5
विस्वसिर साट्याल कबळ कीयनद आयो
1 इंजेके ओसो उंद पोल्लो तेहतह्नन: मियगा बोग़ो मति मन्कल साट्या कबळ कीस्तोग़ इनजोर निटम केंज वायलाह आता. ओग़ तना तपे ततद आंचान तासतोग़ अले! देवुळतुन पुनवोरिह्क वने इद्रमता कबळ मुर्तिय ओप्पो.
2 ओग़ मन्कल अद्रमता कबळ कीतोग़ इनजोर मीट मुडोर मन्कलोरिर दुकम आसि ओन मुडग्डाहि पेसिह कीयना मता. मति मीट कोनि पोंगसोर तिरियलाह आतिर!
3 नना मियगा मेंदुल अग़्के इलोन निटमे! मति सीताते मीवाय संगे मह्नन. सीताते मीवाय संगे मनजि, अद्रमता कबळ कीतोन मावा येसुसामिना अदिकरते मुनेन नेयम कीतन.
4 इतेके मावा येसुसामिना पेदिरते मीट जमा आयह्पा, नना वने सीताते मीवा संगे मह्नन. ओसो मावा येसुसामिना लाव मावा संगे मन्ह्ता.
5 अस्के येसुसामि ओसो वने पोग़ोटाहि वायनद दियाते, ओग़ मन्कना जीवा पिसना इनजि, ओना पापम बुदि बूळेम आयि. अदिह्क देयह्कना मुक्याना कयदे विळ्सतपु, ओनु मीवा मुडाहि पेहचीम्ह्टु.
6 मीट इतेके बेसतोर विस्वसिरोम इनजोर पोंगलाह आतिर, इद ओप्पो. ओयपिह कीतद इचुने पिंडटुन, कोपामेंड पिंडटगा काल्ह्पतेके पूरा कोपामेंड पिंडटुन अद ओयपिह कीस्ता इनजोर पुतिर. अद्रमे मीवा मुडगा वग़ोग़ मन्कल पापम कीसोर मतेके मुडोर सबेटोरिन पापमतगा ओस अर्हतह्तोग़.
7 निटम मीट ओयवद पिंडटा लेह्कान मह्निर. ओयपिह केवद पिंडटाङ आरिना पोल्वातस्के मोक आयनद गोरेपियोता लेह्कान, किर्स्तु मयेनाह्क मोक आतोग़. अदिनेनाह्क ओयता पिंडटा लेह्का मनवाल ओप्पवोग़ मन्कन पेसिह कीसीम्ह्टु. अस्के मीट ओयवद पिंडटा लेह्कान बेस मनदकिर.
8 ओयता पिंडटुन आवना पोल्वातस्के पोहतना लेह्कान, विस्वस केवस्के मयगा मतद लाग्वा बुदतुन, कोंटे बुदतुन पोहिङ. आवना पोल्वातुन ओयवव आरिन तिनजि माळतप लेह्का, नाळेह केवद बुदि ओसो सेतेम बुदि तासिस ताकिङ.
9 साट्याल मन्कलोरा संगे कलियमाट इनजोर नना मुनेन सीटटे रासिस मतन.
10 इतेके साट्याल कबळ केवालोर, लालुस मन्कलोर, नाळेह कीस तिनवालोर, बोमान मोळ्कवालोरा संगे कलियनद आयो इनजि, इद दुनियातोर पापम केवालोरा लोप्पा रासोन. अह मतेके मीक इद बूमतुन विळ्सिसि बेकेयो दुस्रा बूमतेके दाया पोस मनालि.
11 आयो, सीटटे नना विस्वसिरा मुडोराये लोप्पा रासतन. बोग़ाय तन्क विस्वसिनन इनजि, साट्याल कबळ कीतेक, लालुस कीतेक, बोमान मोळ्कतेके, कदर रेहतनव पोल्लोङ वळ्ह्कवाल मतेके, कल लोटि मतेके, नाळेह कीस तिनवाल मतेके, ओना संगे कलियमाट. ओसो ओना संगे तिनदना-उनडना वने केमाट इनजोर वेहतन.
12-13 विस्वस केवोरिन माट नेयम केवालोरल आयवल, ओरिन देवुळि नेयम कीयग़ा. मति विस्वसिरा मुडोरिन नेयम कीयनद कबळ मीवा आंदु. अदिनेनाह्क देवुळता सास्त्रमतगा रासतप लेह्का: “मीवा मुडग्डाहि करब कबळ कीतोन पेसिह कीसीम्ह्टु.”