10
Jesuu jaauwai pöd dich ʉʉi pʉaju khabam aajem
(Mt 19:1-12; Lc 16:18)
1 Jesús mag Capernaum phöbör eemua deeum durr Judeaag mawia jũrr döjã Jordán igaau edau öbeerjemʉg petajim aajem. Mag amach ee pabaimam khaug auwi ich aig õor pöoma pos aicheewai ichdëu ag na õrag jaaujerrjö mag õor pöm thʉnʉmʉg Ẽwandam iek jaaubaadëjim aajem.
2 Mag nʉm ee fariseonaan i aig bëejierram aajem. Makhʉʉnau juau ogthom Jesús imeraa pʉr awaag awi irig jëeumamua, —¿Chadchata pua oowai maach emkhooinau dich ʉʉi pʉaju aai nʉ wa pʉaju khaba nʉ? a jëeujierram anʉm.
3 Ichig mag jëeubaawai jũrr ich Jesús garmua amag, —Moiseeu Ẽwandam iek phã pʉarr gaai, ¿khan a jaau sĩwi? ajim anʉm.
4 Magbaa amachdëu, —Moiseeu jaauwain maadëu dich ʉʉi pʉaju aai nʉm a jaau pʉajim aajem. Sĩita ʉʉi pʉagpaawai wajapha ẽsap phãnaa ag gaai, “Ya mua pʉ pʉa chirʉm” a jaauju aai nʉmgui ajierram anʉm.
5 Magbaawaita Jesuu amag, —Pãadë khĩu ũrbat ajim anʉm. ¿Pãrau khaphʉ nʉ, khan gaaimua Moiseeu mag phã pʉajĩ? Irua mag phã pʉatarran, pãach jʉ̈g theeg sĩsidʉm gaaimuata mag phã pʉajimgui ajim anʉm, chadcha.
6 Pari warrgarwe ich Ẽwandamau maach ompaawaijã emkhooi ʉʉi dʉ̈ita ompaajimgui ajim anʉm.
7 Magtarr aawaita emkhooi ich ʉʉi dʉ̈i pabaadëmʉn ich dënnaan kha ogdʉajemgui ajim anʉm, ya ich ʉʉi dʉ̈ita ãba nʉrraag.
8 Ya magbarm aigmuan warran agdaujö amach appai naajerrta õor ãbpaimjö ich mag nʉisiejem. Ya mag nʉisim chan ya tag amach ããbdö nʉrrjëe aba, õor ãbpaimjö nʉisiejem.
9 Mag warrgarwejã ich Ẽwandamauta mag papitarr aawai pöd iwiir ãbmuajã i ichaaur awi dich õor pʉaju khaba nʉmgui ajim anʉm Jesuu amag.
10 Maimua magtarr khur deg paaukhawijã chi khapeen garmuata deeu ich ag iekpai irig jëeu naajim anʉm.
11 Mag ichig jëeubaawaita Jesuu amag, —Ich ʉʉi pʉawia deeum ʉʉita au simʉn magan pekauta wau simgui ajim anʉm, ich ʉʉi chaar khabam dʉ̈ita mag sĩewai.
12 Wa magba chi ʉʉirau khãijã ich jaai pʉawia deeum emkhooita aumʉn magan agjö pekauta wau simgui ajim anʉm, ich jaai chaar khabam dʉ̈ita sĩewai.
Jesuu chaain kõit iekhatarr
(Mt 19:13-15; Lc 18:15-17)
13 Mag nʉm ee õrau Jesús aig amach chaain waibëe thʉnʉisijim aajem, am gaai pʉrnaa am kõit Ẽwandamag jëeumkhĩir. Pari mag jũrram khʉʉnau chaain waibëbëekham oowi jũrr chi Jesús khapeenauta chi aibëe nʉm khʉʉnag meeurrau sĩujierram aajem, tag aibëepimaaugau.
14 Mamʉ amau mag õrag meeukha iekha nʉm oobaawaita Jesuu jũrr amachigta agjö meeurraunaa, —Idëu õrag amach chaaindam mʉ aig waibëepibat ajim anʉm. ¿Khanthee pãrau amag bëepiba jaau nʉ? Chi jöoin awiajã chamʉ khʉʉn chaainjö mʉ iek ʉ̈khakharrsö ʉ̈kha nʉm khʉʉnta mʉg jẽb gaaijã ʉ̈u wënʉrrawia ʉ̈gtharjã onee wënʉrrabajup ajim anʉm.
15 Mamʉ chi ʉ̈gthar öbërju khĩirju nʉm khʉʉnaujã mʉkhʉʉn chaain dënjö ʉ̈khabam chan pöd öbërbamgui ajim anʉm.
16 Mag iekhapʉ̈inaa, Jesuu am dakhĩir warag chi chaain ich jua ee jiirkha aunaa, am pör ʉ̈r jua ausĩunaa, am kõit wajapha Ẽwandamag jëeumajim aajem.
Woun ãb phatkhon paraam Jesús dʉ̈i iyʉ̈ʉ athurtarr
(Mt 19:16-30; Lc 18:18-30)
17 Maigmua Jesús chawag maagpam ee, woun ãb i aig khaphig bëejim aajem. Mag bëewia i khĩirphee kanieu phõbkhachëwia irig magchëjim anʉm:
—Maestro, pʉʉta chadcha maestro ajapham aawai pʉrʉg jëwaan bëejim: ¿Mua khani jãgju aai chirʉ́ ʉ̈gthar öbëraag? Mʉrʉg jaaubá ajim anʉm.
18 Magbaawai Jesuu irig, —¿Khanthee pua mʉrʉg chi ajapham a sĩ? Õor ajapham chan chukhum. Ajaphamʉn ãba Ẽwandamta ich appai ajapha sĩerrʉmgui ajim anʉm.
19 ¿Pua khaphʉ sĩebá ajim anʉm, Ẽwandamau ich iek Moiseeg phãpitarr gaai: “Oob dich õor khabam dʉ̈i khapes am; oob õor thõom; oob nem jĩgkham; oob chikham ëugarjã sëukha nem ĩgkham; oob sëukha chikhamnaanjã khũgurm; maimua pʉch dënnaanjã jãsene abá” a sim?
20 Magbaawai chi woun mag irig jëeuchëtarrau —Maestro, mʉch bʉ̈rʉʉwe mag pua jaaubarm thum mua ʉʉrkha chitabahab ajim anʉm.
21 Mag wounau mag iekhabaawai Jesuu i dau ee aug khaug paraa eerpanaa irig, —Mamʉ agtha pua nem khĩir ãb wauju waaur wai sĩebahab ajim anʉm. Pʉch diig mawia, nem thum pʉchdëu wai sim përkhʉʉipʉ̈inaa, mag phatkhon jũrr dau aphʉʉ khithëem khʉʉnag thum jigbapʉ̈i ajim anaabá. Maimuan chadau mʉ ẽudee pidú ajim anʉm, chadcha mʉ dʉ̈i chitam khõsi chirʉm khai. Pua magmʉn ʉ̈gthar pawiajã bʉ̈ʉrjã augchëba phatkhon khãai nem ajapham pömta wai chirsijugui ajim anʉm irig.
22 Jesuu ichig mag iekhabaawai warre ökhĩirjuu ich diig petajim anaabá, chadcha phatkhon paraam arr aawai.
23 Ichdëu mag nem jaaubarm ipierraa amaaugau warag ökhĩirjuu petam oowi, ich bigaau narr khʉʉn khĩir eerpa phʉʉrdʉnaa, ich dʉ̈i ogdʉba wënʉrrarr khʉʉnagta, —Keena, pãadë oobat ajim anʉm. Phatkhon paraam khʉʉnta Ẽwandam chi Pörkha sim aar öbëraagan, chadcha thethe simgui ajim anʉm.
24 Jesuu mag iekhabarm ũrwia warre jʉ̈gderraa aphöbaadëjim anaabá. Pari magwi deeu ich Jesuupai amag, —¡Aay, chaaina! Ar phatkhon ithee wʉrpa aajem khʉʉnta Ẽwandam chi Pörkha sim aar öbëraagan, chadcha phithur sĩerrʉmgui ajim anʉm.
25 Phatkhonpanta ʉ̈gthar Ẽwandam chi Pörkha sim aar öbërju khãyau, camello pöm jãg maach wounaan khãaijã ʉ̈rpai sĩerrʉmta phithurg chukhu nobeeu kach ee thoogar öbër dichjugui ajim anʉm.
26 Jesuu mag jaaubaawai chará warag jʉ̈gderraacha nʉm iekhau jũrr amach eepai wir aig amach khapeenag, —Mag khai, magan ¿khaita peerdʉagáwa? anaajim aajem.
27 Magbaa Jesuu amag eerpanaa, —Õragan chadcha phithurgma ajim anʉm, mag ũurwai. Mamʉ Ẽwandamag chan bʉ̈ʉrjã phithurg chukhu simgui ajim anʉm.
28 Magbaawai Pedroou irig, —Maraun chad maach nem wai narrjã ewag khĩirjuba, thum phëpʉawi pʉ dʉ̈i ogdʉba wënʉrrabma ajim anʉm.
29 Magbaa jũrr ich Jesuu magjim anʉm:
—Pedro, mua chadcha mag chirʉm: Ar mʉ gaaimua wa mʉ iek jaaum khõchgau khãijã amach di, amach eeugpeen, amach ʉ̈phʉʉin, amach dënnaan, amach ʉʉi, amach chaain, wa amach nemjĩir khãijã khũchpaim ithee werpʉpʉakham khʉʉnagan,
30 mʉg jẽb gaai agtha nʉwejã amach eeugpeen, amach ʉ̈phʉʉin, amach ãd, amach chaain, amach nemjĩirpa thum mʉ gaaimua okhoomarr khãyaujã ʉ̈r warag ag atcha deejugui ajim anʉm. Ajap õrau am dau aug wauwiajã mag wënʉrrʉmʉn chadau, mʉg atagjã durr iiur gaai mʉch dʉ̈ita ich mag wënʉrramkhĩir mʉch aarchata phë aujugui ajim anʉm.
31 Pari mag ed ãaur khʉʉn ar mʉig eegar aawai amachta chikham khãaijã ʉ̈rʉʉcha nʉm aajerr khʉʉnta ʉ̈gthar Ẽwandam aar paaukhaimaawaijã jũrr serbiibacha aajerrjöo nʉisijugui ajim anʉm. Maimua jũrr ar mʉ gaaimua chikhamnau serbiibag pheejerr khʉʉnta jũrr warm khʉʉn khãaijã ʉ̈rʉʉcha nʉisijugui a jaaumajim aajem.
Õrau ich thõoju Jesuu jaautarr
(Mt 20:17-19; Lc 18:31-34)
32 Maigmua phöbör Jerusalenag khʉdau ma sim ee majim aajem, ich khapeen dʉ̈i deeum khʉʉnpa. Mag wëtumua ich Jesuuta pör garcha am na maa ajim anʉm. Mamʉ mag chi ẽudee wëtmarr khʉʉnan thãar paraata wënʉrrajim aajem, ich Jesuucha ag nawe õrau ich thõoju jaautarr ya khaphʉ narr aawai. Mamʉ mag am thãar paraa wënʉrrʉm Jesuu khaphʉ sĩerr aawai, ich dʉ̈i ogdʉba wënʉrraajerr khʉʉn doce khĩet thʉ̈rkha auwia Jerusalén phöbör eem khʉʉnau ich dʉ̈i khaigba aju jaaumamua magjim aajem:
33 —Pãrau khaphʉ nʉm, maach Jerusalenag wëtum; nau maach mam barbaimaawai mʉch chi Emkhooi Iewaa mʉg chirʉmʉn thethemnaanag mʉ pʉr deejugui ajim anʉm. Magbaawai makhʉʉnau jũrr maach meeun khabam khʉʉnag mʉ thõopi jaauwi durr chaauram khʉʉn jua ee mʉ thʉsĩepʉ̈ijugui ajim aajem, makhʉʉnaujã mʉ dʉ̈i amachdëu ampierr amkhĩir.
34 Magbaawai makhʉʉnau mʉ wau iekhanaa, mʉ jʉ̈gadaujã wʉnaa, mʉ gaaijã ichö thunaa, amachdëu am aig mʉ dʉ̈i awia, ãbmiecha paawai amau mʉ thõopʉ̈ijugui ajim anʉm. Pari mag amau mʉ thõowiajã khãai thãrjup nʉm ee deeu mʉ iiu phiidʉjugui a jaaujim aajem.
Santiagoou Juan dʉ̈imua Jesuug amach khĩir jãsenkhapi narr
(Mt 20:20-28)
35 Mag wëtum ee jöoi Zebedeo chaainau, ajapcharan Santiagoouma Juan dʉ̈imua irig, —Maestro, marau pʉrʉg nemdam jëeum ig naajimgui ajim anʉm. ¿Pua maar khĩir jãsenkhawi maachdëu jëeubarmjö abaju khai? ajierram aajem.
36 Magbaa Jesuu amag, —¿Pãrau jãgata mua pãach dʉ̈i apim khõsi nʉma? ajim anʉm.
37 Magbaawai amachdëu irig, —Marau pʉrʉg jaaum ig nʉmʉn mʉg atag pʉchta thumaam khʉʉn Pörkha bëewi mʉg durr thum jʉ̈abaadeewaijã maar numiim khʉʉnagta pʉch bigaau juppibá ajierram anʉm, pʉch dʉ̈i iek theeg amkhĩir: ãb pʉch juachaar gar, maimua ãb pʉch juawë gar.
38 Magbaawaita ich Jesús garmua amag, —Pãrau chan sĩi pãachdëu nem jëeu nʉmjã khaugbata nʉmgui ajim anʉm. ¿Pãrau khĩirjuawai mag pãachta warm khʉʉn khãaijã ʉ̈rpai aag chikhamnau pãach dau aug wau nʉmjã mʉ dënjö ãwatwi mʉ thõm edjã mʉ dʉ̈i thõju aai nʉ? ajim anʉm amag.
39 Magbaawai chi Santiagoou Juan dʉ̈imua, —Ëera, marau ãwatbajup ajierram anʉm.
Mamʉ magbaawaita Jesuu amag, —Pãrau chadcha õrau pãach dau aphʉʉ wau nʉmjã ãwatwi mʉ thõbarmjö thõma ajim anʉm.
40 Pari magbarm gaaimuapai chan mag mʉch juachaar gar wa juawë gar khãijã mʉch dʉ̈i ãba juppiju chan mua pöd jaauju khaba chirʉmgui ajim anʉm, Ẽwandamauta ichdëu khap jaauju aawai.
41 Mamʉ mag Santiagoou Juan dʉ̈imua amach dakhĩir Jesuug magbaawai chi khapeen diez narr khʉʉnau jũrr am dʉ̈ita meeukha naajim anaabá.
42 Mamʉ magbaawai Jesuu amach thum ãbam aig thʉ̈rkha auwia amag magjim anʉm:
—Pãrau meraajã khaba nʉm, chadcha sĩi mʉg jẽb gaai õor pörkhawi amachdëuta gobernaajem khʉʉnaun amachta chi pörnaan aawai iek theeg nʉm awia amach khãai jua eegpaim khʉʉn dʉ̈i amachdëu ampierr aajem.
43 Pari jũrr pãrau pöd am dënjö magju khaba nʉm, pãach eepai. Magju khãai ãbmua khãijã pãach eepai ichta thumaam khʉʉn khãai ʉ̈rʉʉ am khõsi sim khai, magan jũrr ich garmuata ich khapeenau nem mag abaawaijã am ipierr nʉnʉʉu aju aai simgui ajim anʉm.
44 Maagwai ar ichta ʉ̈gthar pawiajã Ẽwandamau ich garcha juppi ahau apim khõsi sim khai, magan sĩi ichta parhoobam khʉʉn chogkhaju aai simgui ajim anʉm.
45 Mʉ pãar khãai Emkhooi Iewaakha chirʉmjã mag sĩi mʉch garmua chikham chogaagjã bëebajim. Mʉ bëetarran, sĩi chikhamnag mʉch chogamkhĩirta bëejimgui ajim anʉm, mag chitʉmua chikham jua machgau thõwi mag thõbarm gaaimua õor pöm sĩi amach pekau ee preso sĩsidʉmjö nʉm khʉʉn öbeerkhapäain.
Jesuu Bartimeo dau monaaupʉ̈itarr
(Mt 20:29-34; Lc 18:35-43)
46 Mag wëtumua Jericó phöbör ee barimajierram aajem. Maig khũchpai naawia deeu am ërëubaadëm dʉ̈i õor pöm wëtjim aajem. Maimua ya am phöbör eemua öbërwi wëtumta khʉd bigaau woun ãb dau khĩsu khitʉm Bartimeo anʉmta õor ërëu dich nʉm khʉʉnag nemdam jëeuwai oo khërʉm ooimajierram aajem. Mag woundam jöoi Timeo anʉm iewaa ajim aajem.
47 Mag dau khĩsu khitʉmua ich dakha Jesús Nazaretpierr dichmam khaug athaawai ääakhamua, —Jesús, pʉʉta rey David khachitarr ag chaain ewagam khʉʉn Iewaau marau nʉ narr. Mʉ ap chitʉm mʉ dau ee aug khaugbahur aajeejim anʉm, ich dau monawaan bëemkhĩir.
48 Mag chi dau khĩsu khitʉmua ääa khabaadeewai Jesús dʉ̈i õor wëtmarr khʉʉnau irig meeurrarrau aajeejim anʉm, khĩupamkhĩir. Mamʉ magbaawai chará warag thet ääakhamua, —Jesús, pʉʉta rey David khakhitarr ag chaain ewagam khʉʉn Iewaau marau nʉ narr. Mʉ ap chitʉm mʉ dau aug khaugbahur aajeejim anaabá.
49 Jesuu mag ääakham ũr athaawai dʉnʉisiwia chi dau khĩsu khitarr awaan mapijim aajem. Magbaawai chadcha i awaan wëtwi chi wëttarr khʉʉnau irig, —¡Khĩirdam ubʉ phiidʉbaad! Jesuu pʉ thʉ̈r sĩebahab. I aar marrau ajierram anʉm.
50 Ichig magbaawai ich ag bʉ̈rre ich khajũa ʉ̈r joothʉ jũa sĩerr barwerbpʉ̈iwi phiidʉ dʉnʉisinaa Jesús aar petajim aajem.
51 Mag chadcha ich aar dʉnʉʉubaimaawai Jesuu irig, —¿Khani pua mʉrʉg pʉch dʉ̈i apim khõsi chirʉ́? a jëeujim anʉm.
Magbaa chi daudam khĩsu khitʉm garmua jũrr irig, —Maestro, muan pʉrʉg mʉch dauta monaaupʉ̈ipim khõsi chirʉmgui ajim anaabá.
52 Magbaawai Jesuu irig magjim anʉm:
—Chadcha muata pʉch dau monaauju khaphʉ khĩirju chirarr gaaimua ʉ̈u pʉ monaau chirsim. Ya pʉ pʉch diig maju aai chirʉmgui ajim anʉm.
Irua mag iekhabarm bʉ̈rre chadcha dau eerdʉ sĩsiwi ich bi eem daujö daujã wajaug sĩsijim anaabá. Mag ich dau monaaubapäaiwai warag i dʉ̈i petajim aajem.