10
1 मोसानाङ अडोना इसबते, मन्कलोर वर्सा-वर्सातुह्क जन्वर मोक ईस्तोर. मोक ईयनद बेस्केन रोमो, अमेसा ईसोरेन मन्ह्तोर; इतेके अव अडोनाङ पोल्लोङ पयाडाङ बेसताङ पोल्लोना दळ्मलेह्का मन्ह्ताङ. अव निटम पोल्लोङ आयोङ. अदिनेनाह्क देवुळतगा अनवालोर मन्कलोरिन ओरा पापमताहि पूरा एडिह कीया पग़वोङ.
2 पूरा एडिह कीस मतेके, ओर उंदिय मल्काते सिरसिर आवेर. इंका वने पापम मन्ह्ता इनजोर तमा जीवा इनो आवालि. अदिनेनाह्क अचोट्के, पया मोक ईयनद गर्ज मनो आवालि.
3-4 मति कोंदाना, एर्रेना नेतुरि पापमतुन मुर्तिय मायिह कीया पग़वो. मायिह कीयना वाटो, इव मोकिङ वर्सातुह्क इंका वने पापम मन्ह्ता इनजि सीता कीसीसोरेन मन्ह्ताङ.
5 अदिनेनाह्क किर्स्तु बूमते वातोग़, अस्के देवुळतुन इद्रम इतोग़:
“मन्कलोर मोक ईयनदिन, कोड वाटनदिन निमा विचर केविन;
मति नयेनाह्क उंद मेंदुल तयर कीतिन.
6 बोळ्सतद जन्वरता मोकि नीक गिर्दा वावो,
पापम मायि इनजोर ईयनद मोकते निमा गिर्दा आयविन,
7 अस्के नना इतन,
‘ए देवुळि! सास्त्रमतगा नावा लोप्पा रासतप लेह्कान,
नीक विचर वायनदिन कीयलाह वातन,’ ”
इनजोर इतोग़.
8 इंजेके इद पोल्लोतुन पुनदकल: मोसानाङ अडोना इसबते पापमता मापि आयलाह रीतरीतिनाङ मोकिङ ईयना, कोडिङ वाटना गावले. तेला मति इविस्कनगा देवुळि गिर्दा आयो इनजि किर्स्तु इन्ह्तोग़.
9-10 ओसो इन्ह्तोग़: “नीक विचर वायनदिन कीयलाह वातन,” इन्ह्तोग़. देवुळता विचर मतपु येसु किर्स्तु उंदिय मल्का तना मेंदुलतुन मोक आयलाह ईतोग़. इद मोकता मेटे देवुळि माक पवित्र कीता. इद्रमलेह्का किर्स्तु मुनेता करलतुन तेंडिसि पूना करलतुन निल्पिह कीस्तोग़.
11 मुनेता करलता इसबते बूमयालोर जर्मिने गर्याता मुनेह निचि सेवा कीस्तोर, ओसो अमेसा अवे मोकिङ ईसोरेन मन्ह्तोर; ओरा सेवा बेस्केन मारो. मति अद्रमताङ मोकिङ ईयनद पापमतुन मायिह कीया पग़वो.
12 मति किर्स्तु पापमतुन मायिह कीयलाहि उंदिय मल्का अमेसातुह्क तना मेंदुलतुन मोकि इनजि ईतोग़. ओसो राजेम ताकिह कीयलाहि देवुळता तिनळ बाजे पका कदरता जागाते उदतोग़.
13 ओसो अस्केडाहि तना कोटुलतोरिन देवुळि ओना काल इळ्न तच ईयनाह्जोम केपतोग़.
14 बाराह्क इतेके किर्स्तु उंदिय मल्का तना मेंदुलतुन मोक ईसि तना सेवातुन मारिह कीतोग़. अह कीसि, देवुळि तनेनाह्क अलग कीतोर मन्कलोरा पापमतुन ओग़ अमेसातुह्क पूरा मायिह कीतोग़.
15-17 देवुळता जीवा वने इद निटम इनजोर सास्त्रमते इद्रम साक्सि ईस्ता:
“पेग़्के ओरा संगे इद्रमता करल कीकन:
ओरा जीवातगा नावाङ अडोनु नना रासकन;
नना अव अडोनु ओरा सीतातगा तासकन,”
इनजोर सामि देवुळि इन्ह्ता,
इद्रम सास्त्रमते रासतद मन्ह्ता.
पया “ओरा पापमतुन, ओर अडोन देहतदिन,
नना बेस्केन सीतात तासोन आयकन,”
इनजोर वने इता.
18 देवुळि इद्रमलेह्का मावा पापमतुन मापि कीतेके, पापमतुन मायिह कीयलाहि बाराह्क मोक ईयनाह आयग़ा? मोक ईयलाह मुर्तिय गर्ज इले.
रेयवालेवा देवुळतगा दाकल
19-20 अदिनेनाह्क मावोर विस्वसिरिर! येसु किर्स्तु नेतुर पोहच डोलिस मताह्कु, माट देवुळतके दायलाह मयेनाह्कु पूना, जीवा ईयनद अग़ तयर कीसीतोग़. पोग़ोटा सबेट्क पवित्र जागातगा पळ्दा गेंदेतुह्क अतप लेह्का, ओग़ तना मेंदुदा मोक ईसि ओळियतोग़. ओना मेटे माट वने अद पवित्र जागातगा ओळियलाह दीरा पोयतल.
21 किर्स्तुये मावा बेरोग़ पेर्माल; ओग़ देवुळता लोकुरिन ताकिह केवाल आंदोग़.
22 मावा जीवा माक कसुर तोहवा, मावा जीवातगा किर्स्तुना नेतुर इल्ह्कतप लेह्का आता. माट पवित्र एते बिळबिळ एग़ मीतप लेह्का आतल. इव सबे पोल्लोन पुनजि मावा विस्वस मेग़्किस मनजि माट पूरा जीवाताहि देवुळता एरे अनिङ.
23 माक पोल्लो विळ्सतद देवुळि माक नाळेह केवो. अदिनेनाह्क माट कबुल कीतद आसातुन रेंड विचर्क केवा, मेग़्किस पोयिङ.
24 ओर्विह्क-ओर्वोग़ जीवा कीयलाहि, बेसताङ कबस्क कीसीयलाहि, ओर्विह्क-ओर्वोग़ बेद्रम दीरा ईकल इनजोर विचर कीस ऊळिङ, ओसो अद्रमलेह्काने कीयिङ.
25 उच्वुर उंद जागाते जमा आयनदिन विळ्सतोर, ओरा लेह्कान माट जमा आयनदिन विळ्सवल. विस्वसते मेग़्किस मनदलाहि ओर्विना-ओर्वोग़ तोळ आयकल. सामि वायनद दिया एवयलाह आता, इदिन मीट पुतिर. अदिनेनाह्क माट ओसोय जिदते इद्रम कीसोर मनदकल.
किर्स्तुन पास्कनद आयो
26 नना इव पोल्लोन बाराह्क रासतन इतेके, माट बेद सेतेम मन्ह्ता इनजोर पुतल. इद्रम पुन्ज-वेन्ज पापम कीसोर मतेके, अद्रमता पापमतुन मायिह कीयलाहि, इंजेके बेदे मोकि इले.
27 मति ताना बद्लाते रेयतुह्क साङसोर देवुळता नेयमतुन केपनदु; ओसो देवुळतुन विरुद केवालोरिन बूळे कीयलाह, पका मळ्गसोर मनदनद किसतुन केपनद मन्ह्ता.
28 मोसानाङ अडोनु पास्कवाल मन्कन, इर्वुर, मुवुर साक्सि ईतेक अचोन, दया केवा हव्कना इनजोर अडोनगा रासिस मन्ह्ता, इदिन मीट पुतिर.
29 मोसानाङ अडोनु पास्कतेक अद्रम आस्ता इतेके, देवुळता मग़िनु तना कादे विह्कतप लेह्का केवाल, पूना करलते माक पवित्र कीयनद किर्स्तुना नेतुरतुन कळ्वोग़ इनवाल, तन्क दया तोहतनद देवुळता जीवातुन उस्कना-पास्कना केवाल, इद्रमतोग़ मन्कह्क बेचोन सिक्सा दोर्कग़ा? विचर कीस ऊळाट अले!
30 सामि देवुळि इता, “बद्ला एतनद कबळ नावा, ननाने बद्ला एतकन.” ओसो “सामि तना मन्कलोरा नेयम कीयग़ा,” इनजोर इता. इदिन माट पुतल.
31 जीवात मनदनद देवुळता कयदे सिक्सा दोर्कना इतेके पकाय रेय वसनद पोल्लो मन्ह्ता.
32-33 अळ्न्दम मीट बेसतल कबुरतुन विस्वस कीस, देवुळता वेह्चतगा वातस्के मीक बेद्रम कींदुर इनजोर सीता कीस ऊळाट! बेस्के-बेस्के नाटेनोर मन्कलोरा मुनेह विरुदतोर मीक लजा अर्हन्दुर, मीक तिपल कींदुर; बेस्के-बेस्के दुस्रोर विस्वसिरिह्क इद्रम आयह्पा मीट ओरिह्क साय्ता कीतिर. इद्रम विस्वसतेनाह्क वेल्लाय तिपलते पप्ळेम आसोर मतिर. अस्के वने मेग़्किस मतिर.
34 विस्वसतेनाह्क जेलते मतोरा दुकमते मीट वने कलियतिर. मीक पोग़ोन देवुळतगा बेचोन बेसतल, बेस्केन बूळेम आयवद मालसोम दोर्किह्ता इनजोर पुन्ज मतिर. अदिनेनाह्क मन्कलोर मीक विरुद कीसि मीवा सामनतुन ऊंदिस ओयनस्के, मीवा गिर्दातुन ऊंद पग़वोर.
35 मीट देवुळतगा बर्वस तासताह्कु अद मीक बेरा इनम ईयग़ा. अदिनेनाह्क इंजेके बाताले आयि, मीवा बर्वसतुन विळ्समाटु.
36 मीट आरेम आयवा मनदना. अस्के देवुळि विचर कीतदिन मीट कीसि तान मारिह कीकिर, अह कीस देवुळि मीक पोल्लो विळ्सिस मतदिन दोर्किह कीकिर.
37 देवुळता सास्त्रमतगा किर्स्तुना पोल्लो इद्रम रासिस मन्ह्ता:
गळ्क मनजि वावाल मन्कल निटम एवयनोग़, ओग़ आल्सेम केवोग़,
38 अचानाह नावा सेतेमतोर मन्कलोर नाक बर्वस तासताह्के पिसनुर.
मति बोग़ाय पेग़्के गुचतेक अचोन, ओग़ नाक विचर वावोग़,
इनजोर रासतद मन्ह्ता.
39 माट मात्रम पेग़्के गुचिस मनजि, बूळेम आयवालोरल आयवल; मति विस्वस कीसि पिसवालोर मन्कलोरल आंदल.