Ko te Tohi Fakahā
kiā Sioné
Ko te talateú
Ko te Tohi Fakahā kiā Sioné ne'e fa'u ia 'i te 'ū 'aho ne'e fakatanga'i ai 'ia te kakai Kalisitiané kote'uhí ko te notou tui ki te 'Aliki ko Sīsū Kalaisí. Ko te tafito'i kaveinga 'a Sioné ke notou fakatu'amalie mo lototo'a ai, mo tu'u ma'u 'o kā hoko mai he 'ū faingata'a mo he 'ū fakatanga.
Ko te konga lahi 'o te tohí ko he 'ū fakahā mo te 'ū vīsone 'oku fakalea 'aki te 'ū fakatātā mo te heliaki fakapunake 'e mahino ki te kau Kalisitiane 'o te kuonga ko iá, kae lilo ai pē ki te kakai kehé kotoa pē. Ko te 'ū fakatātā mo te 'ū faka'ilongá 'oku notou mahu'inga 'i te Tohi Fakahaá, pea 'oku notou toutou 'asi mai. Hangē ko te takainga tohi mo te sila 'e fitú; ko te talupite 'e fitú; ko te ipu 'e fitu 'o te houhau 'a te 'Atuá. Neongo 'oku faka'uhinga'i kehekehe tono fakalikiliki 'o te tohi nei, kā 'oku mahino 'aupito pē te tafito'i kaveinga ia 'o te tohí: 'a ia, 'e toki hanga 'e te 'Atuá 'iā Sīsū Kalaisi ko te 'Alikí 'o ikuna'i Tono 'ū fili kotoa pē, 'o kau ai mo Sētane, pea 'e Ina fakapale'i tono kakai tui falalá 'aki te 'ū tāpuaki 'o he hēvani fo'ou mo he māmani fo'ou 'o kā kakato leva te ikuna ko iá.
Ko te kakano 'o te tohí
Ko te talateú (1:1-8)
Ko te 'uluaki vīsone mo te 'ū tohi ki te 'ū siasi 'e fitú (1:9—3:22)
Ko te takainga tohi mo tono 'ū sila 'e fitú (4:1—8:1)
Ko te 'ū talupite 'e fitú (8:2—11:19)
Ko te talākoni mo te ongo manu fekai 'e uá (12:1—13:18)
Ko te 'ū vīsone kehekehé (14:1—15:8)
Ko te 'ū ipu 'e fitu 'o te houhau 'a te 'Atuá (16:1-21)
Ko tono faka'auha 'o Pāpiloné, pea mo tono ikuna'i 'o te manu fekaí, mo te palōfita lohí, pea mo te tēvoló (17:1—20:10)
Ko te fakamaau faka'osí (20:11-15)
Ko te hēvani fo'ou, mo te māmani fo'ou, mo te Selusalema fo'oú (21:1—22:5)
Ko te tātukú (22:6-21)
1
Ko te talateú
1 Ko te me'a fakahā 'e Sīsū Kalaisi, 'a ia ne'e tuku kiā Ia 'e te 'Atuá, ke fakahaa'i ki Tana kau tamaio'alikí 'ia te 'ū me'a kua pau ke vave tana hoko maí; 'o fekau atu Tana 'āngeló, ke ina faka'ilo atu ki Tana tamaio'aliki ko Sioné.
2 Ne ina fakamatala'i 'ia te Folafola 'a te 'Atuá, mo te fakamo'oni ne'e fai 'e Sīsū Kalaisí, 'io, 'ia te 'ū me'a kotoa pē ne ina sio ki aí.
3 Manū'ia ā kā ko ia 'oku laú, mo nātou 'oku fanongo ki te 'ū lea 'o te palōfisai nei, mo tauhi 'ia te 'ū me'a kua tohi 'i aí; he kua ofi tono taimí.
Ko te fakafe'iloaki ki te 'ū siasi 'e fitú
4 Ko au 'eni Sione, ko taku tohi ki te siasi 'e fitu 'oku 'i 'Ēsiá.
'Ofa ke kotou ma'u kelesi mo te fiamālie meiā Ia 'oku 'i ai, pea ne'e 'i ai, pea mo Ia 'e ha'ú, pea mei te Laumālie 'e fitu 'oku 'i te 'ao 'o Tono taloní;
5 pea meiā Sīsū Kalaisi ko te Fakamo'oni Falala'anga, ko te 'uluaki ne'e fakatupu mei te kau pekiá, mo te Pule 'o te 'ū tu'i 'o māmaní.
Ko Ia 'oku 'ofa kiā tātoú, pea Ina fufulu 'ia tātou mei te tou 'ū angahalá 'aki Tono ta'ata'a 'O'oná,
6 pea ngaahi 'ia tātou ko te pule'anga, ko te kau taula'aliki ki te 'Atuá ko Tana Tamai — ke 'o Tana 'Afió 'ia te kolōliá mo te mālohí, 'o lauikuonga pea ta'engata, 'Ēmeni.
7 Vakai, 'oku hā'ele mai Ia mo te 'ū 'aó; pea 'e mamata kiā Ia 'e te mata kotoa pē, 'io, mo nātou ne'e notou hoka'i 'Oná; pea 'e tangi mamahi 'ia te 'ū matakali kotoa pē 'o māmani kote'uhí ko ia. 'Io, 'Ēmeni.
8 'Oku folafola mai te 'Aliki ko te 'Atuá, “Ko Au ko te 'Ālifa mo te 'Ōmeka, ko Ia 'oku 'i ai, pea ne'e 'i ai, pea mo Ia 'e ha'ú, ko te Aoniu.”
Ko te hā mai 'ia Kalaisi kiā Sioné
9 Ko au Sione, ko te kotou tokoua, mo te 'inasi fakataha mo kōtou 'i te mamahi mo te pule'anga mo te kātaki 'oku 'iā Sīsuú — ne au nofo 'i te motu 'oku ui ko Pātimosi, kote'uhí ko te Folafola 'a te 'Atuá, mo te fakamo'oni ne'e fai 'e Sīsuú.
10 'Iloangé ne au Laumālie'ina 'i te 'aho 'o te 'Alikí, pea ne'e ongo mei toku tu'á he fu'u le'o, 'o hangē ko he talupité,
11 'oku pehē mai, “Ko te me'a 'oku ke sio ki aí ke ke tohi 'i te tohi, pea 'ave ki te siasi 'e fitú: ki 'Efesō, mo Sīmana, mo Peakamosi, mo Taiataila, mo Sātisi, mo Filatelifia, pea mo Leotisia.”
12 Pea ne au tafoki ke vakai pe ko te ā te le'o 'oku talanoa mo aú. Pea 'i taku tafokí, ne au vakai he tu'unga maama koula 'e fitu,
13 pea ne'e 'i te lotolotonga 'o te 'ū tu'unga maamá he Toko Taha ne'e hangē ko te Fanautama te Tangatá, kua Ina 'ai he kofu tōtōlofa, pea no'o koula 'i Tono fatafatá.
14 Ko Tono fofongá mo Tono lau'i'ulú ne'e hina ekiaki, hangē ko te fulufulu'i sipi hinahina, 'io, hangē ko te sinoú; pea ko Tono ongo fe'i fofongá ne'e hangē ko he ulo'i afí;
15 pea ko Tono ongo va'é ne'e hangē ko te palasa ngingila, hangē kua ta'o 'i te ngoto'umú; pea ko Tono le'ó ne'e hangē ko te le'o 'o te 'ū vai lahi.
16 Pea ne'e 'i Tono nima to'omata'ú he fetu'u 'e fitu; pea ne'e 'alu atu mei Tono ngutú he heletā fakatoumata ne'e māsila; pea ko Tono fōtungá ne'e hangē ko te la'aá tana ulo mālohí.
17 Pea 'i taku mamata kiā Iá, ne au hinga atu ki Tono va'é 'o hangē ko he maté. Pea ne Ina ala mai kiā au 'aki Tono nima to'omata'ú, 'o folafola mai, “'Aua ke manahē; ko Au ko te 'uluaki mo te ki muli;
18 pea ko Au ia 'oku ma'ulí, pea ne Au mate, pea vakai, 'Okou ma'uli 'o lauikuonga pea ta'engata; pea 'oku 'iā Au 'ia te 'ū kī 'o Mate mo Hētesí.
19 Tohi pē te 'ū me'a kua ke mamata ki aí, mo te 'ū me'a 'oku 'i aí, pea mo te 'ū me'a 'oku ene ke hoko 'āmulí.
20 Ko 'eni 'ia te misiteli 'o te fetu'u 'e fitu ne ke sio ki ai 'i Toku nima to'omata'ú, pea mo te tu'unga maama koula 'e fitú: ko te fetu'u 'e fitú ko te kau 'āngelo ia 'o te siasi 'e fitú, pea ko te tu'unga maama 'e fitú, ko te 'ū siasi ia 'e fitú.