16
Dene ngü ka wü Farusi de wü Saduke, te ewü le afiti Yesu
Marako 8:11-13
1 Fütanga ngü la, fü gara wü *Farusi ayia de gara wü *Saduke, akoro kpaka Yesu. Amba wüh koro ka-wü nda-wü de mani, egïrï nga siti ngü, te Yesu ena adürü gbügbü. Fü ewü ayi-tata, gü ba, “Mere kpara deyï, ye mere la mere lara ngü ka talara fü ani, teka fü ani awu, gü ba, Me tima ye me-ye fanü fanü.”
2 Yesu, fü mü ayia alügü ngü fü wü kpara la, gü ba, “Yi ceka la, te gbüra kpï ngbü ngïla ngïla etamurago la, yi tï eyi awu, gü ba, ‘Agö tï alï egambi de.’ Ah bala de?
3 Anga kpurutokokpï, te jia kpï esiti la, yi tï kpah eyi awu, gü ba, ‘Enatikine, agö ena alï alï.’ Te yi tï eyi awu si-ngü teka wü ngü, te ewü ngbü egü tamu wü ngü, de wü lakï füh kotö ne, ꞌburu areke areke la, ah le ta de yi wu kpah awu, gü ba, Me tima ra me-ye. Yi wu bala de, neh teka ne? Yi de wü mürü kögö-nzö!
4 Yi ka-yi de siti wü kpara! Yi le ngü ka Me nda-yi de! Yi ngbü eyi-ta ra, de ma mere kpeke ngü ka talara gbü jia ani, teka fü ani awu, gü ba, Me tima ra me-ye fanü. Te di bala, Me tï agü tamu lara ngü biringbö fü yi nda de, teka kögö-nzö ka-yi la! Amba ah ena adi bü mene lara ngü, te ena amere te-ye, kpah baka nda *Yona tane. Angü Me ena aküwa ra gbü kpi, kpah ba e ta te engu küwa Yona guvu mere si ne.”
Fü Yesu ayia ace ewü sela, anü sü ka-ye kpa te gara sü.
Dene ngü te Yesu mala teka siti fïngangü ka wü Farusi,
de wü Saduke
Marako 8:13-21
5 Fütanga ngü la, fü wü Yesu alï ka-wü gbü *zabu, akö ngu de wü kpara ka-ye la, kpa etangu. Amba to wü kpara kaka-na la ïrï ta aïrï, teka aza ambata fü wü.
6 Fü Yesu akpo angbü emala ngü fü ewü de mani, gü ba, “Wü ceka te-wü mbi, teka ngü ka ambata ka wü *Farusi bete nda wü *Saduke, te wüh ngbü emere de *kö gbü ye ne.”
7 Amba ngü te Yesu mala la, wü kpara kaka je sisi na nda-wü de. Angü fïngangü ka-ewü lala ka-ye fï bü teka ngü ka zü-e. Fü ewü akpo da emala ngü esüka wü, gü ba, “Yesu ngbü emala ngü ka kö gbü ambata ne, angü ah wu eyi, gü ba, ambata esaka ani ma?”
8 Amba Yesu wu ngü de te ewü ngbü emala esüka wü ne kpo. Teka ngü la, fü ah afü te-ye, amala ngü fü ewü, gü ba, “De-yi, yi to maguma yi fere de, neh teka ne? Yi fï nda-yi, gü ba, ma ngbü emala ngü ne, teka te ani za ambata de? Fïngangü ka-yi la fï bü teka ngü ka zü-e?
9 Wü ngü te ma ngbü mere, te yi wu cu de jia yi ne, ngü la rï gbü nzö yi la fï de? Yi fï la nga ambata ꞌburuve terane, te ma za, kukuru to fü bi wü kpara kutu ꞌburuve (5,000) ne. Yi du ro dudu na, biti gbü wü kuwu neh fe?
10 Anga gara na, te ma za ambata lorozi, ato fü bi wü kpara kutu bala (4,000) ne. Yi du ro biti gbü wü kuwu neh fe?
11 Yi fï nga ngü la nda-yi de, neh teka ne? Ah le de yi wu awu, gü ba, ma tï kpah eyi ato gara zü-e fü yi. Amba ngü ka kö gbü ambata, te ma mala nganga fü yi ne, yi wu sisi na de, neh teka ne? Yi fï nda-yi, gü ba, ‘Ma ngbü emala nga ambata fanü?’ Ah bala nda de. Amba ma ngbü emala fü yi, gü ba, ‘Yi ceka te-yi mbi, teka siti fïngangü ka wü Farusi, de wü Saduke.’ ”
12 Te di bala, fü wü *kpara ka Yesu, adu aje tïne si-ngü la, gü ba, ngü te Yesu ngbü emala fü ani ne, ah mala ngü la teka mene kö, te wüh ngbü eküꞌda ambata di ne, nda de. Amba ah ngbü emala ngü la ka-ye, teka siti fïngangü ka wü Farusi, de wü Saduke ne.
Dene kpeke ngü te Petero mala teka Yesu
Marako 8:27-30; Luka 9:18-21
13 Fütanga wü ngü la, fü wü Yesu ayia anü de wü kpara ka-ye, agbü gara sü, te di ede mere kötï de ïrï ye Kayïsarïya Fïlïpoyi. Te wüh koro kpala, fü Yesu ayi-ta wü kpara ka-ye, gü ba, “Angü wü kpara ngbü efï tüngü ni, *Ye Kpara ka Kpï, egü neh fe? Wüh ngbü emala, gü ba, ni de neh da?”
14 Fü ewü alügü ngü fefe, gü ba, “Wü kpara ngbü efï, gü ba, ye de kpeke kpara. Angü wü gara kpara ngbü emala nda-wü, gü ba, ye de *Yüwane Mürü Babatïza, te zükü me-ye gbü kpi. Wü gara gü ba, ye de mürü dofo *Ïlïya. Wü gara emala nda-wü, gü ba, ye de mürü dofo Yeremaya, anga gara kpara esüka wü *mürü dofo ka Me ta gügü ne.”
15 Fü Yesu adu ayi-ta ewü, gü ba, “Anga cu de-wü, wü ngbü efï nda-wü, gü ba, ni de neh da?”
16 Sïmüna Petero, fü mü ayia arü amala ngü fefe, gü ba, “Mü de Mere Miri, te Me tima teka aküwa a ne! Mü de Ye Mere Me!”
17 Fü Yesu adu afü te-ye, amala ngü fefe, gü ba, “Wayi, Sïmüna ye *Yona, Me to wazi eyi fü mü, fanü fanü. Angü ngü de te mü mala teka ra ne, mü wu ngü la de tete-mü nda-mü de. Ah ka-ye de Wüba, Me, te di agbü kpï ne, ah sere ngü la fü mü me-ye.
18 Te di bala, dene ngü te ma le amala fü mü. Enatikine, ïrï mü ena adi tïne de Petero. Angü fanü fanü, mü tïtïne de kpeke kpara baka da. Te di bala, ma ena ajï mere kambü ka-ra füh da engu la. Kambü ka-ra la, ah de wü kpara ka-ra, te ewü ena ato maguma wü fere kpah baka mü. Angü ngü ka-ra ena ato wazi fü ewü, fü ewü arü kpekpeke. Te di bala, wazi ka kpi tï afa ewü de, angü ma ena aküwa ewü me-ra.
19 Te di bala, ma ena ato wazi fü mü, teka fü mü adi emala ngari ra di, fü wü kpara füh kotö ne ꞌburu. Ah ena adi ba e te ma to mafüta fü mü, te ena aü möngïtï ka *küküwa fü wü kpara. Angü mene ngü te mü ena akolo kpa füh kotö kpakine, Me ena ale ngü la kpah bala.” Dela ngü te Yesu mala fü Petero.
20 Fütanga ngü la, fü Yesu adu afü te-ye, amala ngü fü wü kpara ka-ye ꞌburu kpekpeke, gü ba, “Wü mere e amala la nga ni fü wü kpara, gü ba, ‘Ni de Miri te Me tima ne,’ nda-wü de.”
Dene ngü te Yesu mala teka ngü ka kpi ka-ye
Marako 8:31–9:1; Luka 9:22-27
21 Ah kpo bü gbü wü sïkpï engu la, fü Yesu akpo tïne emala nga ye fü wü kpara ka-ye mbölö mbölö, gü ba, “Ah le fü ani anü agbü Yerüsalema, angü mere cïnga ladü te ena amaka ni kpala. Wü *mere kovo de wü *mürü rïrï ena ato mere kuru te ni, fü ewü amörö ni asidi. Amba gbü *ebabata sïkpï, Me ena azükü ni gbü kpi la.”
22 Petero, te mü je ngü la, fü mü aza Yesu, anü di mba edere sü, akpo emala ngü fefe kpekpeke, gü ba, “Ata, mere kpara! Ah tï fü ngü la, amere mü baka e la kpo de!”
23 Te Yesu je ngü la bala, fü ah afü te-ye, amala ngü fü Petero, gü ba, “Mü ce ra de ngü ka-mü, ka *Satana la. Mü le de ma mere rïrï ka Me de, neh teka ne? Fïngangü ka-mü la, ah de ngü ka Me nda de. Dela ka-ye siti fïngangü ka wü kpara de füh kotö ne.”
24 Sidi nga ngü la, fü Yesu afü te-ye, amala ngü fü wü kpara ka-ye la ꞌburu, gü ba, “Te mü ele angbü zu kpara ka-ra la, mü lala fï bü gbü nga ra. Mü mere e afï nga wü e ka-mü ꞌburu ꞌdö de. Mü reke te-mü teka kpi ka-mü, baka kpara te ngbü ebï mere rü gbegbete, te wüh ena abere engu tete na, amörö.
25 Angü te mü le aküwa te-mü de tete-mü la, mü tï aküwa te-mü nda-mü de. Amba te mü ce te-mü o fü kpi teka ngü ka-ra la, Me ena aküwa mü me-ye.
26 Mü fï la nga kuru mü! Angü, te mü ce ngü ka Me, fü mü adu ato te-mü ꞌburu teka ngü ka kotö ne, teka adi emaka mere bi jiase, de mere bi wü züka e de füh kotö ne ꞌburu la, wü e la ena aküwa mü fanü? Wüh tï aküwa mü nda-wü de, angü mü ce ngü ka Me eyi! Te di bala, gara e te mü ena ato fü Me, teka afa kuru mü di, ah de neh ene? E nda ma!
27 Mü fï nga *adu sïkpï, te gara, te ma ena adu akoro tete na! Angü de-ra, *Ye Kpara ka Kpï, ma ena adu akoro füh kotö ne, de wazi ka Wüba, de wü *malayïka kaka mini. Fü ra akolo ngü ka wü kpara ꞌburu, ato takpa fü ewü, te nga wü ngü te wüh ngbü mere.
28 Ma ngbü emala fü yi dene zu ngü fanü fanü. Wü gara kpara ladü esüka yi sene, wüh tï akpi la de, zalü te wüh ena awu mere wazi te Me to fere, Ye Kpara ka Kpï, te ma ena aküwa wü kpara di ne feke.”
Dela ngü ta te Yesu mala fü wü kpara, te ewü le afa nga ye.