21
Edjã iiur durr iiur dʉ̈i
1 Magtarr khur nacharam edaujã mʉg durr dʉ̈i narr Ẽwandamau thum chi iiurig paapʉ̈itarr aawai edjã iiurta durr iiur dʉ̈i mua oojim. Magtarr aawai ya phũasjã chukhu ajim.
2 Mʉch daúachata mua oojim, bʉ̈ʉrjã pekau chukhum khʉʉn phöbör, Jerusalén chi iiur, ʉ̈gthar Ẽwandam sim aarmua eeg urum. Mag urumʉn ya ʉʉi wajap chihöowi ich jaai dʉ̈i jua pʉraagpamjö, sĩi thum chi khĩir khaugamta urajim.
3 Magbarm ee ʉ̈gtharmua nem theeg õor iekjö, “Ĩsin chadau Ẽwandaman õor ee dau daauta nʉrrʉmgui” ajim, “am kha ogdʉba ich mag sĩerraag. Am i phöbörkha nʉisiewai jũrr ichta chadcha am Ẽwandamkha sĩsiju.
4 Ichdëuta thumaa wajapha am dauchöjã jãrpʉ̈pʉ̈i aju. Mam chan tag õor meebam, õor dauhi paraajã abam. Tag chikham ʉ̈apëpërjã aba, gaai machagjã tag khaugbajugui” ajim, “ya warr nem thʉnarr thum isegpʉ̈iwi thum chi iiur apha thʉnaawai.”
5 Magbaawai chi khu juupjem gaai oo sĩerrau, “Muata nem thʉnʉm thum chi iiurig paapäaijem” a iekhajim. Mag iekhapʉ̈iwia, jũrr mʉrʉgta, —Cha mua iekhabarm iek thumaa phã athá. Jãan chadcharam iek aawai pãrau ag gaai ʉ̈khaju aai nʉmgui ajim.
6 Magtarr khur deeu mʉrʉg, —Ya nem thumaa aaipa sĩsimgui ajim. Mʉchpaita nacharam ẽsapdau Ajönaa chi ãbmiecharam Zetajö chitʉm; mʉchta nem thum ompaaju nawe chirajim, mʉg durr öwiajã mʉchin ich mag chirsijugui ajim. Chi öbisi nʉm khʉʉnag mua sĩi ich jãg par õor iiupiejem dö khumdʉ öbër sim eem döpiju.
7 Ar ögkhaba amach garmua pödpʉ̈i nʉm khʉʉnaun, mʉ juagam nem thʉnʉm thum amachdëuta auju. Mʉchta am Ẽwandamkha chirsiewai jũrr amach mʉ chaainkha nʉisijugui ajim.
8 Mamʉ mʉ iek jawaag khuwʉ̈ʉm khʉʉn, mʉ iek ʉ̈khaba aajem khʉʉn, mua khõchkhabam nem waaujem khʉʉn, juau õor thõojem khʉʉn, dich õor khabam dʉ̈i khapes aajem khʉʉn, bënkhʉʉn, parhooba juau nem wautarragta mʉrʉgamjö jëeujem khʉʉn, maimua thum õor sëu paraam khʉʉn, magʉm khʉʉnan thum thʉrrdö õtdau azufre dʉ̈i waaurëu uu wëjöm eeta mua barkhʉʉipʉ̈ijugui ajim. Mamta biek numiimua paawai thõo chaarcha thõ nʉmʉugui a iekhajim.
Jerusalén chi iiur
9 Maimua Ẽwandam chognaan siete narr khʉʉnau amach pipied agjö jarr siete wai narr ee ãbmiecha agua õor khaibag wauju waiberr khʉʉn eem ãb bëewi mʉrʉg, —Mau pidú, mua pʉrʉg oopikhimgui ajim, Cordero ʉʉi paju.
10 Maimua Ẽwandam Akharau mag mʉrʉg oopipigmamua chadcha durrsĩ pöoma ʉ̈gthaa sim gaai mʉ athaadëjim, chi Ẽwandam chogau. Mag arrwi phöbör pöoma sim mʉrʉg oopijim, ʉ̈gtharm phöbör Jerusalén anʉm. Phöbör pöm mag simta ʉ̈gthar ich Ẽwandam sim aarmua eeg uraawai, sĩi arar urajim.
11 Ag bʉ̈ araragan, sĩi ooihmʉ mokdau wajaphamjöta khitajim, mokdau jaspe aajemjö, dau bʉ̈ʉ vidriojö.
12 Mag simʉn ʉ̈gthaa thuur phʉʉrdʉ sĩejim. Mag thuur phʉʉrdʉ simta puertdi khapan doce sĩejim. Makhʉʉn puertdi khapanagpierr Ẽwandam chognaanjã agpierr ããbdö dʉnʉnʉid ajim, chi thʉanaan. Mag dʉ̈i ĩchab warrgar jöoi Israel khararr chaain doce narr khʉʉn thʉ̈rjã mag puertdipierr phãkha sĩsid ajim.
13 Ed öbeerjem gar puertdi thãrjup wai sĩejim; ed burrjem gar agjö thãrjup, margajãrm bi garjã thãrjup, maimua baggajãrm bi garjã agjö puertdi thãrjup sĩejim.
14 Mag phöbör igaau thuur phʉʉrdʉ simʉn, mokdau pör dapag doce nʉm gaaita khaarkha thʉnaajim. Mag mok pör nʉmpierr ĩchab Corderoou ich i jaaumkhĩir doce jʉr autarr khʉʉn thʉ̈rjã gaai phãkha sĩsid ajim.
15 Maagwai chi mag mʉ dʉ̈i iekha sĩerrau padam phĩr dën jua ee wai sĩejim, agua chi phöbör chach phʉʉrdʉpʉ̈iwia, thum chi puertdi mag sĩsid arrjã chachkhapʉ̈inaa chi phöbör igaau thuur phʉʉrdʉ sĩerrjã chachpäaig.
16 Mag phöbörön sĩi thum jã agdaujöo iwiir duraajã khaba, chi jã pheeugjã chi jã durag dʉ̈i ãbata sĩejim. Maimua chadcha chi phöbör chachbaadëjim. Mag chach oowai, chi jã durag, chi jã ʉ̈gthaag maimua chi jã pheeugjã thum agdaujö ich mag dos mil doscientos kilómetros sĩejim.
17 Maimua jũrr chi phöbör igaau thuur phʉʉrdʉ simjã chachbaadëjim. Majã chachpʉ̈inaa oowai, sesenta y cinco metros sĩejim, chi parrg appai. Mag irua chach sĩerr, sĩi maach ich mʉig jẽb gayam khʉʉn chach ajim.
18 Chi phöbör igaau thuur phʉʉrdʉ sĩerr mokdau jaspe anʉm dënta wau sĩejim, maagwai chi phöbör phĩr chaar dën ajim. Mag phĩr chaar dën aawaita sĩi vidrio memerkhög chukhumjöta sĩejim.
19 Chi phöbör igaau thuur phʉʉrdʉ sim bʉ̈ gaai ĩchab mokdau khĩirpierram dën ooihmʉ wau sĩsid ajim. Nacharam jaspe dën ajim; numiim, zafiro dën; thãrjupam, ágata dën; jayapam, esmeralda dën;
20 cincoom, ónice dën; seim, cornalina dën; sieteem crisólito dën; ochoom, berilo dën; nueveem, topacio dën, diesam, crisoprasa dën; onceem, jacinto dën; maimua doceem, amatista dën ajim.
21 Chi puertdi doce narrjã ĩchab perlas dënta waukha sĩsid ajim. Mag chi puertdi khapanagjã chi perlas khapanagpierr narr aawai puertdipierr perla khĩir ãbpaimua wau sĩsid ajim. Maagwai mag phöbör eem kaaijã chi wajapcharamjã ĩchab phĩr chaar dën aawai sĩi vidriojö dau bʉ̈ʉmjöta khitajim.
22 Mag phöbör ee mua bʉ̈ʉrjã Ẽwandamag jëeujem di oobajim, ich maach Pör Ẽwandam thumaam khʉʉn khãaijã jua theeg ʉ̈rpai sĩerrʉmpaita Ẽwandamag jëeujem di anaa ĩchab ichpaita chi Cordero aawai.
23 Ich Ẽwandamaupaita ich mor gaaimua arar wʉʉ jẽer wai sĩewai mag phöbör chan mʉg ãsdawam edaujã chukhu ni edaram edaujã chukhu sim. I lamparaan ĩchab chi Corderodampaiu.
24 Mag sĩewai ĩchab phöbör durrpierr thʉnʉmjã sĩi mag phöbör arar wʉʉ jẽer thʉnʉm bʉ̈ʉgta wënʉrraju anaabá. Maagwai ĩchab mʉg jẽb gayam reinaanaujã mag phöbörta thö iyʉ̈ʉ aju aajem.
25 Mag phöbör eem puertdi chan phãraajã khaugba ich mag sĩerraju aajem. Mag nʉm dʉ̈i ĩchab edau khëwaajã khaugba sĩerraawai, edau khĩejã chukhu aju anaabá.
26 Phöbör durrpierram khʉʉnauta mag phöbör igwia, “Keena, jãgjöm phöbör chan chukhum” a iekhanaa, woun ëugarmjö wajapha i ig iyʉ̈ʉ aju anʉm.
27 Mag phöbör ee chan ĩchab bʉ̈ʉrjã maach inaam nem chan dubbam. Nem maach dawag khabam waaujem khʉʉnjã dubba, ni sĩi chikham khũguurjem khʉʉnjã pöd dubbam. Ãba chi dubju khʉʉnan, Cordero ẽsap gaai thʉ̈r phãkha thʉnʉm khʉʉnpaita dubwi ich mag i dʉ̈i iiu wënʉrraju aajem.