3
Il piti pe Sardis
1 “Antei youti nepei ne riri liti luntoluwepe nimoure mete pite Ma Ili pele wuso pratei uf Sardis.”
“Il pepei paule metine piti luntoluwepe ririm piti pesio towa lite Ma Ili, pe pire eti plen poungo te twinges, le le lesiepe tauri pire eti plen poungo te twinges.”
“Ki kretape wai peiye piti ingiepe il peiki fei olomen le ki kretaiye wai leiye piti empetei kosai yotei irpolo riri leiki wala lireye ratei le ye wala namin ratei, wolo olo, riri leiki olo naro taniye ye, le ye wata pirpolo a lepe, metine topo namin yawi ile.
2 Ki kuluwo wai leiye liti ingiepe il pite Ma Ili pepe, ye olo ingiepe oporo kolo le Ma Ili leiki wala lulpoye kolo. So ye etei kolo, eilo le ye wai yotei singe piti ma nou ingiepe il pite Ma Ili oporo le ye iripe nemple kolo.
3 Ye onposiepe il wuso ingitepe re kapi esiepe fei pepe wem ye ulpo piti ingowo tisi lite Krais. Ye ingiepe il fei pepe le ye ma nou weitei yofu. Wuso ye inlele yotei le ye ingiepe il fei pepe kolo olo, ki ma frou kau faleye watafei metine piti lire ausi lepe, le ye ma retai wem piti ki kau kolo olo.
4 Wolo mete yaipiyeye peiye piti ratei uf Sardis lepe, pe olo pingiepe il olpe kolo le pe wata pirpolo olongou pelpe wala teingipe pepe, fange kolo. Ise fei pepe ma yafo olongou fiyu le ise pepe yireiki mepi milele me wusoli ise telpalo yingiepe il peiki.
5 Mete piti wai potei topo le pe pile singe, pe ma pafo olongou fiyu watafei polpepei, le ki ma kaptutu nange pelpe tani yousi kolo, yousi wuso Ma Ili laptei nange pelpe puwo piti le ma watepe nempi liti nampir pratei, ki ma kaptutu nange pelpe tani yousi fei pepe kolo olo. Wem pe fale pile lutepe pite Ma Ili liripe ririm pele pite yuwei, ki ma kirpei nomnaipe kirpolo pe mete peiki.”
6 “Wuso ye mingim poli, ye ma ingitepe il wuso Riri Teingi lirpei pe nimoure mete pite Ma Ili pele pepe.”
Il piti pe Filadelfia
7 “Antei youti nepei ne riri liti luntoluwepe nimoure mete pite Ma Ili pele wuso pratei uf Filadelfia lepe.”
“Il pepei paule metine wuso onom pele teingine felkeletei le le metine piti lirpei punkom. Le kapi singe piti luntoluwepe mete pite Ma Ili pele watafei metine ili Devit, le luntoluwepe mete pite uf ili Jerusalem. Wem le leilape enke pite mete piti ma kapi il pite Ma Ili pe ma kapi le minele re miso nampli il fei pepe taniepe kolo olo. Le wem le lesiepe enke pite mete lapiri, minele re miso weisipe enke piti kapi il pite Ma Ili kolo olo.
8 Ki kretape wai peiye piti ingiepe il peiki fei olomen, le ki kretai ye wala singe kolo. Ye ingiepe il peiki le ye alingi nange leiki kolo. Ki keilape enke pite mete wuso pratei neineye pepe piti pe ma kapi il peiki le minele re miso weisipe enke pelpe piti pinaulipe il peiki kolo olo.
9 Ye ingitei, mete piti pulsi Towa le pe pempetei pirpei pirpolo pe pite Juda wolo olo, pe pempetei. Mete fei pepe, ki ma kesipe kilape kau kapteiye piti ma peila nange leiye le pe ma pretai piti ki onom puwoise.
10 Ye ingiepe il peiki le ye anri onom peiye wem moingi faleye, le fei pepei ki ma namti kaneiye wem moingi ili ma falepe mete yeflipiye piti tef. Ma Ili ma laltei moingi fei lepei falepe mete piti ma lulwepe, pe wala kani onom pantowo lo olo.
11 Wem kurauye ki ma nou kau. Il peiki wuso ulpope pepe, ye ma esiepe apiri soma ye ma kali menmen teingitei le minemple re miso kali taniye kolo olo.
12 Metine piti wai lotei topo le le lile singe, ki ma kaltei lile watafei yopongo piti lile leila winem lite Ma Ili leiki, le le ma lusa tulum lele fei lepe kolo olo. Ki ma kaltei nange lite Ma Ili leiki laitei metine fei lepe le nange lite uf ili lite Ma Ili leiki, le uf ili Jerusalem nele yefli piti laule yuwei, Ma Ili ma laltei lau. Le nange nele yefli leiki re ki ma kaltei laitei metine fei lepe.”
13 “Wuso ye mingim poli, ye ma ingitepe il wuso Riri Teingi lirpei pe nimoure mete pite Ma Ili pele pepe.”
Il piti pe Laodisia
14 “Antei youti nepei ne riri liti luntoluwepe nimoure mete pite Ma Ili pele wuso pratei uf Laodisia.”
“Il pepei paule metine piti lirpei il punkom. Le metine piti lirkilau lingiepe il pite Ma Ili le le kosape mete lire il punkom. Le lotei so Ma Ili liri piti laptei men nange pite yuwei re tef lepei lepe.
15 Ki kretape wai peiye piti ingiepe il peiki fei olomen, le ki kretai kolpepei, weli leiye olo lirkilau loli kolo olo, le le olo la kolo olo. Ki onom twinges, ki onposi piti weli leiye ma loli lirkilau, wuso olo ki onposi piti le ma la oloye.
16 Wolo weli leiye olo lire arongou, le loli ili kolo olo le le olo la kolo, le fei pepei ki ma kesi kiri tani.
17 Ye irpei yotei irpolo, ‘Ki oweli yini re men nange peiki olo wurutei, le ki ma nou kintape menemple olo ki fei.’ Wolo ye retai men re kolo, ki kuliye oweli yini nangei neyei le mete rafuye pirpei. Ye oweli yini olo, ye olongou piti afo opopo yotei kolo, olo pau yawi, le lutepe peiye olo olpe.
18 Ki kirpeiye, ye aisipe mangou peiki, pe olo teingipitei, le pe ma kaneye piti fale ire metine ili, oweli yini wuru. Le ye aisipe olongou fiyu piti afo opopo yotei le ye ma topo tapune kolo. Le ye aisipe menmen piti eptalo lutepe peiye, le ye ma untoli oporo.
19 Metine piti ki onom puwol, ki ma kirpeilawo re ketesi soma le ma turu lotei, le le ma lusape il olpe pele le le ma nou weitei yofu punkom.
20 Ye ingitei, ki kile kamwewe wingi, le wuso minele lingitepe il manu peiki le le kapunu wingi, ki ma kinki ke winem lele le ki ma kiri wepi wifei waplei, le le ma lireiki wepi wifei waplei.
21 Metine piti wai lotei topo le le lile singe, ki ma kirpowo piti kapi singe peiki le le ma kaneiki piti wuntoluwepe mete, min watafei ki, ki wai kutei topo le kile singe le fei ki kapi singe pite eiya leiki le ki kiri wepi wuntoluwepe mete.”
22 “Wuso ye mingim poli, ye ma ingitepe il wuso Riri Teingi lirpei pe nimoure mete pite Ma Ili pele pepe.”