 सबे लोकुरा पोटालोप्पाडाङ पोल्लोन पुनदनद देवुळि, माट यहुदि विस्वसिरा पोग़ोन तना पवित्र जीवातुन बेद्रम उदिह कीता, अद्रमे ओर यहुदि आयवोरा पोग़ोन वने तना पवित्र जीवातुन उदिह कीसि, ओरिन वने आचता इनजोर तोहता.
9 ओर विस्वस कीतोर अस्के देवुळि ओरा पापमतुन मापि कीस ईता. अह कीसि माट यहुदिर आयि, दुस्राङ जातिनोर आयि, सबे विस्वसिरिन देवुळि उंदिय रीतते पिसिह कीता इनजोर तोहता.
10 इचोन तोहचाय मति मीट इंजेके मोसानाङ अडोने ताकाट इनजोर वेहचि, ओरा पोग़ोन पूहतद मोतातुन वाटलाह बाराह्क देवुळता पट ऊळिह्निर? मावा तादोर-बाबोर ओसो माट वने मोसानाङ पूरा अडोने ताक पग़वल.
11 बेद्रमलेह्का येसुसामि यहुदि आयवोरिह्क ईतद दयातेनाह्के ओर ओन नमिस पिसिह्तोर, अद्रमलेह्काने माट यहुदिरल वने पिसिह्नल, मति अडोङ नोमताह्कु पिसवल,” इनजोर इतोग़.
12 पत्रु इद्रम इतापया, पोलु, बार्नबस वने यहुदि आयवोरगा तमा कयदे देवुळि बाताल-बाताल लोकुर बामनाह ऊळना लेह्काडाङ सीनाङ तोहता, इनजोर वेहतोर. वेहतह्पा सबेटोर केमेन आसि ओरा पोल्लो केंतोर.
13 पोलु, बार्नबस वेहतनद मारिह कीतोर, अस्के अग्डा मुक्याल याकुब इद्रम इतोग़, “मावोरिर, नावा पोल्लो केंजाटु.
14 देवुळि यहुदि आयवोरिन मुने सीता कीसि, ओरग्डाहि उय्तुर मन्कलोरिन तना मन्कलोर आयलाह आचता, अदु बेद्रम ओरिन सीता कीता इनजोर सिमोन पत्रु इंजेके माक तेळियिह कीतोग़.
15 इद पोल्लोतुन देवुळता कबुरतोर वने वेल्लाय मुने वेहच मतोर, अद इद्रम रासतद मन्ह्ता,
16 ‘देवुळि इद्रम वेहता,
“दाविदिना राजेम बूळेम आतेक तेला नना पया वासि तान ओसो निल्पिह कीकन,
पिळ्हपळ आतदिन बेस कीसि तान बद्ले कीकन.
17-18 अह आसि दुस्राङ वेल्लाङे जातिनोर नाक पर्ह्कनुर,
इतेके नयेनाह्क नना आचतोरु यहुदि आयवोरु,”
इनजोर देवुळि वेहता.
इदिन वेल्लाय मुनेताहि तना मन्कलोरिन पुन्पिह कीसोर वाता,’
इनजोर रासिस मन्ह्ता.
19 अदिह्क नना बह इह्नन इतेके, यहुदि आयवोरग्डाहि देवुळतगा वावालोरिन माट तिपल केवल.
20 मति ओरगा इद्रम रासिस लोहतकल, ‘पेन्ह्किह्क वाटटव कळ्वोग़ आस्ताङ अविस्किन तिनदनद आयो, साट्याल कबस्क कीयनद आयो, नेतुर पोववालेवा हव्कतविनाङ अविङ तिनदना आयो, अस्कतापया नेतुरतुन एच तिनदना आयो,’ इनजोर रासकल.
21 बाराह्क इतेके वेल्लाय मुनेताहि सबे सहर्कनगा, देवुळता पार्तनाताङ लोह्कनगा, वारमता पोल्वादियाते मोसानाङ अडोन अर्विसि पोकुर कीस्तोर, अद्रमे मावा यहुदि विस्वसिर माळिह्तोर वने. अदिह्क इंजेक वेहतनव पोल्लोन यहुदि आयवोर विस्वसिर केंजिसि ताकिर, आयवेक अचोन यहुदिरिह्क ओङ वायग़ा,” इनजोर इतोग़.
यहुदि आयवोर विस्वसिरिह्क सीटि लोहतह्तोर
22 पया बळयिर, विस्वसिराङ पेदल्कु, सबे येरुसलेमतोर विस्वसिर बाताल इतोर इतेके, “इंजेके याकुब इतव पोल्लोन रासिसि, मयग्डोर विस्वसिरा कयदे अंताकिया सहरते लोहतकल. ओरु पोलु, बार्नबसिना संगे दायनुर,” इतोर. पया यहुदा बार्सबा इनवान आचतोर, ओसो सीलास इनवान वने आचतोर. वेर इर्वुर आसि विस्वसिरगा पेदा मन्कलोर मतोर.
23 वेरा कयदे विस्वसिरिह्क सीटि लोहतोर, अद सीटटगा इद्रम रासिस मता.
“अंताकिया सहरतगा, सुरिया पटटगा, किलिकिया पटटगा मनवालोर यहुदि आयवोर विस्वसिरिह्क, माट मीवा ऐंगेटोर विस्वसिरोम, इतेके येसुसामिना बळयिरोम ओसो विस्वसिराङ पेदल्कनोम, सीटि रासलाह आतोम, मयेनाह मीक जोहर.
24 मयग्डोर उय्तुर विस्वसिर मियगा वासि बाताङ-बाताङो वेहचि, मीक लेसिह कीतप कीतोर, मीक पका तिपल ईतोर, इनजोर माट केंतोम, मति माट इतेके ओरिन लोहोम आसि.
25 अदिह्क माट सबेटोरोम कलियिसि इर्वुर मन्कलोरिन आचिसि, मियगा कबुर लोहतकल इनजोर विचर कीतोम. ओर आचतोरु, यहुदाल ओसो सीलास, मावा गोततोर बार्नबसना, पोलुना संगे मियगा वास्तोर.
26 वेर बार्नबस, पोलु, इतेके तमा जीवातुन सीता केवा, मावा किर्स्तु येसुसामिना सेवा कीतोर.
27 माट रासतदिन वेर यहुदाल ओसो सीलास वने मीकु वेहतनुर.
28 अव पोल्लोन मीट केंजिसि ताकाटु, अविस्किन विळ्सिस दुस्रा मोतातुन मीवा पोग़ोन वाटोम, इनजोर देवुळता पवित्र जीवा ओसो माटु कलियिस विचर कीतोम. अव पोल्लोङ इद्रम मन्ह्ताङ.
29 “पेन्ह्किह्क वाटटव अविङ तिनमाटु, अस्कतापया नेतुरतुन एच तिनमाटु, नेतुर पोववालेवा हव्कतविनाङ अविङ तिनमाटु, साट्याल कबस्क केमाटु. मीट इव पोल्लोन बेस पोस ताकतेक, अचोन बेस-नेह्ना मनदकिर. अचोने मारता,” इनजोर रासतोर.
30 अद्रमे पया यहुदाल, सीलास, पोलु, बार्नबस, वेर अंताकिया सहरते अतोर, अनजि सबे विस्वसिरिन जमा कीसि, सीटटुन ओरा कयदे ईतोर.
31 ईतस्के तान विस्वसिर अर्विसि, “इद सीटटा पोल्लोतुन केंजिस कोनि मावा जीवा सितुर आता,” इनजोर पका गिर्दा आतोर.
32 यहुदाल, सीलासि देवुळता कबुरतोर मनजि, ओर वने विस्वसिरिन वेल्लाङे पोल्लोङ वेहतोर. वेहचि ओरा जीवातुह्क दीरा ईसि ओरा विस्वसतुन बेर्सिह कीतोर.
33-34 अद्रमे पया ओर इर्वुर अगान उचुक दियाङ मतोर. पया अग्डोर विस्वसिर ओरिन बेस अन्ह्टु इनजि येरुसलेमतके मल्स दायलाह लोहतोर, अस्के ओर इर्वुर मल्स अतोर.
35 मति पोलु, बार्नबस, वेर उचुक दियाङ अंताकिया सहरते मतोर. मनजि दुस्रोर वेल्लाटोरा संगे येसुसामिना पोल्लोतुन काग़्हचोरे ओसो पोकुर कीसोर मतोर.
पोलु, बार्नबस, वेर इर्वुर एग़िह्तोर
36 अद्रमे पया उंद दिया पोलु बार्नबसिन इतोग़, “माट येसुसामिना पोल्लोतुन बेव-बेव सहर्कना लोकुरिह्क वेहतल, अव सबे सहर्कनगा अनजि, ओर सबेटोर विस्वसते बेद्रम मंतोर, ऊळकल अय?” इनजोर इतोग़.
37 इतस्के बार्नबस केंतोग़, केंजिसि “इंगो मति, योहन-मार्कन मावा संगे ओयकल,” इनजोर इतोग़.
38 मति पोलु, बार्नबस, वेर येसुना सेवातुन मारिह कीयनाह्जोम मार्कल ओरा संगे अनवालेवा, पंपूलिया पटटाहि ओरिन विळ्सिस वास मतोग़. अदिह्क “आयो, ओन ओयवल” इनजोर पोलु इतोग़.
39 अदिनेनाह्क पोलु, बार्नबस, पका जग्ळम आतप लेह्का पोल्लोने गिटोगटो आसि एग़तोर. पया बार्नबस मार्कन पोसि, ओडाते उदिसि तना देसेम इतेके कुपरुस देसेमते ओतोग़.
40 ओसो पोलु बार तना संगे दायलाह सीलासिन आचतोग़. पया अंताकियातोर विस्वसिर “देवुळि मीवा तोळ मनि,” इनजोर ओरिन देवुळता कयदे विळ्सिस ईतोर, अस्के ओर इर्वुर पेसतोर.
41 पया पोलु, सीलासिना संगे पूरा सुरिया पटटे, किलिकिया पटटे तिरियतोग़. बेद-बेद नाग़ अंदुर, अग्डोर विस्वसिरा मुडा विस्वसतुन मेग़्किह कीसोर अंदुर.