3
UYoohani uMwoshi akulumbilila mu lungalangala
(Mataayi 3:1-12; Maalika 1:1-8; Yoohani 1:19-28)
1 Mu chinja icha kalongo na fihaano (15) bhwo uKayisaali uTibheeliyo akulongosha ichiisu icha Looma, bhakabha bhasaliighwe uPontiyo Pilaati ukulongosha ichiisu icha Yuteeya, umalafyale uHelooti ukulongosha ichiisu icha Ghalilaayi, uFilipu umukulu ughwa Helooti ukulongosha ichiisu icha Ituleeya ni cha Tulakoniiti nu Lisaniya ukulongosha ichiisu icha Abhileene,
2 soona uAnasi nu Kayaafa bhakabha bhosongo abha bhapuuti. Mu kabhalilo ako, uChaala akayugha nu Yoohani, umwana ughwa Sakaliiya yuuyo akiikalagha mu lungalangala.
3 Po uYoohani akabhuuka mumbafu shooshi shiisho shikabha papiipi nu lusooko ulwa Yoolotani, akalumbililagha ku bhandu ukuti bhiilaataghe imbiibhi nu kwoshighwa ukuti uChaala abhahobhokele imbiibhi shaabho.
4 Isho shikabhoneka isa muumwo umusololi uYesaaya akasimba ukuti,
“Umundu yumo indiakayughaghe ku ishu ilya pamwanya ukufuma mu lungalangala akatingi,
‘Tendekeshanga isila iya Malafyale,
gholoshanga muumwo indiakaghendaghe.
5 Yooshi indebheela indiyikashiilighwe,
kooshi akaghamba ni chighamba indifikabhe ndebheela.
Gholoshanga isila shooshi shiisho shiniongaanite,
nu kupalania isila shooshi shiisho shili ni fibhwina.
6 Po ghweshi umundu indiakabhwaghe ubhupoki ukufuma kwa Chaala.’ ”
7 Po uYoohani akabhabhuulagha abhandu abhingi bhaabho bhakiisagha kukwake ukuti abhooshe, akatingi, “Mwe bhabhiibhi ungati njoka umwe! Kali, ghwini yuuyo abhasokite ukuti mulikindaghe ilyoyo ilya Chaala?
8 Bhombagha shiisho shikulangisha ukuti mupindukite nu kuti mwilaatite imbiibhi shiinyu shooshi. Manye mwifunaghe ukuti, ‘Usekulu ghwitu utwe ghwi Abhulahamu.’ Ingubhabhuula ukuti uChaala abhaghiile ukumupa uAbhulahamu abhaana ukufuma mu mayondo agha!
9 UChaala ali papiipi ukumulonga umundu ghweshi yuuyo atakubhomba imbombo inyiisa isa umundu yuuyo abhiikite isembe pi ikolo pi ikokwe, ukuti lyoshi ikokwe liilyo litakwela iseke inyiisa, akulyomola nu kulitaagha mu mulilo.”
10 Po bhwo abhandu abhingi bhala bhaapulika, bhakaanda ukumubhuusha bhakati, “Kali, tubhombe kooni ukulangisha ukuti twilaatite imbiibhi shiitu?”
11 UYoohani akabhaamula akati, “Umundu ghweshi yuuyo ali ni myenda mibhili iya kufwala, amuyabhile ghumo umundu yula yuuyo atali naghwo, ghwepe umundu yuuyo ali ni findu, amuyabhile fimo umundu yula yuuyo atali nafyo.”
12 Abhasongesha songo bhamu bhaabho bhakabhuuka ukuti uYoohani abhooshe bhoope, bhakamubhuusha bhakati, “Ghwe Mumanyishi, kali, nuutwe tubhombe kooni ukulangisha ukuti twilaatite imbiibhi shiitu?”
13 UYoohani akabhaamula akati, “Manye mubhasongeshange abhandu isongo iya pamwanya ukukinda yiiyo isilikali yibhalaghiile ukusongesha.”
14 Po abhashikali bhamu bhoope bhakamubhuusha uYoohani bhakati, “Kali, nuutwe tubhombe kooni?” Ghwepe akabhaamula akati, “Manye mweghaghe indalama isha bhandu ku maka, soona manye mubhayughilaghe ubhumyashi abhandu ukuti mushaaghe indalama, loole mwiyiilaniange nu mufwalo ghwinyu.”
15 Ku mashiku agho abhandu bhakabha bhakulindilila ukwisa ukwa Mesiiya. Ku nongwa iyo, abhandu bhala bhakaanda ukwinongʼona ukuti lumo uYoohani ghwe yuuyo ghwi Mesiiya.
16 Po uYoohani akabhaamula bhooshi akati, “Une ingubhoosha umwe na miishi, loole akwisa umundu ughwa maka ukuunginda une, yuuyo indabhaghiile ukubha mubhombi ghwake, soona indabhaghiile ukufulama nu kusatula utughoye utwa filato fyake. Uyo ghwe yuuyo indiakabhooshange umwe nu Mbepo uMwelu nu mulilo.
17 Umwene indiakabhapaaghulanie abhiisa ukufuma mu bhatulanongwa isa muumwo umulimi akupeeta amapeeta ukufuma mu fyakwinula. Indiakabhabhungaanie abhiisa isa muumwo umulimi akubhungaania ifyakwinula nu kubhiika mu ighulu lyake. Indiakabhaponie abhatulanongwa mu mulilo ghuughwo ghutakushima naalumo isa muumwo umulimi akupemba amapeeta.”
18 Po uYoohani akashiyugha ni nine inyingi ukubhasoka abhandu ukuti bhiilaataghe imbiibhi shaabho bhwo akulumbilila kukwabho iNongwa iNyiisa.
19 Soona, uYoohani akamukemela umalafyale uHelooti ku nongwa iya kumwegha uHelotiiya yuuyo akabha mukashi ghwa Filipu, umunungʼuna ghwake na ku nongwa iya mbiibhi inyingi shooshi shiisho uHelooti akashibhombagha.
20 Po uHelooti akoongelesha ubhubhiibhi ubhunine ku mbiibhi shaake inyingi ku sila iya kubhalaghila abhashikali bhaake ukuti bhamukole uYoohani nu kumupinya mu nyumba iya bhapinyighwa.
Ukwoshighwa ukwa Yeesu
(Mataayi 3:13-17; Maalika 1:9-11)
21 Akabhalilo kala kaako uYoohani akabhooshanga abhandu, akamwosha nu Yeesu. Po uYeesu akaanda ukwipuuta kwa Chaala. Bhwo ali pakwipuuta, kumwanya kukiighuka.
22 UMbepo uMwelu akiika pamwanya papaake ungati ngunda. Po ishu ukufuma kumwanya likapulikighwa likati, “Ughwe ghwe Mwana ghwangu umughanighwa, inguhobhoka nuughwe.”
Ichikolo icha Yeesu
(Mataayi 1:1-17)
23 UYeesu akabha ni fyinja amalongo matatu (30) bhwo aanda imbombo yaake iya kulumbilila ku bhandu. Abhandu bhakiinongʼonagha ukuti uYeesu akabha mwana ghwa Yoosefu yuuyo akabha mwana ghwa Eeli.
24 UEeli akabha mwana ghwa Mataati,
uMataati akabha mwana ghwa Laabhi,
uLaabhi akabha mwana ghwa Meeliki,
uMeeliki akabha mwana ghwa Yanaayi,
uYanaayi akabha mwana ghwa Yoosefu.
25 UYoosefu akabha mwana ghwa Matatiiya,
uMatatiiya akabha mwana ghwa Aamosi,
uAamosi akabha mwana ghwa Nahuumu,
uNahuumu akabha mwana ghwa Heesili,
uHeesili akabha mwana ghwa Nangaayi.
26 UNangaayi akabha mwana ghwa Maati,
uMaati akabha mwana ghwa Matatiiya,
uMatatiiya akabha mwana ghwa Semeyiini,
uSemeyiini akabha mwana ghwa Yooseki,
uYooseki akabha mwana ghwa Yoota.
27 UYoota akabha mwana ghwa Yohanaani,
uYohanaani akabha mwana ghwa Leesa,
uLeesa akabha mwana ghwa Selubhabheli,
uSelubhabheli akabha mwana ghwa Sheyalitiyeeli,
uSheyalitiyeeli akabha mwana ghwa Neeli.
28 UNeeli akabha mwana ghwa Meeliki,
uMeeliki akabha mwana ghwa Andi,
uAndi akabha mwana ghwa Koosamu,
uKoosamu akabha mwana ghwa Elimaatamu,
uElimaatamu akabha mwana ghwa Eeli.
29 UEeli akabha mwana ghwa Yooshwa,
uYooshwa akabha mwana ghwa Eliyeeseli,
uEliyeeseli akabha mwana ghwa Yoolimu,
uYoolimu akabha mwana ghwa Mataati,
uMataati akabha mwana ghwa Laabhi.
30 ULaabhi akabha mwana ghwa Simiyooni,
uSimiyooni akabha mwana ghwa Yuuta,
uYuuta akabha mwana ghwa Yoosefu,
uYoosefu akabha mwana ghwa Yoonamu,
uYoonamu akabha mwana ghwa Eliyaakimu.
31 UEliyaakimu akabha mwana ghwa Meleeya,
uMeleeya akabha mwana ghwa Meena,
uMeena akabha mwana ghwa Mataata,
uMataata akabha mwana ghwa Naatani,
uNaatani akabha mwana ghwa Ndaabhiti.
32 UNdaabhiti akabha mwana ghwa Yeese,
uYeese akabha mwana ghwa Oobheti,
uOobheti akabha mwana ghwa Bhoghwasi,
uBhoghwasi akabha mwana ghwa Salumooni,
uSalumooni akabha mwana ghwa Naashoni.
33 UNaashoni akabha mwana ghwa Aminandabhu,
uAminandabhu akabha mwana ghwa Aalamu,
uAalamu akabha mwana ghwa Hesolooni,
uHesolooni akabha mwana ghwa Peelesi,
uPeelesi akabha mwana ghwa Yuuta.
34 UYuuta akabha mwana ghwa Yaakobhu,
uYaakobhu akabha mwana ghwa Isiyaka,
uIsiyaka akabha mwana ghwa Abhulahamu,
uAbhulahamu akabha mwana ghwa Teela,
uTeela akabha mwana ghwa Nahooli.
35 UNahooli akabha mwana ghwa Selughi,
uSelughi akabha mwana ghwa Leebhu,
uLeebhu akabha mwana ghwa Peleeghi,
uPeleeghi akabha mwana ghwa Eebheli,
uEebheli akabha mwana ghwa Saala.
36 USaala akabha mwana ghwa Keenani,
uKeenani akabha mwana ghwa Alufakisaati,
uAlufakisaati akabha mwana ghwa Sheemu,
uSheemu akabha mwana ghwa Nooghwa,
uNooghwa akabha mwana ghwa Laameki.
37 ULaameki akabha mwana ghwa Metuseela,
uMetuseela akabha mwana ghwa Eenoki,
uEenoki akabha mwana ghwa Yaleeti,
uYaleeti akabha mwana ghwa Mahalaleeli,
uMahalaleeli akabha mwana ghwa Keenani.
38 UKeenani akabha mwana ghwa Eenoshi,
uEenoshi akabha mwana ghwa Seeti,
uSeeti akabha mwana ghwa Aatamu.
UAatamu akabha mwana ghwa Chaala.