4
Dene ngü te ena areke gbü jia Me
1-2 Wü di enga wüna, nih ꞌburu nde wü kpara ka Miri Yesu. Te di bala, a ngbü emala fü yi kpekpeke, ga, “Yi di emere fï bü züka ngü, te reke areke gbü jia Me.” Angü yi je ngü la eyi gömö a, ta te a ngbü esüka yi kpala ne. Te di bala, ah le de yi nü de ngü la fï bü kpa engagira nü.
3 Wü di enga wüna, Me ngbü ele de yi di engbü ba züka wü kpara ka-ni, *nzïla. Te di bala, yi mere e angbü emere waza de.
4 Ah le de mü di engbü bü nzö de wara mü biringbö, de züka fïngangü. De mü di emere ngü fefe ereke areke, angü Me to engu fü mü me-ye.
5 Wü kpara te ewü le ngü ka Me de ne, wüh ngbü emere ngü ba e te ewü le. Wüh fï nga wara wü baka kpara de, wüh le ewü nzö würüse tete. Gara ewü ngbü eza würüse nzö teka abï mere bi wü jaji. Amba nda-yi, yi mere e amere ngü baka nda-ewü la de, angü yi de wü kpara ka Me.
6 A mala ta ngü la eyi fü yi kpekpeke, gü ba, “Te mü ngbü de würüse te di de wara mü de, mü baka mürü zi te ngbü ezi e ka wü bu ye.” Dela ngü te Me le ꞌduwa kpo fï de, furu afuru. Te mü ngbü emere ngü de bala, Me ena ato mere siti kuru fü mü fanü fanü.
7 Angü ngü ka waza siti gbü jia Me ꞌduwa ba-neh-ene-la. Me ngbü ele de wü kpara ka-ni di engbü nzïla, adi emere bü duu züka ngü gbü jia ni.
8 Dela si-ngü de te engu to *Nzïla Wazi ye tete fü yi, teka de yi di engbü nzïla. Te ah bala, ah le de yi je rïrï ka-a ne reke areke. Teka ne de, angü ah de rïrï ka Me, ah baka gele ka kötï nda de. Te di bala, te mü le ngü la de, Me ena ato kuru fü mü ato.
9-10 Dene eꞌbaꞌbasu ngü te a le amala fü yi, ah de ngü ka le-te. A wu kpo, ga, yi ngbü ele te-yi de wü bu yi, wü *kpara ka Yesu, ale fanü fanü. Angü yi kpo de ngü la eyi gügü, angü Me gü tamu ngü la eyi fü yi. Fü yi angbü ele te-yi de wü kpara ka Yesu ꞌburu gbü sü ka-yi, agbü Makedoniya de kpala ne, ale. Wü di enga wüna, a ngbü emala fü yi kpekpeke, ga, “Yi nü de wü ngü la fï bü kpa engagira nü.”
11-12 Ah le kpah de yi di eo maguma yi teka angbü ziii. Yi mere e adi ekpülü wü bu yi de. Yi di emere tima de kpa yi, teka fü yi adi emaka e-mazü, te ena atï teka yi, kpah baka e te a mala fü yi tane. Te yi ngbü emere wü ngü la bala, wü kpara te ewü le ngü ka Yesu de ne, wüh ena awu, ga, yi de kpeke wü kpara.
Dene ngü teka dudu ka Miri Yesu, füh kotö ne
13 Wü di enga wüna, ma le amala ngü fü yi teka ngü ka wü kpara ka Me, te ewü kpi eyi ne. Te gara, Me ena azükü ewü azükü gbü kpi la. Wü kpara te ewü le ngü ka Me de ne, wüh tï awu ngü la bala nda-wü de. Fü ewü adi engbü de mere siti cïnga, da eku mere gba, teka ngü la. Yi mere e adi engbü de mere cïnga, baka nda-ewü la, de.
14 Angü nih wu eyi, gü ba, Yesu kpi ta akpi, fü ah adu azükü. Kpah bala, Me ena azükü wü kpara ka-ye, te ewü to maguma wü fü Yesu, te ewü kpi eyi akpi ne, aza ewü kpaka ye agbü kpï kpala, gbü sïkpï te Yesu ena adu akoro tete.
15 Ngü de te ma emala fü yi ne, ah de kpeke ngü. Ah de ngü te Miri Yesu mala me-ye. Angü engu mala ngü la, gü ba dene, “Gbü sïkpï te ni ena adu akoro tete, wü kpara ka-ni te ewü kpi eyi akpi ne, ni tï ace ewü de.” Angü wüh ena ayia fi me-wü.
16 Angü gbü sïkpï la, Miri Yesu ena ayia agbü kpï kpala, adu akoro. Fü wü kpara aje ri mere *malayïka, de kono ka Me mini, teka abiti wü kpara ka Yesu Kurisito ꞌburu. Fü Miri Yesu ayia aï wü kpara ka-ye de mere ri ye. Fü wü kpara kaka te ewü kpi akpi ne, fü ewü ayia azükü fi me-wü, de to küte wü mini.
17 Fütanga ngü la, Me ena aza nih de ezükü ne, fü nih ayia ꞌburu de ewü, teka fü nih anü amaka te-nih de wü Miri Yesu kpa tikpi kpala. Fü nih angbü de wü Miri Yesu, fï mere badi.
18 Te di bala, wü di enga wüna, te cïnga te emere yi teka wü bu yi, te ewü kpi akpi ne la, yi di efï nga wü ngü de te ma mala fü yi ne, adi emala esüka yi, teka fü maguma yi adi egu gbü ngü la.