3
Ko te malanga 'a Sione Papitaisó
(Mātiu 3:1-12; Ma'ake 1:1-8; Sione 1:19-28)
1 Pea 'i tono hongofulu mā nima ta'u 'o te pule 'a Taipiliō ko te Sisá, pea 'i te lolotonga te kōvana 'ia Ponitō Pailato 'i Siuteá, pea tu'i 'ia Hēlota 'i Kālelí, mo tono tehina ko Filipé 'i 'Aitulia mo te feitu'u ko Telakonaitisí, pea tu'i 'ia Lisaniasi 'i 'Apiliné,
2 pea Taula'aliki Lahi 'ia 'Ānasi mo Kaiafasí, ne'e hoko ai 'ia te folafola 'a te 'Atuá kiā Sione ko te foha 'o Sākalaiá 'i te toafá.
3 Pea 'alu atu ia ki te feitu'u kotoa pē 'o Sioataní, 'o malanga 'aki te papitaiso 'o te fakatomalá ki te fakamolemole 'o te angahalá.
4 'O hangē ko ia kua tohi 'i te tohi 'o te 'ū lea 'a 'Aisea ko te palōfitá:
“Ko te le'o 'o he toko taha 'oku kalanga 'i te toafá,
‘Kotou teuteu 'ia te hā'ele'anga 'o te 'Alikí;
fakatonutonu Tono 'ū alá.
5 Ko te tele'a kotoa pē 'e tanu,
pea ko te ma'unga mo te tafungafunga kotoa pē 'e holoki;
pea 'e ngaahi te pikopikó ke hangatonu,
mo te tokatāmakí ke tokamālie.
6 Pea 'e mamata 'e te kakano kotoa pē ki te fakama'uli'anga 'a te 'Atuá.’ ”
7 Pea toki lea 'e ia ki te fu'u kakai ne'e notou fononga mai ke papitaiso 'iā iá, 'o pehē, “'Ia te hako'i ngata fekai, ko ai ia ne'e fale'i kōtou ke kotou hola mei te houhau kua mei a'u maí?
8 Kāpau ko ia, pe'i kotou fua 'o taau mo he kau fakatomala; pea 'aua na'a kotou lau 'i te kotou lotó, 'o pehē takua, ‘Ko 'Ēpalahame 'ia te motou tamaí.’ He 'okou tala'i atu, 'oku mafai 'e te 'Atuá ia ke fokotu'u mei te 'ū maka neí he fānau kiā 'Ēpalahame.
9 Pea 'oku lolotonga tu'u 'eni te tokí 'i te tafito 'o te 'ū 'akaú; ko ia ai, kā 'i ai he fu'u 'akau 'oku kailoa fua lelei 'oku tā ia 'o laku ki te afí.”
10 Pea fa'a fehu'i kiā ia 'e te fu'u kakaí, 'o notou iange, “Pea ko te ā leva te motou me'a 'e faí?”
11 Pea iange 'e ia kiā nātou, 'o pehē, “Kā 'i ai he taha 'oku ua tono soté, ke nā taki taha mo ia 'oku halá; pea ko ia 'oku ma'u he me'akaí, ke fai pehē mo ia foki.”
12 Pea ha'u foki he kau tānaki tukuhau ke papitaiso, 'o notou 'eke ange kiā ia, “Tangata'aliki, ko te ā 'a mātou 'e motou faí?”
13 Pea iange 'e ia, “'Aua na'a kotou 'eke 'o lahi ange 'i te me'a kua tu'utu'uni kiā kōtoú.”
14 Pea fehu'i ange kiā ia foki 'e te kau taú, “Ko te ā 'e motou fai 'e mātoú foki?”
Pea iange 'e ia, “'Aua na'a kotou fakamālohi'i he taha; pea 'aua na'a lohiaki'i; pea kotou fiamālie pē 'i te totongi 'oku 'avatú.”
15 Pea 'i te fakakaukau 'e te kakaí, mo notou fifili kotoa pē 'i te notou lotó kiā Sione, na'a ko te Kalaisí iá,
16 ne'e toe lea 'e Sione kiā nātou kotoa pē, 'o pehē, “Ko au 'okou papitaiso kōtou 'aki te vai; kā 'oku ha'u he Toko Taha 'oku mālohi ange 'iā au, ko te Toko Taha ko iá 'oku kailoa kita taau ke vete te nono'o 'o Tono senitoló; he 'e papitaiso 'e Ia 'ia kōtou 'aki te Laumālie Mā'oni'oní mo te afi.
17 Ko te Toko Taha ia 'oku 'i Tono nimá 'ia te huo sivi uite, pea 'e Ina sivi 'aki ke ma'a Tono haha'angá; pea 'e Ina tānaki 'ia te 'ū fe'i uité ki Tono faleokó; kā 'e Ina tutu 'ia te kafukafú 'aki te afi 'oku kailoa lava to'onó tāmate'i.”
18 Ne'e lahi mo te 'ū tala mālie kehe, ne ina fai 'aki tana tokoni ki te kakaí.
19 Ka ne'e valoki'i 'e ia 'ia Hēlota ko te tu'í, kote'uhí ko Helotiasi ko te mali 'o tono tehiná, pea kote'uhí ko te 'ū kovi kehekehe ne'e fai 'e Hēlotá;
20 pea ne ina fakalahi 'aki 'eni kotoa pē, 'aki tana fakahū 'ia Sione ki te pilīsoné.
Ko tono papitaiso 'o Sīsuú
(Mātiu 3:13-17; Ma'ake 1:9-11)
21 Pea 'i te 'osi tono papitaiso 'o te kakai kotoa pē, pea kua papitaiso mo Sīsū foki, pea 'i te fai 'e Ia Tana huú, ne'e matangaki 'ia te langí,
22 pea 'alu ifo kiā Ia 'ia te Laumālie Mā'oni'oní, 'i te sino ne'e tatau mo he fe'i lupe; pea ne'e 'i ai he le'o mei te langí ne'e pehē mai, “Ko Toku 'Alo Pelé 'ia Koe, ko Koe 'Okou hōifua ki aí.”
Ko te tupu'anga 'o Sīsuú
(Mātiu 1:1-17)
23 Pea ne'e tolungofulu ta'u nai 'ia Sīsū 'i Tana kamata ngāué; pea ne'e lau Ia ko te foha 'o Siosifa,
'a ia ko te foha 'o Hēlai,
24 'a ia ko te foha 'o Mātati,
'a ia ko te foha 'o Līvai,
'a ia ko te foha 'o Melikai,
'a ia ko te foha 'o Sianai,
'a ia ko te foha 'o Siosifa,
25 'a ia ko te foha 'o Matataiasi,
'a ia ko te foha 'o 'Ēmosi,
'a ia ko te foha 'o Nēhumi,
'a ia ko te foha 'o 'Esilai,
'a ia ko te foha 'o Nākai,
26 'a ia ko te foha 'o Mā'ati,
'a ia ko te foha 'o Matataiasi,
'a ia ko te foha 'o Semaini,
'a ia ko te foha 'o Sioseki,
'a ia ko te foha 'o Siota,
27 'a ia ko te foha 'o Sioanani,
'a ia ko te foha 'o Lesa,
'a ia ko te foha 'o Seluipepeli,
'a ia ko te foha 'o Saletili,
'a ia ko te foha 'o Nēlai,
28 'a ia ko te foha 'o Melikai,
'a ia ko te foha 'o 'Ātai,
'a ia ko te foha 'o Kōsame,
'a ia ko te foha 'o 'Ēlimatami,
'a ia ko te foha 'o 'Ea,
29 'a ia ko te foha 'o Sīsū,
'a ia ko te foha 'o 'Eliesa,
'a ia ko te foha 'o Siolimi,
'a ia ko te foha 'o Mātati,
'a ia ko te foha 'o Līvai,
30 'a ia ko te foha 'o Simione,
'a ia ko te foha 'o Siuta,
'a ia ko te foha 'o Siosifa,
'a ia ko te foha 'o Sionami,
'a ia ko te foha 'o 'Ilaiakimi,
31 'a ia ko te foha 'o Melea,
'a ia ko te foha 'o Mena,
'a ia ko te foha 'o Mātata,
'a ia ko te foha 'o Nētani,
'a ia ko te foha 'o Tēvita,
32 'a ia ko te foha 'o Sese,
'a ia ko te foha 'o 'Ōpeti,
'a ia ko te foha 'o Poasi,
'a ia ko te foha 'o Solomone,
'a ia ko te foha 'o Nāsoni,
33 'a ia ko te foha 'o 'Aminatape,
'a ia ko te foha 'o 'Atamaini,
'a ia ko te foha 'o 'Alanai,
'a ia ko te foha 'o 'Esilome,
'a ia ko te foha 'o Felesi,
'a ia ko te foha 'o Siuta,
34 'a ia ko te foha 'o Sēkope,
'a ia ko te foha 'o 'Aisake,
'a ia ko te foha 'o 'Ēpalahame,
'a ia ko te foha 'o Tela,
'a ia ko te foha 'o Nēhoa,
35 'a ia ko te foha 'o Sēluki,
'a ia ko te foha 'o Le'u,
'a ia ko te foha 'o Pēleki,
'a ia ko te foha 'o 'Epa,
'a ia ko te foha 'o Sela,
36 'a ia ko te foha 'o Kēnani,
'a ia ko te foha 'o 'Āfakisate,
'a ia ko te foha 'o Semi,
'a ia ko te foha 'o Noa,
'a ia ko te foha 'o Lēmeki,
37 'a ia ko te foha 'o Mētuisela,
'a ia ko te foha 'o 'Īnoke,
'a ia ko te foha 'o Sēleti,
'a ia ko te foha 'o Melilieli,
'a ia ko te foha 'o Kēnani,
38 'a ia ko te foha 'o 'Īnosi,
'a ia ko te foha 'o Seti,
'a ia ko te foha 'o 'Ātama,
'a ia ko te foha 'o te 'Atuá.