6
1 UThixo wasesithi kuMosi, “Uzabona esengizakwenza kuFaro khathesi. Ngenxa yamandla esandla sami uzabavumela bahambe, ngenxa yamandla esandla sami uzabaxotsha elizweni lakhe.”
2 UNkulunkulu waphinda wathi kuMosi, “NginguThixo.
3 Ngazibonakalisa ku-Abhrahama, ku-Isaka lakuJakhobe njengoNkulunkulu uSomandla, kodwa ngegama lami elithi Thixo kangizange ngizibonakalise kubo.
4 Ngaphinda ngenza isivumelwano labo ukuze ngibanike ilizwe leKhenani lapho ababehlala khona njengabezizweni.
5 Phezu kwalokho, sengikuzwile ukububula kwabantu bako-Israyeli besebugqilini ngaphansi kwamaGibhithe, njalo sengikhumbule isivumelwano sami.
6 Ngakho tshela abako-Israyeli ukuthi nginguThixo, njalo ngizalikhulula embusweni wamaGibhithe onzima, ngizalikhulula ukuze lingabi yizigqili zabo, njalo ngizalikhulula ngesandla eseluliweyo langezimangaliso.
7 Ngizalemukela njengabantu bami njalo ngizakuba nguNkulunkulu wenu. Ngalokho lizakwazi ukuthi nginguThixo uNkulunkulu wenu owalikhupha embusweni olukhuni wamaGibhithe. Ngizalikhulula ukuze lingabi yizigqili zabo.
8 Njalo ngizaliletha elizweni engafunga ngesandla sami esiphakemeyo ukulinika u-Abhrahama, u-Isaka loJakhobe. Ngizalinika lona ukuze libe ngelenu. Mina nginguThixo.”
9 UMosi wabika lokhu kwabako-Israyeli, kodwa kabazange bamlalele ngenxa yokudangala kwabo ebugqilini obulochuku.
10 UThixo wasesithi kuMosi,
11 “Hamba uyetshela uFaro inkosi yaseGibhithe ukuthi avumele abako-Israyeli baphume elizweni lakhe.”
12 Kodwa uMosi wathi kuThixo, “Nxa abako-Israyeli bengangilaleli, kuyini okungenza ukuthi uFaro angilalele, njengoba ngikhuluma ngigagasa?”
Umbhalo Wendlu Yakwabo KaMosi Lo-Aroni
13 UThixo wakhuluma loMosi lo-Aroni mayelana labako-Israyeli loFaro inkosi yaseGibhithe wabalaya ukuthi bavumele abantu bako-Israyeli ukuthi baphume eGibhithe.
14 Laba babezinhloko zezindlu zaboyise:
Amadodana kaRubheni, izibulo lika-Israyeli ayeyila:
uHanokhi, uPhalu, uHezironi, loKhami.
Laba babengabosendo lukaRubheni.
15 Amadodana kaSimiyoni ayeyila:
uJemuyeli, uJamini, u-Ohadi, uJakhini, uZohari, loShawuli olonina oweyengumKhenani.
Laba babengabosendo lukaSimiyoni.
16 La ngamabizo amadodana kaLevi ngokwemibhalo yabo:
uGeshoni, uKhohathi loMerari.
ULevi waphila iminyaka elikhulu elilamatshumi amathathu lesikhombisa (137).
17 Amadodana kaGeshoni ngezizukulwana zawo ayeyila:
uLibhini, uShimeyi, lemuli zabo.
18 Amadodana kaKhohathi ayeyila:
u-Amramu, u-Izihari, uHebhroni lo-Uziyeli.
UKhohathi waphila iminyaka elikhulu elilamatshumi amathathu lantathu (133).
19 Amadodana kaMerari ayeyila:
uMahili loMushi.
Laba babengabosendo lukaLevi, ngokwemibhalo yabo.
20 U-Amramu wathatha uJokhebhedi owayengudadewabo kayise. Wamzalela u-Aroni loMosi.
U-Amramu waphila iminyaka elikhulu elilamatshumi amathathu lesikhombisa (137).
21 Amadodana ka-Izihari ayeyila;
uKhora, uNefegi loZikhiri.
22 Amadodana ka-Uziyeli ayeyila:
uMishayeli, u-Elizafani loSithiri.
23 U-Aroni wathatha u-Elishebha indodakazi ka-Aminadabi. U-Elishebha wayengudadewabo kaNahashoni. Wamzalela uNadabi, u-Abhihu, u-Eliyazari lo-Ithamari.
24 Amadodana kaKhora ayeyila;
u-Asiri, u-Elikhana lo-Abhiyasafi.
Laba babengabosendo lukaKhora.
25 U-Eliyazari indodana ka-Aroni wathatha omunye wamadodakazi kaPhuthiyeli. Wamzalela uFinehasi.
Laba-ke yibo ababengabakhokheli bezimuli zakoLevi, ngendlu yinye ngayinye.
26 Yibo labo o-Aroni loMosi uThixo athi kubo, “Khokhelani abantu bami bako-Israyeli libakhuphe elizweni laseGibhithe ngamakhulu abo.”
27 Yibo laba abaya kuFaro inkosi yaseGibhithe mayelana lokukhupha abantu bako-Israyeli eGibhithe. Kwakuyibo oMosi lo-Aroni.
U-Aroni Ukhulumela UMosi
28 Ngesikhathi uThixo ekhuluma loMosi eGibhithe,
29 wathi kuye, “NginguThixo. Tshela uFaro inkosi yaseGibhithe yonke into engikutshela yona.”
30 Kodwa uMosi wathi kuThixo, “Njengoba ngikhuluma ngigagasa, kambe kuyini okungenza ukuthi uFaro azihluphe ngokungilalela?”